Krótkopowěsće (04.12.18)
Adwent z překwapjenkami
Budyšin. Hladajo na dźesaćlětne wobstaće Budyskeho wokrjesa su sej zamołwići wosebitu adwentnu překwapjenku přemyslili a krótke epizody nahrawali. Tak nastachu štyri krótkowideja, z kotrychž su prěni nětko wozjewili. Tón wěnuje so korjenjam regiona. Widźeć stej serbskej nałožkaj jutrowne jěchanja a čerpanje jutrowneje wody.
Andrej Bitow njeboh
Moskwa. Spisowaćel Andrej Georgjewič Bitow je wčera 81lětny zemrěł. Sobuzałožerjej literarno-disidentskeho sowjetskeho almanacha Metropol bě hač do doby pjerjestrojki zakazane zjawnje publikować. 1991 sta so wón z prezidentom nětko ruskeho PEN-centruma. Najznaćiša kniha mjez druhim z mytomaj Platonowa a Móst Berlin wuznamjenjeneho awtora je roman „Puškinowy dom“.
Kelko wobydlerjow budźe 2100?
Krótkopowěsće (03.12.18)
Mjezybilancu sćahnyli
Pančicy-Kukow. Po dobrym měsacu je skupina młodostnych z mjenom Kukowske prašaki cyłkownje 1 169 podpismow nazběrała. To zdźěli čłon cyłka Fabian Kaulfürst. 1 113 ludźi je so přećiwo Serbskemu sejmej w tuchwilnej formje wuprajiło, štož je wjace hač 95 procentow wšěch wotedatych hłosow. Podpismowa akcija traje hač do 31. decembra.
Imageowa kampanja wokrjesa
Zhorjelc. Nowa internetna strona Zhorjelskeho wokrjesa wěnuje so fachowcam, kotřiž chcedźa so tam zaměstnić. Poskitk z mjenom www.unbezahlbar.land pokazuje na žiwjenjahódny wokrjes z dobrymi wuměnjenjemi za swójby, z dźěłom, wukubłanjom, kreatiwitu a kulturu. Za kampanju zamołwita je wuwićowa towaršnosć Delnjošleska Hornja Łužica.
Panda najskerje njepřińdźe
Krótkopowěsće (30.11.18)
Nowy katalog z 80 objektami
Kamjenc. Nowy katalog mišterskich twórbow su Kamjenske zběrki wčera prěni raz zjawnosći prezentowali. Wobšěrna edicija skići jónkrótnu panoramu bohateho wobstatka wuměłskich a kulturnych kubłow Lessingoweho muzeja, sakralneho muzeja Hanineje cyrkwje, měšćanskich stawiznow w słodarni kaž tež měšćanskeho archiwa. Katalog z nich 80 objektow předstaja.
Kompetencny centrum do Łužicy
Choćebuz. Zwjazkowe wobswětowe ministerstwo je wčera připowědźiło, we Łužicy klimoškitny kompetencny centrum za energijointensiwne industrije zarjadować. Móžne stejnišćo za to móhł Choćebuz być. Centrum měł z předewzaćemi, slědźenskimi institucijemi a mjezynarodnymi institutami hromadźe dźěłać. W klětušim zwjazkowym etaće stej za to dwaj milionaj eurow předwidźanej.
Dotal 174 próstwow dóšło
Krótkopowěsće (29.11.18)
Stabilne dźěłowe wiki
Budyšin. We wuchodnej Sakskej bě w nowembrje 17 842 bjedźěłnych, dwaceći mjenje hač w oktobrje a 1 578 mjenje hač loni w samsnym měsacu. Předstajejo aktualnu dźěłowičnu rozprawu skedźbni Ilona Winge-Paul, operatiwna jednaćelka Budyskeje dźěłoweje agentury, dźěłodawarjow dźensa na sezonowy pjenjez krótkodźěła dla, zo bychu w zymje pušćenjam zadźěwali.
Olympiada rušćiny zahajena
Aumund-Hammersbeck. Łužica je na 14. zwjazkowej olympiadźe ruskeje rěče sylnje zastupjena. Na wčera blisko Bremena zahajenym wurisanju zastupuje Saksku mjez druhim 17lětna Lejnjanka Tereza Kubicec, šulerka Kamjenskeho Lessingoweho gymnazija. Wšitcy třo wobdźělnicy Braniborskeje, Gustav Konzack, Isabel Möbus a Adam Ratica, su šulerjo Grabinskeho gymnazija.
Módroćišć kulturne herbstwo
Krótkopowěsće (28.11.18)
Recepty nětko delnjoserbske
Budyšin. Kniha Ludoweho nakładnistwa Domowina „Warimy z Tomašom“ je nětko tež w delnjoserbšćinje wušła. Přełožk je Margot Hašcyna wukonjała. Kuchar Tomaš Lukaš rozłožuje dohromady 55 receptow, kak sej jědźe krok po kroku přihotować. Serbsko-němski kuchinski słownik publikaciju wudospołnja. Na předań je kniha mjez druhim w Smolerjec kniharni a Choćebuskej Lodce.
Debata wo e-sporće
Wiesbaden. Hessenski nutřkowny minister Peter Beuth (CDU) žada sej wopřijeće „e-sport“ wotstronić. W dźeniku Darmstadtske Echo posłownje rěka, zo nima hraće na kompjuteru ničo ze sportom činić a zo ma so tele wopřijeće „wuraděrować“. Na platformje Twitter reagowaše Hans Jagnow ze zwjazka e-sporta Němskeje a wumjetuje Beuthej „njewuprajomnu retoriku“, kotraž poćah k sportej wobćežuje.
Čěska klětu hóstny kraj wikow
Krótkopowěsće (27.11.18)
Chce mandat zakitować
Wojerecy. Zapósłanc Frank Hirche chce swój direktny mandat při klětušich wólbach Sakskeho krajneho sejma znowa zakitować. Wobdźělnicy wólbnowokrjesneje zhromadźizny CDU su 57lětneho minjeny pjatk we Wojerecach za direktneho kandidata CDU w tamnišim wólbnym wokrjesu 55 wuzwolili. Hirche přisłuša krajnemu sejmej wot lěta 2009.
Bernardo Bertolucci njeboh
Rom. Wuznamny filmowc Bernardo Bertolucci je wčera 78lětny zemrěł. Mjez jeho často wuznamjenjenymi twórbami najznaćiše su „Posledni Tango w Parisu“, drama „1900“ a „Posledni kejžor“. Składnostnje spožčenja Čestneje palmy za žiwjenski skutk we wobłuku filmoweho festiwala w Cannesu lěta 2011 počesćichu jeho jako „najskerje najsławnišeho italskeho režisera přitomnosće“.
VW Passat přichodnje z Čěskeje
Krótkopowěsće (26.11.18)
Mišterske wopisma přepodate
Drježdźany. Drježdźanska rjemjeslniska komora je sobotu 320 absolwentam mišterske wopismo přepodała. Cyłkownje bě 26 powołanjow zastupjenych. Najwjetša skupina nowych mištrow je mechatronikar jězdźidłow ze 67 absolwentami. Slěduja tepjenjotwarcy (25), ortopediscy šewcy (23), pjekarjo (22) a elektrotechnikarjo (19).
FDP chce do knježerstwa
Biskopicy. Sakska FDP so na to hotuje, zo po klětušich wólbach zaso do krajneho sejma zaćehnje. Za to chce znajmjeńša wosom procentow hłosow wolerjow zdobyć. Nimo toho chce FDP w nowym sakskim knježerstwje sobu skutkować. To je krajne předsydstwo swobodnych demokratow kónc tydźenja na klawsurnym posedźenju w Biskopicach wobzamknyło.
Chcedźa wjes za syroty twarić
Krótkopowěsće (23.11.18)
Nowy rozmołwny rjad
Drježdźany. Sakski ministerski prezident Michael Kretschmer (CDU) zahaji dźensa wječor w Drježdźanskej cyrkwi Třoch kralow nowy rjad rozmołwow. Pod hesłom „Ze sobu rěčeć! – Wobydlerska dźěłarnička“ chce sej wón časćišo z ludźimi mysle wuměnjeć. Tajke rozmołwy su we wšěch sakskich wokrjesach, Lipsku, Drježdźanach a Kamjenicy, planowane.
Žane přidatne pjenjezy załožbje
Drježdźany. Namjet frakcije Lěwicy w Sakskim krajnym sejmje, Załožbje za serbski lud přidatnu inflacisku ratu 120 000 eurow płaćić, je zwrěšćił. Kulturny wuběrk krajneho sejma je wčera namjet we wobłuku wuradźowanja wo naćisku dwójneho etata 2019/2020 wotpokazał. Lěwica chcyše, zo Sakska tak dynamizaciju załožbowych pjenjez nastorči.
Z wobrotom zdwórliwosće
Krótkopowěsće (22.11.18)
Pjenjezy za zhromadny projekt
Berlin. Štyri awtochtone mjeńšiny w Němskej móža 2019 wjelelětne zhromadne předewzaće, pućowansku wustajeńcu, zeskutkownić. Wona ma wo stawiznach, kulturje, identiće a rěči Danow, Frizow, Serbow, Sintow a Romow kaž tež delnjoněmskeje rěčneje skupiny informować. Kaž mjeńšinowy sekretariat w Berlinje zdźěla, změja za to 125 000 eurow z klětušeho etata Zwjazka.
Polěpšenja hišće trěbne
Drježdźany. Na dwěmaj městnomaj skedźbnja mjezyrozprawa komisije za rozrost, strukturnu změnu a dźěło na serbski lud. „Mjezystaw wuraznje witamy, polěpšenja pak su hišće trěbne“, rjekny předsyda Domowiny Dawid Statnik z widom na kónčnu rozprawu. Wón bě so na wuměnje informacijow wo tym předwčerawšim w Drježdźanskej statnej kencliji na přeprošenje statneho ministra Olivera Schenka wobdźělił.
Dwanaće kandidatow
Krótkopowěsće (20.11.18)
Prócowanja wobkedźbować
Wojerecy. Na zetkanju ministerskeju prezidentow Sakskeje a Braniborskeje, Michaela Kretschmera (CDU) a Dietmara Woidkeho (SPD), ze zastupjerjemi Łužiskeho kruha wčera we Wojerecach wobdźěli so tež předsyda Domowiny Dawid Statnik. Wón apelowaše na komunalnych zastupjerjow, prócowanja Serbow wo zachowanje swojeje kultury a identity jako wažny aspekt strukturneho wuwića w regionje wobkedźbować.
Schadźowanka skoro wupředata
Budyšin. Zastupne lisćiki za lětušu 144. schadźowanku su nimale wupředate, wšitke blida su hižo rezerwowane. Załožba za serbski lud zdźěli, zo je jenož hišće něhdźe 20 kartkow na předań. Dale załožba na to skedźbnja, zo wobsteji po-dobnje kaž we wobłuku předstajenja Němsko-Serbskeho ludoweho dźiwadła móžnosć, wječer sej dočasnje skazać.
Wabja za powołanje šofera
