Město přewza kupnicu
Choćebuz. Město Choćebuz přewza ležownosć a twarjenje kupnicy Galeria Kaufhof, kotrejž koncern Galeria Karstadt Kaufhof swojich hospodarskich ćežow dla w juniju spušći. Wjetšina měšćanskich zapósłancow běše so srjedu wječor za to wuprajiła, zdźěli měšćanski rěčnik Jan Gloßmann. Cyłkownje 15 milionow eurow město za to inwestuje. Cil je, žiwe nutřkowne město zachować.
Woswjeća róčnicu
Zhorjelc. Z wobydlerskim swjedźenjom swjećitej susodnej měsće Zhorjelc a Zgorzelec jutře róčnicu 25. róčnicu wobstaća partnerstwa. Prěni raz zhromadnje wustupiłoj stej měsće 5. meje 1998 we wobłuku proklamacije Europske město. Kaž Zhorjelski měšćanski zarjad zdźěli, bě to zakład za zhromadne dźěło. Wjac hač 70 towarstwow, institucijow a wuměłskich skupinow na swjedźenju wustupi.
Minister najlěpšich počesćił
Z naslědnistwom so zaběrali
Radeberg. Mjeztym hižo 12. króć zarjadowaše hospodarske spěchowanje Drježdźanskeje industrijneje a wikowanskeje komory wčera dźeń předewzaćelkow, na kotrymž wobdźělichu so tež žony z Budyskeho wokrjesa. W Radebergu zaběrachu so mějićelki firmy mjez druhim z naslědnistwom. Dale wužiwachu składnosć so mjez sobu wuměnjeć.
Dźiwadłowe dny zahajili
Budyšin. 24. dny serbskeho dźěćaceho dźiwadła su so dźensa w Budyskim dźiwadle na hrodźe zahajili. Hač do jutřišeho dožiwja dźiwadłowe skupiny serbskich zakładnych šulow a hortow zajimawe dźěłarnički pod profesionelnym nawodom. Wuslědki tutych jutře předstaja. Wosebity wjeršk lětušich dnjow budźe drje předstajenje dźiwadłoweho krucha „Ptaškowa swjaźba“ horta Žylowskeje zakładneje šule.
Krabat klětu w Choćebuzu
Na festiwalu spěwała
Halle. Delnjoserbska spěwarka Lena Hauptmannojc je wčera wječor na 18. festiwalu Woman in Jazz w Halle nad Solawu wustupiła a tež wjacore delnjoserbske spěwy zanjesła. Studowana jazz- a pop-spěwarka je loni na samsnym festiwalu loni dobyła 2. myto publikuma mjez 22 wobdźělnikami z cyłeje Europy a z tym składnosć tam lětsa koncertować.
Seminar MENS klětu we Łužicy
Budyšin. Serbske młodźinske towarstwo Pawk wuhotuje klětuši jutrowny seminar MENS, Młodźiny europskich narodnych skupin. To su sobustawske organizacije na swojej wurjadnej hłownej zhromadźiznje kónc tydźenja jednohłósnje wobzamknyli. Tak witaja młodźi Serbja na 60 młodostnych z cyłeje Europy do sprjewineho města. Nimo dźěłarničkow k mjeńšinowym temam je tež mały wulět po Łužicy předwidźany.
Kniha pohonja kreatiwni być
Steinmeier „knježi“ we Łužicy
Zły Komorow. Sedmy raz poda so zwjazkowy prezident Frank-Walter Steinmeier ze swojim hamtskim sydłom na tři dny do republiki – dźensa do Złeho Komorowa. Chce tu wosebje zhonić, kak ludźo we Łužicy z kóncom wudobywanja brunicy a z tym zwisowacej změnu strukturow wobchadźeja. Tež wo zaměstnjenju ćěkancow chce porěčeć.
Mjezykulturelnej tydźenjej
Wojerecy. „Nowe rumy“ je hesło lětušeju mjezykulturelneju tydźenjow. Wot 16. septembra do 1. oktobra wotměja so w komunach Budyskeho wokrjesa mnohe zarjadowanja. Nowe rumy maja so při zetkanjach, mjezsobnym zeznaću a zhromadnych aktiwitach wotkryć. Wo spěchowanje móža so zajimcy nětko w interneće pod požadać.
Lěkarjo dźensa stawkowali
Insolwenca přizjewjena
Niska. Za Nišćansku wagonownju je słowakska mějićelka Tatrawagonka pola Drježdźanskeho hamtskeho sudnistwa 4. meje insolwencu přizjewiła. „To je hórke, móže pak tež šansa być“, rěka z IG metal wuchodneje Sakskeje. Po zawodnej zhromadźiznje namołwja dźěłarnistwo jutře na 26. pominansku stražu před zawodnymi wrotami. Zaměr wostanje, poslednjeho twarca nakładnych wagonow w Němskej do přichoda wjesć.
Kubłanska jězba do Smolinow
Budyšin. 27 čłonow-seniorow Serbskeho šulskeho towarstwa, jich partnerojo a přećeljo towarstwa su so wčera na kubłansku wuprawu do Smolinow podało. Z přewodom sobudźěłaćerki SŠT Moniki Deleńkoweje wotkryja sej města kaž Wernigerode, Goslar, Blankenburg a Halberstadt. Mjez wosebitosćemi, kotrež wopytaja, je zawěra Rappbodetal a njedaloki najdlěši powjazowy wisaty móst swěta.
Partnerstwo skrućili
Přirada załožby so schadźowała
Wojerecy. Zaručenje wučby serbšćiny na šulach běše dźensa tema na posedźenju parlamentariskeje přirady Załožby za serbski lud pod nawodom Marka Šimana ze sakskim kultusowym ministrom Christianom Piwarzom (wobaj CDU) a županku župy „Handrij Zejler“, Gabrielu Linakowej, w domje Domowiny. Linakowa sej žadaše direktne spěchowanje šulskich projektow ze stron ministerstwa.
Biografiju předstajił
Neubrandenburg/Berlin. Składnostnje 90. posmjertnych narodnin tež we Łužicy znateje spisowaćelki Brigitte Reimann wuńdźe lětsa w juliju pod titulom „Žedźu so za žiwjenjom – Brigitte Reimann“ prěnja biografija wo njej. Awtor Carsten Gansel je knihu we wobłuku „Knižneho nalěća 2023“ wčera wječor w Neubrandenburgu předstajił, piše powěsćernja dpa. Gansel je literarny wědomostnik a sobustaw němskeho PEN-centruma.
Wětřikowy sćežor poswjećili
Habeck přewozmje patronatstwo
Flensburg. Za koparske europske mišterstwo narodnych mjeńšin Europeadu 2024 w němsko-danskim pomjeznym kraju přewozmje němski wicekancler a zwjazkowy minister za hospodarstwo a škit klimy Robert Habeck patronatstwo. To je zarjadowaca organizacija FUEN wčera zdźěliła. Politikar Zelenych a rodźeny Lübeckčan bydli w Flensburgu, wón zastupuje tamniši wólbny wokrjes 1 tuchwilu w zwjazkowym sejmje.
Choćebuska šansoneta w Halle
Halle nad Solawu. Na 18. festiwalu Women in Jazz, kotryž bu wčera w Halle nad Solawu zahajeny, prezentuje so přichodnu wutoru mjez druhim delnjoserbska spěwarka Lena Hauptmann ze swojim duwom LeDazzo. Lena Neumann, z kotrejž Hauptmann zhromadnje w triju Die Lenas hudźi, ma lětsa šansu na wuznamjenjenje we wobłuku dorostoweho wubědźowanja „Next Generation“.
Planuja Rudne horiny škitać
Myto Ćišinskeho J. Łušćanskemu
Budyšin. Lawreat Myta Ćišinskeho 2023, najwjetšeho wuznamjenjenja Serbow, budźe publicist a kulturnik Jurij Łušćanski z Budyšina. Spěchowanske myto k Mytu Ćišinskeho spožča kulturnikej a hudźbnikej Gregorej Kliemej z Choćebuza. To je za počesćenje přisłušny kuratorij na swojim posedźenju wčera w Budyšinje wobzamknył, předsydka gremija Susann Šenkec informowaše. Wuznamjenjenska swjatočnosć budźe 14. oktobra w Smochćicach.
Šula z nowym mjenom
Kamjenc. Spěchowanska šula w Kamjencu ma wot wčerawšeho nowe mjeno. Tak rěka nětko Zapadnołužiska šula Kamjenc – Šula ze spěchowanskim ćežišćom wuknjenja. Na swjedźenskim zarjadowanju běchu wčera zastupjerjo Budyskeho wokrjesa, šule, starši chowancow a Kamjenski wyši měšćanosta Roland Dantz (njestronjan) přitomni.
Naslědnistwo zawěsćene
CDU dale najsylniša strona
Drježdźany. Wolacy w Sakskej CDU najbóle dowěrjeja. W měsačnym woprašowanju instituta Civey a „Sächsische.de“ z njedźelnym prašenjom („Koho byšće wolili, bychu-li njedźelu wólby krajneho sejma w Sakskej byli?“) je CDU znowa 34 procentow docpěła, kaž hižo 2. apryla. Za AfD hłosowaše 26 procentow (-1), Zelenych dźewjeć (+1), SPD wosom (-1) a Lěwicu 10 (+1). Štyri procenty za FDP njedosahaja za zaćah do krajneho sejma.
Swoje žadanje wobnowił
Budyšin. Zapósłanc sakskeho krajneho sejma Marko Šiman (CDU) je swoje žadanje za wutwarom zwjazkoweje awtodróhi A4 wobnowił. Pozadk toho su wólby noweho wyšeho měšćanosty Berlina Kaia Wegnera (CDU), kotryž nochce plany za wutwar zwjazkoweje awtodróhi A100 w němskej stolicy podpěrać. Po słowach Šimana měli srědki za wutwar A 4 mjez Drježdźanami a Zhorjelcom wužiwać.
Nowa atrakcija w parku
Ansambl sotrownje wopytali
Mały Wjelkow. Wiceprezidentaj zwjazka Europa Nostra prof. dr. Jacek Purchla z Krakowa a Petr Svoboda z Prahi staj štwórtk na přeprošenje dr. Uwe Kocha, němskeho prezidenta zwjazka, město Budyšin kaž tež sotrownju Ochranowskeje bratrowskeje wosady w Małym Wjelkowje wopytałoj. Před dwěmaj tydźenjomaj bu ansambl sotrownje do lisćiny 7 najwohroženišich kulturnych městnosćow Europy přiwzaty.
Młoda alternatiwa prawicarska
Drježdźany. Sakski wustawoškit zastopnjuje młodźinsku organizaciju AfD „Młodu alternatiwu“ nětko jako zawěsćenu prawicarsku organizaciju. Z tym wotpowěduje wustawoškit kraja rozsudej Zwjazkoweho wustawoškita wot srjedy. Z tutoho zastopnjowanja rezultuje wobkedźbowanje organizacije ze srědkami tajneje słužby kaž tež intensiwniše pruwowanje sobustawow.
Mejske demonstracije