Krótkopowěsće (02.11.20)
120 nowych infekcijow
Budyšin. W Budyskim wokrjesu bu wčera 120 nowych infekcijow z koronawirusom zwěsćenych. Z tym je ličba w sydom dnjach poćahowana na ličbu wobydlerstwa 781. W karantenje je 2 415 ludźi. 41 dalšich pacientow je wuhojenych. Tuchwilu je we wokrjesu 1 166 ludźi inficěrowanych. 32 z nich so w klinikach hoja. Mjeztym je dalši pacient zemrěł.
Myto Büchnera Elce Erb
Darmstadt. Autorka Elke Erb je sobotu w Darmstadtskim Statnym dźiwadle Myto Georga Büchnera přijała. Korony dla bě tam lědma publikuma. Z mytom bu 82lětna lyrikarka a basnica za swoje „njezaměnliwe“ literarne žiwjenske tworjenje wuznamjenjena. Myto we wysokosći 50 000 eurow Němskeje akademije za rěč a basnjenje je najwažniše wuznamjenjenje na polu literatury w Němskej.
Filmowy festiwal přesunjeny
Choćebuz. Organizatorojo 30. filmoweho festiwala Choćebuz (FFC) su podawk na 8. do 13. decembra 2020 přesunyli. Dualny festiwal wotměwa so w tych dnjach z předstajenjom filmow w kinach delnjołužiskeho města kaž tež na internetnej stronje festiwala. Kartki za předstajenje filmow w kinach wot 3. do 8. nowembra dale płaća.
Krótkopowěsće (30.10.20)
Dalše infekcije zwěsćili
Budyšin/Zhorjelc. W Budyskim wokrjesu su wčera 141 dalšich nowonatyknjenych z koronawirusom zwěsćili. Tuchwilu je tu dohromady 793 wosobow inficěrowanych, dwanaće z nich w chorowni lěkuja. Budysku pěstowarnju „Friedrich Schiller“ su jednoho koronoweho pada dla zawrěli. W Zhorjelskim wokrjesu je so 40 ludźi znowa natyknyło, dohromady maja tam 716 inficěrowanych, z kotrychž je 28 w chorowni.
Serbska rada wuradźowała
Budyšin. Digitalnje zetkachu so wčera čłonojo Rady za serbske naležnosće Sakskeje. Radźićeljo zaběrachu so mjez druhim z wot statneho knježerstwa předpołoženym naćiskom zakonja k skrućenju zažneho a šulskeho kubłanja. W lisće Sakskej statnej kencliji kritizuja w jeje nadawku wudaty wosebity zešiwk „Mosaika“, w kotrymž serbska rěč a kultura ze žanym słowom njenaspomnjenej njejstej.
Žadna cyrkej so wotpaliła
Krótkopowěsće (29.10.20)
Z časom slědować hižo njemóža
Budyšin/Zhorjelc. 139 nowych natyknjenjow z koronawirusom su wčera w Budyskim wokrjesu zwěsćili. Wulkeje ličby padow dla njemóže strowotniski zarjad hižo wšitke kontaktowe wosoby pozitiwnje testowanych informować, w zdźělence rěka. W Zhorjelskim wokrjesu su wčera 146 nowoinfekcijow zwěsćili.
Statnik gratuluje Kamjenicy
Budyšin. Předsyda Domowiny Dawid Statnik je Kamjenicy k wuzwolenju jako Europska kulturna stolica 2025 gratulował. „Kamjenica skići ze swojim słowjanskim pochadom dobry zwisk k ideji, w třikrajowym róžku 2018 abo 2019 mjezy přesahowacu kulturnu stolicu wutworić. By rjenje było, hdyž by Łužica jónu takrjec štafelowy stab wot Kamjenicy w rjedźe europskich kulturnych stolicow přewzać móhła“. (hlej tež 2. stronu)
Móst přez dróhu do Łužicy
Krótkopowěsće (28.10.20)
Etat za 2021 rozjimali
Budyšin. Komisija rady Załožby za serbski lud je wčera na swojej prěnjej widejowej konferency scyła klětuši hospodarski plan załožby rozjimała. Kaž załožbowy direktor Jan Budar informuje, pokazuja drje prěnje signale pjenjezydawarjow na stopnjowanje přiražkow, njejasne pak je, hač hodźa so priority w trěbnej šěrokosći zwoprawdźić. Etat ma załožbowa rada 8. decembra wobzamknyć.
Połoženje njezměnjene
Budyšin/Zhorjelc. Połoženje nastupajo koronawirus so njezměruje. Tak zličichu wčera w Budyskim wokrjesu 43 nowych natyknjenjow, 16 su zaso wustrowjeni. Kwota infekcijow na 100 000 wobydlerjow w běchu sydom dnjow wučinja 126. W Zhorjelskim wokrjesu maja 22 nowych natyknjenjow, kwota wučinja tam 130. Wčera je 89lětna žona z Hamora w zwisku z koronu zemrěła.
Lessing za dźěći
Krótkopowěsće (27.10.20)
Ličby dale stupaja
Budyšin/Zhorjelc. Ličba na koronu inficěrowanych w Hornjej Łužicy dale stupa. Wčera zličichu w Budyskim wokrjesa 15 nowych infekcijow, sydomdnjowska kwota na 100 000 wobydlerjow wučinja 119. Tuchwilu je 523 ludźi natyknjenych, 692 je so wustrowiło. W Zhorjelskim wokrjesu mějachu wčera tři nowe infekcije. Sydomdnjowska kwota wučinja tam 132. Aktualnje je tam 510 ludźi chorych, 409 je zaso strowych.
Nowy cyrkwinski hudźbnik
Chróstawa. Hans Christian Martin naslěduje wjelelětneho cyrkwinskeho hudźbnika Chróstawskeje ewangelsko-lutherskeje wosady Lucasa Pohla. 8. nowembra chcedźa bywšeho organista znatych Naumburgskich pišćelow we cyrkwi swj. Wjacława z kemšemi jako kantora w Chróstawje zapokazać.
Nowy šef frakcije AfD
Podstupim. Dwaj měsacaj po wotstupje Andreasa Kalbitza je frakcija AfD w Braniborskim krajnym sejmje dźensa Hansa-Christopha Berndta za noweho předsydu wuzwoliła. Berndt naslěduje Kalbitza, kiž dyrbješe jako frakciski šef wotstupić, po tym zo běchu jeho w awgusće ze strony wuzamknyli.
1860 wróćo na čole
Krótkopowěsće (26.10.20)
Digitalna zhromadźizna
Budyšin/Flensburg. Europski parlament chce so hišće lětsa z wobydlerskej iniciatiwu Minority SafePack rozestajeć a rezoluciju wobzamknyć. To připowědźi prezident Federalistiskeje unije europskich narodnych mjeńšin FUEN Loránt Vincze, kotryž je sam zapósłanc w Brüsselu, sobotu na digitalnej delegatnej zhromadźiznje FUEN. Wobzamknyli su wjacore rezolucije wo škiće narodnych mjeńšin.
Filmowy přinoški zapodać
Wulke Hendrichecy. Za 18. Nysowy filmowy festiwal, planowany klětu wot 18. do 23. měje w němsko-pólsko-čěskim třikrajowym róžku pytaja zarjadowarjo wubědźowanske přinoški za kategorije hrajny film, krótkofilm a dokumentaciski film. Hač do 31. decembra móža filmowcy swoje přinoški zapodać. Produkowane dyrbja wone być 2020 abo 2021 w jednym z třoch festiwalowych krajow.
Politiske wuměłstwo
Krótkopowěsće (23.10.20)
Nowe postajenja
Budyšin/Zhorjelc. Sylnje přiběraceje ličby natyknjenych z koronawirusom dla chce wokrjes Budyšin nowe postajenja wukazać, kotrež maja wot jutřišeho płaćić. Wčera zličichu 62 nowych infekcijow. 31 ludźi je zaso wustrowjenych. Ličba nowych infekcijow na 100 000 wobydlerjow w běhu sydom dnjow wučinja 80. W Zhorjelskim wokrjesu zličichu 67 nowych natyknjenych. Kwota na 100 000 wobydlerjow je 90 překročiła.
Myto opoziciji w Běłoruskej
Brüssel/Minsk. Nahladne myto Sacharowa za čłowjeske prawa Europskeho parlamenta spožča lětsa opoziciji w Běłoruskej. Zastupnicy opozicije symbolizuja wšědny bój wo čłowjeske prawa a swobodu měnjenja, rjekny prezident parlamenta EU David Sassoli w plenumje w Brüsselu. Parlament EU je prěnja institucija, kotraž protesty w Běłoruskej z mytom hódnoći. Tole ma ludźi dale pohonjować.
Historiske přinoški přistupne
Krótkopowěsće (22.10.20)
Karanteny sylnje přiběraja
Budyšin. 54 nowych inficěrowanych su we wokrjesu Budyšin jeničce w běhu wčerawšeho dnja zličili. Sylnje potrjechena je starownja w Ottendorfje-Okrilli. Tam zwěsću 16 natyknjenjow, dalše testy hišće wuhódnoćeja. Z 1 078 je ličba karantenow wo 273 přiběrała. 77 tajkich móžachu mjeztym zběhnyć, a ze cyłkownje 627 ludźimi je so wosom dalšich wustrowiło. W Zhorjelskim wokrjesu je so ličba nowonatyknjenych porno wčera wo 57 na 272 zwyšiła.
Trěbna změna w předsydstwje
Budyšin. Předsydka Serbskeho šulskeho towarstwa Ludmila Budarjowa, kotraž zastojnstwo mjeztym 30 lět wukonja, lětsa k wólbam hižo njenastupi. To je wona čłonam towarstwa w lisće, z přeprošenjom na hłownu a wólbnu zhromadźiznu zdźěliła. Ta wotměje so 21. nowembra w Chrósćicach. Mjeztym maja kandidatow za nowe předsydstwo.
Statuwu kejžorki wotkryli
Krótkopowěsće (21.10.20)
Casnik dóstanje šefredaktorku
Choćebuz. Stefanie Krawcojc budźe wot 2021 šefredaktorka Noweho Casnika. Městno je na pjeć lět wobmjezowane. Krawcojc naslěduje dr. Viktora Zakarja, kotryž funkciju po wotchadźe Gregora Wieczoreka hišće hač do kónca lěta wukonja. 45lětna maćernorěčna Delnjoserbowka je w Berlinje a w Finskej studowała a je wot lěta 2014 redaktorka najstaršeje nowiny w Delnjej Łužicy.
Nětko rizikowa kónčina
Budyšin/Zhorjelc. Ze 162 pozitiwnje na koronawirus testowanymi w běhu sydom dnjow je wčera tež Budyski wokrjes hranicu 50 nowoinfekcijow na 100 000 wobydlerjow překročił a je tuž rizikowa kónčina. Wobmjezowanja pak tam najprjedy njepřiwótřa, ale wočaknu dalše směrnicy sakskeho knježerstwa, rěka z Budyskeho krajnoradneho zarjada. W Zhorjelskim wokrjesu su wčera 220 natyknjenych zličili, 25 wjac hač dźeń do toho.
Z nowymaj čłonomaj
Krótkopowěsće (20.10.20)
Dalekubłanje za zwukopisak
Budyšin. We wobłuku medijoweje akademije Serbskeho rozhłosa a Sakskeho wukubłanskeho kanala SAEK je wučerka Milenka Cyžowa dźensa dopołdnja w Budyšinje dalekubłanje za zwukopisak BOOKii přewjedła. Nimo někotrych zajimcow w rumnosćach SAEK běchu so tež tójšto serbskich wučerkow a wučerjow, sobudźěłaćerjow LND kaž tež nakładnistwa Tessloff online wobdźělili.
Prózdniny w Hornim Hajnku
Horni Hajnk. Wosom dźěći je na poskitk Budyskeho Rěčneho centruma WITAJ přizjewjenych. Wot wčera do pjatka zabawjeja so wone w nazymskich prózdninach w domje Jurja Brězana w Hornim Hajnku. Šulskej socialnej dźěłaćerce RCW chcetej z nimi w běhu tohole tydźenja do přirody hić, wšelake hry hrać a kreatiwni być. Korony dla su wjacori starši wobdźělenje swojich dźěći na prózdninskim poskitku wotprajili.
Idealne wuměnjenja w centrumje
