Krótkopowěsće (17.04.24)
Žadyn dźiw na postawje
Drježdźany/Wotrow. Prašenje za pozdatnym dźiwom na postawje blisko Wotrowa je rozrisane. Po přepytowanju zdźěli biskopstwo Drježdźany-Mišno wčera, zo jedna so při čerwjenej maćiznje wo roztoče. Klaus Reinhardt, profesor za nałožowanu coologiju při Drježdźanskej TU, bě k tutomu rezultatej přišoł. Wulka ličba zwěrjatkow na hłowomaj postawy móhła na ćopłoće zaležeć.
Stawki maturu poćežuja
Budyšin. Po cyłej Sakskej stawkuja wot dźensa, srjedy, hač do njedźele zaso busowi šoferojo. W Budyskim wokrjesu je wospjet předewzaće RegioBus potrjechene. Wosebje mjerzacy je stawk za maturantow, kotřiž tuchwilu swoje pruwowanja złoža. Sakski kultusowy minister Christian Piwarz bě so wčera nad situaciju wulce hóršił.
Poskićuja přezmjezny studij
Krótkopowěsće (16.04.24)
Serbske filmy w Drježdźanach
Drježdźany. We wobłuku dźensa zahajeneho 36. filmoweho swjedźenja Drježdźany wuhotuja Sakski filmowy zwjazk, serbsko-němska syć Łužycafilm a Załožba za serbski lud jutře pod hesłom „Wiźeś – Sichtbar – Widźomne“ popołdnjo „serbskich (krótko)filmow“. Mjez druhim předstaja na Hrodźe Lingnera pask „Som doma“ a knihu „Serbske filmowe krajiny“ Grit Lemke a Andyja Rädera.
Druhi raz „Happy monday“
Budyšin. Na druhej „Wjesołej póndźeli“ dožiwi wčera něhdźe 300 zajimcow Młodźinski dujerski orchester Budyšin, skupinu Fortschritt a „Spěwy do směrkow“ z Annu Mariju Bretschneider, Tassom Schille a Timom Heilmannom na Budyskim Hłownym torhošću. Přichodnu póndźelu wuhotuja mjez druhim Serbski institut a band Skaprifischer program na Póstowym naměsće.
Budyšanej myto spožčiła
Krótkopowěsće (15.04.24)
Přihotowanski wuběrk powołany
Choćebuz. Zwjazkowe předsydstwo Domowiny je minjeny pjatk w Choćebuzu čłonku a čłonow přihotowanskeho wuběrka za Mjezynarodny folklorny festiwal „Łužica“ 2025 powołało. To su Gabriel Krawc ze Serbskeje rejowanskeje skupiny Smjerdźaca, Błažij Handrik ze Serbskeho folklorneho ansambla Wudwor, Chróšćanski wjesnjanosta Marko Kliman kaž tež Katharina Jurkowa a Pětr Brězan z Domowiny.
Lětsa holcy w čitanju dobyłoj
Budyšin. 14 holcow a dwaj hólcaj, wšitcy su šulerjo 3. lětnika serbskich zakładnych šulow, su so zašłu sobotu w čitanju wubědźowali. Walentina Koklic z Ralbičanskeho kubłanišća je była mjez dwanaće maćernorěčnymi najlěpša a Sascha Landeckec z Budyskeho mjez štyrjomi w skupinje serbšćinu wuknjacych dźěći. Rěčny centrum WITAJ je čitanske wubědźowanje lětsa 20. króć organizował.
Dwójny poskitk wuknihowany
Krótkopowěsće (12.04.24)
Złota medalja šulerce ze Slepoho
Drježdźany. Sakski kultusowy minister Christian Piwarz je wčera wobdźělnikow Sakskeje olympiady cuzych rěčow počesćił. Złotu medalju wudobyštaj sej šulerka Wyšeje šule Slepo Luna Ritze w jendźelšćinje a šuler Serbskeje wyšeje šule Ralbicy Jakub Barč w rušćinje. Luiza Domanic, tež šulerka Ralbičan šule, wudoby sej w rušćinje druhe městno. Cyłkownje běše so 55 šulerjow 8. a 9. lětnikow wobdźěliło.
Finale za mjenowe prawo
Berlin. Dźensa chcyše zwjazkowy sejm reformu mjenoweho prawa Němskeje wobzamknyć. Z tym móža tež Serbowki swoje swójbne mjeno na serbske wašnje do hamtskich dokumentow zapisać dać. Sakski zapósłanc a parlamentariski jednaćel frakcije FDP Torsten Herbst, kiž je so wjele lět za reformu zasadźował, praji, zo ma serbšćina dźěl wšědneje komunikacije tež na zjawnych zarjadach być.
Šiman: Přihot na studij zaručeny
Krótkopowěsće (11.04.24)
Na konferency w Helsinkach
Helsinki. Kubłanska referentka Domowiny Katrin Suchec-Dźisławkowa a jednaćel Serbskeho šulskeho towarstwa Andreas Ošika přebywataj tele dny w Helsinkach. Tam wobdźělitaj so na zetkanju kubłanskeje skupiny FUEN. Mjez druhim rozestajataj so z kubłanskim systemom šwedskeje mjeńšiny w Finskej.
Liča z wjace nadpadami wjelkow
Drježdźany. Hladajo na miłe temperatury a z tym móžnosće swój skót na pastwach pasć, warnuje sakske fachowe zarjadnistwo wjelk před nadpadami rubježneho zwěrjeća. Kaž fachowcy wčera zdźělichu, měli plahowarjo skotu škitne naprawy přepruwować a spěšnje škody wotstronić. Zarjadnišćo wuchadźa z toho, zo dyrbja plahowarjo skotu z wjace wjelčimi nadpadami ličić.
Chcedźa pomnik znowa postajić
Krótkopowěsće (10.04.24)
Olympiada serbšćiny zahajena
Wodowe Hendrichecy. 56. centralna olympiada serbskeje rěče bu dźensa we Wodowych Hendrichecach zahajena. Hač do pjatka chce tam 63 šulerjow a šulerkow šěstych lětnikow ze šulow w Hornjej a 28 z Delneje Łužicy swoje dokonjanosće w serbskej rěči při spjelnjenju pisomnych a ertnych nadawkow dopokazać. Nošer zarjadowanja je Serbske šulske towarstwo.
Dešno wosebje powabne było
Choćebuz. Předsydstwo towarstwa Serbski kulturny turizm je so na posedźenju wčera w Choćebuskim Serbskim domje skonstituowało. Dale su so čłonojo wo zarjadowanjach k jutram w Delnjej a Hornjej Łužicy wuměnili. Pozitiwnje zwěsćichu, zo pěstuja žony w jědnaće wsach dwurěčneje Łužicy jutrowne spěwanje w serbskej rěči. Dešno běše jutry wosebje powabne w Delnjej Łužicy.
Wojuja dale wo titul UNESCO
Krótkopowěsće (09.04.24)
Spočatk abiturneho pruwowanja Drježdźany. Za 10 674 šulerjow a šulerkow w Sakskej zahaja so dźensa abiturne pruwowanja z předmjetomaj ewangelska a katolska nabožina. Ertne pruwowanja wotměwaja so wot 26. meje. Konkretne terminy šule same postajeja. 2 718 maturantkow a maturantow powołanskich gymnazijow nastupi 16. apryla do pruwowanskeho časa.
70 próstwow dóšło
Budyšin. Za projektowe spěchowanje lětsa w druhim połlěće předleži Załožbje za serbski lud po kóncu požadanskeje doby 31. měrca 70 próstwow. Spěchowanski wolumen wučinja nimale 332 000 eurow, załožba wčera informowaše. Załožbowy zarjad próstwy pruwuje, fachowa přirada 16. meje wo přizwolenju předewzaćow rozsudźi. Na to zapodawarjo zhonja, hač budźe jich projekt spěchowany abo nic.
Zastaranje z wodu zaručić
Krótkopowěsće (08.04.24)
Dale a wjace bioratarjow
Kamjenc. Trend ekologiskeho ratarjenja tež w Sakskej dale traje. Loni bě 12 procentow wjace zawodow ekologisce ratariło. Jich bě dohromady 810. Tež zawodow, kiž plahuja swój skót po ekologiskich principach, je lěto a wjace – dohromady 480. Mjez dohromady 4500 ratarskimi zawodami w Sakskej je nětko někak 11 procentow ekologiskich
Skóržba wuspěšna
Drježdźany. Krajne sudnistwo je skóržbje Budyskeho předewzaća Hentschke Bau přećiwo rešeršowacemu kolektiwej, kotryž zastupuje antifašistiski zwjazk VVN-BdA Sakska, tydźenja pjatk wopowědowało. Wšelake wuprajenja nastupajo prawicarske zmyslenje jednaćela Jörga Drewsa kaž tež sobudźěłaćerjow předewzaća so hižo wospjetować njesmědźa resp. dyrbja so w interneće zhašeć.
Statnik so z młodostnymi zetkał
Krótkopowěsće (05.04.24)
Wjace wučby wupadnyło
Drježdźany. Na sakskich šulach je w prěnim šulskim połlěće wjace wučbnych hodźin wupadnyło. To bě nimale 8,8 procentow, kaž ze statistiki kultusoweho ministerstwa wuchadźa. Za něhdźe 40 000 wupadnjenych wučbnych hodźin ma ministerstwo warnowanski stawk wuwučowacych loni w nowembru a decembru za hłownu přičinu.
Wobkrućenje njerozumja
Choćebuz. Wobswětowa syć Zelena liga kritizuje, zo njeje planowanje fosilneje płunoweje milinarnje w Janšojcach energijopolitisce sćěhujomne wobkrućene. Přiwjazanje na płunowu abo wodźikowu syć je w Janšojcach nadpřerěznje drohe a analyza kóštow a wužitka za planowane zjawne spěchowanje płunowodow pobrachuje, rěka w zapodatym stejišću Zeleneje ligi předewzaće nastupajo.
Wo projektach so wuměnja
Krótkopowěsće (04.04.24)
Pozicija ministra wobkrućena
Drježdźany. Pobrachowacy fachowcy we Łužicy su problem, na kotryž je sakski minister za regionalne wuwiće Thomas Schmidt (CDU) hižo dlěši čas skedźbnił. Hdyž so nětko ifo-institut kaž tež zastupjerjo industrijneje a wikowanskeje komory njedostatka fachowcow boja, to poziciju ministra wobkrući. Změna strukturow žada sej nimo nowych dźěłowych městnow tež inwesticije do mjechkich faktorow stejnišća, rjekny Schmidt.
Łužiska akademija přichoda
Lubnjow. Druhu Łužisku akademiju přichoda wuhotuja wot 7. do 12. julija w konferencnym centrumje LEAG w Lubnowje. 50 młodych ludźi změje tam šansu, so do swěta wobnowjomnych energijow z diskusijnymi kołami, dźěłarničkami a wulětami zanurić. Zajimcy w starobje 18 do 27 lět z Braniborskeje, Sakskeje a Berlina móža so hač do 30. apryla přizjewić. Prěnja akademija běše loni.
Pakt wohroženych městow
