Krótkopowěsće (24.08.21)
Mało dalšich natyknjenjow
Budyšin. Incidenca po Roberta Kochowym instituće wučinja dźensa w Zhorjelskim wokrjesu 2,8, w Budyskim je snadnje na 7,7 postupiła. Tu informowachu wčera wo sydom natyknjenjach z koronawirusom přez kónc tydźenja. Aktualnje je 54 wosobow schorjenych, z kotrychž štyri w chorowni lěkuja. W Zhorjelskim wokrjesu zwěsćichu sobotu a njedźelu dohromady štyri dalše infekcije.
Ze Sakskeje serbska delegatka
Drježdźany. Dr. Lubina Malinkowa z Rakec je jedna z dweju delegatkow ze Sakskeje, kotrejž wobdźělitej so na 11. plearnej zhromadźiznje Ekumeniskeje rady cyrkwjow (ÖRK) klětu wot 31. awgusta do 8. septembra w Karlsruhe. Kaž krajny cyrkwinski zarjad w Drježdźanach wčera zdźěli, je ÖRK serbsku stawiznarku jako zastupjerku etniskich mjeńšin pomjenowała. Korony dla njeje zarjadowanje lětsa móžne a bu přestorčene.
Móst budźe skromniši
Krótkopowěsće (23.08.21)
Tudyša incidenca dale niska
Budyšin. Z hódnotu 3,2 po Roberta Kochowym instituće je dźensa Zhorjelski jedyn z pjeć wokrjesow z najnišej incidencu w Němskej. Ta wokrjesa Budyšina je dźensa 7,3. Minjeny pjatk je tamniši krajnoradny zarjad wo dwěmaj natyknjenjomaj z koronawirusom a dalšim smjertnym padom rozprawjał, w Zhorjelskim wokrjesu mějachu jednu infekciju.
Eksperća Łužicu wopytaja
Choćebuz. Poradźowacy wuběrk za ramikowe zrěčenje wo skiće narodnych mjeńšin přebywa 26. awgusta we Łužicy. Kaž Domowina informuje, chcedźa so eksperća w Žylowskej pěstowarni „Mato Rizo“ w nošerstwje Serbskeho šulskeho towarstwa rozhladować. Tu je wuměna wo wužadanjach a perspektiwach bilingualneho kubłanja předwidźana. W Domizniskim muzeju Dešno zhonja hosćo wo projekće imersije dorosćenych „Zorja“.
Dotal 180 padow ASP zwěsćili
Krótkopowěsće (20.08.21)
Štwórta žołma započała
Berlin/Budyšin/Zhorjelc. Roberta Kochowy institut je w swojej tydźenskej rozprawje wo połoženju koronawirusa zwěsćił, zo je štwórta žołma započała. Za indic maja woni, zo infekcije hinak hač loni zašo a spěšnišo přiběraja. Wosebje młodźi dorosćeni su dźeń a bóle potrjecheni. Incidenca w běhu sydom dnjow registrowanych infekcijow z koronawirusom je po cyłej Němskej 48,8, w Budyskim wokrjesu 7,7 a w Zhorjelskim 4,4.
Serbja w Texasu zaso swjeća
Serbin. Pod serbskim hesłom „Zetkamy so na Serbskim Festiwalu“ přeprošuje towarstwo Texas Wendish Heritage Society lětsa 26. septembra znowa na „Wendish-Fest“. Loni su zarjadowanje koronawirusa dla wotprajili, lětsa wotměwa so 33. króć. Mjez druhim chcedźa wuknjacy šule tamnišeje wosady lutherskeje cyrkwje St. Paul ptači kwas předstajić.
Staroserbske hrodźišćo namakali?
Krótkopowěsće (19.08.21)
We Łužicy dale snadna incidenca
Budyšin/Zhorjelc. Dohromady dźewjeć nowoinfekcijow je Budyski strowotniski zarjad wčera zwěsćił. Roberta Kochowy institut (RKI) poda tu dźensa incidencu 6,7. W Zhorjelskim wokrjesu je połoženje dale stabilne, nichtó njeje so tam aktualnje z koronawirusom natyknył. Incidenca po RKI je 4,7.
Nowa serbska dušepastyrka
Zhorjelc/Dešno. Fararka Katharina Köhlerowa budźe nowa dušepastyrka za serbske naležnosće w Ewangelskej cyrkwi Berlin-Braniborska-šleska Hornja Łužica w Dešnje, zdźěli wčera tamniši zarjad. Njedźelu chce ju generalna superintendentka Theresa Rinecker w Dešnje do zastojnstwa zapokazać. Köhlerowa změje so mjez druhim wo serbskorěčne kemše a zarjadowanja starać.
Sakska znowa najlěpša
Krótkopowěsće (18.08.21)
Serbja na europskej płachće
Berlin. Swětowu premjeru je wčera film wo Delnich Serbach „Village X“ w Berlinje dožiwił. Wobhladało je sej jón nimale 400 ludźi – mjez nimi tež zastupnicy z Mosta a Dešna. Nawjerćał je film telewizijny sćelak ARTE mjez druhim na superkokoće 2019 w Mosće a na zapusće w Dešnje. Film je 1. dźěl rjadu wo žiwjenju na wsy we wšelakich regionach Europy. Dźensa w 23:05 hodź. jón ARTE wusyła. Pask je zdobom w mediatece přistupny.
Najniša incidenca Sakskeje
Budyšin/Zhorjelc. W Budyskim wokrjesu su wčera štyri nowoinfekcije z koronawirusom zwěsćili. Roberta Kochowy institut podawa incidencu 8,0. W Zhorjelskim wokrjesu stej so dwě dalšej wosobje natyknyłoj, incidenca po RKI je tu 5,5. Wobaj łužiskej wokrjesaj matej najnišu incidencu po cyłej Sakskej, najwyšu ma Lipšćanski z 29,8.
Spěchuja Błótowski ateljej
Krótkopowěsće (17.08.21)
Přidatne poskitki za šćěpjenje
Budyšin/Zhorjelc. Strowotniski zarjad Budyskeho wokrjesa je hač do wčerawšeho šěsć dalšich koronainfekcijow zwěsćił. Štyri wosoby w chorowni lěkuja. Roberta Kochowy institut poda za dźensa lochce zwyšenu incidencu 6,0. W Budyšinje a Wojerecach poskicá wokrjes jutře a štwórtk dalše šćěpjenske terminy. W Zhorjelskim wokrjesu je incidenca na 6,7 postupiła. Tam wčera žane nowe natyknjenje zwěsćili njejsu.
Serbsko-němske kemše swjećili
Zły Komorow. 46 wěriwych je njedźelu serbsko-němske ekumeniske kemše w Złokomorowskej Serbskej cyrkwi swjećiło. Wuhotowali su je tamniši farar Manfred Schwarz, farar na wuměnku Dieter Schütt ze Žylowa a referent Złokomorowskeje katolskeje wosady Thomas Lamm. Kemšam přizamkny so zhromadna bjesada z programom Złokomorowskeje Pśězy.
Zmodernizuja chorownju
Krótkopowěsće (16.08.21)
Wjace ludźi w karantenje
Budyšin/Zhorjelc. W Budyskim wokrjesu je aktualnje 35 wobydlerjow z koronawirusom natyknjenych, štyrjoch lěkuja stacionarnje. 63 wosobow je tuchwilu w karantenje. Incidenca po Roberta Kochowym instituće (RKI) je na 5,7 spadnyła. W Zhorjelskim wokrjesu zwěsćichu tři nowoinfekcije a pjeć dopokazow delta-warianty. W karantenje je hišće 22 wobydlerjow, incidenca tam wučinja 6,7.
Sakska krajne projekty zapodała
Drježdźany. Sakska namjetuje Zwjazkej w zwisku ze strukturnej změnu w brunicowymaj rewěromaj swobodneho stata cyłkownje dźewjeć krajnych projektow. Kaž powěsćernja dpa zdźěla, stej mjez nimi tež planowany „Serbski forum wědy“ na Budyskich Lawskich hrjebjach a campus Łužiskeho slědźenskeho centruma „CircEcon“.
Demokratiska kultura mytowana
Krótkopowěsće (13.08.21)
Žaruja wo Kurta Biedenkopfa
Drježdźany. Sakski ministerski prezident Michael Kretschmer (CDU) je Kurta Biedenkopfa jako wulku němsku wosobinu 20. lětstotka hódnoćił. „Jako ministerski prezident je wón wot lěta 1990 hač do 2002 zakłady wuspěšneho wuwića našeje domizny połožił“, rjekny Kretschmer w Drježdźanach. Biedenkopf bě wčera wječor w sakskej stolicy 91lětny po krótkej ćežkej chorosći zemrěł.
Incidenca snadnje stupa
Budyšin/Zhorjelc. Ličba na koronu schorjenych snadnje přiběra. Za Budyski wokrjes je RKI dźensa incidencu 5,7 podał, za Zhorjelski 6,3. We woběmaj wokrjesomaj zwěsćichu wčera štyri nowoinfekcije. Dohromady je we wokrjesomaj wot wčerawšeho 67 wosobow w karantenje. Wo dalšich smjertnych padach korony dla njeje we woběmaj ničo znate.
Hižo 220 lět hród wopytuja
Krótkopowěsće (12.08.21)
Dalše spontane šćěpjenja móžne
Budyšin/Zhorjelc. Wokrjes Budyšin poskića přidatnej terminaj so spontanje pře koronu šćěpić dać, a to jutře w Budyskim Centeru na Žitnych wikach wot 9.30 do 16 hodź. a sobotu w samsnym času we Wojerowskim Łužiskim centeru. RKI podawa za Budyski wokrjes incidencu 5,3; pjeć infekcijow z wirusom su tu wčera zwěsćili. Tež w Zhorjelskim wokrjesu je jich pjeć; incidenca tam je po RKI 4,7.
Pjekarjow hižo njewukubłuja
Budyšin. Za wukubłanje na pjekarja w lěće 2021/2022 je so jenož wosom zajimcow přizjewiło. Tak njemóža wujednany kompromis mjez sakskim kultusowym ministerstwom a wokrjesom Budyšin zwoprawdźić. Kaž tam rěkaše, je 16 wučomnikow trěbnych, zo bychu na dalše tři lěta w Budyskim powołanskošulskim centrumje pjekarjow wukubłać móhli.
Čołm lisćinje herbstwa přidać
Krótkopowěsće (11.08.21)
Dalše nowoinfekcije z koronu
Budyšin/Zhorjelc. Strowotniski zarjad Budyskeho wokrjesa je wčera tři dalše koronainfekcije zwěsćił. W chorowni lěkuja tuchwilu tři wosoby, jednu wjace hač dźeń do toho. Roberta Kochowy institut poda za dźensa incidencu 5,0. Tež w Zhorjelskim wokrjesu je incidenca na 4,0 postupiła. Třo dorosćeni a jedne dźěćo su so z wirusom natyknyli. Jednoho pacienta tam stacionarnje lěkuja.
Próstwy hišće wotedać
Podstupim. Za braniborski spěchowanski program „Kultura na wsy“ móža zajimcy hišće hač do 18. awgusta próstwu wotedać. Z dohromady jednym milionom eurow spěchuja tak mjenowane kulturne kótwicowe městna, kotrež na region wuprudźeja a tamnišich akterow zwjazuja. Wosebje čestnohamtsce skutkowacych chcedźa zapřijeć.
Publikacija wo strukturnej změnje
