Krótkopowěsće (23.05.24)
Kalender znowa wušoł
Budyšin. W Ludowym nakładnistwje Domowina je wušoł nowy nakład kalendra „Łužica – Łužyca – Lausitz“ za lěto 2025. Znowa wabja fotografije Maćija Bulanka za najrjeńše blečki Łužicy kaž tež za tradicije a wašnja Serbow. Nimo toho skići kalender městno za noticy a zapiski. Produkt je po cyłym hornjo- a delnjoserbsce kaž tež němsce popisany a je wot nětka na předań.
Personal stawkuje
Wojerecy. W klinikumje Łužiskeje jězoriny stawkuja dźensa přistajeni, kotřiž su w dźěłarnistwje Verdi organizowani. Přičina su trajace tarifowe jednanja. Poslednje wuradźowanje 29. apryla wuslědka njeměješe. Verdi žada sebi wyše mzdy, kaž tež płaćenje inflaciskeho pjenjeza a wjace swobodnych dnjow.
Woidke a Kretschmer pola LEAG
Krótkopowěsće (22.05.24)
LND a SPL na „Swěće knihi“
Budyšin/Praha. „Das Buch – německojazyčná literatura“ je hesło Francej Kafce składnostnje jeho 100. posmjertnin wěnowanch 29. mjezynarodnych knižnych wikow „Svět knihi“. Wone wotměja so wot jutřišeho hač do 26. meje w Praze. Wospjet prezentujetej so na nich tež Ludowe nakładnistwo Domowina ze swójskim stejnišćom a Towarstwo přećelow Serbow (SPL) z čitanjemi mjez druhim Milana Hrabala a Lukáša Novosada.
Wučerjow we Łužicy wukubłuja
Zhorjelcu. Sakska wukubłanje wučerjow we wjesnych kónčinach dale skrući. Ministerstwje za wědomosć a kultus, Uniwersita Lipsk a Wysoka šula Žitawa/Zhorjelc chcedźa jutře w Zhorjelcu dokument za studijny poskitk „wučerstwo na wyšej šuli z wosebitej pedagogiku“ podpisać. Wukubłanje budźe přewažnje na Wysokej šuli Žitawa/Zhorjelc.
Dźeń tykowanych domow
Krótkopowěsće (21.05.24)
Pólski film počesćeny
Zhorjelc. Film „Tyle co nic“ je hłowne myto 21. Nysoweho filmoweho festiwala dobył, kotrež spožči Sakske statne ministerstwo za wědomosć, kulturu a turizm. Pólski režiser Grzegorz Dębowski přija z rukow statneje ministerki Barbary Klepsch (CDU) njedźelu wječor w Zhorjelcu 10 000 eurow. Jury w kotrejž skutkuja fachowcy z Němskeje, Pólskeje a Čěskeje su mjez dźewjeć filmami rozsudźili.
Myto dr. Madlenje Norbergowej
Podstupim. Lětuše Myto Miny-Witkojc spožči so dr. Madlenje Norbergowej. Społnomócnjeny braniborskeho knježerstwa za naležnosće Serbow Tobias Dünow rjekny, zo je wědomostnica přikład za prócowanje wo zachowanje delnjoserbskeje rěče. Hižo čas žiwjenja angažuje so wona powołansce, priwatnje kaž tež čestnohamtsce w tutym zmysle a to nic jenož w Delnjej Łužicy ale tež za mjezami Braniborskeje.
Zetkanje dźiwadłow zahajene
Krótkopowěsće (17.05.24)
Domowina namołwja wolić hić
Budyšin. Z namołwu, na komunalnych, Europskich a krajnosejmowych wólbach so wobdźělić, je so prezidij Domowiny za serbsku zjawnosć wobroćił. „W demokratiji smě kóždy sobu skutkować. Tohodla je trěbne, zo zasadźamy so ze swojim hłosom za towaršnosć, kotraž so přez tolerancu, mjezsobny respekt a mnohotnosć wuznamjenja“, rěka we wčera wozjewjenej namołwje.
Z Mytom Viadriny počesćeny
Frankfurt nad Wódru. Z 23. mytom Viadridny je Europska uniwersita Frankfurt nad Wódru wčera němskeho politologu a bywšeho direktora Němskeho historiskeho instituta we Waršawje, prof. dr. Klausa Ziemera, počesćiła. Lawreat je hižo lětdźesatki znaty jako wupokazany znajer a wuběrny analyst němsko-pólskich poćahow.
Weber nachwilny intendant
Krótkopowěsće (16.05.24)
Słowakski premier stabilny
Bratislava. Strowotniski staw słowakskeho ministerskeho prezidenta Roberta Fica je po atentaće na njeho „stabilny, ale dale jara chutny“. Tole je zastupowacy ministerski prezident Robert Kaliňák dźensa słowakskej powěsćerni TASR prajił. Po informacijach chorownje su Fica pjeć hodźin operowali. Atentatnik bě wčera na 59lětneho třělał a jeho ćežko zranił.(Čitajće dale na stronje 2.)
Łužičana za prezidenta wuzwolili
Drježdźany. Twarski předewzaćel Uwe Nostitz z Bělšec je nowy prezident sakskeho foruma rjemjesła. 62lětneho twarskeho inženjera su wčera w Drježdźanach z jasnej wjetšinu hłosow za naslědnika Drježdźanskeho třěchikryjerskeho mištra Jörga Dittricha wuzwolili. Dittrich znowa kandidował njeje. Wón je mjeztym prezident Centralneho zwjazka rjemjesła Němskeje a wostanje wiceprezident w Sakskej, forum rjemjesła zdźěla.
Zrěčenje podpisali
Krótkopowěsće (15.05.24)
Zaso wjace swójbow w Sakskej
Kamjenc. W Sakskej bydli zaso wjace swójbow z njepołnolětnymi dźěćimi hač hišće před dźesać lětami. Loni su nimale 417 000 swójbow z małolětnymi dźěćimi registrowali, 2013 běše jich 375 000 swójbow, statistiski krajny zarjad w Kamjencu składnostnje dźensnišeho Dnja swójby zdźěli. Porno tomu je ličba tajkich swójbow 1996 hišće 561 000 była. Loni wučinjachu mandźelstwa ze swojimi dźěćimi 54 procentow swójbow.
Strach wohenjow dale přiběra
Pirna. Strach lěsnych wohenjow w Sakskej přiběra. Předewšěm na sewjeru Zhorjelskeho a Budyskeho wokrjesa je po informacijach statneho zawoda Sakski lěs jara suche. Mjeztym su tam zamołwići warnowanski schodźenk pjeć postajili. Pobrachowacych spadkow dla móhła so situacija dale přiwótřić.
Češa pija mjenje piwa
Krótkopowěsće (14.05.24)
Start za filmowy festiwal
Žitawa. W Žitawje zahaja dźensa wječor 21. Nysowy filmowy festiwal. W dźiwadle Gerharta Hauptmanna běži film „Ellbogen“, portret młodeje žony. Rjad Fokus ma lětsa titul „Female Perspektives“ a wopřija produkcije z Němskeje, Čěskeje a Słowakskeje. Festiwal wotměwa so w jědnaće městach, w 19 kinach Hornjeje Łužicy, Pólskeje a Čěskeje, mj. dr. w Zhorjelcu, Zgorzelecu, Žitawje, Liberecu, Varnsdorfje, Budyšinje a Běłej Wodźe.
Wjele prawicarskich kandidatow
Budyšin. We wšěch wólbnych wokrjesach nastupi prěni raz k wólbam Budyskeho wokrjesneho sejmika „Zwjazk Hornja Łužica“. Neonacistiscy „Swobodni Saksojo“ a zastupjerjo prawicarskeho protestneho hibanja z dwělomnymi chorhojemi mjez druhim při B 96 su hromadźe 39 kandidatow nastajili. Na wólbnej lisćinje je nimo wučerki tež wjele młódšich ludźi zastupjenych.
Ludowu próstwu hišće podpisać
Krótkopowěsće (13.05.24)
Jüngel znowa derby dobył
Hamburg. Marvin Jüngel z Kamjenca je swój titul jako dobyćer jěchanskeho wubědźowanja Hamburgskeho derbyja zakitował. Před wjace hač 25 000 přihladowarjemi je wón znaty módry banćik wospjet dobył. Kaž 22lětny po wubědźowanju zwurazni, bě jemu wažne dopokazać, zo njebě dobyće loni wuwzaće.
Dantz za fairnosć do wólbow
Kamjenc. Wyši měšćanosta Kamjenca Roland Dantz je ludnosć namołwjał, wšěch požadarjow wo mandaty při komunalnych a europskich wólbach respektować. Wón reaguje na napady na běrowy stron AfD a Lěwica a na přiběrace skóncowanje wólbnych plakatow. Dantz: „Tajki wandalizm so na nas wšěch měri, mamy so zhromadnje za demokratiju a swobodnu wotewrjenu towaršnosć zasadźować!“
„Templ“ čěskeho lodohokeja
Krótkopowěsće (10.05.24)
Zwjazk móže dźěłać započeć
Budyšin. Krajna direkcija je załoženje zaměroweho zwjazka za Kamjensku Lessingowu kupjel dowoliła. Z tym móže zwjazk, wobstejacy z Budyskeho wokrjesa a města Kamjenc, dźěłać započeć, rěka w nowinskej zdźělence wokrjesa. Kupjel ma 31,5 milionow eurow płaćić. Z toho je 28,4 miliony eurow spěchowanskich srědkow z programa za změnu strukturow. 2027 chcedźa ju twarić započeć.
Lutowarnju počesćili
Budyšin. Budyska wokrjesna lutowarnja słuša k najangažowanišim firmam „Tydźenjow wotewrjenych předewzaćow Sakskeje“. Wusahowace, na praksu wusměrjene zarjadowanje k powołanskej orientaciji sakskaj ministraj za kultus, Christian Piwarz (CDU), a hospodarstwo, Martin Dulig (SPD), a šef agentury za dźěło w Sakskej Klaus-Peter Hansen z čestnym wopismom připóznachu.
„Treningowe městačko“ natwarili
Krótkopowěsće (08.05.24)
Wuswobodźenje wopominali
Kamjenc. Pod hesłom „Wójnu dobyć njedosaha. Wažniše je, měr organizować!“ su Kamjenčenjo na wopomnišću něhdyšeho wonkowneho koncentraciskeho lěhwa Kamjenc-Herrental dźensa na wuswobodźenje wot nacionalsocializma a na kónc Druheje swětoweje wójny spominali. Zarjadowanje organizowało běše spěchowanske towarstwo wopomnišća.
Jednanja zwrěšćili
Běła Woda. Tarifowe jednanja za w Běłowodźanskej chorowni su zwrěšćili. Zawčerawšim su so tam zastupjerjo dźěłodawarjow a dźěłarnistwa zetkali. Najebać dlěše rozmołwy njejsu so na zrěčenje dojednali. Dźěłarnistwo verdi žada sej inflaciske wurunanje we wobjimje 3 000 eurow za čłonow dźěłarnistwa a zwyšenje tarifa wo dwaj procentaj wot lětušeho apryla. Nětko w chorowni dalše stawki hroža.
Sakska pod přerězkom
Kamjenc. Přerězna mzda je w lěće 2022 wo 5,8 procentow stupała, zdźěli sakski statistiski zarjad wčera w Kamjencu. Tak zasłužichu ludźo w swobodnym staće wob lěto přerěznje 23 536 eurow. Po cyłym Zwjazku pak bě přerězna mzda 25 830 eurow. Z tym leži Sakska pod cyłoněmskim přerězkom.
