Krótkopowěsće (03.02.26)
Horst Gallert njeboh
Budyšin. Bywši krajny rada Budyskeho wokrjesa Horst Gallert je tele dny w starobje 88 lět zemrěł. Wot lěta 1992 do 2001 je so wón rozsudnje za wuwiće Budyskeho wokrjesa zasadźował. „Njezapomnite je wosebje jeho zasadźenje za kulturu, přewažnje za Němsko-Serbske ludowe dźiwadło“, krajny rada wokrjesa Udo Witschas a jeho předchadnik w zastojnstwje Michael Harig (wobaj CDU) wčera hódnoćeštaj.
Wo strategiji rozmyslowali
Wojerecy. Na wčerawšej rewěrowej konferency we Wojerecach diskutowaše něhdźe 20 wobdźělnikow z wobłukow komunow, politiki, hospodarstwa, wědomosće a ciwilneje towaršnosće wo přichodnym postupowanju hladajo na změnu strukturow w brunicowych kónčinach. Sakske ministerstwo za infrastrukturu a krajne wuwiće bě na nju přeprosyło. W srjedźišću konferency steješe ewaluacija a přichodna strategija.
Historisku chorhoj nabyli
Krótkopowěsće (02.02.26)
Wostanu jednanjakmani
Zhorjelc. Zhorjelski wokrjes wodychnje. Sakska krajna direkcija je jemu dodatny etat přizwoliła. Najebać budget we wobjimje 841 milionow eurow pak je połoženje nadal napjate. Zhorjelski wokrjes so hižo dlěje z financielnymi ćežemi bědźi. Přizwolenje dodatneho etata bě jenož z wuwzaćnym rjadowanjom móžne.
Prawicarske pady přepytowali
Drježdźany/Lipsk. Statny škit je loni jědnaće padow z ekstremistiskim prawicarskim pozadkom na sakskich wysokich šulach přepytował a to w Drježdźanach a Lipsku. Tole zdźěli sakske ministerstwo za wědomosć na naprašowanje frakcije Lěwicy w Sakskim krajnym sejmje. Na Lipšćanskej uniwersiće bě to mjez druhim akcija z plakatami tak mjenowaneje Sachsengarde.
Na kursaj so přizjewić
Budyšin. Zajimcy za rěčny kurs čěšćiny w Praze (wot 16. julija do 13. awgusta) abo w Čěskich Budějovicach (wot 2. awgusta do 24. awgusta) njech w Rěčnym centrumje WITAJ hač do 15. měrca swoje přizjewjenske podłožki wotedadźa. Formular a dalše informacije su na internetnej stronje přistupne.
Mjetarjo finale přěhrali
Krótkopowěsće (30.01.26)
Sprjewiny hotel bórze zawru
Budyšin. Dom něhdyšeho Sprjewineho hotela kónc februara dokónčnje zawru. To je Budyski krajnoradny zarjad zdźělił. Dwanaće lět su tule ćěkancow hospodowali, tuchwilu je jich hišće 150, mjez nimi 55 Ukrainjanow. Požadarjo azyla dóstanu městno w druhich domach, kotrež wokrjes wužiwa. Ukrainjenjo móhli w bydlenskich domach kwartěr namakać.
Swójbna zběrka so nawróćiła
Choćebuz. Archiw swójby hrabje Hermanna von Pücklera-Mužakowskeho je so po 80 lětach zaso do Rogeńskeho parka w Choćebuzu nawróćił. Do toho bě zběrka něhdźe 400 dokumentow z 16. do 20. lětstotka w Podstupimskim Braniborskim krajnym archiwje składowana. Z tym je 400 lět swójbnych stawiznow z manuskriptami knihow, zrěčenjemi k mandźelstwam, priwatnymi listami atd. zaso w Choćebuzu.
Pacientam lěki słać
Krótkopowěsće (29.01.26)
Alstom potencial Łužicy wužiwa
Budyšin. Koncern Alstom swoje stejnišćo w Budyšinje wutwarja: Wot wčerawšeho maja tam rozšěrjeny wobłuk za produkciju regionalnych ćahow. Za Budyskeho zapósłanca Sakskeho krajneho sejma Marka Šimana (CDU) je to pozitiwny signal za region. Wón na to skedźbnja, zo je tu mnoho kwalifikowanych inženjerow a fachowych dźěłaćerjow, štož je dobre wuměnjenje za naročnu produkciju.
Sakska za firmy atraktiwna
Mnichow. Hospodarski slědźenski institut ZEW w Mannheimje je nowu studiju wozjewił, z kotrejež wuchadźa, zo je Sakska před Bayerskej za zawody najatraktiwniši zwjazkowy kraj. Po hódnoćenju instituta je Bayerska wosebje we wobłuku infrastruktury popušćiła. Cyłkownje nadpadnje, zo su zapadoněmske kraje derje zaměstnjene, tola w rankingu dale a wjace dypkow a městnow přisadźa.
Mjenje bjezdźěłnych we wokrjesu
Krótkopowěsće (28.01.26)
Kapacita ćahow wobmjezowana
Budyšin. Krajna železnica Trilex je wčera wozjewiła, zo je w ćahach tuchwilu přemało kapacitow. Tójšto ćahow ma so reparować. Mjez Zhorjelcom a Drježdźanami ćahi dale jězdźa, tola ćěridłowe wozy njedosahaja a tuž njeje wjele městna za sobujěducych. Trilex prosy pasažěrow, zo bychu zwiski pruwowali a ćah po móžnosći we hłownych wobchadnych časach njewužiwali.
Mjenje dźěłowych městnow
Kamjenc. Po wšej Sakskej je so 15 000 dźěłowych městnow zhubiło. Tole je Krajny zarjad za statistku w Kamjencu wčera zdźělił. Loni dźěłaše w swobodnym staće něhdźe 2,049 milionow ludźi. To je 0,7 procentow mjenje hač lěto do toho. Woteběraca ličba městnow je wuraz słabeje konjunktury. Tež w lěće 2024 bě hižo mjenje dźěłowych městnow. To potrjechi nimale wšitke branše.
Kónc korejtow w Praze
Krótkopowěsće (27.01.26)
Wjac wo Serbach na uniwersiće
Choćebuz. Prezidentka Braniborskeje techniskeje uniwersity Choćebuz-Zły Komorow prof. Gesine Grande a direktor Serbskeho instituta prof. Hauke Bartels staj wčera kooperaciske dojednanje podpisałoj. Institut a uniwersita přihotujetej w kooperaciji wučbne zarjadowanja wo serbskej rěči a kulturje. Nimo toho chcetej so zhromadnje wo zakónčace dźěła, promocije a slědźenje starać.
„Złoty chorobny stoł“ za jězorinu
Stuttgart. Turistiskemu zwjazkej Łužiska jězorina su na wulkowikach za pućowanje CMT (Caravan, motor, turistika) po lěće 2019 nětko wospjet wuznamjenjenje „Złoty chorobny stoł“ za turizm bjez zadźěwkow spožčili. Jury pisaše, zo je jězorina mjeztym modelowy region za wuwiće a zwičnjenje inkluziwneho turizma. Wosebje sej dobre informacije wo wotpowědnych poskitkach chwala.
Kamjenc: Dalši pad tuberkulozy
Krótkopowěsće (26.01.26)
Njeskutk w Kulowje wujasnili
Kulow. Třo 14- a 15lětni młodostni su podhladni, zo su w silwesterskej nocy na Kulowskim torhošću z ilegalnej pyrotechniku, pochadźacej z wukraja, na wobchodach wěcnu škodu 26 000 eurow zawinili. To je wuslědk přepytowanja policije. Młodostni ćisnychu praskotak z 300 gramami rozbuchliny, štož je za žiwjenje strašne. W Němskej su maksimalnje štyri gramy rozbuchliny dowolene.
CDU so přećiwo AfD přesadźiła
Zły Komorow. Alexander Erbert (CDU) je nowy krajny rada wokrjesa Hornje Błóta-Łužica. Wón je so we wčerawšim druhim kole wólbow z 53,4 proc. přećiwo kandidatce AfD Antje Ruhland-Führer (46,6 proc.) přesadźił. 45,2 proc. wšěch 90 343 wólbokmanych je so na wólbach wobdźěliło. To je nimale runje telko kaž w prěnim kole před tydźenjomaj. Dźensa ma wólbny wuběrk wokrjesa wuslědk oficielnje wobkrućić.
Skóncowanje lojpy chłostaja
Krótkopowěsće (23.01.26)
Próstwa čitarjam SN
Budyšin. Ludowe nakładnistwo Domowina prosy swojich čitarjow dźensa a přichodne dny wo zrozumjenje. Techniskich přičin transportneje firmy dla njehodźa so Serbske Nowiny sčasom dodawać. Je móžno, zo dóstanu čitarjo nowinu hakle přichodny dźeń. Transportna firma zaměrnje na rozrisanju dźěła.
Chcedźa w regionje zwučować
Kamjenc. Zwjazkowa wobora chce kónc tydźenja wokoło Běłeje Wody, Kamjenca, Wojerec a Grodka zwučować. We wobłuku zwučowanja z mjenom „Colder Iron“ dyrbja wobydlerjo mjenowanych kónčinow z tym ličić, zo přichodne dny wojakow abo wojerske jězdźidła wuhladaja. Zwučować chcedźa wonu taktisku direktnu komunikaciju. Mjez druhim je předwidźane, zo wojacy z pomocu balonow lětaki rozdźěla.
Dalše pjenjezy dóstali
Krótkopowěsće (22.01.26)
Wobłuk za operacije přetwarjeja
Wojerecy. W klinikumje Łužiska jězorina we Wojerecach tuchwilu wobłuk za operacije přetwarjeja. Cyłkownje inwestuja za to 7,1 milion eurow. Wulki dźěl toho spěchujetej Zwjazk a swobodny stat Sakska. Klinikum sam ma jeničce podźěl we wobjimje 550 000 eurow nałožić. W času přetwara w chorowni dale operacije přewjeduja.
Mólbje Metzkesa w Budyšinje
Budyšin. Dwě mólbje 96lětneho, w Budyšinje rodźeneho Haralda Metzkesa su wčera mecen Michael Wiedemann z Berlina, galerist a moler Holger John a něhdyši Drježdźanski wyši měšćanosta Wolfgang Berghofer Budyskemu měšćanskemu muzejej přepodali. Měšćanosta dr. Robert Böhmer dźakowaše so za wobrazaj „Herkules am Scheideweg“ a „Fallende Stadt“, kotryž pokazuje rozpad systema.
Zubry do rezerwata
Krótkopowěsće (21.01.26)
Uniwersita bórze bóle serbska
Choćebuz. Braniborska techniska uniwersita Choćebuz-Zły Komorow a Serbski institut podpisatej přichodnu póndźelu kooperaciske zrěčenje. „Serbska perspektiwa ma so při slědźenju a we wučbje uniwersity bóle widźomna stać“, ze zdźělenki wuchadźa. Hižo do toho je uniwersita připowědźiła, zo zahaji lětsa nazymu wukubłanje wučerjow za serbšćinu na zakładnych šulach.
Rěčne pruwowanja złožić
Budyšin. Rěčny centrum WITAJ poskićuje prawidłownje móžnosć, pruwowanja za certifikat hornjoserbšćiny po Zhromadnym europskim referencnym ramiku za rěče złožić. Lětsa wotměja so pruwowanja 7. měrca w Budyšinje. Přizjewjenski formular, informacije wo pruwowanjach a zwučowanske nadawki steja na internetowej stronje www.sprachzertifikat-sorbisch.de.
Wěstota zaso zaručena
