Krótkopowěsće (07.10.24)
Njezbožo na mišterstwje
Běła Woda. Na Brězowskim jězorje běše minjeny kónc tydźenja swětowe mišterstwo spěšnych čołmow. Při tym pak dóńdźe k njezbožu, dokelž staj dwaj čołmaj do so zrazyłoj. Pilot z Madźarskej bě wjacore mjeńšiny pod wodu a wuchowanscy pomocnicy jeho reaniměrowachu. Ćežko zranjeneho dowjezechu do Wojerowskeho klinikuma. Tamny wodźer čołma bě 59lětny z Italskeje.
Jubilejne wiki přewjedli
Wjazońca. Nimale 80 hornčerjow z Němskeje, Čěskeje a Pólskeje je so minjeny kónc tydźenja na 35. hornčerskich wikach we Wjazońcy wobdźěliło. Nimo wikow přewjeduja tam tež program, při čimž zhonja wopytowarjo tójšto wokoło keramiki. Tež hornčerjo z wokoliny, kaž z Halštrowa, Hózka abo Porchowa je přehladka we Wjazońcy wažny termin.
Najwjetša lodohokejowa arena
Krótkopowěsće (04.10.24)
Kritikarja brunicy delegowali
Budyšin. Prezidij Domowiny je na posedźenju srjedu Thomasa Burchardta zaso do brunicoweho wuběrka Braniborskeje delegował. Z tym prezidij namjet župy Delnja Łužica sćěhowaše. Burchardt je hižo wjele lět z mandatom serbskeho třěšneho zwjazka z čłonom tutoho gremija. Wón je so zahe přećiwo dalšim brunicowym jamam a za škit serbskeho sydlenskeho ruma zasadźował.
Twornju w lěće 2026 zawru
Zhorjelc. Francoski koncern Alstom je nětko připowědźił, zo chce Zhorjelsku twornju hač do kónca měrca 2026 zawrěć. Přičina toho je strategiske přerjadowanje wukonow na wuchod Europy. Tuchwilu ma zawod něhdźe 700 přistajenych. Stejnišćo w Zhorjelcu zhladuje na 175 lět wuspěšne zhotowjenje ćahow. Předsyda zawodneje rady René Straube ma rozsud Alstom za tragiski.
Pytany złóstnik lepjeny
Krótkopowěsće (02.10.24)
Tanki bórze ze Zhorjelca?
Budyšin. Po informacijach MDR INVESTIGATIV so němsko-francoski koncern za brónje KNDS za Zhorjelski zawod Alstom zajimuje. Nawodnistwo koncerna francoskeho zhotowjerja ćahow bě kónc julija wozjewiło, zo ma so Zhorjelska twornja předać. KNDS pyta nětko za stejnišćom za brónjernju. Dźěl sobudźěłaćerjow Alstom chce KNDS přewzać. Informacije pak njejsu hišće wobkrućene.
„Sorbistan“ w dalšej stolicy
Zwěrin. Kulturny forum Schleswigsko-holsteinskeho domu w Zwěrinje (Schwerin) je wot dźensnišeho do zajutřišeho z hosćićelom festiwala „(L)Ost poets stage“. Program wopřijima na přikład performance Łužiskeje spokenword-akademije, prezentaciju knihi „Pozběh je žónski“, diskusije na podiju kaž tež koncerty a kabaret. Jonas Pjetaš wuhotuje dźěłarničku „Re:Load – Serbski poetry slam“.
Astrocentrum nětko wuhotuja
Krótkopowěsće (01.10.24)
Pěstowarnje wurjaduja
Miłoćicy. Předsydstwo a čłonojo Křesćansko-socialneho kubłanskeho skutka Sakska rozsudźichu, zo ma so wobłuk pěstowarnjow w nošerstwje CSB wurjadować. Wot klětušeho januara zrjaduje so wobłuk do powšitkownowužitneje towaršnosće z wobmjezowanym rukowanjom. Wšitcy sobudźěłaćerjo so do noweje towaršnosće přewozmu. Jeje jednaćel budźe Marko Kliman, kotryž wostanje zdobom jednaćel CSB.
Atentatnik dyrbi do psychatrije
Biskopicy. Budyske krajne sudnistwo je dźensa wusud 17lětneho atentatnika z Biskopic wozjewiło. Wobskorženy dyrbi přichodne lěta do psychatrije. Młodźinska komora zasudźi jeho nimo toho k pjeć lětam młodźinskeho chłostanja. 17lětny je loni w awgusće spytał, swoju něhdyšu šulu w Biskopicach zapalić. Šulerja zakładneje šule wón z nožom ćežko zrani.
Dokumentaciju předstajiła
Krótkopowěsće (30.09.24)
Delan nětko čěski kanonik
Litoměřice. Ralbičanski wosadny farar Šćěpan Delan bu zawčerawšim w Litoměřicach jako kanonik do tamnišeho katedralneho kapitla swjateho Šćěpana přiwzaty. Litoměřicki biskop Stanisłav Přibyl je jeho na swjedźenju swjateho Wjacława zapokazał. Wjele Serbow je so swjatočnosći wobdźěliło. Na kóncu Božeje mšě woni serbski kěrluš zaspěwachu.
Nowy rekord nastajili
Wysoka Dubrawa. W Hornjej Łužicy je so z najwyšim palacym tak mjenowanym „šwedskim wohenjom“ nowy rekord nastajił. Cyłkownje 34 metrow wysokeho šmrěka su akterojo minjeny pjatk we Wysokej Dubrawje pola Niskeje zapalili. Do toho su zarjadowarjo wšitke hałuzy štoma wotstronili. Mišter za rozbuchliny je zdónk šmrěka wotnutřka z pomocu elektriki zapalił.
„Praske nalěćo“ dale žiwe
Krótkopowěsće (27.09.24)
Němcy so kwalifikowali
Němcy. Wjes Němcy je sej mjez šěsć wobdźělnikami na wokrjesnym wubědźowanju „Naša wjes ma přichod“ prěnje město wudobyła. Oberlichtenau slěduje na druhim městnje, Sulšecy na třećim. Prěnje a druhe městno stej za zwjazkowe wubědźowanje kwalifikowanej.
Do wólbow hišće raz forum
Běła Woda. Třo požadarjo wo zastojnstwo Wyšeho měšćanosty w Běłej Wodźe chcedźa dźensa hišće raz na wólbnym forumje prašenja wobydlerjow wotmołwić. Rozsudne wólbne koło je zajutřišim. W prěnim kole před štyrjomi tydźenjemi njejsu Swantje Schneider-Trunsch (Klartext), Katja Dietrich (njewotwisna) a David Kreiselmeier (AfD) absolutnu wjetšinu hłosow wolerjow dóstali.
Prěni serbski countryjowy walčik
Krótkopowěsće (26.09.24)
Lessingowe myto Meyerej
Drježdźany. Spisowaćel Clemens Meyer je z lawreatom Lessingoweho myta Swobodneho stata Sakskeje 2025. Wuznamjenjenje spožča jemu za „wjelorake, originarne wuměłstwowe přinoški“, kotrež „towaršnostnu debatu“ wobohaćeja. Spěchowanskej myće přizwolichu Lipšćanskej awtorce Tinje Pruschmann a Budyskemu režiserej a nawodźe tamnišeho Thespis-centruma Georgej Genouxej.
Róža Pinkawina njeboha
Worcyn/Budyšin. Zasłužbna Domowinjanka, lawreatka Myta Domowiny 2009 a wučerka na wuměnku Róža Pinkawina z Worcyna je 88lětna hižo njedźelu w Budyskej chorowni zemrěła. To je župa „Jan Arnošt Smoler“ ze swójby zhoniła. Swěru je so wona doposledka wo Muzej Měrćina Nowaka w Njechornju starała, zajimcow po nim wodźiła, a swoju kónčinu w župnym předsydstwje zastupowała.
Festiwal Interphoto zaběžał
Krótkopowěsće (25.09.24)
Předsydstwo Zelenych wotstupi
Berlin. Po wjacorych wólbnych poražkach strony je předsydstwo Zelenych swój wotstup připowědźiło – lěto do přichodnych wólbow zwjazkoweho sejma. Tole staj wobaj předsydaj strony Ricarda Lang a Omid Nouripour w Berlinje zdźěliłoj. Na zjězdźe strony w nowembru chcedźa nowe předsydstwo wuzwolić.
Wotnětka z dźěćacymi spěwami
Budyšin. Aplikacija „Towaršny spěwnik“ je wo dalši pakćik spěwow rozrostła. Dohromady tři pakćiki z cyłkownje 461 spěwami su z tym přistupne: „Zakładny pakćik“, „Młoda hudźba“ a wotnětka tež „Dźěćace spěwy“. Nowa je funkcija, kotraž zmóžnja wužiwarjam, swójske lisćiny pěsnjow zestajeć. App je darmotna, pakćiki předawaja online pod .
Namjety za 150. schadźowanku
Krótkopowěsće (24.09.24)
Přednošk wo drasće za rejowanje
Choćebuz. Pod nadpismom „Drasta je za rejowanje“ je wědomostna sobudźěłaćerka Serbskeho instituta dr. Theresa Jacobsowa wčera wo serbskej drasće na rejach něhdy a dźensa přednošowała. Referatej w Choćebuskim Serbskim muzeju je něhdźe 30 zajimcow sćěhowało. Přednoškej slědowachu reje, kajkež skupina Serbska reja pod hesłom „Rejowański Dom Łužyca“ prawidłownje w Choćebuzu wuhotuje.
Nowu stražu přepodali
Njedźichow. W Njedźichowje su zamołwići wčera nowu wuchowansku stražu přepodali. Za něhdźe połdra miliona eurow je tam twarski kompleks ze třomi dźělemi nastał. Tam su móžnosće za přebywanje a wotpočowanje, běrowy a hala za jězdźidła. Projekt realizowało je 26 předewzaćow z regiona. Stražu nětko maltezojo wužiwaja.
„Swětła nad bunkerami“
Krótkopowěsće (23.09.24)
2. łužiske fotowe dny zakónčili
Luboraz. Prezentacija wudźěłkow tworješe wčera zakónčenje 2. łužiskich fotowych dnjow w Luborazu. Dohromady dźesać wuměłcow je w běhu tydźenja „změnu we Łužicy z přeswědčiwymi a estetisce poradźenymi wobrazami dokumentowało“. Mjez wobdźělnikami běchu mjez druhim Yvonne Most, Jürgen Maćij a Hanka Šěnec; přehladka pod hołym njebjom při Luboraskim hrodźe je hač do kónca lětušeho oktobra přistupna.
Z Łužicu so rozestajić
Choćebuz. Ze šulskim lětom 2024/25 je so šulerske wubědźowanje „Łužiscy designerojo produktow“ zahajiło. Pod hesłom „Što je za was Łužica?“ móža so šulerjo we wokrjesach na juhu Braniborskeje ze swojej domiznu rozestajeć a swoje ideje projektej Dompro zapodać. Dalše informacije nańdu zajimcy online pod www.mitmachen-lausitz.de.
Proces bórze zakónča
