Krótkopowěsće (18.09.25)
Wurjadnu „hłownu“ wotměli
Budyšin. Z formalnych přičin je Maćica Serbska wčera wurjadnu hłownu zhromadźiznu w Budyskim Serbskim domje wuhotowała. Jednohłósnje schwalichu čłonojo přiměrjeni wustawkow, kotrejž rjadujetej nadawki předsydstwa towarstwa a jeho reprezentancu w juristiskim zmysle. Po zhromadźiznje zahajichu sezonalny rjad Maćična akademija z přednoškom „Prěni lětdźesatk nakładnistwa Maćicy Serbskeje“ dr. Franca Šěna (čitajće wjace we wutornym wudaću SN).
Wutwar A4 hakle po 2040?
Drježdźany/Budyšin. Planowanje wutwara A4 wuchodnje Drježdźan je Zwjazk jeničce hač do Hermsdorfa přilubił. Dalše rozšěrjenje awtodróhi na tři jězdnje do kóždeho směra chce po prognozy wobchada 2040 pruwować. Tole wuchadźa z wotmołwy sakskeho knježerstwa na naprašowanje zapósłanca krajneho sejma Franka Peschela (AfD). Peschel sej wjac angažementa Sakskeje za Łužicu žada.
F-35 dale preferuja
Krótkopowěsće (17.09.25)
Tři žony za wólby wjesnjanostki
Njeswačidło. Tři žony wabja do 2. koła wólbow wjesnjanostki w Njeswačidle wo wolerjow gmejny: Optikarka Anett Pötschke ze Šešowa, ekspertka za strowotnistwo Silke Mickan-Ziesch z Njeswačidła a kubłanska referentka a swobodna rěčnica Juliane Mazalla z Łuha. Wone wuhotuja tež mnohe zjawne informaciske zarjadowanja (jutře na 4. stronje je wobšěrnišo předstajimy a terminy wozjewimy.)
Doba wupisanja nimo
Budyšin. Doba prěnjeho wupisanja Domowinskeho Myta za hospodarstwo je so zawčerawšim skónčiło. Zarjadej Domowiny su namjety z Delnjeje, srjedźneje a Hornjeje Łužicy dóšli. Nětko ma so nowy wutworjeny mytowanski wuběrk schadźować a wo namjetach wuradźować. Myto přepodadźa na 3. fachowym forumje „hospodarstwo a kultura“ w nowembrje.
Haćenja na železniskej čarje
Krótkopowěsće (16.09.25)
Přestorča knižne předstajenje
Njebjelčicy. Knižne předstajenje „Z Prahi do Palestiny“, kotrež měješe so 18. septembra w Njebjelčanskej wosadnicy wotměć, dyrbi Ludowe nakładnistwo Domowina chorosće dla přestorčić. Nowy termin je wutoru, 30. septembra, w 19 hodź. na Njebjelčanskej gmejnskej žurli na Hłownej dróze.
Rozmołwne koło přihotowali
Budyšin. Na swojim wčerawšim online-posedźenju je Mjeńšinowa rada mjez druhim wo přihotach přichodneho rozmołwneho koła narodnych mjeńšin a rěčacych delnjoněmčiny w nutřkownym wuběrku němskeho Zwjazkoweho sejma wuradźowała. Dale zaběrachu so čłonojo rady ze zetkanjom młodostnych, kotřiž přisłušeja narodnej mjeńšinje abo delnjoněmčinu rěča. Zarjadowanje budźe lětsa w nowembrje w Budyšinje.
Dotal dwaj wjelkaj zatřělili
Krótkopowěsće (15.09.25)
Scholze kandidaturu cofnył
Njeswačidło. Jenički kandidat za wólby hłownohamtskeho wjesnjanosty w Njeswačidle je pjatk swoju kandidaturu cofnył. Martin Scholze z Bóšic bě w prěnim wólbnym kole z 48 proc. trěbnu absolutnu wjetšinu skomdźił. K druhemu kołu njedźelu, 28. septembra, wón hižo njenastupi. Kaž nawodnica wólbow Katrin Ullrich wobkrući, dóstanu wolerjo prózdnu wólbnu cedlku a smědźa – kaž w prěnim kole – mjeno napisać. Tehdom je Juliane Mazalla z Łuha ze 105 hłosami najlěpši wuslědk wšěch 56 wosobow docpěła, kotrež buchu napisane. Wjele hłosow bě njepłaćiwych, dokelž njejsu ludźo nimo předmjena a swójbneho mjena wjesku napisali. Scholze njebě drje za sebje wabił, wjele ludźi pak jeho znaje, tež jako wobdźělnika demonstracijow při B 96.
Kowar znowa w předsydstwje
Krótkopowěsće (12.09.25)
Naprašowanje zahajili
Budyšin. Budyska Allendowa štwórć ma so wožiwić, dale wuwiwać a porjeńšić. Měšćanski zarjad je nětko anonymne naprašowanje zahajił, kotrež je mjez druhim w rušćinje a arabšćinje přistupne. W naprašowanju na internetnej stronje www.mitdenken.sachsen.de/1056903 su konkretne prašenja wo měšćanskej štwórći podate. Hač do 27. septembra móža je zajimcy wupjelnić.
Prezentuje so wospjet w Praze
Praha. Z postrowom zahaji dźensa sakska ministerka za kulturu a turizm Barbara Klepsch lětni swjedźeń Kontaktneho běrowa Swobodneho stata Sakska w Praze. Zarjadowanje, na kotrymž so sakska kultura a hospodarstwo w čěskej stolicy prezentujetej, wotměwa so jónu wob lěto. Partneraj stej lětsa wokrjes Šwikawa a turistiski zwjazk regiona Kamjenica-Šwikawa. Sakska a Čěska mjez sobu nadal wuske styki pěstujetej, štož swjedźeń w Praze wospjet symbolizuje.
Wojerska pomoc Pólskej
Krótkopowěsće (11.09.25)
Statnik wabi za srědki załožby
Berlin. Předsyda Domowiny Dawid Statnik je so wčera w Berlinje ze zapósłancomaj strony SPD zwjazkoweho sejma Maju Wallstein (za Choćebuz-Sprjewja-Nysa) a Martinom Gersterom (čłon etatoweho wuběrka) zetkał. Statnik so w rozmołwje z frakcijemi za to zasadźuje, zo parlament spěchowanje Załožby za serbski lud tak wobzamknje, kaž je to knježerstwo do naćiska za etat 2026 zapisało.
Myto spožčili
Köln. Serija „37° Leben: Against All Gods – Die Glaubens-WG“, w kotrejž je z Róžanta pochadźaca Serbowka Gloria Lanzyna sobu skutkowała, bu wčera wječor w Kölnje z telewizijnym mytom wuznamjenjena. Produkcija je w kategoriji „najlěpši infotainment“ dobyła. Serija pokazuje, kak su žid, muslim, hinduistka, buddhist, njewěriwa wosoba a katolikowka nachwilnje zhromadnje bydlili.
Zawod nachwilnje zawrěli
Krótkopowěsće (10.09.25)
Hasinger: Sylny signal za Łužicu
Zhorjelc. Astrocentrum Łužica (DZA) wuhotuje přichodny tydźeń w Zhorjelcu mjezynarodne zeńdźenje Astronomiskeje towaršnosće pod hesłom „The restless Universe“ (njeměrne swětnišćo). Posledni raz je towaršnosć 1924 na schadźowanje w Lipsku přeprosyła. Tohodla widźi direktor DZA, prof. Günther Hasinger, podawk jako sylny signal za Łužicu.
Energija z wětra zaběra sejm
Drježdźany. W Sakskim krajnym sejmje su so dźensa, w prěnim posedźenju po lěćnej přestawce, z naćiskom zakonja wo financielnym wobdźělenju gmejnow na dobytkach zdobywanja energije z wětra zaběrali. Jón běchu frakcije CDU, SPD a BSW wudźěłali. Mjez druhim zwyša wot lěta 2026 winowatostny wotedawk na produkowanu kilowattnu hodźinu wo 0,1 cent na 0,3 cent.
Wulke plany Toyoty
Krótkopowěsće (09.09.25)
Saněruja Zhorjelske dwórnišćo
Zhorjelc. Na Zhorjelskim dwórnišću su ze zaróštowanjom južneje fasady 110 lět stareho, historiskeho hłowneho twarjenja wčera druhu saněrowansku fazu zahajili. Zwjazk, kraj Sakska a Němska železnica dohromady 33,5 milionow eurow do wulkoprojekta inwestuja. Mjez druhim chcedźa wokna na 1 250 kwadratnych metrow wulkej třěše wuměnić kaž tež woclowe nošaki ponowić a zesylnić.
Poslednje přihoty na nowej uni
Podstupim/Choćebuz. „Rozmołwjamy so z poslednimi požadarjemi za dohromady 80 městnow z profesuru na nowej Mediciniskej uniwersiće Łužica“, to zdźěli braniborska ministerka za wědomosć Manja Schüle (SPD) wčera w nowinskej zdźělence. Požadarjo pochadźeja mjez druhim z USA, Južneje Koreje, Awstralskeje a dalšich europskich krajow. Cyłkownje 36 studowacych mediciny wuknje w lětušim zymskim semestrje na uniwersiće.
Słuchohra tež jako stream
Krótkopowěsće (08.09.25)
Hišće žadyn nowy wjesnjanosta
Njeswačidło. 327 hłosow je Martin Scholze z Bóšic po informacijach gmejnskeho zarjada na wólbach wjesnjanosty Njeswačidła wčera dóstał (49 procentow). 889 z 1 877 wólbokmanych (47 proc.) je drje so wobdźěliło, jenož 667 hłosow pak bě płaćiwych. Ludźo napisachu 56 dalšich mjenow na wólbny lisćik. Najwjac hłosow zdoby Juliane Mazalla z Łuha (105). Druhe wólbne koło budźe 28. septembra.
Mjezynarodny sympozij zahajili
Mały Wjelkow. „Kulturne herbstwo zwjazuje a twori přichod“ rěka mjezynarodny sympozij, kotryž město Budyšin wot dźensnišeho do zajutřišeje srjedy w Małowjelkowskej sotrowni wuhotuje. Program wopřijima přednoški wo stawiznach a wuznamje tamnišeje bratrowskeje jednoty, diskusije na podiju a wodźenja kaž tež ekskursiju do Niskeje. Patronatstwo wukonjeja wulkopósłancy Němskeje, Danskeje a Čěskeje.
Wokrjesny zwjazk BSW załožili
Krótkopowěsće (05.09.25)
Rozsudźa wo premjerje
Chrósćicy. Připowědźeneho měnjateho wjedra dla Towarstwo Cyrila a Metoda hač do pózdnjeho popołdnja rozsudźi, hač so premjera pasionskeje hry „Sćěhuj mje!“ dźensa wječor kaž planowane wotměje. W 17.30 hodź. rozsud na internetnej stronje www.posol.de/pasion-2025 a na Instagramje pasion_chroscicy wozjewja.
Böhmer w komisiji
Budyšin/Drježdźany. Budyski měšćanosta dr. Robert Böhmer (bjezstronski), kiž je w měsće za financy, porjad, kubłanje a socialne zamołwity, je wotnětka z eksternym čłonom noweje enquetoweje komisije za komunalne etaty Sakskeho krajneho sejma. Wona wěnuje so polěpšenju finančneje situacije gmejnow a městow. Powołany bu Böhmer wot frakcije AfD, kotraž bě wutworjenje komisije namjetowała.
Nadźijeja so myta
