Krótkopowěsće (27.11.23)
Projektaj wuznamjenjenej
Mittweida. We wobłuku Sakskeho statneho myta za twarjenje we wjesnych kónčinach bu předwčerawšim mjez druhim Hórčanski Smolic statok wuznamjenjeny. Młoda swójba je sej tam přikładnje konjenc na bydlenski dom wutwariła. Tež ponowjeny tykowany dom bjezposrědnje Njeswačanskeje cyrkwje je wuznamjenjenje dóstało.
Předstaja wuslědki ewaluacije
Budyšin. Wědomostnicy Serbskeho instituta su we wobłuku nowinarskeje konferency dźensa wo přednoškach na zajutřišim, srjedu, so wotměwacym Institutnym dnju informowali. Zarjadowanje budźe w Serbskim domje a změje jako jedne temowe ćežišćo „Wubrane wuslědki ewaluacije koncepta ,2plus‘ a wliw wobchadneje rěče na komunikatiwnu kompetencu šulerjow 9. lětnika“.
Bankowe konta wozjawnić
Krótkopowěsće (24.11.23)
Łužiski kruh wuradźował
Grodk. Pod hesłom „zwjazkowa politika a wědomosć“ je so zwjazkarstwo Łužiski kruh dźensa w Grodku na poslednje lětuše zjawne zetkanje zešło. Hódnoćili su mjez druhim dotalne postupowanje nastupajo změnu strukturow po kóncu zmilinjenja brunicy. K tomu witachu tež statneho ministra a społnomócnjeneho zwjazkoweho knježerstwa za wuchodnu Němsku, Carstena Schneidera (SPD).
Fred Kaiser 2. naměstnik
Baršć. Wokrjesny sejmik Sprjewja-Nysa je wokrjesneho radźićela a wjesnjanostu gmejny Dešno-Strjažow, Freda Kaisera, na swojim posedźenju předwčerawšim w Baršću za 2. naměstnika předsydy sejmika wuzwoliła. Prěnje prawo namjetowanja měješe frakcija CDU, kotrejž Kaiser jako njestronjan přisłuša. W tajnych wólbach hłosowaše 34 z 38 radźićelow za kandidata CDU.
Bayern Paris porazył
Krótkopowěsće (23.11.23)
Fotograf Erich Schutt zemrěł
Choćebuz. Znaty delnjołužiski fotograf a wobrazowy chronist Erich Schutt je minjenu njedźelu, 19. nowembra, 92lětny w Choćebuzu zemrěł. We Wětošowje narodźeny je hač do 1994 za nowinu Lausitzer Rundschau dźěłał. Jeho fota wobohaćichu tež Nowy Casnik, Nowu dobu, Serbske Nowiny, Rozhlad a dalše edicije Ludoweho nakładnistwa Domowina.
Wučerjej z Bórkowow mytowanaj
Berlin. Mjez dźensa z „Mytom za ciwilnu kuražu – přećiwo prawicarskemu radikalizmej, antisemitizmej a rasizmej“ w Berlinje počesćenymi, staj tež něhdyšej wučerjej na Bórkowskej šuli Laura Nickel a Max Teske. Myto je ze 4 000 eurami dotěrowane. Wučerjej běštaj z anonymnym listom zjawnosć na prawicarske podawki na swojej šuli skedźbniłoj.
Z kardinalom so zetkali
Krótkopowěsće (21.11.23)
Wjace přenocowanjow
Błóta. Dowol w tukraju je za wobydlerjow Němskeje dźeń a atraktiwniši. Tak přenocowa z cyłkownje 11,5 milionow wopytowarjow Braniborskeje w prěnich třoch kwartalach lěta 2023 něhdźe 1,8 milionow w Błótach. Zajim za jězorinu Wódra-Sprjewja, Ruppinsku jězorinu, město Podstupim a jězorinu Dubje je tež přiběrał. Ličby přenocowanjow su samo lěpše hač do časa korony.
SJ Chrósćicy w filmje
Chrósćicy/Mnichow. We wobłuku projekta Mnichowskeje Wysokeje šule za film a telewiziju (HFF), filmoweho festiwala Berlinale a Załožby Phillipa Lahma ma so dohromady jědnaće krótkofilmow produkować, wotbłyšćowace „rólu kopańcy za towaršnosć“. Mjez druhim su w tym zwisku tele dny wjacorych młodych hrajerjow SJ Chrósćicy z kameru přewodźeli. Premjernje maja so paski na klětušej Berlinali předstajić.
Wučba prawowědy na DSG
Krótkopowěsće (20.11.23)
Stawk na wysokich šulach
Drježdźany. Sobudźěłaćerki a sobudźěłaćerjo wysokich šulow w Sakskej dźensa stawkuja. Potrjechene su kubłanišća w Lipsku, Drježdźanach a Kamjenicy. Do stawkowanja bě dźěłarnistwo GEW namołwjało. Přičina su zdźěla prekarne dźěłowe wuměnjenja, wosebje za studentiske pomocne mocy. Přichodne dny su dalše stawki, tež na šulach planowane.
Ze Schirdewanom a Rackete
Augsburg. Lěwica je swoju lisćinu za wólby Europskeho parlamenta 9. junija 2024 kónc tydźenja na zwjazkowym zjězdźe w Augsburgu wuzwoliła. Na čole stejitaj kopředsyda strony Martin Schirdewan a 35lětna njestronjanka, ekologowka a wuchowarka ćěkancow z nuzy Carola Rackete. Wona bě redakciju SN njedawno wopytała. Najlěpši wólbny wuslědk 98,6 procentow docpě lěkar Gerhard Trabert z Mainza na štwórtym městnje
Wjele wobškodźenych awtow
Krótkopowěsće (17.11.23)
Herbst: Žane skrótšenja
Berlin. Skrótšenje srědkow za mjeńšinowy sekretariat je po posedźenju financneho wuběrka zwjazkoweho sejma z blida. Naćisk etata ministerstwa nutřkowneho su wotpowědnje změnili, zdźěli parlamentariski jednaćel frakcije FDP Torsten Herbst wječornikej. Za Łužicu tež wažne: nowy němsko-pólski młodźinski tiket za železnicu a slědźerski centrum za ekologiske twarjenje w Budyšinje.
Dalše pjenjezy za škit přirody
Podstupim. Wokrjesy w Braniborskej dóstanu w zwisku ze škitom přirody wjace financielneje podpěry. Rada załožby fondsa za přirodoškit je na swojim nazymskim posedźenju dalše spěchowanske srědki we wobjimje 2,6 milionow eurow přizwoliła, wozjewi wčera braniborske wobswětowe ministerstwo.
Mangowe póčki zwužitkuja
Krótkopowěsće (16.11.23)
Dalše potencielne stejnišćo
Hodźij. Tež Hodźij móhł po rešeršach sćelaka MDR potencielne stejnišćo za nowu jednotku Zwjazkoweje wobory w Hornjej Łužicy być. Wjesnjanosta Gerald Meyer (njestronjan) wobkrući našemu wječornikej wotpowědne naprašowanje wójska a zo su so zastupjerjo před tydźenjemi móžny areal pola Třoch Hwězdow wobhladali. Wot toho časa w naležnosći ničo wjace słyšał njeje, Meyer rjekny.
Mjenje spokojnosć z dźěłom
Drježdźany. Němski dźěłarnistwowy zwjazk woprašuje so jónu za lěto dźěłopřijimarjow po cyłej Němskej za jich spokojnosću z dźěłom. Ličby za loni nětko předleža. Tam podachu 45 procentow wšěch dźěłacych, zo su ze swojim dźěłom spokojom. Tole je wo 10 procentow mjenje hač w cyłoněmskim přerězku.
Z bałdrijanom kóčki wabja
Krótkopowěsće (15.11.23)
Krabat Magica – mystiske kuzło
Čorny Chołmc. Nowy poskitk Krabat Magica maja wot 28. do 30. decembra w Čornochołmčanskim Krabatowym młynje. Z nim chcedźa ludźom ze spěwom, hudźbu a kuzłom strach před ćmu wzać. Budźe to potajne a mystiske dožiwjenje za cyłu swójbu. Wšědnje maja 700 městnow. 1 500 zastupnych lisćikow je hižo předatych. Tikety hodźa so online abo při wječornej kasy kupić.
Hrajnišća za Europeadu
Za klětuše koparske wubědźowanje narodnych mjeńšinow je 14 hrajnišćow zawěsćenych. Hry wotměja so potajkim wot 28. junija do 7. julija w Němskej a Danskej, hraničnej kónčinje wokoło Harrislee. Cyłkownje 36 mustwow je přizjewjenych, mjez nimi tež serbskej mustwje žonow a muži.
Nowe spěchowanje projektow
Drježdźany. Swobodny stat mjezu překročace projekty za ćežišći „skutkowny pomjezny rum – prewencija a přiměrjenje na změnu klimy“ a „powšitkowne a powołanske kubłanje kaž tež wuknjenje čas žiwjenja“ programa Interreg EU w Sakskej a Pólskej spěchuje. Komuny, towarstwa, załožby, lokalne hospodarske zwjazki a zarjadnistwa móža swoje próstwy hač do 31. januara 2024 zapodać.
Krótkopowěsće (14.11.23)
Dale w krótkodźěle
Kamjenjej. Sobudźěłaćerjo kaolinownje blisko Rakec maja hač do kónca lěta hišće w krótkodźěle zwostać. Wo tym informuje zawod. Přičina za to je dale snadne naprašowanje kaolina za papjerowu industriju. Nětko nadźijeja so na nowych partnerow, na přikład z cementoweje industrije.
Nowosći w syći
Budyšin/ Chrósćicy. Dwě nowosći předstajichu serbske cyłki poslednje dny w socialnych syćach: Medijowi skawća, dźěl studija LUCIJA, su swój prěni spěw wozjewili. Pod titulom „Nimamy (hišće) bok na šulu“ zaběraja so młodźi skawća na lóštne wašnje ze šulu. Widejo je na YouTube přistupny. Na Instagramje je kapała Holaski připowědźiła bórze prěnju kolekciju drastow wudać. Bliše informacije maja bórze slědować.
Najwyši eksorcist je Čech
Krótkopowěsće (13.11.23)
Dóńtaj čłowjekow přirunował
Praha. Z Němsko-čěskim žurnalistiskim mytom 2023 bu mjez druhim reportaža „Kak ćežko je, w cuzym kraju so zadomjeć“ žurnalista Martina Weisera, wozjewjena w časopisu „Reporter“, wuznamjenjena. Přinošk přirunuje dóńt po Druhej swětowej wójnje wuhnateje sudetskeje Němki ze žiwjenjom ukrainskeho dźěsća ćěkancow w Němskej.
4. myto Miny Witkojc wuwołane
Podstupim. Serbska rěč a kultura stej centralnej wobstatkaj Łužiskeje identity a domizny. To chce Braniborska z Mytom Miny Witkojc wuwědomić, kotrež kóžde druhe lěto spožča. Hač do 29. februara 2024 móža komuny, towarstwa a zwjazki namjety za 4. myto Witkojc zapodać, kaž je knježerstwowy społnomócnjeny za naležnosće Serbow, statny sekretar Tobias Dünow (SPD), wčera wozjewił.
Komunalnu energetiku zmóžnić
