„Nawi přichoda“ na Budyskej studijnej akademiji mnohe powołanske perspektiwy wotkrył

Wo mnohotnosći wukubłanja a studija w regionje informowaše njedawne zarjadowanje „Nawi přichoda“ na Budyskej studijnej akademiji. Wjace hač tysac zajimcow je poskitk wužiwało.

Štó ma zajim, je napjate prašenje

Stawk tež na serbskich šulach

srjeda, 08. februara 2017 spisane wot:

Wukony wučerjow maja so skónčnje připóznać

Drježdźany/Budyšin (SN/MiR). Wučerjo sakskich šulow w zjawnym nošerstwje su dźensa stawkowali. K protestam namołwjeli běchu dźěłarnistwje kubłanje a wědomosć (GEW) a ver.di kaž tež Němski zwjazk zastojnikow (dbb). Protestne akcije mějachu wšelakory raz. GEW a ver.di sćeleštej swojich ludźi direktnje před financne ministerstwo w Drježdźanach, čłonojo dbb demonstrowachu po stolicy.

Dźensniši stawk zapřiješe kubłanišća po cyłej Sakskej a tak tež serbske. Póndźelu běchu wotpowědne podłožki do šulow wšitkich družin dóšli. Na to dóstachu starši informacije z listom, kotrež su šulske nawodnistwa a wučerjo šulerjam sobu dali. Wučerjo móžachu so tež hišće na dnju stawka za wobdźělenje rozsudźić. Přiwšěm měješe wučba zaručena być.

Za žiwjensku orientaciju

srjeda, 08. februara 2017 spisane wot:

Projekt zwjazkoweje centrale za strowotne rozswětlenje „moje sylnosće, mój přichod“ w hali na Budyskim Třělnišću šulerjam zmóžnja, swoje kmanosće spóznać.

Budyšin (SN/MiR). 510 šulerjow z dwanaće wyšich a dweju spěchowanskeju šulow Budyskeho wokrjesa so na mjenowanym projekće wobdźěla. Mjez nimi su kubłanišća z Rakec a Kamjenca. 7. lětnik Serbskeje wyšeje šule „Dr. Marja Grólmusec“ Radwor zaběraše so dźensa dopoł­dnja ze swójskej perspektiwu. W dožiwjenskim parcoursu wuspytachu so šulerjo mjez druhim na jewišću, starachu so wo domjacnosć, dźěłachu při kompjuteru a rozrisachu přirodowědne nadawki. Wšo to ma słužić žiwjenskej orienta­ciji młodostnych.

Powołanja teoretisce a praktisce zeznali

wutora, 07. februara 2017 spisane wot:

Worklecy (BW/SN). Po wjacorych serbskich firmach a kubłanišćach je so dźensa dopołdnja 8. lětnik Worklečanskeje serbskeje wyšeje šule „Michał Hórnik“ rozhladował. Tak wopytachu šulerjo stajnje po dwěmaj abo třoch w Miłoćicach Wjenkec metalotwarsku firmu BMP, w Pančicach-Kukowje skótnolěkarsku praksu, Zelnakec pjekarnju a dźěłarnju za zbrašenych swj. Michała. We Worklecach šijachu pola šwalče Petry Kupcy­neje, pomhachu kubłarkam w tamnišej pěstowarni a přewodźachu sobudźěła­ćerjow maltezow při wšědnym dźěle. Cyłe­ dopołdnjo smědźachu holcy a hólcy do jednotliwych powołanjow počuchać a swoje prašenja wotbyć.

Dobre zhromadne dźěło

wutora, 07. februara 2017 spisane wot:
Ći, kotřiž dźensa šulu wuchodźa a powołanske wukubłanje nastupja, su w komfortabelnej situaciji, zo zawody wučomnikow pytaja. Před lětami bě to hišće cyle hinak, jako młodostni druhdy scyła žane wukubłanske městno namakali njejsu. Přiwšěm dyrbja so tež dźensa prašeć, kotre powołanje je za nich prawe. Při tym pomha jim projekt Rěčneho centruma WITAJ, kotryž runja zašłymaj lětomaj tuchwilu­ znowa na Worklečanskej wyšej šuli „Michał Hórnik“ přewjeduja. Powołanska orientacija z teoretiskim dźělom wčera a praktiskim dźensa šulerjam wuwědomja, kotre wuměnjenja woni za te abo tamne powołanje trjebaja a što praktiske dźěło w metal předźěłacym zawodźe, w skótnolěkarskej praksy, w šwalčerni a druhdźe wopřijima. Za dobre zhromadne dźěło mjez RCW a serbskimi pře­dewzaćelemi słuša wšitkim wobdźělenym wulki dźak. Bianka Wjeńcyna

Na wulkim jewišću Němsko-Serbskeho ludoweho dźiwadła měješe dźensa dopołdnja hudźbna bajka Sergeja Prokofjewa „Pětr a wjelk“ premjeru. Zhromadny projekt Budyskeje hudźbneje šule ze swojim orchestrom a rejwanskej company MSV 04 Budyšin w kooperaciji NSLDź měri so na šulerjow Budyskeho wokrjesa. Foto: SN/Maćij Bulank

Dobyćerjo jutře koncertuja

pjatk, 03. februara 2017 spisane wot:

Wojerecy (MFü/SN). Najlěpši wobdźěl­nicy 26. regionalneho wubědźowanja „Młodźina hudźi“ wuhotuja jutře, so­botu, w 15 hodź. w awli Wojerowskeho ­Lessingoweho gymnazija tradicionalny koncert dobyćerjow. Dohromady 107 ­dorostowych hudźbnikow Budyskeho a Zhorjelskeho wokrjesa bě so na wubědźowanju minjeny kónc tydźenja we ­Wojerecach wobdźěliło. Mjez nimi bě lědma Serbow. Jeničce Józef Hantuš a Dawid Wowčer z Radworja kaž tež Tarah Meltzer z Chasowa swoje kmanosće ­pokazachu. 85 solistow a ansamblowych hudźbnikow je znajmjeńša 21 wot 25 móžnych dypkow docpěło a sej tak jedne z prěnich mytow wubědźiło. Najlěpši z nich wuhotuja jutřiši koncert doby­ćerjow.

Wučba serbšćiny raz hinak

štwórtk, 02. februara 2017 spisane wot:
Šulsku hodźinu bóle praktiskeho raza dožiwichu wčera wobdźělnicy serbskeje wučby na Kulowskej wyšej šuli „Korla Awgust Kocor“. Ze swojej wučerku Ines Lešowej dojědźechu sej do Łaza, hdźež podachu so na slědy Handrija Zejlerja. Čłonka spěchowanskeho towarstwa za zetkanišćo Dom Zejlerja a Smolerja Gabriele Knothe (nalěwo) čitaše šulerjam ze Zejlerjowych fabulow. We Łazowskej cyrkwi hosćo zhonichu, zo su w njej 1991 Załožbu za serbski lud załožili. Dale pobychu w Domje Zejlerja a Smo­lerja kaž tež při pomniku Handrija Zejlerja. Foto: Heinz Hirschfeld

Wšelake warianty ptačeho kwasa

štwórtk, 02. februara 2017 spisane wot:

Budyšin (SN/MiR). 22 předstajenjow dźěćaceho­ ptača kwasa ma Serbski lu­dowy ansambl lětsa předwidźanych. Pjeć z nich a z tym po ličbje wjace hač dotalne lěta je ryzy serbskich. Serbskorěčne předstajenja móža sej dźěći na žurli ansambla trójce a dwójce na jewišću Chróšćanskeje „Jednoty“ wobhladać. Dalše předstajenja su po wjetšinje měšanorěčne, němsce a serbsce, kaž we Wojerecach a Choćebuzu. Ansamblowcy maja za turneje tež němsku wersiju ze serbskimi elementami přihotowanu. Tónle tydźeń su ju jónu tež w Budyšinje předstajili. W njej zanjesechu ansamblowcy někotre štučki serbsce, kaž „Štó ma njewjesta być“ a „Sławu“. Hewak bě rěčny poskitk němski. „Ze wšelakimi wariantami wotpowědujemy přećam kubłanišćow“, praji jednaćelka Serbskeho ludoweho ansambla Diana Wagnerowa. Dźěći ze serbskich pěstowarnjow a šulow měrja so na wotpowědne serbske předstajenja, šule z nakromnych kónčin wužiwaja wosebje měšanorěčne.

Dwurěčne šule pytaja wučerjow

srjeda, 01. februara 2017 spisane wot:

„Serbšćina je moja maćeršćina a němčina je mi tohorunja wažna.“ Takle wopisuje Lukas Čórlich swój poměr k rěčomaj, kotrejž wšědnje nałožuje. Wón chodźi do 12. lětnika Wojerowskeho Lessingoweho gymnazija. Do toho je wón Ralbičansku Serbsku wyšu šulu z realnym wotzamknjenjom zakónčił. Lětsa chce nětko maturować. Rady wobdźěla so na cyło­dnjowskim poskitku serbšćiny, kotruž zajimcam na Lessingowym gymnaziju wot 7. do 12. lětnika podawaja. Jako dwanatkar je wón tam jenički wobdźělnik. Tuž jeho wučerka Lubina Kühnowa wosebje spěchuje. Wšako chce so wón stać ze serbskorěčnym hudźbnym pedagogom.

„Serbskorěčnosć za mnje woznamjenja, zo hudźbu přichodnje serbsce wuwučuju“, Lukas Čórlich rozjasnja. Jemu je wažne swoju maćeršćinu žiwje dale dawać, přetož „wona je identita“. 18lětny hudźi na wjacorych instrumentach a chce­ pozdźišo šulerjow wo rjanosći kompozicijow wot Mahlera hač k Mo­zartej přeswědčić a jich za serbske spěwne­ herbstwo zahorić. Přidatnu prócu,­ kotraž je trěbna, zo by w studiju nadźěłanu wědu tež serbsce posrěd­kować móhł, chce wón rady na so wzać.

nawěšk

  • Spěchowanski kruh za serbsku ludowu kulturu je 16. a 17. měrca mjeztym 28. serbske jutrowne wiki w Budyskim Serbskim domje wuhotował. Wiki běchu jara wuspěšne, tež nastupajo ličbu wopytowarstwa. Tule smy wam někotre fotowe impresije z wikow zestajeli

nowostki LND