Krótkopowěsće (31.05.24)
Hotuja so na powodźenja
Drježdźany. Fachowe zarjady sakskeho knježerstwa kaž krajne zarjadnistwo rěčnych zawěrow hotuja so na přichodne dny, dokelž wočakuja připowědźenych spadkow dla powodźenja. Z rěčnych zawěrow su dźěl wody wotpušćili. Wobydlerjo podłu rěkow maja so na napjatu situaciju nastajić. Wjele zarjadowanjow je w potrjechenych kónčinach wotprajenych, mjez druhim tež dźeń wotewrjenych duri sakskeje knježerstwoweje štwórće.
Myto znowa spožča
Drježdźany. Tež lětsa zaso chce sakske ministerstwo za kulturu wosebje angažowanych ludźi z mytom „Čestnohamstke dźěło w kulturje“ počesćić. Namjety, štó móhł so mytować, móža towarstwa, zawody, organizacije a gmejny hač do kónca junija na webstronje ministerstwa zapodać.
Worklečenjo wokrjesny mištr
Krótkopowěsće (30.05.24)
Župa „Michał Hórnik“ dale rosće
Chrósćicy. Předsydstwo župy „Michał Hórnik“ je na swojim wčerawšim posedźenju Sportowe towarstwo Pěskecy z.t. z 62 čłonami do župy přiwzało. Wo tym informowaše regionalna rěčnica Katharina Jurkowa. Z tym liči župa nimale 1 500 čłonow w 17 towarstwach, třoch Domowinskich skupinach a 11 kulturnych ćělesach. Dale mjez druhim dźěłowy plan za druhe połlěto 2024 dorěčachu.
Projekt digitalizacije dokónčili
Budyšin. Dohromady dźesać Budyskich šulow je w běhu poslednich štyrjoch lět digitalne wuhotowanje dóstało. Z tym je projekt měšćanskeho zarjadnistwa z cyłkownej inwesticiskej sumu 6,8 milionow dokónčeny. Nimo wuhotowanja z digitalnymi nastrojemi je tež přistup šulow do spěšneje internetneje syće zaručiło.
Lěto traje jenož 18 hodźin
Krótkopowěsće (29.05.24)
Dale a mjenje apotekow
Budyšin. Po cyłej Sakskej je dale a mjenje apotekow. W někotrych kónčinach mjez druhim w Budyskim a Zhorjelskim wokrjesu dyrbja ludźo dlěše puće na so brać, zo móhli do apoteki, zdźěli wčera prezident sakskeje komory apotekow Göran Donner. Předewšěm za staršich wobydlerjow a starši z mjeńšimi dźěćimi je situacija wobćežna.
Piwarz maturantow přewodźa
Budyšin. Abiturienća Budyskeho Serbskeho gymnazija zhonja dźensa wuslědki maturitnych pruwowanjow. Rano su při zachodźe přichadźacym šulerjam a wučerjam na swojim poslednim šulskim dnju z Abi 2024 čoło popisali. 10. a 11. lětnik kubłanišća přebywatej dźensa na planowej hrě POL&IS zwjazkoweje wobory. Tam jich sakski minister kubłanja Christian Piwarz (CDU) přewodźa.
Pytaja rjekow turizma
Krótkopowěsće (28.05.24)
Prěni raz Serbow wopytał
Budyšin. Intendant MDR Ralf Ludwig je wčera wječor Budyski Serbski dom wopytał. Mjez druhim so předsyda Domowiny Dawid Statnik, čłon rozhłosoweje rady MDR Bjarnat Cyž a direktor MDR Sakskeje w Drježdźanach Sandro Viroli na rozmołwje wobdźělichu. Prěni raz wopyta loni wuzwoleny intendant MDR Serbow. W Budyskim studiju gratulowaše wón redakciji młodźinskeho wusyłanja Radijo Satkula k 25. jubilejej.
Zrěčenje dočasnje wupowědźili
Budyšin. Nastupajo njewěsty přichod produkciskeho stejnišća Alstom w Zhorjelcu je industrijne dźěłarnistwo IG metal zrěčenje wo přichodźe z koncernom wupowědźiło. Zrěčenje měješe so poprawom w lěće 2026 zakónčić. Tež zawod w Budyšinje je potrjecheny.
Filharmonija z nowym nawodu
Krótkopowěsće (27.05.24)
Syć za wožiwjenje pišćelow
Chrostawa. Na iniciatiwu Gottfrieda Silbermannoweje towaršnosće ma so 32 hišće zachowanych nowotwarow pišćelow wuznamneho pišćeletwarca w Sakskej bóle widźomnych stać. Nowozałožena syć wosadow a komunow nadźěła koncertne projekty, digitalne prezentacije instrumentow a turistiske čary k Silbermannowym pišćelam, ke kotrymž tež Chrostawske pišćele słušeja.
Projektaj z Łužicy mytowanej
Berlin. Šulerki a šulerjo 10. lětnika Serbskeje wyšeje šule Worklecy su ze swojim filmom „Móšničku na zapadźe, korjenje w serbskej Łužicy“ myto wubědźowanja „Časy přewróta. Němska w změnje wot časa zjednoćenja“ dobyli. Mjez mytowanymi je tež Spokenword akademija z Běłeje Wody z projektom „Ost-West-poetry“. Je to akademija, kotraž je antologiju „Pozběh je žónski“ wudała.
Smjerdźečenjo w Sicilskej pobyli
Krótkopowěsće (24.05.24)
Woswjeća jubilej
Stróža. Lětsa woswjeći biosferowy rezerwat Hornjołužiske hola a haty swoje 30lětne wobstaće. Je to jenički rezerwat po cyłej Sakskej. Zarjadowanje steji pod titulom „30 lět biosferowy rezerwat – čłowjek z přirodu w změnje“. Za dźensa, pjatk, a jutře, sobotu, su wjacore zarjadowanja planowali.
Předsydka SPD institut wopytała
Budyšin. Zwjazkowa předsydka SPD, Saskia Esken, wopyta dźensa, pjatk, Serbski institut. Tam informowaše so wo nadawkach instituta, kaž tež wo tuchwilnej situaciji. W rozmołwje ze zastupowacej direktorku instituta, Susan Hozynej, kaž tež dalšimi zastupjerjemi serbskich institucijow bě wosebje tež nowy centrum wědy na Lawksim arealu tema.
Lěpšina zanjechaneje kónčiny
Krótkopowěsće (23.05.24)
Kalender znowa wušoł
Budyšin. W Ludowym nakładnistwje Domowina je wušoł nowy nakład kalendra „Łužica – Łužyca – Lausitz“ za lěto 2025. Znowa wabja fotografije Maćija Bulanka za najrjeńše blečki Łužicy kaž tež za tradicije a wašnja Serbow. Nimo toho skići kalender městno za noticy a zapiski. Produkt je po cyłym hornjo- a delnjoserbsce kaž tež němsce popisany a je wot nětka na předań.
Personal stawkuje
Wojerecy. W klinikumje Łužiskeje jězoriny stawkuja dźensa přistajeni, kotřiž su w dźěłarnistwje Verdi organizowani. Přičina su trajace tarifowe jednanja. Poslednje wuradźowanje 29. apryla wuslědka njeměješe. Verdi žada sebi wyše mzdy, kaž tež płaćenje inflaciskeho pjenjeza a wjace swobodnych dnjow.
Woidke a Kretschmer pola LEAG
Krótkopowěsće (22.05.24)
LND a SPL na „Swěće knihi“
Budyšin/Praha. „Das Buch – německojazyčná literatura“ je hesło Francej Kafce składnostnje jeho 100. posmjertnin wěnowanch 29. mjezynarodnych knižnych wikow „Svět knihi“. Wone wotměja so wot jutřišeho hač do 26. meje w Praze. Wospjet prezentujetej so na nich tež Ludowe nakładnistwo Domowina ze swójskim stejnišćom a Towarstwo přećelow Serbow (SPL) z čitanjemi mjez druhim Milana Hrabala a Lukáša Novosada.
Wučerjow we Łužicy wukubłuja
Zhorjelcu. Sakska wukubłanje wučerjow we wjesnych kónčinach dale skrući. Ministerstwje za wědomosć a kultus, Uniwersita Lipsk a Wysoka šula Žitawa/Zhorjelc chcedźa jutře w Zhorjelcu dokument za studijny poskitk „wučerstwo na wyšej šuli z wosebitej pedagogiku“ podpisać. Wukubłanje budźe přewažnje na Wysokej šuli Žitawa/Zhorjelc.
Dźeń tykowanych domow
Krótkopowěsće (21.05.24)
Pólski film počesćeny
Zhorjelc. Film „Tyle co nic“ je hłowne myto 21. Nysoweho filmoweho festiwala dobył, kotrež spožči Sakske statne ministerstwo za wědomosć, kulturu a turizm. Pólski režiser Grzegorz Dębowski přija z rukow statneje ministerki Barbary Klepsch (CDU) njedźelu wječor w Zhorjelcu 10 000 eurow. Jury w kotrejž skutkuja fachowcy z Němskeje, Pólskeje a Čěskeje su mjez dźewjeć filmami rozsudźili.
Myto dr. Madlenje Norbergowej
Podstupim. Lětuše Myto Miny-Witkojc spožči so dr. Madlenje Norbergowej. Społnomócnjeny braniborskeho knježerstwa za naležnosće Serbow Tobias Dünow rjekny, zo je wědomostnica přikład za prócowanje wo zachowanje delnjoserbskeje rěče. Hižo čas žiwjenja angažuje so wona powołansce, priwatnje kaž tež čestnohamtsce w tutym zmysle a to nic jenož w Delnjej Łužicy ale tež za mjezami Braniborskeje.
Zetkanje dźiwadłow zahajene
Krótkopowěsće (17.05.24)
Domowina namołwja wolić hić
Budyšin. Z namołwu, na komunalnych, Europskich a krajnosejmowych wólbach so wobdźělić, je so prezidij Domowiny za serbsku zjawnosć wobroćił. „W demokratiji smě kóždy sobu skutkować. Tohodla je trěbne, zo zasadźamy so ze swojim hłosom za towaršnosć, kotraž so přez tolerancu, mjezsobny respekt a mnohotnosć wuznamjenja“, rěka we wčera wozjewjenej namołwje.
Z Mytom Viadriny počesćeny
Frankfurt nad Wódru. Z 23. mytom Viadridny je Europska uniwersita Frankfurt nad Wódru wčera němskeho politologu a bywšeho direktora Němskeho historiskeho instituta we Waršawje, prof. dr. Klausa Ziemera, počesćiła. Lawreat je hižo lětdźesatki znaty jako wupokazany znajer a wuběrny analyst němsko-pólskich poćahow.
Weber nachwilny intendant
