Krótkopowěsće (14.01.20)
Najlěpši lokal wuznamjenjeny
Zhorjelc. Najwoblubowaniši hosćenc Hornjeje Łužicy je Łutowska „Sakska stwička“. Dobyćerja wubědźowanja wo najlěpši lokal su wčera w Zhorjelcu wuznamjenili. Druhe městno docpě Rachlowska „Chěžkarska korčma“ a třeće Žitawski hosćenc „Mister Bales“. Budyska kofejownja „Nähcafé Lotte“ wjeseleše so nad pjatym městnom.
Klimowa hysterija – njesłowo 2019
Darmstadt. Zapřijeće „klimowa hysterija“ je „njesłowo lěta 2019“. Z nim so prócowanja wo lěpšu klimu a hibanje za jeho škit wočornjeja a wažne debaty wo tym diskredituja, zdźěli rěčnica jury w Darmstadće. Wuraz běchu zastupnicy politiki, hospodarstwa a medijow wospjet wužiwali, mjez druhim wodźacy politikar AfD Alexander Gauland.
Wjace ćěkancow-wučomnikow
Krótkopowěsće (13.01.20)
Manewer USA we Łužicy
Budyšin/Choćebuz. USA přihotuja „Defender 2020“, najwjetše wojerske zwučowanje minjenych 25 lět w Europje ze 37 000 wojakami, stami tankow a 13 000 kruchami materiala a bróni. Logistiske srjedźišćo ma wojerske zwučowanišćo Hornja Łužica być. We wokrjesu Sprjewja-Nysa pak hotuja so hižo na prěnje protesty, kaž nowina Lausitzer Rundschau dźensa rozprawja.
Najlěpši počesćeni
Čorna Pumpa. Pjeć młodych fachowcow, kotřiž su loni wukubłanje w předewzaću Łužiska energija a milinarnje (LEAG) jako najlěpši zakónčili, počesćichu minjeny pjatk na Čornopumpskim industrijnišću. Zdobom móžachu so Stefan Schmidt, William Fischer, Lars Krüger, Tobias Reuter a Florian Kossack do wosebiteje chroniki zapisać.
„Narodniny“ tolerja swjećili
Jáchymov. Wot pjatka do njedźele wotměwachu w rudnohórskim městačku Jáchymovje swjedźenske zarjadowanja składnostnje 500. róčnicy wobstaća tolerja. Tutón pjenjez bě tam 1520 zemjanska swójba Schlikow razyć započała. Jednaše so wo prěni europski pjenjez, na kotrymž bě wopon hinašeho hač knježićelskeho rodu zwobraznjeny.
Krótkopowěsće (10.01.20)
Pilsenske dale faworit
Hamburg. Institut za wične slědźenje Splendid research je tak mjenowany „piwowy monitor 2020“ publikował. Studija wujewja, zo přerěznje něhdźe dwě třećinje piwo pijacych w Němskej napoj znajmjeńša kóždy třeći dźeń konsumujetej. Najwoblubowaniša družina je dale po pilsenskim wašnju warjena.
Pjeć zajimčow za wučerstwo
Lipsk. Na wčerawši dźeń wotewrjenych duri je so tójšto zajimcow na uniwersitach, wysokich šulach a akademijach rozhladowała. Z Budyskeho Serbskeho gymnazija je pjeć šulerkow, kotrež chcedźa lětsa po maturje wučerstwo studować, Institut za sorabistiku Lipšćanskeje uniwersity wopytało. Zwonka oficialneho programa nawjazachu wone wosobinski zwisk docentam a dožiwichu wosebite wučbne zarjadowanje.
Najlěpša nowina pytana
Krótkopowěsće (09.01.20)
Ulf Großmann zemrěł
Drježdźany. Ulf Großmann je njeboh. Bywši chórowy nawoda, hudźbny wučer a kulturny decernent w Zhorjelcu je wjele lět w krajnej politice skutkował, mjez druhim jako čłon kulturneho senata Sakskeje kaž tež jako předsyda kulturneho wuběrka zwjazka městow Němskeje. Wot lěta 2011 bě prezident Kulturneje załožby Sakskeje. Wutoru je Großmann w starobje 63 lět zemrěł.
Předewzaća za nowe lěto
Choćebuz. Lětsa wuńdźe přehladna karta wo župach, Domowinskich skupinach a serbskich towarstwach w digitalnej a ćišćanej formje. Nimo toho Domowina směrodajny program strategiskich dypkow za wjacerěčny modelowy region Łužicy wosrjedź Europy we wobłuku dźěłarnički „přichod Łužicy“ sobu zdźěłuje. Wo tym informowaše třěšny zwjazk wčera swojich regionalnych rěčnicow a referentow w Choćebuskim Serbskim domje.
Namjety za Myto Witkojc zapodać
Krótkopowěsće (08.01.20)
Dźeń a wjac hladanja potrěbnych
Kamjenc. Sakska ma so na dale a wjac hladanja potrěbnych nastajić. Hač do lěta 2030 jich ličba wo pjećinu na 242 000 rozrosće. Tele daty wuchadźeja z wobličenjow krajneho statistiskeho zarjada ze sydłom w Kamjencu, kotrež su wčera wozjewili. Před lětomaj bě w swobodnym staće něhdźe 205 000 ludźi na hladanje pokazanych.
Christine Ruby prěničku wudała
Drježdány. Pod titulom „Späne – Gedichte“ je Christine Ruby swoju prěnju zběrku basnjow předpołožiła. Wušła je kniha w Typostudio Schumacher Gebler Drježdźany. Publicistka z Radebeula, kotraž je tež za Serbski sejm kandidowała, předstaji swoju prěničku 29. januara w Radebeulskej kniharni Sauermann.
Tesla ma 41 milionow płaćić
Krótkopowěsće (07.01.20)
Wjac zrěčenjow wotzamknyli
Drježdźany. W sakskich rjemjeslniskich zawodach maja zaso wjace wučomnikow. Loni su cyłkownje 5 500 nowych wukubłanskich zrěčenjow wotzamknyli, štož je 82 zrěčenjow wjace hač lěto do toho. Młodostni rozsudźichu so předewšěm za wukubłanje na metalotwarca a mulerja kaž tež za sanitarny a tepjenski wobłuk.
Trjebaja nowe tramwajki
Drježdźany. Drježdźanske wobchadne zawody (DVB) chcedźa hač do nazymy lěta 2023 cyłkownje 30 nowych tramwajkow zasadźić, kotrež budu w Budyskim a Zhorjelskim stejnišću koncerna Bombardier zhotowjene. Jedne jězdźidło płaći něhdźe 4,2 milionaj eurow. Wot jutřišeho do 19. januara móža sej zajimcy model tajkeje tramwajki w Drježdźanskim wobchadnym muzeju wobhladać.
Chcedźa za Kafku wabić
Krótkopowěsće (06.01.20)
Hwězdnych spěwarjow přijałoj
Drježdźany. Hwězdni spěwarjo wopytachu dźensa Sakski krajny sejm a statnu kencliju w Drježdźanach. W parlamenće přija jich dopołdnja prezident sejma dr. Matthias Rößler. Ministerski prezident Michael Kretschmer (wobaj CDU) přija na to něhdźe sto holcow a hólcow z biskopstwa Drježdźany-Mišno. Spěwanje na Třoch kralow je najwjetša solidarna akcija dźěći za dźěći po wšěm swěće.
Wuspěšni šulerjo-fyzikarjo
Drježdźany. Wosom šulerjow ze Sakskeje je na předkole lětušeje 51. mjezynarodneje olympiady za fyziku kónc januara w Greifswaldźe wobdźělenych. Tak ma Sakska najwjetšu ličbu wobdźělnikow wšěch zwjazkowych krajach Němskeje. Cyłkownje bě 281 kandidatow nastupiło, 51 šulerjow bě so ze swojimi wuslědkami kwalifikowało. Olympiada wotměje so w juliju w litawskej stolicy Wilniusu.
Statna opera ponowjena
Krótkopowěsće (03.01.20)
Loni dwójce dwójnikaj
Kamjenc. W Kamjenskej chorowni swj. Jana bě so loni 546 dźěći narodźiło – 277 holcow a 269 hólcow, dwójce dwójnikaj. Rata wurězanja dźěsća wučinja 15,8 procentow. Najwoblubowaniše holče mjena w chorowni Lessingoweho města 2019 běchu Frieda, Mathilda a Emma. Pola hólcow běchu so starši najčasćišo za Emila, Antona a Kurta rozsudźili.
Mjenje bjezdźěłnych hač loni
Budyšin. Ličba bjezdźěłnych w Budyskim wokrjesu je so w decembru porno nowembrej wo 3,9 procentow powjetšiła. Cyłkownje bě něhdźe 17 000 dźěłokmanych bjeze zaběry. Přirunujo z decembrom 2018 je to nimale dźesać procentow mjenje, kaž Budyska wotnožka agentury za dźěło zdźěla. Kwota bjezdźěłnosće we wokrjesu wučinja šěsć procentow.
LMBV z nowym jednaćelom
Krótkopowěsće (02.01.20)
Strony zwěsćeja wjace namocy
Drježdźany. CDU, SPD, Zwjazk 90/Zeleni, Lěwica a AfD su zdźělili, zo wjace namocy přećiwo stronam zwěsćeja. Hroženja, hida a nadběhi na politikarjow su z jich wida přiběrali. Statistika sakskeho nutřkowneho ministerstwa pak to cyle tak njewotbłyšćuje. Krajny kriminalny zarjad naliči 218 padow mjenje politisce motiwowanych chłostajomnych njeskutkow přećiwo politikarjam a stronam za lěto 2018 hač w předchadźacym lěće.
Karikaturist Bach zemrěł
Kamjenica. Po dołhej chorosći je Kamjeničanski karikaturist Rainer Bach silwester 73lětny zemrěł. Jako swobodnje skutkowacy wozjewi wón karikatury mjez druhim w satiriskim magacinje „Eulenspiegel“. Kosmonawt Gennadij Padalka bě w lěće 2015 rysowanku Rainera Bacha sobu na mjezynarodnu swětnišćowu staciju ISS wzał.
Industrijna kultura w srjedźišću
Krótkopowěsće (30.12.19)
Serbska murja so schadźowała
Njechorń. Towarstwo Serbska murja je sobotu w Domje Měrćina Nowaka-Njechorńskeho swoju hłownu zhromadźiznu přewjedło. Wosebje zhladowali su na aplikaciju QuizSerb, serbski digitalny kwis, kiž běchu zdźěłali a kotryž wobstajnje z nowymi prašenjemi pjelnja. Na čoło předsydstwa wuzwolichu Pětra Dźisławka a Kiru Hrjehorjec.
Na škodu šulerjow
Berlin. Po cyłej Němskej na šulach mjeztym přidružnicy skutkuja. Prezident cyłozwjazkoweho zjednoćenstwa wučerjow Heinz-Peter Meidinger ma jich wukubłanje w rozmołwje z nowinu Die Welt za njedosahace a za „njeskutk na dźěćoch“, rěčo w tym prašenju wo „dospołnym zaprajenju“ zwjazkowych krajow. Často njejsu přidružnicy kwalifikowani dosć, hdyž šulsku słužbu nastupja.
Lěki jednotnje wotstronjeć
