Krótkopowěsće (11.09.26)
Zeibina 70 lět
Bóšicy. Předewzaće Zeibina kumštne maćizny a technika w Bóšicach swjeći tele dny swoje 70lětne wobstaće. Hižo w třećej generaciji swójba předewzaće nawjeduje. Zeibina ma stejnišća w Bóšicach, Pólskej a Słowakskej. Tam zhotowjeja precizne dźěle z kumštnych maćiznow. W Hornjej Łužicy je předewzaće wot lěta 1965 zasydlene.
Wola wosadne předsydstwa
Drježdźany. W sakskich ewangelskich wosadach maja so nowe předsydstwa wolić. Wólby wotměja so 20. septembra, zdźěli zarjad krajneje cyrkwje. W přichodnej legislaturje so ličba předsydstwow jasnje pomjeńši. Přičina je zjednoćenje wosadow. Jich ličba je so wot 549 w lěće 2020 na 272 wosadow a wosadnych zwjazkow w lěće 2026 redukowała.
Přezmjezne lěkowanje zmóžnić
Krótkopowěsće (10.09.26)
Staršiske přinoški zniža
Radwor. Radworska gmejna klětu staršiske přinoški za žłobik, pěstowarnju a hort w swojich kubłanišćach zniži. To je gmejnska rada na swojim wčerawšim posedźenju wobzamknyła. Radźićeljo su sej toho wědomi, zo z tym kóšty za gmejnu stupaja. Přiwšěm je jim wažne, staršich wolóžić a jim signalizować, zo su dźěći w gmejnje witane. Klětu ma so pruwować, kak so tole na etat wuskutkuje.
Prezidij deleguje chór a brigadu
Chrósćicy. Prezidij Domowiny je wčera wobzamknył, chór Budyšin na 30. spěwanje sakskich chórow 12. decembra w Lipšćanskej sukelnicy delegować. 1. serbska kulturna brigada so klětu wot 16. do 20. junija na 30. festiwalu Alta Pusteria w Južnym Tirolu wobdźěli. Přichodne posedźenje zwjazkoweho předsydstwa budźe 25. septembra w Chrósćicach.
Tři filmy z Hornjeje Łužicy online
Krótkopowěsće (09.09.26)
Mjenje wučby wupadnyło
Drježdźany. Na sakskich statnych šulach dźeń a mjenje wučby wupaduje. To wuchadźa ze statistiki, kotruž je kultusowe ministerstwo dźensa dopołdnja wozjewiło. Po wšej Sakskej je w zašłym šulskim lěće 11,4 procenty mjenje hodźinow wupadnyło hač hišće lěto do toho. Na serbskich zakładnych šulach we Worklecach, Pančicach-Kukowje a Chrósćicach kaž tež na wyšimaj šulomaj we Worklecach a Ralbicach je porno tomu zdźěla wo wjele wjace hodźinow wupadnyło hač w šulskim lěće do toho.
Zawěsćenje budźe tuńše
Drježdźany. Wjele wobsedźerjow awtow změje po nowej regionalnej statistice w přichodźe mjenje za zawěsćenje swojeho jězdźidła płaćić. W Budyskim a Zhorjelskim wokrjesu kaž tež w Kamjenicy a Lipsku dohromady 315 000 wobsedźerjow z połnokaskowym zawěsćenjom z toho profituje. Tole je Zwjazk němskich zawěsćernjow dźensa zdźělił.
Přepruwuja techniku
Krótkopowěsće (08.09.26)
Towarstwa a iniciatiwy podpěrali
Budyšin. Wokrjes Budyšin je loni dohromady 226 towarstwow a čestnohamtskich iniciatiwow z cyłkownje 153 000 eurami podpěrał. Pjenjezy buchu přewažnje w projektach we wobłuku hladanja domizny a nałožkow zasadźene. Jeničce za to su zamołwići 62 000 eurow wudali. Srědki je Budyski wokrjes z etata Sakskeje wzał. Podpěra za jednotliwe projekty wučinješe 500 do 1 500 eurow.
Mjenje padow boreliozy
Drježdźany. W aktualnej sezonje je so w Sakskej wo wjele mjenje ludźi z boreliosu inficěrowało hač loni, jako fachowcy rekord zwěsćichu. Hač do kónca awgusta zličichu 1 240 padow, Krajny přepytowanski wustaw (LUA) dźensa informowaše. To je nimale štwórćina mjenje hač před lětom, jako registrowaše LUA w samsnej dobje nimale 500 padow wjace.
Chce w pjeć jězorach płuwać
Krótkopowěsće (07.09.26)
Zasadźa tři přidatne ćahi
Budyšin. Železniske předewzaće trilex wot dźensnišeho tři přidatne ćahi mjez Drježdźanami – Biskopicami – Zhorjelcom zasadźa. Kapacity chcedźa tak hač do januara powyšić. Zaměrowy zwjazk wuchodna Sakska (ZVVO) bě za to trěbne financne srědki wobzamknył. Předewzaće ODEG je ćahi k dispoziciji stajiło. Bliše informacije wo jězbnym planje zhonja sobujěducy na internetnej stronje .
Timmereversa rozžohnowali
Drježdźany. Heinricha Timmerversa su zawčerawšim swjatočnje jako biskopa Drježdźansko-Mišnjanskeho biskopstwa rozžohnowali. Mjez přitomnymi Božeje mšě w Drježdźanskej Dwórskej cyrkwi běchu serbscy duchowni, wěriwi ze serbskich wosadow, kaž tež sydom družkow. Próstwy je mjez druhim družka serbsce přednjesła.
Češa a biblioteki
Krótkopowěsće (04.09.26)
Nowa regionalna rěčnica
Wojerecy. Wot 1. septembra je Juliette Aulichowa ze Židźinoho nowa regionalna rěčnica na teritoriju župy „Handrij Zejler“ Wojerecy a ma naležnosće tamnišich kulturnych towarstwow, kubłanišćow a lokalnych skupin na starosći. W swojim swobodnym času wona pola docenta Mareka Krawca serbsce wuknje.
Octavian Ursu spřisahany
Zhorjelc. Na wčerawšim posedźenju Zhorjelskeje měšćanskeje rady bu nowy a bywši wyši měšćanosta Octavian Ursu (CDU) spřisahany. Jeho běchu wólbokmani wobydlerjo hižo kónc meje znowa do zastojnstwa wolili. Wčera předstaji měšćanosta swój program. Mjez druhim chce wón pěstowarnje ponowić a kulturne poskitki zachować. Tež ze susodnym městom Zgorzelecom chce wušo hromadźe dźěłać.
Žitawa za krajnu přehladku
Krótkopowěsće (03.09.26)
Na 3. łužiski lěsny marathon
Koćina. W lěsu mjez Ralbicami, Koćinu a Kulowom wotměje so přichodnu njedźelu 3. łužiski lěsny marathon. Wjace hač 100 zajimcow je so mjeztym přizjewiło. Start a cil budźetej w Koćinje. Běharjo startuja tež lětsa zaso we wšelakich kategorijach. Prěni raz je zdobom kolesowanje z gravelbikom móžne.
Warnowanski dźeń
Budyšin. Cyłoněmski warnowanski dźeń, na kotrymž chcedźa zamołwići warnowansku infrastrukturu přepruwować, budźe přichodny štwórtk, 10. septembra. Při tym pruwuja mjez druhim funkcionalitu appow na šmóratkach. W Budyskim wokrjesu testuja zdobom sireny, krajnoradny zarjad nětko zdźěli. K tomu wusyłaja sirenowej signalej „warnowanje před strachom“ a „zběhnjenje“. Sireny njejsu w kóždej wsy instalowane, tuž njebudu signale wšudźe słyšeć.
Čerpaja z programa
Krótkopowěsće (02.09.26)
Biskop Timmerevers wotstupił
Drježdźany. Drježdźansko-Mišnjanski biskop Heinrich Timmerevers je dźensa wotstupił. Kaž biskopstwo w Drježdźanach zdźěli, je Timmerevers bamža wo dočasne wuwjazanje ze słužby prosył. Přichodnu sobotu woswjeći 74lětny swój slěborny biskopski jubilej. Heinrich Timmerevers je wot lěta 2016 biskop Drježdźansko-Mišnjanskeho biskopstwa.
Fararka so rozžohnuje
Slepo. Po dwanaće lětach skutkowanja w Slepjanskej wosadźe chce so fararka Jadwiga Malinkowa z nowej dušepastyrku we Wojerowskej chorowni stać. To je wona wčera na swojej stronje na Instagramje zdźěliła. Zdobom chce wona w cyrkwinskim wokrjesu jako nadregionalna serbska fararka skutkować. Malinkowa wostanje hišće tři měsacy ewangelska fararka w Slepom.
Ulrich Pogoda zemrěł
Krótkopowěsće (01.09.26)
Lěwica-Zeleni: Žanu centralizaciju!
Budyšin. Frakcija zwjazka Lěwica-Zeleni we wokrjesnym sejmiku starosći so dla planow, stejnišćo dźěłoweho sudnistwa w Budyšinje rozpušćić. Po měnjenju frakcije je drje diskusija wo modernych a eficientnych strukturach zmysłapołna, ale zdobom warnuja před centralizowanjom na kóšty regionow zwonka metropolow. W konkretnym padźe dźe wo přizamknjenje stejnišća w Drježdźanach.
Franke so rozžohnował
Budyšin. Jednaćel marketingoweje towaršnosće Hornja Łužica-Delnja Šleska (MGO) Olaf Franke je so wčera po jědnaće lětach ze zastojnstwa rozžohnował. Wažnej běštej jemu turistiske wuwiće Hornjeje Łužicy kaž tež zhromadne dźěło wšitkich akterow w kónčinje. Krajny rada Budyskeho wokrjesa Udo Witschas (CDU) dźakowaše so jemu za jeho angažement. Jeho naslěduje Nicole Huber.
Wopačna powěsć ludźi zamyla
Krótkopowěsće (31.08.26)
Towarstwo za swobodnu šulu
Njebjelčicy. Iniciatiwa za Swobodnu serbsku šulu chce spěchowanske towarstwo załožić. Čłonka powšitkownowu- žitneje tzwr Kristin Rječkec zdźěli, zo přeprošuja staršich, dźědow, wowki a dalšich zajimcow 11. septembra w 16.30 hodź. do Njebjelčic, na Lipowu 15. Tam staw přihotow za załoženje šule, kotrež za šulske lěto 2028/2029 planuja, předstaja.
Sudnistwo w Budyšinje zawrěć?
Drježdźany. Sakske knježerstwo pruwuje pozdatnje zawrěće dźěłoweho sudnistwa w Budyšinje. Kaž sakska justicna ministerska Constanze Geiert njedawno w Žitawje rjekny, njedźěłatej sudnistwje w Šwikawje a Budyšinje efektiwnje. W Budyšinje su aktualnje štyrjo sudnicy přistajeni, wjacore městna su njewobsadźene. Hač sudnistwo woprawdźe zawrěja, wo tym rozsudźi krajny sejm.
Swoje wuswědčenja dóstali
