Krótkopowěsće (09.12.25)
Wot brunicy k połwodźakam
Drježdźany/Choćebuz. Dźěłaćerjo předewzaća LEAG, kotřiž w brunicowych jamach dźěłaja, maja w přichodźe produkciju połwodźakow w Drježdźanach podpěrać. Wotpowědne kooperaciske zrěčenje stej LEAG a koncern GlobalFoundries wotzamknyłoj a zjawnosć wčera wo tym informowałoj. We wobłuku pilotoweho projekta ma dźesać sobudźěłaćerjow LEAG tři měsacy w Drježdźanach dźěłać.
Žane pjenjezy w nocy
Budyšin. W přichodźe njebudźe hižo móžno, pola awtomatow Budyskeje wokrjesneje nalutowarnje w nocy pjenjezy wot konta wotzběhnyć. Předsydstwo nalutowarnje zdźěli, zo chcedźa nowe rjadowanje hač do kónca lěta zwoprawdźić. Přičina za rozsud je wěstota. Awtomaty steja často w domach z bydlenjemi. Hdyž paduši awtomat rozbuchnu, su wobydlerjo wohroženi.
ZARI na wulkej konferency
Krótkopowěsće (08.12.25)
Bobry smědźa we Łužicy wostać
Drježdźany. Drježdźanske zarjadniske sudnistwo je minjeny pjatk rozsudźiło, zo smětej dwě swójbje bobrow we Łužicy wostać. Zwěrjata njesmědźa so přesydlić abo zatřělić. Přirodoškitny zwjazk Zelena liga Sakska je sudnistwo w chwatnej próstwje prosył, zo wosebitu dowolnosć za přesydlenje bobrow do Francoskeje cofnje. Hatar z Chrjebje bě tule dowolnosć dóstał.
Rěča wo etaće 2027/2028
Smochćicy. Sakski financny minister Christian Piwarz (CDU) liči za dwójny etat 2027/2028 z ćežkimi jednanjemi. Wudawki su wo wjele wyše hač dochody. „W tutej situaciji su strukturelne a bolostne zasadne rozsudy trěbne“, rjekny wón dźensa do zahajenja dwudnjowskeje klawsury wo etaće w Smochćicach. Po tuchwilnym planje pobrachujetej w nowym dwójnym etaće hač do 4,2 miliardźe eurow, zo móhli wšitke wudawki w samsnym wobjimje kaž dotal dale njesć.
Stawizny z Jizerskich horow
Krótkopowěsće (05.12.25)
Generacija Němska tež w Sakskej
Budyšin. W Sakskej ma so w prěnich měsacach 2026 krajny zwjazk organizacije Generacija Němska załožić. To je Budyski měšćanski radźićel Lennard Scharpe na naprašowanje wobkrućił. Wón bu minjeny kónc tydźenja w Gießenje na załoženskej zhromadźiznje młodźinskeje organizacije AfD Generacija Němska jako społnomócnjeny za financy wuzwoleny.
Proces wusadźeny
Choćebuz. Proces přećiwo 42lětnemu klimowemu aktiwistej před Choćebuskim zarjadniskim sudnistwom bu wčera wusadźeny, dokelž bě jeho prawiznica schorjeła. Při zahajenju procesa pak je přiwšěm 20 aktiwistow před sudnistwom protestowało. 42lětny je wobskorženy, dokelž je so z dalšimi akterami před třomi lětami na ležownosć Janšojskeje brunicoweje milinarnje zadobył a připrawy blokował.
Klóšter nima srědk pře diabetes
Krótkopowěsće (04.12.25)
Pjenjezy za dźěći a młodostnych
Budyšin. Budyskemu wokrjesej steji cyłkownje 50 000 eurow za projekty dźěći a młodostnych k dispoziciji. Pjenjezy su z lětnjeho nadbytka nalutowarnje. Zwjazki, zjednoćenstwa, towarstwa a gmejny Budyskeho wokrjesa móža so wo maksimalnje 2 500 eurow požadać. Srědki chce wokrjes z mało běrokratiskim dźěłom dźěćom a młodostnym za projekty přewostajić.
Nowy jězbny plan za busy
Budyšin. Wot 14. decembra płaći za busy w Budyskim wokrjesu nowy jězbny plan. Na internetnej stronje wokrjesa www.landkreis-bautzen.de/fahrplananderungen.php su zamołwići wšitke změny porno dotalnemu planej w tabulce zjimali. Někotre zwiski busow su dospołnje šmórnyli. Na stronje su tohorunja změny časow a zastanišćow podate.
Kwotu wobzamknyli
Krótkopowěsće (03.12.25)
Geigerzählera wuznamjenili
Wojerecy. We wobłuku spěwneho swjedźenja Hoyschrecke, kotryž wotmě so minjeny kónc tydźenja we Wojerowskej Kulturnej fabrice, wuznamjeni jury „wirtuozneho punkera ze serbskimi korjenjemi“ Paula Geigerzählera z mytom Hoyschrecke 2025. Po wotumje publikuma wobsadźi wón druhe městno po skupinje Traumvagabunden.
Twarja nowu čisćernju
Wochozy. Předewzaće Łužiska energija a milinarnje (LEAG) při Wochožanskej brunicowej jamje nowu čisćernju wody přihotuje. Připrawa ma stupacu dnownu wodu za ekosystem čisćić. Přichodny tydźeń chce LEAG zakładny kamjeń za nju połožić. Hižo klětu ma čisćernja dźěłać započeć, předewzaće wčera zdźěli.
Zamołwitosć wot 14 lět?
Krótkopowěsće (02.12.25)
Na fachowej wuměnje w Berlinje
Berlin. Sobudźěłaćerjo Serbskeje centralneje biblioteki a Serbskeho kulturneho archiwa při Serbskim instituće su tele dny archiw a biblioteku Berlinskeho Židowskeho muzeja wopytali. Zajimowachu so za zběrki, projekty digitalizacije a nazhonjenja z přećahom muzeja před dźesać lětami. Serbska centralna biblioteka a Serbski kulturny archiw matej na Lawski areal přećahnyć, ručež budźe natwarjeny.
Prawicarjo klub nadpadnyli
Choćebuz. Prawicarjo su kónc tydźenja młodźinski klub „Chekov“ w Choćebuzu napadnyli a na sćěnach parole kaž „Cottbus bleibt deutsch“ a hrónčka přećiwo žonam a queernym ludźom zawostajili. Do kluba tež serbscy młodostni rady chodźa. Rěčnica kluba Carolin Andres praji, zo njedadźa so zatrašić. Při akciji wobškodźichu skućićeljo nasćěnowe wobrazy młodostnych, kotrež mnohotnosć symbolizuja.
Zjězd budźi kontrowersu
Krótkopowěsće (01.12.25)
Preuß zastojnstwo nastupił
Kamjenc. Michael Preuß (bjezstronski) wukonja wot dźensnišeho zastojnstwo wyšeho měšćanosty w Kamjencu. Roland Dantz (Swobodni wolerjo) je so po 21 lětach na zasłuženy wuměnk podał. 44lětny Preuß bě dotal twarski decernent w měšćanskim zarjadnistwje. Preuß je wólby w nowembrje z jasnymi 73,4 procentami dobył.
Za hłubši zwisk ze Źarami
Budyšin. Nowy krajny rada pólskeho wokrjesa Żary, Bogdan Kępiński, a jeho naměstnik Wojciech Kasprów staj zašły tydźeń Domowinu wopytałoj. Chcetaj stare styki regiona ze Serbami wožiwić. Předsyda Domowiny Dawid Statnik widźi krótkodobnje móžnosće kulturneje wuměny. Zastupjerjo gmejny Żary přijědu kóžde lěto w aprylu do Chrósćic, zo bychu padnjenych wojakow spominali.
Nimale 18 000 potrjechenych
Krótkopowěsće (28.11.25)
Zeleni namołwjeja Vogta
Budyšin. Zeleni wočakuja wot Budyskeho wyšeho měšćanosty Karstena Vogta (CDU), zo woprawnjenym žadanjam pěstowarkow wotpowěduje a so wo wjac dowěry w měšćanskim zarjadnistwje stara. Měšćanski radźićel Jonas Löschau bě drje přećiwo wotwolenju Vogta, přiznawa pak, „zo móžeš wo stilu nawjedowanja a wuslědkach jeho dotalneho časa zastojnstwa wšelakeho měnjenja być.“
„Drasta digitalnje“ z přikładom
Grabin. Třeći Łužiski kulturny forum, wuhotowany we wobłuku iniciatiwy Sakskeje a Braniborskeje „Kulturplan Lausitz“, je wčera něhdźe 130 akterow z wuměłstwa, kreatiwneho hospodarstwa, kulturneho zarjada a politiki z wobeju zwjazkoweju krajow do Kulturneje tkalcownje Grabin přiwabił. Nimo mjezsobneje wuměny steješe widźomnosć kulturnych projektow we Łužicy w srjedźišću. Modelowy přikład w tym zwisku bě prezentacija projekta „Drasta digitalnje“.
Malinkowa nowa předsydka
Krótkopowěsće (27.11.25)
Wo spěchowanje so powabić
Rakecy. Rakečanski běrow Leaderoweho regiona Hornjołužiska hola a haty je dobu požadanja wo spěchowanje małych projektow z inwesticiskej sumu mjez 2 000 a 15 000 eurami w lěće 2026 zahajił. Cyłkownje steji 200 000 eurow z europskeho programa LAEADER k dispoziciji. Zajimcy měli swoje projektowe próstwy hač do 26. januara 2026 zapodać.
Towarstwje wuznamjenjenej
Drježdźany. Sakski minister za nutřkowne naležnosće Armin Schuster (CDU) je wčera dwanaće sakskich sportowych towarstwow za jich wjelelětne skutkowanje a wosebity angažement wuznamjenił. Z Budyskeho wokrjesa běštej mjez nimi sportowe towarstwo Ralbicy-Hórki a kehelowarske towarstwo z Kinsporka. Wuznamjenjeni přijimachu „sportowu plaketu zwjazkoweho prezidenta“. Nimo toho dóstachu pjenježny dar we wobjimje 1 000 eurow.
Hosćenc při Sprjewi zawrjeny
Krótkopowěsće (26.11.25)
Próstwu wo spěchowanje cofnyli
Ochranow. Iniciatiwa „Kulturne herbstwo Ochranowskeje bratrowskeje jednoty w němsko-čěskim namjeznym kraju zdźeržeć a posrědkować“ je próstwu wo spěchowanje we wobłuku projekta Interreg cofnyła. Přičina je po informacijach dźenika Sächsische Zeitung žadanje, spěchowansku sumu na 1,4 miliony eurow pomjeńšić. Rozsud potrjechi předewšěm Małowjelkowsku sotrownju, kotrejež dalše financowanje njeje zaručene.
Sudnistwo: Plan njepłaći
Wjelećin. Wobtwarjenski plan za drobnowikowanske stejnišćo Edeka w Šěrachowje-Korzymju njeje płaćiwy. To je Sakske wyše zarjadniske sudnistwo (OVG) w Budyšinje zawčerawšim wujasniło, jako sudnistwo swój wusud wozjewi. Město Wjelećin bě tuž ze swojej skóržbu wuspěšne, informuja Sakske Nowiny dźensa w swojim onlinowym wudaću.
Štom z Łužiskich horow
