Krótkopowěsće (27.03.24)
Dar Jürgena Maćija přiwzali
Budyšin. Wobstatk eksponatow fotografikarja Jürgena Maćija w Budyskim Serbskim muzeju je wospjet rozrostł. Budyski wokrjes je dar přiwzał, tak zo wopřijima zběrka wotnětka tež seriju „Agrarlandschaften“ a kasetu z 23 portretami a awtografami cyłkownje dźewjeć serbskich spisowaćelow, mjez druhim Kita Lorenca, Jurja Kocha a Jurja Brězana. Maćij „dźakuje so rukopisy přewostajacym awtoram za podpěru“.
Medicinska uniwersita we Łužicy
Choćebuz. Braniborski kabinet je wčera w Podstupimje wobzamknył, zo ma so w Choćebuzu medicinska uniwersita Łužica – Carl Thiem załožić. Naćisk zakonja dyrbi parlament wobjednawać. Koncept noweje uniwersity je naprawa wuwića strukturow we łužiskej pohórnistwowej kónčinje.
Digitalizacija so wudaniła
Krótkopowěsće (26.03.24)
Wolerske zjednoćenstwo nastupi
Radwor. Serbske wolerske zjednoćenstwo w Radworju nastupi k wólbam gmejnskeje rady 9. junija z wosom kandidatami. Tole su na wčerawšim posedźenju zjednoćenstwa w Radworskej „Meji“ wobzamknyli. Při komunalnych wólbach před pjeć lětami běchu ludźo po tutym puću dweju serbskeju zastupnikow do gmejnskeje rady wuzwolili. Dalši Serbja kandiduje mjez druhim na lisćinje CDU.
Kampanja za turizm
Budyšin. Wobsedźerka serbskeho hosćenca „Wjelbik“ w Budyšinje, Mónika Lukašowa, je jedne ze sydom wobličow noweje turistiskeje kampanje za region mjez Žitawskimi horinami we wuchodźe a wjace hač 20 jězorami wokoło Lipska w zapadźe Sakskeje. Plakaty noweje imegoweje kampanje maja dwurěčnosć w Hornjej Łužicy widźomnu činić a wopytowarjow přiwabić.
Słowakscy fachowcy do Čěskeje
Krótkopowěsće (25.03.24)
Wo jutrach w Serbach zhonili
Radebeul. Zastupjerjo towarstwa Serbski kulturny turizm wobdźělichu so předwčerawšim na lětušich jutrownych wjeselach Hoflößnitz. Na stejnišću stej Annelie Rölke a Franc Golchert hosćom debjenje jutrownych jejkow pokazali. Zodbom pak zhonichu wopytowarjo wo poskitkach, zarjadowanjach a temach kołowokoło jutrownički we Łužicy.
Wosebite myto do Žitawy
Žitawa. Abiturientka Helena Krügar zdoby sej ze swojim přepytowanjom k stabiliće wšelakich pjerkobulow wosebite myto wubědźowanja „Młodźina slědźi 2024“. 18lětna přepytowaše w krajnym wubědźowanju zadźerženje nowych hybridnych a karbonowych pjerkobulow w přirunowanju ze zwučenymi. Jury chwaleše splećenje wědomostneho naroka ze sylnym praktiskim poćahom.
Uwe Nostitz nowy prezident
Krótkopowěsće (22.03.24)
Mjeńšinowa rada so zešła
Berlin. W nowych rumnosćach Mjeńšinoweho sekretariata na Jendźelskej dróze w štwórći Charlottenburg je so wčera Mjeńšinowa rada domoródnych mjeńšin Němskeje schadźowała, kaž předsyda Domowiny Dawid Statnik na naprašowanje informowaše. Woni su Romanijej Rose gratulowali, kiž bu na dalše štyri lěta jako předsyda Centralneje rady Sintow a Romow woleny.
Wólbna komisija zaručena
Choćebuz. Za sobudźěło we wólbnej komisiji za wólby noweje Rady za naležnosće Serbow Braniborskeje je so sydom wosobow přizjewiło. To je telko, kelkož smě gremijej maksimalnje přisłušeć, informowachu na posedźenju předsydstwa župy Delnja Łužica wčera w Choćebuzu. Zwjazkowe předsydstwo Domowiny chce wólbnu komisiju 12. apryla zasadźić.
Liča dale ze škodami
Krótkopowěsće (21.03.24)
„Karls“ wjeska dožiwjenjow
Döbeln. Zajutřišim wotewrě so nowy wólnočasny park při awtodróze A14, kotryž budźe přez cyłe lěto a tež při špatnym wjedrje přistupny. Na cyłkownje 6 hektarach skića mjez druhim husańcowu čaru, truskalcu, po kotrejž móžeš łazyć, abo skakanski zawk we wulkosći XXL. W lěću so 1,5 hektarow wulka płonina přidruži, na kotrejž ma nastać labyrint w kukuricy. Wosebitosć w Sakskej budźe raj kołbaskow ze žonopowym suwadłom.
Wo spěchowanju wutwara rěčeli
Kumwałd. Krajnej radaj wokrjesow Budyšin a Zhorjelc staj so wčera z něhdźe 80 wjesnjanostami swojeju wokrjesow zešłoj, zo byštaj wo financnej podpěrje wutwarej A4 kaž tež elektrifikaciji železniskeje čary Drježdźany-Zhorjelc ze srědkami za změnu strukturow diskutowałoj. Na kóncu so wšitcy na to dojednachu, zo diskusiju w gremijach městow a gmejnow dale wjedu a tam wo tym rozsudźa.
Knižne wiki wotewrjene
Krótkopowěsće (20.03.24)
Zetkanje Budyskeje župy
Budyšin. Posedźenje předsydstwa Budyskeje župy „Jan Arnošt Smoler“ je so wčera na Radworskim dwórnišću wotměło, kaž regionalna rěčnica Katja Liznarjec informowaše. Tam su so čłonojo gremija ze zastupjerjemi Domowinskich skupin a župje přisłušacych towarstwow zetkali. Woni aktiwity serbskich cyłkow rozjimachu a so zdźerženju w wutworjenju rěčnych rumow wěnowachu.
Nuzowe přebywanišćo zawru
Budyšin. Budyski krajnoradny zarjad zawrěje kónc apryla po planje Wojerowski dom za požadarjow wo azyl na Liselotte Hermannowej dróze. Sto wobydlerjow domu přećehnje potom do decentralnych kwartěrow. Dohromady ma wokrjes 1700 požadarjow wo azyl w centralnych a decentralnych přebywanišćach zakwartěrowanych.
„Čěscy“ Rusojo přećiwo Putinej
Krótkopowěsće (19.03.24)
Serbska wersija online
Budyšin/Zhorjelc. Internetowa strona projekta MoSaiKTeiL – Łužiske bahna, pěsk, chójny a haty – skići wotnětka kompletnu hornjoserbsku wersiju. Zajimcy móža so wo biologiskej mnohotnosći regiona a přirodoškitnych naprawach informować. Přez angažowanu přełožowarku a spěchowanje přez Załožbu za serbski lud běše wobšěrne serbske wudaće, kotrež ma zwjazanosć mjez přirodu a kulturu sylnić, móžne.
Spěchuja młodych politikarjow
Choćebuz. Akterojo z Łužicy chcedźa hladajo na komunalne wólby w Braniborskej a Sakskej młodych politikarjow podpěrać. Za to je Łužiska syć nětko stipendij we wobjimje 2 000 eurow wupisała, za kotryž móža so młodźi zajimcy požadać. Spěchować maja so angažowani politikarjo, kotřiž stronje přisłušeja, na wólbnej lisćinje steja abo bjezstronsce kandiduja.
Kanalowe wěka ze wšeho swěta
Krótkopowěsće (18.03.24)
Kubłanske doporučenja
Drježdźany. Po wuprajenju kultusoweho ministerstwa přibliža so ličby kubłanskich doporučenjow aktualnje zaso niwowej do koronoweje pandemije. Tak dóstachu k połlětu 51 proc. šulerkow a šulerjow doporučenje za gymnazij a 49 proc. za wyšu šulu. 2019 a 2020 ležeše procentualny podźěl pola 48 za gymnazij a 51 za wyšu šulu. Za čas koronoweje pandemije wuda so wjace kubłanskich doporučenjow za gymnazij.
Deklaraciju zaměrow podpisali
Žitawa. Sakski ministerski prezident Michael Kretschmer (CDU) je so sobotu z maršalom wojewódstwa Delnja Šleska kaž tež z hejtmanom regiona Liberec w Žitawje zetkał. Woni su deklaraciju zaměrow nastupajo mjezy překročacu kooperaciju w procesach změny strukturow w róžku třoch krajow podpisali.
SmartGuide při pućowanju
Krótkopowěsće (15.03.24)
Nowe personalije pola Krabata
Njebjelčicy. Reiner Deutschmann, wjelelětny předsyda Krabatoweho towarstwa, njebudźe hižo k wólbam nastupić. Tute zastojnstwo chce tuchwilny zastupowacy předsyda Steffen Mühl přewzać. Zdobom pyta towarstwo noweho projektoweho managera, kotrehož skutkowanje Załožba za serbski lud financielnje podpěruje.
Dźěłarnička: Hort jako rěčny rum
Chrósćicy. Nawjedowacy a kubłarjo šěsć serbskich hortow zeńdźechu so wčera w Chrósćicach na dźěłarničku Rěčneho centruma Witaj (RCW), Křesćansko-socialneho kubłanskeho skutka a Serbskeho šulskeho towarstwa. Tema bě „sylnjenje horta jako serbskorěčny kubłanski rum ruku w ruce ze zakładnej šulu“. Po informaciji RCW planuja dalše tajke zarjadowanja, tež z wučerjemi.
Wozrodźenje hižo njewabi?
Krótkopowěsće (14.03.24)
Tydźenjej šulskeho kina
Drježdźany. Wot dźensnišeho štwórtka hač do 27. měrca wotewrja sakske kina durje za wšitkich šulerjow a wšitke šulerki njewotwisnje wot šulskeje družiny. Zahajenje běše dźensa dopołdnja w Šwikawje z nowym filmom „Spuk unterm Riesenrad“. Filmy su wjace hač jenož zabawa, dokelž powědaja stawizny, pokazuja nowe perspektiwy a kubłaja. Zbytne zastupne lisćiki hodźa so pod www.schulkinowoche.de skazać.
Serbscy šulerjo w Francoskej
Paris. 36 šulerkow a šulerjow Serbskeje wyšeje šule „Michał Hórnik“ Worklecy a Serbskeho gymnazija Budyšin přebywa tuchwilu na swojej mjeztym tradicionalnej wuprawje w Francoskej. Woni podachu so wutoru nawječor z busom na puć. Najprjedy dojědźechu sebi šulerjo do Parisa, potom dale do partnerskeje šule w Bretoniskej.
Sněhakowanje w krizy
