Krótkopowěsće (27.02.23)
Serbsce po hrodźe wodźił
Wojerecy. Prěnje serbskorěčne wodźenje po Wojerowskim hrodźe, dźensnišim měšćanskim muzeju, hdźež běštej hač do 1972 běrow a magacin serbskeho muzeja zaměstnjenej, je so njedźelu pod nawodom Wernera Sroki wotměło. Skupina dźewjeć ludźi, mjez nimi županka Gabriela Linakowa, sćěhowaše hodźinu dołho wuwjedźenja wo stawiznach domu a wustajeńcach muzeja.
Narodne krajiny přirody
Drježdźany. W nowej brošurje „Jónkrótne. Narodne krajiny přirody w Sakskej“ předstaji sakske wobswětowe ministerstwo narodny park Saksku Šwicu, biosferowy rezerwat Hornjołužisku holu a haty, kónčinu dźiwizny Kinsporsku holu kaž tež přirodowe parki Dübensku holu, Rudne horiny/Bohotsku a Žitawske horiny z jich biologiskej mnohotnosću.
Češa wobrónjuja Ukrainu
Krótkopowěsće (24.02.23)
817 nowych wučerjow
Drježdźany. Z druhim šulskim połlětom započnje 817 nowych wučerkow a wučerjow w Sakskej wuwučować. Jich je mjenje hač bě planowane, prěnjotnje bě hač do 1 100 nowopřistajenjow předwidźanych. „Byrnjež něhdźe 100 wosobow wjace přistajeć móhli porno minjenemu połlětu, bych sej k wolóženju našich šulow wjace nowych pedagogow přał“, rjekny kultusowy minister Christian Piwarz (CDU) wčera w Drježdźanach.
Wokrjesnu dróhu wutwarja
Budyšin/Ptačecy. Budyski wokrjes wokrjesnu dróhu mjez Lejnjom a Ptačecami dospołnje wutwari. Zdobom připrawja dróhu přewodźacy kolesowarski puć, kaž krajnoradny zarjad dźensa informuje. Twarski čas ma wot 6. měrca hač do 15. decembra trać. Za tutu dobu přejězd přez Lejno a Ptačecy zawrjeny wostanje.
Přeprošenje na Dźeń Saksow
Krótkopowěsće (23.02.23)
Změna w hrajnym planje
Budyšin. Hinak hač planowane předstaji Němsko-Serbske ludowe dźiwadło w lětušim 27. lětnym dźiwadle musical „The Adams Family“. Kaž zamołwići na swojej internetnej stronje zdźěla, přesunje so lětsa planowana inscenacija „Spuck unterm Riesenrad“ z organizatoriskich přičin na 2024. Kaž Sakske Nowiny dźensa pisaja, su nimo wobšěrneho přihota tež chorobne wupady přičina za přesunjenje.
Namjety za Nobelowe myto
Oslo. Za lětuše Měrowe Nobelowe myto je 305 kandidatkow a kandidatow namjetowanych. Kaž je Nobelowy institut w norwegskej stolicy Oslo zdźělił, steji na lisćinje nominowanych 212 wosobow a 93 organizacijow. Komu najwažniše politiske wuznamjenjenje spožča, chcedźa spočatk winowca wozjewić. Přepodaće myta budźe 10. hodownika, na posmjertninach Alfreda Nobela. Myto wuchadźa ze załožby Nobela (1833–1896), loni su je aktiwisća za čłowjeske prawa z Běłoruskeje, Ruskeje a Ukrainy dóstali.
Čěska Šwica dale zaraćena
Krótkopowěsće (22.02.23)
Štomy dospołnje porubane
Ottendorf-Okrilla. Porubanje štomow we Łužničanskej holi je wotzamknjene. Wčera su lěsni dźěłaćerjo jenož hišće poslednje zdónki z přestrjenje wotwjezli, hdźež běše połdra lěta protestny camp aktiwistow klimy zaměstnjeny. Na terenje chce předewzaće KBO šćerk wudobywać a ma za to tež dowolnosć. Minjeny tydźeń je policija tam camp protestowacych z wulkozasadźenjom rumowała.
Někotři z wysokej mzdu
Magdeburg. Po rešeršach nowiny Mitteldeutsche Zeitung (MZ) płaći Srjedźoněmski rozhłós (MDR) 36 přistajenym mzdy zwonka tarifa a za to lětnje miliony wudawa. K tak mjenowanym sobudźěłaćerjam zwonka tarifa słušeja mjez druhim intendantka MDR Karola Wille a wosom direktorow sćelaka. „Zbytnych 27 sobudźěłaćerjow su zwjetša wotrjadnicy“ wopodstatni rěčnik MDR nowinje MZ.
Prezident wopyta wuběžk
Krótkopowěsće (21.02.23)
Přehladka z dalšej staciju
Přibysłaẃ. Pućowanska wustajeńca „Što rěka tu mjeńšina? Danojo, Frizojo, němscy Sintojo a Romojo, Serbja a rěčnicy delnjoněmčiny – Twoji njeznaći susodźa?“ je wotnětka w Kulturnohistoriskim muzeju w Přibysławje (Prenzlau) přistupna. Mjez přehladku dźensa wotewěracymi hosćimi běchu kulturny statny sekretar Braniborskeje Tobias Dünow (SPD), Ute Eisenack ze Zwjazkoweje rady za delnjoněmčinu a kurator dr. Robert Lorenc.
Z dwěmaj kandidatomaj
Łaz. Za wólby wjesnjanosty 23. apryla w gmejnje Łazu staj dwaj požadarjej wobkrućenaj, kaž Mandy Liepert, předsydka gmejnskeho wólbneho wuběrka, dźensa wozjewi. Mějićel zastojnstwa Thomas Leberecht kandiduje za CDU. Jeho wužada Frank Förster z Hermanec nad Sprjewju, kotrehož je AfD nominowała.
„Biikebrennen“ Frizow na Sylće
Krótkopowěsće (20.02.23)
Myće Liebeskindej a Baumej
Drježdźany. US-ameriski architekt Daniel Liebeskind je z lawreatom 14. mjezynarodneho Drježdźanskeho měroweho myta. Wčera přepodachu jemu myto w Semperowej operje. „Zda-li so wšitko nimo być – wójna, genocid, terorowy nadpad – zbywa spomnjeće. Za to trjebamy městna wopominanja, kotrež njehodźa so přewidźeć a kajkež Libeskind naćisnje“, we wopodstatnjenju rěka. Čestne myto přiznachu politikarjej Gerhartej Baumej (FDP).
Premjera ze serbskej hudźbu
Berlin. We wobłuku tele dny wotměwaceho so 73. mjezynarodneho filmoweho festiwala Berlin bu minjeny pjatk film režiserki Anna Zett „Es gibt keine Angst“ premjernje předstajeny. Pask wopřijima mjez druhim spěw „Rückkehr aus Ithaka“ skupiny SERVI. Hudźbnik a komponist Jan Bělk piše, zo je „jara hordy, z małym podźělom“ filmej přinošować móc.
Zahubny woheń na zahrodce
Krótkopowěsće (17.02.23)
Přichodnje zdarma do muzeja?
Lipsk. Zastup do trajnych wustajeńcow měšćanskich muzejow w Lipsku ma wot 2024 darmotny być. Tutón namjet bu na słužbnym posedźenju wyšeho měšćanosty wothłosowany, kaž město wčera zdźěli. Měšćanska rada pak hišće přihłosowała njeje. Z „atraktiwnym poskitkom“, kiž móhł so z modelom za dalše wustajenišća stać, chcedźa sej „korony dla zhubjeny publikum wróćo zdobyć“.
Filmowy festiwal zahajili
Berlin. Mjezynarodny filmowy festiwal Berlin 2023 bu wčera ze swjatočnej galu zahajeny. 19 paskow wubědźuje so wo „złoteho a slěborneho bara“; dohromady pokazaja na mjeztym 73. festiwalu, kotryž słuša k najwjetšim zarjadowanjam swojeho razu na swěće, něhdźe 250 produkcijow wšitkich žanrow. Lawreataj wosebiteju mytow za žiwjenski skutk staj režiser Steven Spielberg a kamerownica Caroline Champetier.
Wobdźělenje Rusow njedowolić
Krótkopowěsće (16.02.23)
Akciski dźeń pola Alstom
Budyšin. Dźěłarnistwo IG metal protestowaše dźensa z akciskim dnjom po cyłej Němskej přećiwo wottwarej dźěłowych městnow a zniženju mzdow na stejnišćach twornjow za ćahi. W přitomnosći Budyskeho zapósłanca w Sakskim krajnym sejmje, Marka Šimana (CDU), su zastupjerjo zawodneje rady a dźěłarnistwa w Budyšinje koncernej Alstom wumjetowali, „specialistow wućěrić“.
Infineon twari w Drježdźanach
Neubiberg. Po zdźělence chipoweho koncerna Infineon je předsydstwo předewzaća zhromadnje z dohladowanskimi gremijemi plany za wutwar swojeho Drježdźanskeho zawoda schwaliło. Do toho běše zwjazkowe hospodarske ministerstwo dočasny zazběh projekta přizwoliło. Start twarskich dźěłow budźe nazyma 2023. Z wutwarom nastanje něhdźe 1 000 nowych dźěłowych městnow.
Nowa fararka w Minakale
Krótkopowěsće (15.02.23)
Patronatne kemše TCM
Baćoń. Wěriwi měli swjateju Cyrila a Metoda wo zastupnistwo prosyć, zo njeby so wójna słowjanskeho kraja přećiwo druhemu słowjanskemu krajej hižo dale wjedła. K tomu pozbudźowaše farar Gabriš Nawka na patronatnych kemšach Towarstwa Cyrila a Metoda (TCM) wčera wječor w Baćonju. Městopředsyda TCM namołwješe, so bóle na diplomatiju złožować hač na to, z Němskeje brónje słać.
Bywše lěhwo jatych pomjeńšić?
Wojerecy. Wojerowski měšćanski muzej so z projektami prawidłownje wo politiske kubłanje prócuje. Tak přewjedu mnoho z tutych w něhdyšim lěhwje za francoskich a druhich wójnskich jatych w Elsterhorsće. Před dnjomaj startowaše francosko-němske towarstwo REVE peticiju na platformje change.org, zo njesmě so posledni eksistowacy skład tehdyšeho lěhwa wottorhać za powjetšenje krajneje šule wohnjowych wobornikow. Peticija je online na .
Procentaj za armeju zawěsćić
Krótkopowěsće (14.02.23)
Su za dualny studij wučerstwa
Neukirchen. Swobodni wolerjo (FW) w Sakskej žadaja sej dualny studij wučerstwa. „Chroniskeje potrjeby na wučerjach dla trjebamy nowe ideje,“ praji krajny šef FW Thomas Weidinger němskej powěsćerni w Drježdźanach. „Z dualnym studijom zwyšimy kwalitu wukubłanja, dokelž je teoretiski pedagogiski dźěl přez bliskosć k šulerjam wo wjele žiwiši za přichodnych wučerjow,“ wón doda.
Po škodach čaru zaso wotewrili
Žitawa. Po tym zo běchu paduši w lěće 2022 koporowe kable pokradnyli a woclowe hrjady wobškodźili, běše železniska čara mjez Hagenwerderom a Žitawu měsacy dołho zawrjena. Nětko ćahi zaso jězdźa – to zdźěli sćelak MDR na swojej powěsćowej stronje. Škoda płaćeše němsku železnicu štwórć miliona eurow. K lěpšemu škitej kolijow chce wona mjezy překročacy wěstotny koncept zawjesć.
Saněrowanje nasypa dokónčene
