Krótkopowěsće (18.05.22)
Logo za jubilej pytany
Chrósćicy. Na róčnicu swojeho 800lětneho wobstaća chcedźa w Chrósćicach kónc junija 2025 z wosebitym gmejnskim a wosadnym tydźenjom spominać. Za njón ma nastać wosebite logo. To je přihotowanski wuběrk jubilejneho swjedźenja na swojim wčerawšim štwórtym zetkanju w Chrósćicach wobzamknył. Namjety přijimuja hač kónca septembra w gmejnskim zarjedźe abo na tamnišej farje.
Planuja „žiwe konzerwy“
Praha. Na změnu wěstotneho połoženja w Europje nětko tež čěski Zarjad statnych materialnych rezerwow reaguje. Tak měli přichodnje žiwe kruwy wobstatk jeho składa žiwidłow město dotalneho zamróženeho mjasa być. Kruwy měli plahowarjo za zarjad zastarować. Dalša nowosć je nakup mloka za ćěšenkow. Žiwidłowe rezerwy dyrbja potrjeby stata za pjatnaće dnjow zawěsćić.
Na finale europa league
Krótkopowěsće (17.05.22)
„Čitanja za měr“ wušli
Ludwigsburg. Awtorojo ze Sakskeje, Braniborskeje a Ukrainy su 16. měrca na „čitanju za měr“ w Drježdźanskim Ericha Kästnerowym Domje za literaturu swój hłós přećiwo Putinowej wójnje w Ukrainy zběhnyli. Nětko su přinoški w ukrainskej, němskej a serbskej rěči pod titulom „Wir ahnten nicht die nahende Gefahr“ w literarnym časopisu BAWÜLON (2/2022) Ludwigsburgskeho nakładnistwa Pop wušli. Předsłowo spisał je Benedikt Dyrlich.
Inscenaciju tjg wuznamjenili
Zwickau. Na zakónčenju lětušeho zetkanja sakskich dźiwadłow minjenu njedźelu w Zwickauje su inscenaciju „Tiere essen“ Drježdźanskeho Dźiwadła „Młoda generacija“ (tjg) ze Sakskim mytom dźiwadła 2022 wuznamjenili. We wopodstatnjenju jury rěka, zo produkcija přez tradicionelne dźiwadłowe formy, kaž staj to sćinohra a grjekski chór, swójsku, hnujacu estetiku wuprudźa.
Alstom pyta za rozrisanjom
Krótkopowěsće (16.05.22)
Za ekologiske ratarjenje
Nossen. Kompetencny centrum za ekologiske ratarjenje je sakski ratarski minister Wolfram Günther (Zeleni) dźensa w Nossenje wotewrěł. Po jeho słowach „ma ekoratarstwo systematiski přistup k najnowšim wuwićam w teoriji a praksy dóstać“. Tak hodźa so produktiwita zwyšić a ekologiske wašnja plahowanja w Sakskej bóle hač dotal rozšěrić.
Dalše hašenske jězdźidła
Drježdźany/Budyšin. Z trajacej suchotu strach za lěsne wohenje po cyłej Sakskej přiběra. We wosebje wohroženych wokrjesach Budyšin, Zhorjelc a Sewjerna Sakska je kraj stajnje jedyn hašenski ćah katastrofoweho škita přećiwo lěsnym wohenjam zaměstnił. Zo bychu tele jednoty rozšěrili, kupi nutřkowne ministerstwo pjeć hašenskich jězdźidłow typa TLF 4000.
Nowostki z centruma mlóčnicy
Krótkopowěsće (13.05.22)
Jan Chlebníček njeboh
Budyšin. Wjelelětny dirigent a nawoda orchestra Serbskeho ludoweho ansambla Jan Chlebníček je předwčerawšim w starobje 86 lět w Budyšinje zemrěł. Wot lěta 1969 do 1981 kaž tež wot 1989 do 2006 bě wón za wuměłske wukony ćělesa zamołwity. Nimo toho skutkowaše jako komponist a jako slědźer na polu serbskeje ludoweje hudźby.
Pytaja elewki a elewow
Budyšin. Činohrajne studijo při NSLDź pyta elewki a elewow za nowu hrajnu dobu 2022/2023. Přeprošeni su młodźi ludźo w starobje wot 18 lět, kotřiž so za powołanje dźiwadźelnika abo dalše dźiwadłowe powołanje kaž na přikład režiser, dramaturg, dźiwadłowy pedagoga atd. zajimuja a kotřiž wobknježa hornjo- abo delnjoserbšćinu. Přizjewjeć móža so zajimcy hač do 25. junija.
Dalše smjertne pady korony dla
Budyšin. Za cyłu Němsku je Roberta Kochowy institut dźensa w zwisku z koronu 164 smjertnych padow mjenował. Jedyn z toho je z Budyskeho wokrjesa. Po 161 dalšich natyknjenjach z wirusom je tam aktualna incidenca po RKI 243,6. Wo 114 infekcijach a 6. meje zemrětej wosobje Zhorjelski wokrjes wčera informowaše. Tu je incidenca po RKI dźensa 157,2.
Krótkopowěsće (12.05.22)
Wojuja wo wjace mzdy
Wjazońca. Sobudźěłaćerjo předewzaća Capron we Wjazońcy wojuja wo moderne a načasne tarifowe zrěčenje. Mjeztym je zawodna tarifowa komisija swoje žadanja nawodnistwu zawoda přepodała. Přistajeni chcedźa na přikład tarifowe zrěčenje sakskeje metaloweje a elektroindustrije w stejnišću zwoprawdźić. Prěni jednanski termin budźe 24. meje.
Wo samopostajowanju Serbow
Mladá Boleslav. Wosebita pućowanska wustajeńca Serbskeho instituta (SI) „Swoboda kiwa“ je wotnětka w statnym wokrjesnym archiwje čěskeho města Mladá Boleslav přistupna. We wobłuku wčerawšeje wernisaže je stawiznarka SI dr. Jana Piňosová hosći po přehladce wjedła. Centralna tema wustajeńcy je „narodne prócowanje wo samopostajowanje Serbow mjez swětowymaj wójnomaj“.
Dale lochce znižene hódnoty
Krótkopowěsće (11.05.22)
Zetkanje dźiwadłow zahajene
Plauen/Zwickau. Pod patronatstwom prezidenta sakskeho krajneho sejma dr. Matthiasa Rößlera a sakskeje krajneje ministerki za kulturu a turizm Barbary Klepsch (wobaj CDU) bu wčera 11. zetkanje sakskich dźiwadłow zahajene. Hosćićel je dźiwadło Plauen-Zwickau. Mjez cyłkownje jědnaće wobdźělacymi so jewišćemi je tež Němsko-Serbske ludowe dźiwadło ze swojej inscenaciju „Gott“.
Kompetencny centrum załoža
Nossen. Kompetencny centrum za ekologiske ratarstwo chce sakski minister za ratarstwo Wolfram Günther (Zwjazk 90/Zeleni) póndźelu w Nossenje wotewrić. Zaměraj Krajnemu zarjadej za wobswět, ratarstwo a geologiju přisłušaceje institucije stej mjez druhim produktiwitu družin ekologiskeho plahowanja stopnjować a jich atraktiwitu z na praksu orientowanymi poručenjemi powjetšić.
Znowa smjertne pady
Krótkopowěsće (10.05.22)
W prawidłownych rjadownjach
Berlin. Ćeknjeni wuknjacy z Ukrainy wuknu w Němskej prěnjorjadnje hromadźe z tudyšimi šulerjemi a nic we wosebitych rjadownjach. To wuchadźa z reprezentatiwneho woprašowanja wučerkow a wučerjow za Roberta Boschowu załožbu. 78 procentow tych, kotrychž šule su hižo ukrainske dźěći a młodostni přiwzali, rjekny, zo je cyle abo zdźěla w prawidłownych rjadownjach wuwučuja.
Sobu najniša incidenca w Sakskej
Budyšin. Roberta Kochowy institut je dźensa za Budyski wokrjes incidencu 241,3 podał a zdobom wo 144 natyknjenjach z koronawirusom informował. Wokrjes Zhorjelc je wčera wo 78 infekcijach rozprawjał, kotrež su minjenu sobotu a wčera zwěsćili. Incidenca tam je po RKI dźensa 183,2. Hornjołužiskej wokrjesaj matej hromadźe z Rudnohórskim wokrjesom najnišu incidencu w Sakskej.
Wo ličbje wobydlerstwa w Čěskej
Krótkopowěsće (09.05.22)
Dóstanu wjace mzdy
Choćebuz. Po dwanaće hodźin trajacym jednanju stej so dźěłarnistwo za chemiju, hórnistwo a energiju (IG BCE) a Choćebuski koncern Łužiska energija a milinarnje (LEAG) skónčnje dojednałoj. Přistajeni předewzaća dóstanu štyri procenty wjace mzdy a jónkrótnu sumu we wysokosći 600 eurow. Pjatk popołdnju stej stronje dojednanje podpisałoj.
Start za tydźenje šulskeho kina
Budyšin. Po dwulětnej přestawce su organizatorojo šulskich kinowych tydźenjow přijeli dotal 22 000 přizjewjenjow w 46 kinach Sakskeje. Wot 9. do 20. meje wotewru kina šulskim rjadownjam wšitkich starobnych skupin swoje žurle. Zo by so we wučbje poradźiło wo filmje, kotryž su sej šulerjo wobhladali, rěčeć, předleži wšitkim filmam přewodny pedagogiski material. Zdobom poskićuja kina husto tež rozmołwy k jednotliwym filmam.
Žane nowe pady přizjewili
Krótkopowěsće (06.05.22)
Wuspěšna němska premjera
Berlin. Serbska wirtuozowka na tereminje Carolina Eyckec je z wupředatym koncertom wčera w Berlinskim Zeissowym wulkoplanetariju němsku premjeru swojeje noweje tačele „Thetis 2086“ swjećiła. Dźensa slěduje dalša prezentacija nowostki na samsnym městnje. Za čas redakciskeho kónca běchu nimale wšitke zastupne lisćiki hižo předate.
Snadne wotpinanje pandemije
Budyšin/Zhorjelc. Roberta Kochowemu institutej buchu z Budyskeho wokrjesa 174 nowonatyknjenjow z koronawirusom a dwaj smjertnej padaj w zwisku z infekciju přizjewjene. Incidenca tu wučinja aktualnje 322,1. We wokrjesu Zhorjelc zwěsćichu 99 nowownatyknjenjow, dwaj schorjenej pacientaj staj zemrěłoj. Incidenca tam je so snadnje na 249,4 znižiła.
Tramwajkowu čaru ponowjeja
Krótkopowěsće (05.05.22)
Wurjadna „hłowna“ 3. junija
Budyšin. Wurjadna hłowna zhromadźizna Domowiny wotměje so pjatk, 3. junija 2022, wot 17 hodź. w Choćebuzu. To je prezidij zwjazkoweho předsydstwa třěšneho zwjazka na wuradźowanju wčera w Budyšinje rozsudźił. Zdobom je gremij naćisk změnow wustawkow organizacije schwalił, zo bychu wone žadanjam hamtskeho sudnistwa w Drježdźanach wotpowědowali, kotrež wustawki towarstwow juristisce pruwuje.
Niwow lědma změnjeny
Budyšin. Niwow incidency kaž tež nowych natyknjenjow z koronawirusom je nimale njezměnjeny. Roberta Kochowy institut mjenowaše dźensa za Budyski wokrjes incidencu 330,2 a 221 w běhu 24 hodźin zwěsćenych infekcijow. Za wokrjes Zhorjelc je RKI 212 natyknjenjow a dalšich šěsć smjertnych padow podał, incidenca je 263,4. Zhorjelski wokrjes njeje wčera žane ličby wozjewił.
Cil je bjezbarjernosć
