Krótkopowěsće (16.02.22)
Ralf Bursy njeboh
Berlin. W starobje 66 lět je póndźelu hudźbnik a producent Ralf „Bummi“ Bursy po ćežkej chorosći zemrěł. Berlinjan bě w 1980tych lětach z hitami kaž „Feuer im Eis“ wuspěšny. Wuměłc bě Serbam jara přichileny a je njeličomne pěsnje za Serbski rozhłós produkował a spěwał. Z Měrćinom Weclichom je wón wusko hromadźe dźěłał. Hudźił je „Bummi“ Bursy tež na wjesnym swjedźenju w Sernjanach a Brětni.
Wuwiće rozdźělne
Budyšin/Zhorjelc. Incidencna hódnota koronawirusa so po Roberta Kochowym instituće we wokrjesomaj Budyšin a Zhorjelc rozdźělnje wuwiwa. Mjeztym zo je w Budyskim na 1 039,6 spadnyła, je wona w Zhorjelskim na 983,8 lochce postupiła. Budyski wokrjes wozjewi wčera 657 nowych infekcijow a dwaj smjertnej padaj, Zhorjelski 585 natyknjenjow, pjeć z nich z omikronwariantu.
Z wobrazom počesća Sokołow
Krótkopowěsće (15.02.22)
Incidenca lochce spaduje
Budyšin/Zhorjelc. Wot pjatka hač do wčerawšeje póndźele su we wokrjesomaj Budyšin (960) a Zhorjelc (813) cyłkownje 1 773 dalšich natyknjenjow z koronu zličili, w Zhorjelskim 14 omikronwarianty. Přiwšěm je incidenca we woběmaj wokrjesomaj lochce spadnyła. Tak podawa Roberta Kochowy institut dźensa za Budyšin hódnotu 1235,2 (-154,4) a za Zhorjelc 951,5 (-216,3).
Digitalna biblioteka
Budyšin. Portal delnjoserbskeje rěče Serbskeho instituta (SI) je wo poskitk bohatši. Wot kónca januara móža zajimcy pod prěnju wersiju digitalneje delnjoserbskeje biblioteki wužiwać. Wona wopřijima mjez druhim swobodnje přistupne digitalizowane wudaća staršich ćišćanych delnjoserbskich tekstow. Wo wužiwanju a dalšich wobsahach nowostki informuje SI zajutřišim, štwórtk, na online-prezentaciji.
Studowacych prjedy zapřijeć
Krótkopowěsće (14.02.22)
Dźeń a wjace natyknjenjow
Budyšin/Zhorjelc. Incidency we wokrjesomaj Budyšin (1389,6) a Zhorjelc (1167,8) bližitej so po Roberta Kochowym instituće němskemu přerězkej. Krajnoradnej zarjadaj informowaštej pjatk – aktualniše ličby hač do redakciskeho kónca njepředležachu – wo 663 nowoinfekcijach a smjertnymaj padomaj w Budyšinje a wo 521 natyknjenjach a jednym smjertnym padźe w Zhorjelcu.
„Lětni hit“ w nowym šaće
Budyšin/Choćebuz. Łužiske popowe duwo Doro Farkašec a Jordan Henson je remix swojeho hita „This style“, zhotowjeneho wot wuměłca KVEN, na YouTube wozjewiło. Dotal bu widejo něhdźe 1 500 króć wotwołane. Z originalnym spěwom bě so duwo za němske předkoło lětušeho wubědźowanja European Song Contest požadało, jury pak namjet naposledk njewobkedźbowaše.
Matura w dwěmaj wersijomaj
Krótkopowěsće (11.02.22)
Jan Clausen předsyda wuběrka
Budyšin. Z Janom Clausenom nawjeduje wuběrk Zwjazkoweho předsydstwa Domowiny za prawniske a politiske naležnosće dalši młody čłowjek. Wuběrkownicy su jemu wčera na konstituowacym posedźenju gremija zamołwity nadawk dowěrili. 20lětny w Lipsku prawnistwo studuje a přisłuša zwjazkowemu předsydstwu z mandatom župy „Michał Hórnik“ Kamjenc.
Znowa wyša incidenca
Budyšin. Stupacu incidencu je Roberta Kochowy institut dźensa za Budyski wokrjes z hódnotu 1 156,3 a za Zhorjelski z 1 048,9 wozjewił. Porno tomu su natyknjenja z koronawirusom zaso spadowali. Wo 801 infekciji a jednym smjertnym padźe je wokrjes Budyšin wčera informował, wo 719 natyknjenjach a třoch zemrětych pacientach wokrjes Zhorjelc.
Druhe koło „hackathona“
Krótkopowěsće (10.02.22)
Lipšćanske knižne wiki njebudu
Lipsk. Třeći króć po 2020 a 2021 su w času wot 17. do 20. měrca planowane Lipšćanske knižne wiki přičin pandemije dla wotprajili. „Mnohe wotprajenja wustajerjow minjene dny su k tomu wjedli, zo njemóžemy hižo wočakowanu kwalitu a wobsahowu šěrokosć wikow za publikum zaručić“, rěka ze stron zarjadowarjow. Přichodne Lipšćanske knižne wiki maja so 23. do 26. měrca 2023 wotměć.
Rozrost natyknjenjow
Budyšin. Krótko do zymskich prózdnin natyknjenja z koronawirusom spochi přiběraja. Budyski wokrjes přizjewi wčera 1 485 nowych padow a dalšeju zemrěteju pacientow. Incidenca rozrosće tu po Roberta Kochowym instituće dźensa na 1 069,4, w Zhorjelskim wokrjesu na 955,5. Tam rozprawjachu wčera wo 891 infekcijach w běhu 24 hodźin.
Delnjoserbšćinu bóle nałožować
Krótkopowěsće (09.02.22)
Žane jutrowne wiki w Budyšinje
Budyšin. Tež lětsa wupadnu jutrowne wiki w Budyskim Serbskim domje. To je předsydstwo Spěchowanskeho kruha za serbsku ludowu kulturu wobzamknyło. Za to pak poskićeja 12./13. měrca w Budyskej Serbskej kulturnej informaciji dźěłarničku za debjenje jejkow. Za 69. wubědźowanje wo najrjeńše serbske jutrowne jejko móža dorosćeni swoje kolekcije hač do 4. měrca pola Domowiny w Budyšinje wotedać.
Incidenca zaso nad tysac
Budyšin. Z hódnotu 1 005 je incidenca w Budyskim wokrjesu po Roberta Kochowym instituće dźensa nahladnje stupała. Za wokrjes Zhorjelc mjenowaše RKI 807. Wokrjes Budyšin informowaše wčera wo 320 natyknjenjach z koronawirusom a znowa dwěmaj smjertnymaj padomaj. Wokrjes Zhorjelc je 416 infekcijow a jednoho zemrěteho pacienta wozjewił.
Pjenjezy za hońtwu
Krótkopowěsće (08.02.22)
Nowe dźěło zahajili
Choćebuz. W zwisku ze strukturnej změnu je dźensa jědnaće sobudźěłaćerjow koncerna Łužiska energija a milinarnje (LEAG) nowe dźěło pola Němskeje železnicy w Choćebuzu zahajiło. Přichodnje maja woni spěšniki ICE hladać, na čož so tuchwilu wukubłuja. LEAG a Němska železnica chcetej nastupajo personalne planowanje wušo hromadźe dźěłać.
Incidenca dźensa woteběrała
Budyšin. Incidenca je po Roberta Kochowym instituće dźensa w Budyskim wokrjesu na hódnotu 724,1 a w Zhorjelskim na 771,5 woteběrała. Wokrjesaj stej wčera wo sumje natyknjenjow z koronawirusom wot minjeneho pjatka informowałoj. W Zhorjelskim wokrjesu bě to 751 infekcijow, w Budyskim 663. Tam mějachu dalšej smjertnej padaj. W chorowni hladaja 94 na koronu schorjenych.
Mało apotekow so přizjewiło
Krótkopowěsće (07.02.22)
Wjeršk hišće docpěty njeje
Budyšin. Incidenca we wuchodnej Sakskej wjeršk hišće docpěła njeje a dale přiběra. Roberta Kochowy institut je dźensa za Budyski wokrjes hódnotu 830,2 a za Zhorjelski 925,9 podał. Wo 424 natyknjenjach z koronawirusom a dwěmaj smjertnymaj padomaj je wokrjes Budyšin minjeny pjatk informował, wokrjes Zhorjelc rozprawješe wo 376 infekcijach.
Loni dobre lěto běrnow było
Kamjenc. Za sakskich ratarjow bě loni dobre lěto běrnow. Kaž Kamjenski statistiski krajny zarjad dźensa zdźěla, domchowachu burja nimale 244 000 tonow ze swojeje role. Porno 2020 je to 15 procentow wjace. Plahowanska přestrjeń běrnow pak bu w přirunanju lětow wo 350 na 5 800 hektarow pomjeńšena. Přirost złožuje so na lěpši hektarowy wunošk. Tež pola cokoroweje rěpy mějachu lěto z bohatym wunoškom 1,27 milionow tonow.
Twórby Gerharda Richtera
Krótkopowěsće (04.02.22)
Přećiwo winowatosći šćěpjenja
Drježdźany/Budyšin. Sakscy krajni radojo su so wčera na zwjazkoweho ministra za strowotnistwo prof. dr. Karla Lauterbacha (SPD) a na sakskeho ministerskeho prezidenta Michaela Kretschmera (CDU) wobroćili. Woni sej žadaja, na institucije wusměrjenu winowatosć šćěpjenja wusadźić. Budyski wyši měšćanosta Alexander Ahrens (SPD) je so wčera w zjawnym lisće přećiwo powšitkownej šćěpjenskej winowatosći wuprajił.
Incidenca wospjet přiběra
Budyšin. Po informaciji RKI je incidenca korony dla dźensa w Budyskim wokrjesu na 693,3 postupiła. Tudyši strowotniski zarjad je wčera 498 nowoinfekcijow z wirusom zwěsćił, jedna wosoba je w tym zwisku zemrěła. W Zhorjelskim wokrjesu wučinja incidenca po RKI dźensa 822,6. Tam su wčera 434 natyknjenych a tři smjertne pady registrowali.
Za nutřkownu demokratiju
Krótkopowěsće (03.02.22)
Pechstein a Friedrich z chorhoju
Peking. Claudia Pechstein a Francesco Friedrich njesetaj němsku chorhoj na zahajenskej ceremoniji Olympiskich zymskich hrow 2022 jutře, pjatk, w Pekingu. Ze štyrjomi hrami w curlingu su so hižo wčera olympiske wubědźowanja w Chinje započeli. W srjedźišću National Aquatics běchu to duele w miksowej dwójce. Hosćićel China startowaše z dobyćom, němscy curlerojo pódla njejsu.
Wjace infekcijow hač tydźenja
Budyšin. Ličba natyknjenjow z koronawirusom nětko bóle přiběra hač hišće minjeny tydźeń. Budyski wokrjes rozprawješe wčera wo 566 infekcijach a třoch smjertnych padach, Zhorjelski wo 718 natyknjenjach. Tam bu 61 dalšich padow z omikronwariantu wobkrućenych. Incidenca je po RKI dźensa w Budyskim wokrjesu 560, w Zhorjelskim 780,3.
Dalši wuběrk dźěłać započał
