Krótkopowěsće (23.08.22)
Fonds za krute pady zarjadować
Drježdźany. Sakska socialna ministerka Petra Köpping na zarjadowanju fondsa za krute pady wysokich płaćiznow za energiju dla wobstawa. Ministerski prezident Michael Kretschmer (CDU) a hospodarski minister Martin Dulig (SPD) staj wobaj potwjerdźiłoj, zo je tajke něšto trěbne, rjekny politikarka SPD wčera w Drježdźanach. „Tuž njemóže to změrowanska pila być, ale ma so stać z realitu.“
Termin zapodaća podlěšeny
Zhorjelc. Zapodaće podłožkow za 14. wuměłske přesadźowanje je Załožba za wuměłstwo a kulturu w Hornjej Łužicy hač do 28. awgusta podlěšiła, kaž Zhorjelski krajnoradny zarjad zdźěla. Twórby, kotrež maja so přesadźować, prezentuja w Muzeju Budyšin we wosebitej přehladce wot 9. hač do 22. septembra. Tam budźe tež přesadźowanje 24. septembra.
Podpěra městu Choćebuz
Krótkopowěsće (22.08.22)
Kubšicy a Hamor na čole
Budyšin. Trajacy dešć kónc tydźenja je tež w Hornjej Łužicy přirodźe přewšo tył. W nocy wot soboty na njedźelu su w Kubšicach a Hamorje w běhu 24 hodźin 77,4 litry resp. 72,2 litraj na kwadratny meter naměrili. Wobě komunje mjenowaše Němska wjedrowa słužba jako načolnikow. Pomróčenje w běhu dnja přiběra, za nóc wočakuja dalše spadki.
Label LABA so wobara
Zhorjelc. Hornjołužiski modowy label LABA wobara so na Drježdźanskim wyšim krajnym sudnistwje přećiwo rozsudej krajneho sudnistwa Zhorjelc, zo njesmě t-shirt z portretom žony na zakładźe mólby Hanki Krawcec hižo předawać. Po měnjenju labela njewobsahuje wusud zakładne prašenje za poměrom mjez prawom na swójskim wobrazu a wuměłsku swobodu.
1 968 krónow za Ukrainu
Krótkopowěsće (19.08.22)
Warnuja před njewjedrom
Berlin/Budyšin. Po tydźenjach suchoty a wulkich lěsnych wohenjow je Němska wjedrowa słužba dźensa před lokalnje ćežkimi hrimanjemi na wuchodźe a sewjerowuchodźe kraja warnowała. Za wječor njewjedram podobne wuwiće njewuzamkuja. W nocy na sobotu wočakuja nad Łužicu sylne pomróčenje, móhło tež k spadkam z hrimanjom a sylneho dešća dla k njewjedram dóńć.
Koronainfekcije dale traja
Budyšin. W prózdninskim času bu wuwiće infekcijow z koronawirusom tróšku do pozadka stajene. Pandemija pak hišće přetrata njeje. Wo tym swědči 154 nowych natyknjenjow w Budyskim a 109 w Zhorjelskim wokrjesu, wo kotrychž Roberta Kochowy institut dźensa informuje. Incidenca we wokrjesu Budyšin je 291,3, ta we wokrjesu Zhorjelc 235,1.
Słuchokniha nětko tež jako mp3
Budyšin. W Ludowym nakładnistwje Domowina njedawno wušła słuchokniha „Flockdownkino“ Měrany Cušcyneje je nětko tež jako mp3 download přistupna. Tam čita awtorka sama wubrane teksty ze zběrki krótkoprozy „Stop a stup“ z lěta 2021. Za 7,50 eurow hodźi so na internetnej stronje kupić.
Měšćanski běh kaž loni
Krótkopowěsće (18.08.22)
Spěchuja Kulturnu fabriku
Wojerecy. Wuznam Wojerowskeje Kulturneje fabriki jako „socialnu městnosć“ chcedźa powyšić, za to Sakska srědki přewostaja. Sociokulturny centrum změje něhdźe 265 000 eurow hač do lěta 2024, wozjewi socialna ministerka Petra Köpping (SPD) wčera při wopyće we Wojerecach. „Trjebamy tajke městna zhromadnosće a spěchujemy je z našim krajnym programom.“
Wohenje a grilowanje zakazane
Budyšin. Wotewrjene wohenje a grilowanje na arealu při Budyskim spjatym jězoru su trajaceje suchoty dla nachwilnje zakazane. Wo tym je tudyše měšćanske zarjadnistwo wčera informowało a na to skedźbniło, zo je strach wudyrjenja lěsnych wohenjow dale njesměrnje wulki. Zakaz měri so runje tak na zjawne wohnišća při spjatym jězoru.
Čěske plany w Ukrainje
Krótkopowěsće (17.08.22)
Mjenje wohnjowych wobornikow
Bad Schandau. Połoženje při lěsnym wohenju w Sakskej Šwicy so změruje. Tak njejsu hižo telko wohnjowych wobornikow trěbnych kaž dotal. Kaž krajnoradny zarjad Sakska Šwica-Wuchodne Rudne horiny zdźěli, su ličbu zasadźenych mocow na 370 zredukowali. Woheń, kotryž bě so 25. julija z Čěskeje Šwicy na Saksku Šwicu rozšěrił, je tam 150 hektarow wulki teren zničił.
Niše žiwjenske wočakowanje
Wiesbaden. Žiwjenske wočakowanje w Sakskej je za čas koronapandemije sylnje wotběrało. Wone ležeše pola nowonarodźenych hólcow 2021 nimale połdra lěta niže hač do pandemije, pola nowonarodźenych holcow tróšku wjace hač lěto. Wo tym je Zwjazkowy institut za ludnostne slědźenje we Wiesbadenje dźensa informował. Spady w tajkim rozměrje su slědźerjo posledni raz ke kóncej NDR zwěsćili.
Turisća tuchwilu faluja
Krótkopowěsće (16.08.22)
Přepławjenja w Hornjej Łužicy
Wjazońca/Załom. Wčerawše njewjedra z wulkim mnóstwom dešća su tež někotre městna w Hornjej Łužicy přepławili. Wosebje horni kraj bě potrjecheny. W Załomju su něhdźe 37 litrow dešća na kwadratny meter na hodźinu naměrili. Wjesny hat we Wjazońcy bě přez brjohi stupił. Wohnjowa wobora dyrbješe wodu z pincow klumpać.
Wuprawa do Žitawskich hór
Worklecy. Na prózdninsku wuprawu Dekanatneho dušepastyrstwa je sej wčera 30 serbskich dźěći 5. do 8. lětnika do Žitawskich hór dojěło. Dźensa wopytowachu klóšter w Jablonneé v Podještědí. Dale steji na programje wopyt w krosnowanskim parku, pućowanje na horu Oybin a jězba z parnej železnicu.
Najwjace škodow wohenja dla
Krótkopowěsće (15.08.22)
Hišće tójšto městnow
Kamjenica. Kónc julija su zawody w Sakskej hišće cyłkownje 9 375 njewobsadźenych wučomniskich městnow přizjewili. To zdźěla Agentura za dźěło. Kaž zarjadnišćo dale informuje pyta pak na tamnym boku hišće 5 565 młodostnych z pomocu młodźinskich powołanskich agenturow za wukubłanjom. Tak je jasnje wjace njewobsadźenych městnow hač požadarjow.
Slědźa za přičinu wohenja
Chojny. Po lěsnym wohenju w Chojny (Koitzsch) pola Wjazońcy přepytuja podhlada njewobhladniweho zapalerstwa dla. Při dróze do Kinsporka je so pjatk popołdnju něhdźe 3 000 kwadratnych metrow lěsa paliło. Na městnje, hdźež je woheń wudyrił, namakachu zbytki cigarety. Hač je to přičina je pak njejasne.
W Sprjewi faluje woda
Krótkopowěsće (12.08.22)
Škitne postajenja dale płaćiwe
Drježdźany. Tuchwilne aktualne škitne naprawy před koronu w Sakskej su dale płaćiwe. Sakske knježerstwo je wčera rjadowanja wo škiće před koronu hač do 10. septembra podlěšiła, zdźěli wčera Sakske ministerstwo za socialne. Tak je dale předpisane w zjawnym wobchadźe a w lěkarskich praksach medicinisku masku wužiwać. W hladarnjach je samo předpisane FFP2-masku wužiwać.
Znowa wuwinowany
Budyšin. Krajnoradny zarjad je bywšeho wjesnjanostu Njebjelčic Tomaša Čornaka znowa z wumjetowanjow w zwisku z rešeršowej skupinu Šadowic wuwinował. W pismje Čornakej, kotrež redakciji SN předleži, pisa wokrjes jako prawnisce dohladowanska instanca, zo njewuchadźa z toho, zo je so Čornak „wosobinsce wobohaćał. Tež njelegalne jednanje z wašeje strony njeje spóznać“, tak wokrjes.
Čěske zakitowanske plany
Krótkopowěsće (11.08.22)
Njewšědny protest
Miłoraz. Njewšědny protest nastupajo wobchadźenje ze strukturnej změnu je gmejna Trjebin wčera w Miłorazu wotměła. Tam su mjeńšinu dołho zwony zwonili. Wjesnjanosta Waldemar Locke skedźbni na njesprawne rozdźělowanje pjenjez za strukturnu reformu. Biskopicy dóstawaja miliony, mjeztym zo w Trjebinje, kotryž je z kónca wudobywanja brunicy chětro potrjecheny, lědma něšto dochadźa.
Wodźikowa unija nastawa
Drježdźany. Techniske uniwersity Kamjenica, Freiberg a Drježdźany su so wčera z memorandumom na „intensiwniše zhromadne dźěło nastupajo wuslědźenja wodźikowych technologijow“ dojednali. Nastać ma „wodźikowa unija“, kotraž „na wysokim niwowje energijowu změnu ze Sakskeje sem sobu wuhotuje“, kaž w zdźělence Sakskeho ministerstwa za wědomosć, kulturu a turizm rěka.
„Velveta“ insolwenzna
Krótkopowěsće (10.08.22)
Přećiwo planam knježerstwa
Bórkowy. W běhu jeno jeničkeho měsaca je peticiju “Błóta su swětowe kulturne namrěwstwo, nic swětowe dźiwiznowe herbstwo“ wjac hač 4 000 ludźi podpisało. Z njej protestuja wobydlerjo přećiwo planam Braniborskeho knježerstwa, w biosferowym rezerwaće Błóta wulke płoniny jako dźiwiznu woznamjenić. Woni njeboja so jeno škodow za přirodu, ale tež hospodarskeho ruina. 24. awgusta chcedźa wobydlersku iniciatiwu załožić.
Za dobru klimu kolesować
Budyšin. Wot 5. do 25. septembra wobdźěli so město Budyšin znowa na akciji „Kolesować po měsće“. Město namołwja wobydlerjow sobu činić a w akciskim času tak husto kaž móžno wšědnje po puću na dźěło, do šule abo tež w dowolu koleso wužiwać a tak kilometry za swój team a Budyšin zběrać. Přizjewjenje je móžne pod: .
Produkciju chcedźa rozšěrić
