Krótkopowěsće (10.01.22)
Dalši pacienća zemrěli
Budyšin. Incidenca je po Roberta Kochowym instituće dźensa w Budyskim wokrjesu 313,1 a w Zhorjelskim 271,8. Wokrjes Budyšin informowaše minjeny pjatk wo 161 natyknjenjach z koronawirusom a wo třoch smjertnych padach. Wokrjes Zhorjelc bě 96 infekcijow a 13 zemrětych w ziwsku z koronu zwěsćił.
Nowe rjadowanja na šulach
Drježdźany. Nowy korona-wukaz sakskeho knježerstwa předwidźi wobmjezowane regularne wotewrjenje dźěćacych dnjowych přebywanišćow a zakładnych šulow. Rjadownje a skupiny maja so kruće dźělić. W šulskich twarjenjach a stajnje potom, njehodźi-li so minimalny wotstawk połdra metra dodźeržeć, ma so nahubnik wužiwać. Za wuknjacych wot 5. lětnika wobsteji we wučbje za to winowatosć, w primarnym schodźenku nic. Wopytowarjo mjenowanych zarjadnišćow maja aktualny negatiwny test předpołožić.
Wulkopósłanc wotwołany
Krótkopowěsće (07.01.22)
Jasnje pod přerězkom Němskeje
Budyšin/Zhorjelc. Poměrnje krute postajenja hygieny w Sakskej so po wšěm zdaću pozitiwnje na pandemiske połoženje wuskutkuja. Hinak hač předewšěm na sewjeru Němskeje, hdźež bliža so incidency štyriměstnowym ličbam, stej hódnoće we wokrjesomaj Budyšin a Zhorjelc na 283,2 resp. 245,1 spadnyłoj. Dohromady zličichu w nimaj 221 nowych infekcijow z koronawirusom a jědnaće dalšich smjertnych padow.
Nowy kantor zrěčenje podpisał
Drježdźany. Nowy kantor Drježdźanskeho Křižneho chóra Martin Lehmann je wčera słužbne zrěčenje podpisał. W septembrje nastupi wón zastojnstwo, z čimž stanje so z 29. nawodnikom swětosławneho ćělesa. Wotnětka chce so 48lětny we wobłuku „přihotowanskeho dojednanja intensiwnje na swoje nadawki přihotować“.
Pomhaja bjezdomnym
Krótkopowěsće (06.01.22)
Wjace smjertnych padow
Budyšin. Ličba w zwisku z koronu zemrětych pacientow znowa přiběra. Budyski wokrjes informowaše wčera wo 17 padach, Zhorjelski wo 14 z časa wot 9. do 28. decembra. Zdobom mjenowachu 312 resp. 221 natyknjenjow z koronawirusom. Incidenca po Roberta Kochowym instituće je dźensa w Budyskim wokrjesu 310,7 a w Zhorjelskim 247,0.
Nowy serbski film
Choćebuz. Roman Pernak je nowy film z delnjoserbskim wobsahom předpołožił. Berlinjan předstaja w połhodźinskim pasku wuwiće towarstwa „Serbske koparje“, kaž předsyda towarstwa Horst Adam informuje. Filmowc tematizuje hłownje prócu wo zhromadnu serbsku koparsku wubranku a prócu, nałožować delnjoserbšćinu. Hdy a na kotre wašnje film předstaja, kotryž je Załožba za serbski lud spěchowała, dotal jasne njeje.
Nadźijeja so wotewrjenja
Krótkopowěsće (05.01.22)
Incidenca pomału přiběra
Budyšin. Po kóncu lěta z mjenje testami incidenca po Roberta Kochowym instituće nětko tež w Hornjej Łužicy zaso přiběra. Za Budyski wokrjes mjenuje RKI hódnotu 269,1, za Zhorjelski 222,7. Wo 269 natyknjenjach z koronawirusom a dalšich wosom smjertnych padach rozprawjachu wčera we wokrjesu Budyšin. Wokrjes Zhorjelc informowaše wo 225 infekcijach a 15 wosobach, kotrež běchu w decembrje w zwisku z koronu zemrěli.
Wosebite posedźenje sejma
Drježdźany. Sakski krajny sejm je so dźensa ze zhromadźenjemi za čas koronapandemije zaběrał. Wosebite posedźenje bu próstwy frakcije AfD dla zwołane a měri so na aktualne postajenje nuzoweho stawa w swobodnym staće. Demonstracije su wulkeho stracha natyknjenja dla na dźesać ludźi na krutym městnje wobmjezowane. Wuwzaća přizwolić je móžno. Kritikarjo korona-naprawow pak zawjazki prawidłownje ignoruja.
Słownik zaso na předań
Krótkopowěsće (04.01.22)
Dalši pacienća zemrěli
Budyšin. Incidenca po Roberta Kochowym instituće je dźensa w Budyskim wokrjesu 263,4 a w Zhorjelskim 210,7. Za dobu wot silwestra je wokrjes Budyšin wčera wo 169 natyknjenjach z koronawirusom a wosom smjertnych padach informował. Wokrjes Zhorjelc rozprawješe wot minjeneho pjatka wo 197 infekcijach. Ličba zemrětych rozrosće wo jědnaće, pady běchu do hód.
Spěšne jednanje trěbne
Drježdźany. Ze zwyšenja minimalneje mzdy spočatk januara wot 9,60 na 9,82 na hodźinu profituje w Sakskej něhdźe 86 200 přistajenych. Zwjazk němskich dźěłarnistwow wobwoda Sakskeje (DGB) pak ma zwyšenje za přeniske a žada sej spěšne jednanje, DGB nětko zdźěli. Nowa zwjazkowa koalicija je dźě lětsa zwyšenje na 12 eurow přilubiła, w žadanju rěka.
Hač nowy zakoń pomha?
Krótkopowěsće (03.01.22)
Mjenje testow ličby wobwliwuje
Budyšin. Za Budyski wokrjes je Roberta Kochowy institut dźensa incidencu 351,3, dale 60 natyknjenjow z koronawirusom w běhu 24 hodźin a tři smjertne pady podał. Za wokrjes Zhorjelc mjenowaše incidencu 259,0 a dwanaće infekcijow wot wčerawšeho. RKI na to skedźbnja, zo bě w dnjach mjez hodami a Nowym lětom mjenje testow a přizjewjenych natyknjenjow. Tež w Hornjej Łužicy pak pady z wariantu omikron přiběraja.
Andreas Ošika jednaćel SŠT
Budyšin. Serbske šulske towarstwo z nowym jednaćelom do lěta 2022 startuje. Kaž předsydka SŠT Katharina Jurkowa zdźěli, Andreas Ošika wot dźensnišeje póndźele w zastojnstwje skutkuje. 43lětny Worklečan je studowany hospodar a socialny pedagoga. SŠT je jako kubłanske towarstwo nošer sydom serbskich a Witaj-pěstowarnjow.
Bijadło naslěduje pišćele
Krótkopowěsće (30.12.21)
Łužica dale „hotspot“
Budyšin/Zhorjelc. Po Roberta Kochowym instituće stej z wokrjesomaj Choćebuz (786,3) a Sprjewja-Nysa (689,3) dwaj delnjołužiskej mjez třomi gmejnskimi zwjazkami z najwyšej incidencu w Němskej. Wokrjes Budyšin informuje wo 390 nowoinfekcijach z koronawirusom, dźewjeć pacientow je zemrěło. Incidenca tu je 315,4. W Zhorjelskim wokrjesu zwěsćichu 230 nowych natyknjenjow a tři smjertne pady. Incidenca tam je 227,5.
Srědki zaměrnišo nałožować
Frankfurt n. M. Dźěłarnistwo Kubłanje a wědomosć (GEW) kritizuje rozdźělenje pjenjez programa Zwjazka a zwjazkowych krajow za šulersku dopomoc korony dla. „Srědki kaž z krjepjawku nałožować, njeje zmysłapołne. Předewšěm we wjesnym rumje je potrjeba spěchowanja často wjetša hač we wulkoměstach. Nimo toho pobrachuje nam tam prosće personal“, kaž ze stron GEW rěka.
Powjaznicu podlěša
Krótkopowěsće (29.12.21)
Incidenca dale nad přerězkom
Budyšin/Zhorjelc. We wokrjesu Budyšin zwěsćichu wčera 186 nowych infekcijow z koronawirusom, dohromady 123 pacientow lěkuja stacionarnje (+7). 16 schorjenych je zemrěło. Incidenca po Roberta Kochowym instituće je tu aktualnje 346,6. We wokrjesu Zhorjelc zličichu 144 nowych natyknjenjow a dalšich 11 smjertnych padow. 135 wobydlerjow hladaja tuchwilu w chorownjach (-5). Incidenca tam wučinja 237,5.
Teleskop smali po swětnišću
Paris. Štyri dny po starće swětnišćoweho teleskopa „James Webb“ je nastroj něhdźe 40 procentow dospołneje distancy zmištrował. Kónc januara ma kónčnu poziciju 1,5 milionow kilometrow zdaleny wot zemje docpěć. Zhromadny wědomostny projekt agenturow ESA, NASA a CSA je dotal najwobšěrniši a najdróši swojeho razu w stawiznach.
Heidelberg „najmłódše město“
Krótkopowěsće (28.12.21)
Prěni omikron-pad dopokazali
Budyšin. Wirusowu wariantu omikron su 23. decembra prěni raz we wokrjesu Zhorjelc dopokazali. Wot minjeneho štwórtka hač do wčerawšeho bě 273 natyknjenjow z koronawirusom, krajnoradny zarjad wčera zdźěli. Incidenca po RKI je tam dźensa 246,6 a w Budyskim wokrjesu 392,3. Wčerawša hódnota 127,5 bě problemow při sposrědkowanju dla přeniska. Přez hody zwěsćichu tu 115 infekcijow a sydom smjertnych padow.
Wjace chorypisanjow korony dla
Berlin. W Sakskej, Saksko-Anhaltskej a Durinskej bě wjace ludźi korony dla chorych pisanych hač w zwjazkowym přerězku. Wo tym informowaše wčera chorobna kasa Barmer. We 48. tydźenju (28.11.– 4.12.) bě jich w Sakskej z 185 po 10 000 zawěsćenych. Jako zwjazkowy přerězk je Barmer 51 podała. Swobodny stat Sakska bě dołhi čas negatiwny načolnik nastupajo infekcije.
Psy přećiwo covidej
Krótkopowěsće (27.12.21)
Mjenje testow hód dla
Budyšin. Pohodowna incidenca w koronapandemiji Budyskeho wokrjesa je po Roberta Kochowym instituće dźensa 127,5. Za wokrjes Zhorjelc je RKI 372,8 podał. W kotrej měrje ličbje woprawdźite połoženje rysujetej, njehodźi so rjec. Wšako su so za čas hodownych swjatych dnjow mjenje testow přewjedowali. Hakle dźensa popołdnju wobaj wokrjesaj aktualne ličby natyknjenjow wozjewitej.
Za nowu zwukowu připrawu
Podstupim/Choćebuz. Braniborske kulturne ministerstwo přewostaja Choćebuskemu statnemu dźiwadłu lětsa a klětu 525 000 eurow ze zamóženja stron a masowych organizacijow NDR. Spěchowanje słuži kupje moderneje, wukoniteje zwukoweje připrawy za Wulki dom na Liebknechtowej. Přisłušna ministerka Manja Schüle (SPD) mjenuje dźiwadło „kulturnu swětłownju regiona“, kotraž „trjeba hdys a hdys booster“.
Hotowostna słužba wohrožena
