Krótkopowěsće (26.06.20)

pjatk, 26. junija 2020 spisane wot:

Tydźeń bjez nowonatyknjenych

Budyšin. Hižo sydom dnjow njesu w Budyskim wokrjesu žanych nowych infekcijow z koronawirusom zwěsćili. Wot spočatka pandemije je tu dotal dohromady 501 koronapadow, z nich je 19 ludźi zemrěło. 480 je so mjeztym wustrowiło. Hišće dwě wosobje stej aktualnje schorjenej, 32 ludźi je w karantenje. Za­wčerawšim su wosom testow přewjedli.

Wuběrkam skoro runostajena

Podstupim. Rada za naležnosće Serbow při Krajnym sejmje Braniborskeje je dźeń a bóle „normalnemu“ wuběrkej parlamenta runostajena. To wuchadźa z wčera wozjewjeneho noweho jednanskeho porjada sejma. Tam je gremij w 17 paragrafach zakótwjeny. Samostatny wot­rězk 12 rjaduje dźěławosć serbskeje rady we wobłuku skutkowanja parlamenta.

Jednaćel zastojnstwo złoži

Krótkopowěsće (25.06.20)

štwórtk, 25. junija 2020 spisane wot:

Prezidentka do karanteny

Bratislava. Słowakska prezidentka Zuzana Caputova je so wčera do prewen­tiwneje karanteny podała. Sobudźěłaćer wot njeje bě do kontakta z pozitiwnje na ko­ronu testowanej wosobu přišoł. Planowane zetkanje z awstriskim zwjazkowym prezidentom Alexanderom Van der Bellen chcedźa nachwatać. Bywša libe­ralna wobydlerska prawiznica je lěto w zastojnstwje a po naprašowanjach z wotstawkom najwoblubowaniša politikarka EU-kraja.

Třeće městno sej zdobyli

Choćebuz. W zwjazkowym wubědźowanju šulerskich firmow je sej projektowa skupina Delnjoserbskeho gymnazija w Choćebuzu ze swojej rejwanskej kofejownju „Kral“ 3. městno zdobyła. Do toho su hižo wotpowědne Braniborske wubědźowanje dobyli. Loni w awgusće je 15 jědnatkow pod nawodom wučerja Guida Kabischa ideju předewzaća wuwiło.

Pomocny paket wobkrućili

Krótkopowěsće (24.06.20)

srjeda, 24. junija 2020 spisane wot:

Napis budźe dwurěčny

Pančicy-Kukow. Na twarjenju zarjadniskeho zwjazka Při Klóšterskej wodźe w Pančicach-Kukowje připrawja po saněrowanju dwurěčny napis. Po wčerawšim rozsudźe zhromadźizny zwjazka budźe serbski napis horjeka, němski pod nim. Wobaj změjetej samsnu wulkosć. Dokelž wčerawše wothłosowanje z dnjowym porjadom připowědźene njebě, je móžno, zo je wospjetuja.

Rößler dale prezident kuratorija

Aue-Bad Schlema. Prezident Sakskeho krajneho sejma dr. Matthias Rößler je dale tež prezident kuratorija Dnja Saksow. Čłonojo kuratorija su jeho wčera na dobu hač do lěta 2025 w zastojnstwje wobkrućili. Wiceprezident je Freibergski wyši měšćanosta Sven Krüger. Koronakrizy dla, su lětuši Dźeń Saksow w Aue-Bad Schlemje wotprajili, nachwataja pak jón tam 2023. Klětu budźe swjatk w Freitalu.

Nowa CD Budyskeje wosady

Krótkopowěsće (23.06.20)

wutora, 23. junija 2020 spisane wot:

Pabst wostanje dalšu dobu

Kamjenica/Budyšin. Na Kamjeničanskim změrcowskim sudni­stwje za je­wišćo staj so Serbski ludowy ansambl a jeho chórowy direktor Andreas Pabst wčera­ dojednałoj, zo Pabst dalšu hrajnu dobu­ hač do julija 2021 swoje dźěło w ansamblu wukonja. Loni w oktobrje njebě SLA zrěčenje z nim podlěšił, na čož Andreas Pabst skoržeše. Wot lěta 2016 je wón­ chórowy direktor ansambla.

Kostimy nimale financowane

Choćebuz. Za serbski eksperimentalny film móžachu młode wuměłče z Cho­ćebuza 1 300 eurow nazběrać. Kaž Bramborske serbske radijo rozprawja, hodźa so po słowach filmowcow-bywšich šulerjow Delnjoserbskeho gymnazija z toho znajmjeńša kostimy zapłaćić. Wo prašenju „Je so serbskosć skoro zhubiła?“ rozmysluja wuměłče wokoło Nory Wendt a jeje band Concentration.

Pandemija rekonstrukciju haći

Krótkopowěsće (22.06.20)

póndźela, 22. junija 2020 spisane wot:

Helga Schubert wuznamjenjena

Celovec. Myto Ingeborg Bachmann dósta­ wčera w Berlinje rodźena spisowaćelka Helga Schubert. 80lětna je so z tekstom wo ćežkim poćahu mjez maćerju a dźowku přećiwo 13 dalšim kandidatam přesadźiła. Hižo 1980 bě Schubert přeprošena na čitanje we wobłuku z 25 000 eurami dotěrowaneho wuznamjenjenja, kotrež płaći jako jedne z najwažnišich němskorěčneje literatury. Tehdy pak njesmědźeše wona z Němskeje demokratiskeje republiki do wukraja jěć.

Serbska rada w livestreamje

Podstupim. Dohromady 72 zajimcow je minjeny pjatk na internetnej stronje Krajneho sejma Braniborskeje posedźenje Rady za naležnosće Serbow prěni raz přez livestream sćěhowało. Hačrunjež činja­chu to wobmjezowanja koronakrizy dla – wopytowarjam je tuchwilu zakazane w twarjenju krajneho sejma přebywać –, su nětko techniske wuměnjenja date tež dalše posedźenja rady live wusyłać.

Ćahi zaso normalnje jězdźa

Krótkopowěsće (19.06.20)

pjatk, 19. junija 2020 spisane wot:

Za dwurěčne wuswědčenja

Podstupim. Šulerska rada wokrjesa Sprjewja-Nysa je iniciatiwu za dwurěčne němsko-serbske wuswědčenja nastorčiła. Jeje předsyda Justin Pigol je ju dźensa na posedźenju Rady za naležnosće Serbow w Podstupimje předstajił. Šulerska rada bě zwěsćiła, zo jenož w Delnjoserbskim gymnaziju Choćebuz a w Bórkowskej šuli „Mina Witkojc“ braniborske zarjadniske postajenje nastupajo dwurěčne wuswědčenja na kubłanišćach ze serbskej wučbu dodźerža.

Dalšu infekciju zwěsćili

Budyšin. Mjez 46 testami su w Budyskim wokrjesu wčera dalšu infekciju z koronawirusom zwěsćili. Cyłkowna ličba­ natyknjenych je wot wčerawšeho dale 501. Po dźensnišim stawje su tři wosoby schorjene. Aktualnje je 45 wosobow w karantenje.

Rekordne wobydlerstwo

Wiesbaden. Zwjazkowy statistiski zarjad­ je rekordnu ličbu wobydlerjow Němske­je zwěsćił. Loni zličichu dohromady 83,2 milionaj ludźi, štož je něhdźe 15 000 wjace hač lěto do toho. Najwjetši bě rozrost w Berlinje, porno tomu je so lič­ba wobydlerstwa w Durinskej, Saksko-Anhaltskej a Posaarskej najbóle pomjeńšiła.

Krótkopowěsće (18.06.20)

štwórtk, 18. junija 2020 spisane wot:

14 awtorow so wubědźuje

Celovec. 44. dny němskorěčneje literatury zahaja dźensa w korutanskim Celovecu. Dohromady 14 awtorow z Něm­skeje, Awstriskeje a Šwicarskeje wubědźuje so tam wo 25 000 eurow hódne Myto Inge­borg Bachmann. Sydom jurorow w in­terneće live wo čitanych tekstach disku­tuje. Myto dopomina na basnicu Ingeborg Bachmann (1926–1973) a je jedne z najwažnišich wuznamjenjenjow za němskorěčnu literaturu.

Počesća ekonoma Sena

Frankfurt n. M. Indiski ekonom a filozof Amartya Sen dóstanje 25 000 eurow hódne Měrowe myto Němskeho knihikupstwa. 1933 w Shantiniketanje rodźeny a dźensa w Cambridgu (USA) bydlacy Sen je so čas žiwjenja za sprawnu ekonomiju zasadźał. Jako prěni je pokazał, zo njeje pobrachowaca cyroba přičina wulke­ho hłodu, ale jeje wopačne rozdźělenje.

Jednanski porjad wudospołnić

Krótkopowěsće (17.06.20)

srjeda, 17. junija 2020 spisane wot:

W Sakskej nětko mjenje ludźi bydli

Kamjenc. Wobydlerstwo Sakskeje je kónc­ lěta 2019 snadnje woteběrało. Kaž statistiski krajny zarjad w Kamjencu dźensa zdźěli, bydleše 31. decembra 2019 w swobodnym staće 4 071 971 ludźi, něhdźe­ 6 000 mjenje hač lěto do toho. Zhorjelski wokrjes słuša k tym štyrjom z najwjetšim spadom wobydlerstwa. Najbóle přiběrało je wone w Lipsku.

Wopominaja 17. junij 1953

Berlin/Zhorjelc. Ze zarjadowanjemi w Berlinje a w Sakskej wopominaja dźensa wopory ludoweho zběžka w NDR 17. junija 1953. Na Berlinskim pohrjeb­nišću Seestraße wočakowachu zwjaz­kowu minister­ku justicy Christinu Lambrecht a knje­žaceho měšćanostu Michaela Müllera (wobaj SPD). W Zhorjelcu chcyše so wyši měšćanosta Octavian Ursu­ (CDU) na wopominanju wobdźělić.

Alternatiwny poskitk

Krótkopowěsće (16.06.20)

wutora, 16. junija 2020 spisane wot:

Dalšu infekciju zwěsćili

Budyšin Mjez 59 testami, kotrež su w Budyskim wokrjesu přewjedli, zwě­sćichu wčera dalši pad koronainfekcije. Ličba natyknjenych wučinja nětko dohromady 500. Aktualnje je dźesać scho­rjenych, pjatnaćo su w karantenje. 471 wosobow je so mjeztym wustrowiło, 19 pacientow je zemrěło.

Pomoc za sakske pomniki

Berlin/Drježdźany. Z 826 000 eurami spěchujetej Zwjazk a Sakska w zwisku z programom „Narodne hódne kulturne pomniki“ štyri sakske pomniki. Z pje­njezami chcedźa židźanu tapetu chin­skeho kabineta na hrodźe Wildenfels a špundowanje w modlerni Ochranowskeje bratrowskeje wosady wobnowić. Dale maja so w Drježdźanach narowne pomniki na ewangelskim Janskim a Eliasowym kaž tež na bywšim kěrchowje cyrkwje Našeje knjenje zwuporjedźeć.

Šupy a nercy třěleć dowolene

Krótkopowěsće (15.06.20)

póndźela, 15. junija 2020 spisane wot:

W Braniborskej AfD wobkedźbuja

Podstupim. Braniborski wustawowy škit po dlěšim pruwowanju dospołnu AfD wobkedźbuje. To zdźěli nutřkowne ministerstwo powěsćerni dpa dźensa w Podstupimje. Rozsud zwisuje z wuwićom po wuzamknjenju krajneho a frakciskeho šefa Andreasa Kalbitza ze strony, mjez druhim ze změnu jednanskeho porjada frakcije krajneho sejma, zo móhł Kalbitz jej dale přisłušeć.

Myto Brücke-Most do Israela

Zhorjelc. Bywšu wonkownu ministerku Israela Tzipi Livi počesća z lětušim Mjezynarodnym mytom Brücke-Most europskeho města Zhorjelca-Zgrorzeleca. Wo tym je towaršnosć za spožčenje myta wčera informowała. Politikarka je znata za swobodniske myslenje, demokratiju, wote­wrjenosć a čłowjeskosć, z čimž sćělesnja ideju za mytom Brücke-Most.

Serbski knižny kófer zaso po puću

słowo lěta 2020

nawěšk