Krótkopowěsće (25.03.22)
Jako sudnik dźěłać njesmě
Lipsk. Bywši zapósłanc zwjazkoweho sejma strony AfD Jens Maier swoje zastojnstwo jako sudnik najprjedy raz wukonjeć njesmě. Słužbne sudnistwo za sudnikow w Lipsku je 60lětnemu zakazało, tuchwilne zastojnstwo dale wjesć. Wo tym sudnistwo dźensa informowaše. Wustawowy škit w Sakskej zastopnjuje Maiera jako prawicarskeho ekstremista.
Roman Nuk nominowany
Waršawa/Drježdźany. Kandidaća za lětuše Němsko-Pólske žurnalistiske myto Tadeusza Mazowieckeho su pomjenowani. Jury je wčera 30 přinoškow w pjeć kategorijach nominowała. Mjez nimi je w kategoriji „žurnalizm w pomjeznym regionje“ tež rozhłosowy přinošk Romana Nuka a Holgera Lühmanna „Mensch Nachbar extra: Was kommt nach der Kohle?“. 9. junija chcedźa dobyćerjow na gali w Zhorjelcu wuznamjenić.
Wolóženje njewotwidźomne
Krótkopowěsće (24.03.22)
Polěpšenje dale njespóznajomne
Budyšin/Zhorjelc. Krajnoradny zarjad wokrjesa Budyšin informowaše wčera wo dalšich 1 757 zwěsćenych infekcijach z koronawirusom. W Zhorjelskim wokrjesu je so 1 091 wosobow z nim natyknyło, štyrjo schorjeni su zemrěli. Incidency stej so po Roberta Kochowym instituće we woběmaj wokrjesomaj zwyšiłoj a wučinjatej dźensa za Budyšin 1 957,7 a za Zhorjelc 1 400,1.
Na dobro klimy a móšnjow
Wojerecy. Wobchadny zwjazk Hornje Łobjo (VVO) a Wobchadna towaršnosć Wojerecy (VGH) poskićatej wot 1. apryla nowy dnjowy tiket. Jězdźenka płaći 3,50 eurow a dowola jězby z busom a železnicu po měsće kaž tež we wokolinje hač do Čorneho Chołmca. Zaměr je, wjace ludźi za zjawny wosobowy bliskowobchad zahorić. Wukopa-li so modelowy projekt jako wuspěšny, chce VVO přichodnje po-dobny poskitk za cyły region zarjadować.
Ličba skawtow dale a wjetša
Krótkopowěsće (23.03.22)
IC TEAM z Budyšina počesćeny
Budyšin. Budyska towaršnosć IC TEAM Personaldienste GmbH bu z pječatom „Najlěpši dźěłodawar w srjedźnym stawje 2022“ wuznamjenjena. Předewzaće je we wubědźowanju Centruma za dźěłodawarsku atraktiwitu (zeag GmbH) lětsa třeće městno docpěło. Jury dźiwa wosebje na strowu a zdobom wukonitu kulturu na dźěłowym městnje. Zakład su detailowane woprašowanja sobudźěłacych.
Dale mnohe natyknjenja
Budyšin. Ličba z koronawirusom natyknjenych wosobow w Hornjej Łužicy je dale wulka. Budyski wokrjes informowaše wčera wo 1 963 infekcijach a wo třoch smjertnych padach. Tu je incidenca po Roberta Kochowym instituće dźensa 1 785,5, we wokrjesu Zhorjelc 1 392,1. Tamniši krajnoradny zarjad rozprawješe wčera wo 909 natyknjenjach a třoch zemrětych z časa wot 6. do 16. měrca.
Delnjoserbska brošurka FUEN
Krótkopowěsće (22.03.22)
Serija nětko w mediatece
Drježdźany. Serija wo Serbach „Straight Outta Crostwitz“ je w mediatece ARD widźeć. Wobhladać móža sej ju zajimcy tež wot jutřišeho na MDR+. W srjedźišću serije, kotraž bu w Chrósćicach a Hornjej Hórce wjerćana, steji spěwarka ludowych pěsnjow Hanka (Jasna Fritzi Bauer), kotraž so jako rapperka na wubědźowanju wobdźěli. Wobdźěleny běše tež bubnar skupiny „Silbermond“ Andreas Nowak.
Incidenca zaso pod 2 000
Budyšin. Incidenca po Roberta Kochowym instituće je dźensa w Budyskim wokrjesu z 1 932,5 zaso pod hódnotu 2 000, we wokrjesu Zhorjelc je wona 1 418,8. Tam informowachu wčera wo 1 437 natyknjenjach wot minjeneho pjatka a wo dwěmaj smjertnymaj padomaj wot 11. měrca. Z Budyskeho wokrjesa porno wčerawšemu žane aktualniše ličby njepředleža.
Swobodne městna za poetryslam
Budyšin. Serbski ludowy ansambl a Ludowe nakładnistwo Domowina wuhotujetej 18. junija prěni serbski poetryslam „Lit|a|pop“. Za njón přihotowacu dźěłarničku, kotruž organizatoraj 26. a 27. měrca w Budyskej młodowni poskićatej, móža so zajimcy krótkodobnje hišće přizjewić, a to z mejlku na .
Krótkopowěsće (21.03.22)
Nowotny dale wjesnjanosta
Rakecy. Z 98,5 procentami wšěch hłosow bu Swen Nowotny wčera za Rakečanskeho wjesnjanostu wuzwoleny. Wot CDU namjetowany bě Nowotny jenički kandidat. Wolerjo pak mějachu składnosć, dalše mjeno na wólbny lisćik připisać, štož je jenož mało ludźi činiło. Před sydom lětami bě so Swen Nowotny prěni raz wo zastojnstwo wjesnjanosty w Rakecach prócował a so tehdy přećiwo třom dalšim kandidatam přesadźił.
Incidenca wyša hač 2 000
Budyšin. Přez kónc tydźenja je incidenca w Budyskim wokrjesu marku 2 000 překročiła. Dźensa podawa Roberta Kochowy institut hódnotu 2 082,8. Wokrjes informowaše dopołdnja wo 1 693 natyknjenjach z koronawirusom a wo dwěmaj smjertnymaj padomaj wot minjeneho pjatka. Wo 1 216 infekcijach rozprawješe wokrjes Zhorjelc minjeny pjatk, po RKI wučinja tam incidenca dźensa 1 609,6.
Sylnja wučbu informatiki
Krótkopowěsće (18.03.22)
Tola wjac natyknjenjow było
Budyšin. Zastatk při wobdźěłanju přizjewjenych natyknjenjow z koronowirusom je Budyski krajnoradny zarjad wčera přiznał, rozprawjejo wo ličbje 2 063 nowych infekcijow a wo jednym smjertnym padźe. Po Roberta Kochowym instituće wučinja incidenca tu 1 677,8 a we wokrjesu Zhorjelc 1 238,0. Tam rozprawjachu wčera wo 1 034 dalšich natyknjenjach.
Wobsahi podpěry rozjimali
Budyšin. Prěnje wobsahi podpěry za ćěkancow z Ukrainy su wjesnjanosća a měšćanosta hromadźe ze zarjadnistwom Budyskeho wokrjesa wčera rozjimali a decentralnej organizaciji zasadnje přihłosowali. Wokrjes wočakuje, zo kóžda komuna za zaměstnjenje kapacitu přewostaja, wotpowědowacu dwěmaj procentomaj ličby wobydlerstwa. Dotal je něhdźe 1 200 ćěkancow we wokrjesu.
Sberbank w likwidaciji
Krótkopowěsće (17.03.22)
Myto wikow dóstał
Lipsk. Awstriski spisowaćel Karl-Markus Gauß je wčera lětuše Myto za europske zrozumjenje Lipšćanskich knižnych wikow přijał. W swojej narěči w Mikławšskej cyrkwi kritizowaše wón wulke nakładnistwa, kotrež běchu wobdźělenje cofnyli a tak zawinowali, zo knižne wiki njejsu. Zdobom wěnowaše so wón aktualnym wójnskim rozestajenjam a skedźbni na dóńt małych narodow.
Niwow incidency njezměnjeny
Budyšin. Po 856 natyknjenjach z koronawirusom, wo kotrychž je wokrjes Budyšin wčera informował, mjenuje Roberta Kochowy institut tam dźensa incidencu 1 434,5. We wokrjesu Zhorjelc je wona 1 059,6 zwotkelž rozprawjachu wčera wo 892 nowych infekcijach, z toho je 188 dźěći potrjechenych. Ličba smjertnych padow je wo dwaj (Budyšin) resp. štyri (Zhorjelc) přiběrała.
Mnohe wobsahi rozjimali
Krótkopowěsće (16.03.22)
Nagelowa wustaja w ministerstwje
Drježdźany. Wot dźensnišeho móža sej zajimcy personalnu wustajeńcu Maje Nageloweje na prěnim poschodźe w Drježdźanskim statnym ministerstwje za wědomosć, kulturu a turizm na tamnišej Wigardowej 17 wobhladać. Přehladka wostanje we wobłuku formata „Kunst im Gang“ hač do 15. junija přistupna.
Dalšich akterow zapřijeć
Budyšin. Z wulkoprojektom Serbski forum wědy na Lawskim arealu w Budyšinje zwjazuja wulku šansu, rozjimać nowe struktury a perspektiwy. Wo tym běchu sej čłonojo kulturneho wuběrka na swojim wčerawšim posedźenju přezjedni. Tam su hromadźe ze zastupjerjemi Załožby za serbsku lud, Serbskeho muzeja a Serbskeho instituta rozmyslowali, kak hodźeli so dalši akterojo do wuwića noweho domu zapřijeć.
Incidenca woteběrała
Krótkopowěsće (15.03.22)
Z krizowym stabom
Budyšin. Krizowy stab koordinuje pomoc za Ukrainu wot wčerawšeho w Budyskim krajnoradnym zarjedźe. Wobdźělene fachowe zarjady so na dźěłowych dnjach wot 8 do 18 hodź. wothłosuja, kaž zarjad wčera zdźěli. Ćežišći najprjedy raz stej, nuzowe kwartěry za přichadźacych zarjadować a bydlenske rumnosće za jich trajne zaměstnjenje wotnajeć. Wokrjes Budyšin so na to hotuje, znajmjeńša 5 000 wosobow přiwzać.
Dale na wysokim niwowje
Budyšin. Incidenca po Roberta Kochowym instituće je dźensa z hódnotomaj 1 627,5 w Budyskim a 1 166,6 w Zhorjelskim wokrjesu dale na wysokim niwowje. Wokrjes Budyšin informuje wo 391 natyknjenjach a třoch smjertnych padach wot minjeneho pjatka. Wokrjes Zhorjelc rozprawja wo 1 066 nowoinficěrowanych a třoch zemrětych pacientach.
Tež Češa chcedźa wojować
Krótkopowěsće (14.03.22)
Z klawsurneho posedźenja SŠT
Wjerbno. Smjerdźečanska LIPA a Serbske šulske towarstwo chcetej swoje zhromadne poskitki dale rozšěrić. To zwurazni předsydstwo SŠT na swojim klawsurnym wuradźowanju kónc tydźenja w delnjołužiskim Wjerbnje. Tak wotpohladuja medijopedagogiske a swójbne kubłanje w LIPJE rozšěrić. Zarjadować chcedźa staršisku app a wobnowić internetnu stronu SŠT. Dale so wo to prócuja, zo móža sobudźěłaćerjo přichodnje tež z leasingowym kolesom na dźěło jěć.
Incidenca sylnje přiběraca
Budyšin. Incidenca je přez kónc tydźenja sylnje přiběrała. Roberta Kochowy institut poda dźensa za Budyski wokrjes hódnotu 1 796,9, za Zhorjelski 1 335,8. Wokrjes Budyšin informowaše minjeny pjatk wo 1 311 natyknjenjach a wo dwěmaj smjertnymaj padomaj. Samsny dźeń rozprawješe wokrjes Zhorjelc wo 661 infekcijach a dwěmaj zemrětymaj.
Pomhaja zwěrjencam
