Krótkopowěsće (26.06.25)
Móst měra chcedźa wupyšić
Budyšin. Budyski Móst měra ma so k wosebitym přiležnosćam wupyšić. Na Dnju Hornjeje Łužicy 21. awgusta maja so módro-žołte banćiki přičinić a na Dnju němskeje jednoty 3. oktobra budu tole čorno-čerwjeno-złote banty. Namjet je frakcija AfD wčera na posedźenju Budyskeje měšćanskeje rady zapodała. Wjetšina zapósłancow je přihłosowała. Serbske barby pak so jewić njebudu.
Nowa nawodnica muzeja
Wojerecy. Peg Koedel je nowa nawodnica Wojerowskeho Konrada Zusoweho kompjuteroweho muzeja ZCOM. W Rostocku rodźena je „nazhonita ekspertka za digitalne archiwowanje a digitalne kubłanje“, w zdźělence institucije rěka. Koedel chce wuspěšne dźěło swojeje předchadnicy Andreje Pittmann dale wjesć a muzej jako inowatiwne wuknjenske a dožiwjenske městno za wšitke generacije sylnić.
„Chlěb republiki“ napjekli
Krótkopowěsće (25.06.25)
Zjednoćenju přihłosowali
Budyšin. Po tym, zo běše wokrjesny sejmik w Zhorjelcu zjednoćenju Zaměroweho zwjazka Hornja Łužica-Delnja Šleska (ZVON) a Wobchadneho zwjazka Hornje Łobjo (VVO) přihłosował, su so póndźelu tež radźićeljo Budyskeho wokrjesneho sejmika za to wuprajili. Čłonojo zwjazka VVO su fuziji w minjenym tydźenju přihłosowali, čłonojo ZVON plan na pjatkownišim posedźenju schwala. Fuzija zmóžnja mjez druhim jednotny wobchadny tarif za wuchodnu Saksku kaž tež zhromadny informaciski system.
Online-galerija zaso přistupna
Budyšin. Problemow na serweru dla njeje QR-code w přinošku Předźenaka wo Chróšćanskim swjedźenskim ćahu składnostnje 800. róčnicy přez kónc tydźenja spušćomnje fungował. Online-galerija je nětko zaso přistupna.
Brechowa nakładnistwo wopytała
Krótkopowěsće (24.06.25)
Marathon do přestawki
Drježdźany. Sakski krajny sejm ma do lětnjeje přestawki hišće marathon posedźenjow zmištrować. Jutře a štwórtk chce parlament doskónčnje wo dwójnym etaće wuradźować. Dźensa wobjednawaja najprjedy druhe temy. W aktualnej hodźinje so zapósłancy wo wuskutkach horcoty kaž tež wo slědźenju w swobodnym staće dorozumja. Po tym frakcije wo wjacorych próstwach stronow rozsudźa.
Železniska čara je zawrjena
Kamjenc. Twarskich dźěłow na nastupišću Bischheim-Gersdorf dla wostanje čara linije S8 mjez Połčnicu a Kamjencom hač do 8. awgusta dospołnje zawrjena. Kaž Němska železnica zdźěla, zarjaduja za potrjecheny wotrězk narunanski transport z busami. Městna w tychle jězdźidłach su wobmjezowane, tak zo kolesa sobu njebjeru.
Serbski institut podpěrać
Krótkopowěsće (23.06.25)
Diskusije hižo do wuradźowanja
Budyšin. Ma němska chorhoj přichodnje před zarjadniskimi twarjenjemi Budyskeho krajnoradneho zarjada a před šulemi wokrjesa zmawować? Wo tym chcedźa dźensa na posedźenju wokrjesneho sejmika wuradźować. Hižo w předpolu so kontrowersnje wo tym rěči. Dwaj namjetaj předležitej: jedyn je wot zarjadnistwa wokrjesa, dalši je AfD zapodała.
Saněrowanje nuznje trěbne
Choćebuz. Kraj Braniborska je nětko spěchowanske srědki za ponowjenje stadiona koparskeho towarstwa Energija Choćebuz schwalił. Za to su w etaće za lěće 2025/2026 dwójce jedyn milion eurow zaplanowali. Za přizwolene srědki so towarstwo dźakuje. Prezident Sebastian Lemke pak na to skedźbni, zo budźe w přichodźe hišće wjace pjenjez trěbnych.
Algi so spěšnje wupřestrěwaja
Krótkopowěsće (20.06.25)
Köpping w Budyšinje
Budyšin. Sakska ministerka za socialne a strowotu Petra Köpping je wčera w Budyšine pobyła. W Budyskej chorowni so wona wo tym wobhoni, kak krok po kroku medicinsku strategiju 2030 přesadźa. Ministerka wopyta w sprjewinym měsće zdobom kongres hladarjow Hornjołužiskich klinikow. Köpping hódnoćeše předewšěm jich wuznamne dźěło.
W bibliotece čitali
Choćebuz. W delnjoserbskej bibliotece na dworje Choćebuskeho Serbskeho domu bě wčera čitanje z knihi „Wurzeln und Wandel der Lausitz“. Tam čitachu Ingrid Hustetowa, Źilka a Stefanie Krawcojc. Sobudźěłaćer biblioteki Bernd Pitkunings zarjadowanje moderěrowaše a wjedźeše z wudawaćelku Hannelore Schmidt-Hoffmann interview. Nimo toho zaspěwa swójskej spěwaj a předčita swójski tekst.
Žada sej škit wěrićelow
Krótkopowěsće (19.06.25)
Warnowanski stawk w ansamblu
Berlin/Budyšin. Aktualne jednanja mjez Zjednoćenstwom němskich jewišćow a dźěłarnistwami Unisono, GDBA, BFFS a VdO wo zwyšenju mzdow a přiměrjenju přiražkow za přistajenych dźiwadłow a orchestrow su „dotal njewunošne“. Tohodla namołwjachu dźěłarnistwa swojich čłonow wčera, zo njech stawkuja. Tež w Serbskim ludowym ansamblu wzdachu so wjacori sobudźěłaćerjo běrtlk hodźiny dołho dźěła, zo bychu „ćišć na tarifoweho partnera zwyšili“.
Dóstanu spěchowanje
Berlin. We wobłuku zwjazkoweho programa „Aller.Land – zusammen gestalten. Strukturen stärken“ su wčera w Berlinje 30 regionalnych kulturnych předewzaćow za druhu spěchowansku dobu wozjewili. Podpěru we wobjimje 1,5 milionow eurow dóstanje mjez druhim kulturny rum Hornja Łužica-Delnja Šleska za swój projekt „Let’s Talk!“.
Jězusa z bónčkom skóncowali
Krótkopowěsće (18.06.25)
Schadźuja so w Južnej Africe
Johannesburg. W Johannesburgu w Južnej Africe schadźuje so tele dny centralny wuběrk swětoweje rady cyrkwjow na swoje prawidłowne wuradźowanja. Na zetkanju wobdźěli so tež dr. Lubina Malinkowa z Rakec, kotraž je jako delegatka němskeje ewangelskeje cyrkwje čłonka centralneho wuběrka. Nimo zarjadniskich prašenjow steja w srjedźišću zetkanja aktualne prašenja wokoło globalnych konfliktow, kiž tež cyrkwinske žiwjenje potrjechja.
Dalši přinošk wozjewili
Budyšin. Maćica Serbska je w swojej Instagram-rubrice „Mudrišo z Maćicu“ dalši přinošk wozjewił. Tónraz wěnuje so towarstwo posesiwnym a refleksiwnym pronomenam. Pod hesłom „jeho abo swój“ su tam pokiwy za wužiwanje podali. Prěni raz je Maćica Serbska 25. měrca přinošk w mjenowanej rubrice wozjewiła.
Pjenjezy za wuchowansku słužbu
Krótkopowěsće (17.06.25)
Festiwal bjez hosći z Irana
Budyšin. Přihotowanski wuběrk Mjezynarodneho folklorneho festiwala Łužica – Łužyca – Lausitz je rozsudźił, iranskemu ansamblej Araz-Ildirim wobdźělenje na festiwalu wotprajić. Přičina je dlijenje při wustajenju trěbnych wizumow. Planowane wustupy tamnišu azerbajdźansku mjeńšinu reprezentowaceho cyłka bjez narunanja wupadnu. Program festiwala bu tomu přiměrjeny a je mjeztym na internetnej stronje Domowiny wozjewjeny.
Namjety prawje bórze zapodać
Budyšin. Domowina namołwja, namjety kandidatow za Myto Domowiny, Myto Domowiny za dorost a Čestne znamješko Domowiny zapodać. Wotpowědny formular je na internetnej stronje www.domowina.de wozjewjeny. Namjety hodźa so z mailku abo w zarjedźe Domowiny zapodać. Přizjewjenska doba kónči 30. junija.
Twarja truty za Ukrainu
Krótkopowěsće (16.06.25)
Wuradźuja wo přichodźe
Zhorjelc. Astrofyzikarjo z cyłeho swěta schadźuja so tónle tydźeń w Zhorjelcu. Na mjezynarodnej konferency wobdźěli so něhdźe 550 slědźerjow. Po słowach designowaneho załožerja Astrocentruma Łužica Günthera Hasingera je to najwažniše zarjadowanje swojeho razu na swěće. Mjez dr. chcedźa přichod najwjetšeho radijoweho teleskopa rozjimać.
Myto filmowemu festiwalej
Berlin. Nysowy filmowy festiwal (NFF) bu minjeny pjatk z wosebitym mytom Myta Wilhelma Frickeho wuznamjenjeny. Lawdatorka dr. Grit Lemcyna wuzběhny wosebje „resiliencu a renitencu“ towarstwa Kunstbauerkino, kotrež festiwal najebać „skandaloznje snadny budget“ w třoch krajach lěto wob lěto wuhotuje. Z mytom počesća Zwjazkowa załožba za předźěłanje diktatury SED „angažement za demokratiski dialog w zmysle europskeho dorozumjenja“.
Spytaja baćony přesydlić
Krótkopowěsće (13.06.25)
Serbska skupina zaručena
Drježdźany. Serbska dźěćaca skupina w Drježdźanskim nowym měsće je dźakowano přidatnym přizjewjenjam najprjedy hač do klětušeho zaručena. Tole zdźěli Christoph Cyž, předsyda tamnišeho towarstwa „Stup dale“, po wčerawšej rozmołwje ze zastupjerjomaj Serbskeho šulskeho towarstwa (SŠT) Romanom Grzybom a Marlis Młynkowej. SŠT je nošer skupiny dnjoweje maćerje Sabiny Wagneroweje.
SN na mjezynarodnej konferency
Nova Gorica. Zastupjerjo organizacije Midas – nowinow mjeńšinow – schadźuja so tele dny na generalnej zhromadźiznje w kulturnej stolicy Europy, słowjenskim hraničnym měsće Nova Gorica. Hosćićel je lětsa nowina Primorski dnevnik. Serbske Nowiny (SN) zastupuje tam wyša redaktorka Bianka Šeferowa. Dźensa rozjimaja čłonojo Midas połoženje nowinow mjeńšinow.
Dalši kandidat w Kamjencu
