Krótkopowěsće (17.06.26)
Chorowni kooperujetej
Zhorjelc. Nawodnistwje Zhorjelskeje chorownje swj. Carolusa a tamnišeho klinikuma stej so wčera na krutu zhromadnu kooperaciju dojednałoj. Z njej chcetej předewzaći strowotniske zastaranje w měsće kaž tež w Zhorjelskim wokrjesu trajnje zawěsćić. Zaměr kooperacije mjez druhim je, poskitki wobeju stejnišćow zmysłapołnje mjez sobu wothłosować a na wysokim niwowje dale wjesć.
Ze situaciju njespokojom
Budyšin. Institut za wične slědźenje MAS z Lipska a firma Procesni psychologojo z Łužicy stej so w měrcu a aprylu něhdźe tysac wobydlerjow łužiskich wokrjesow we wobłuku Łužiskeho monitora woprašowałoj. Mjez druhim so wobhonichu, kak spokojom su ludźo ze swojej žiwjenskej situaciju. Wuslědki wotbłyšćuja negatiwne wuwiće: Jenož hišće 66 procentow woprašowanych je ze situaciju spokojom. Loni bě to 79 procentow.
Pancery na awtodróze
Krótkopowěsće (16.06.26)
Rěče mjeńšinow lěpje škitać
Berlin. Zwjazkowa rada je na swojim posedźenju minjeny pjatk próstwje Schleswigsko-Holsteinskeje, Sakskeje, Braniborskeje a Delnjeje Sakskeje wotpowědowała, regionalne a mjeńšinowe rěče w markowym prawje Europy lěpje škitać. Konkretnje dźe wo zapřijeća abo rěčne wobroty, kotrež su w charće regionalnych a mjeńšinowych rěčow Europy škitane.
Namołwjeja k akciskemu dnjej
Bórkowy. Komunalne načolne zwjazki su zhromadnje k akciskemu dnjej „komuny na limiće“ 22. junija w Bórkowach namołwjeli, dokelž je financna situacija městow, wokrjesow a gmejnow dramatiska. Tak mjenowanych dobrowólnych nadawkow dla maja dźeń a mjenje pjenjez k dispoziciji. Mjez nimi je tež turizm, kotryž je w Bórkowach najsylniši hospodarski faktor.
Nowe pišćele w katedrali
Krótkopowěsće (15.06.26)
Dorostowi rejwarjo so předstajili
Budyšin. Swoju zakónčacu galu su rejwarki a rejwarjo dorostoweho studija Serbskeho ludoweho ansambla (SLA) wčera w Budyšinje předstajili. Rejowanske skupiny „Łužičanki“ z Chrósćic a Radworja kaž tež „Łužiska rapsodija“ pokazachu na žurli SLA program „Mały ptačk“. Na dwěmaj předstajenjomaj je něhdźe 80 dźěći a młodostnych z wjesołymi rejemi w pisanych kostimach publikum zawjeseliło.
300 lět Serbski seminar
Praha. Dźensa před třomi lětstotkami bu w Praze zakładny kamjeń Serbskeho seminara połoženy. Dom bu pozdźišo jako Seminarium Budissinorum ad s. Petrum pomjenowany a bě třeći serbski konwikt w měsće. Kapacita předchadźacych njeje za ličbu zajimcow studija katolskeje teologije hižo dosahała. Z někotrych žórłow wuchadźa, zo bu zakładny kamjeń 15. pražnika połoženy. Za dokładnym datumom ma so dale slědźić.
Awta z Chiny njewitane
Krótkopowěsće (12.06.26)
Ekstremistiska namóc popušćiła
Drježdźany/Budyšin. Sakske nutřkowne ministerstwo a krajny zarjad za škit wustawy stej zawčerawšim rozprawu wustawoweho škita za Saksku za lěto 2025 předstajili. Z njeje wuchadźa, zo je mjenje ekstremistiskich chłostajomnych njeskutkow na wuchodźe Sakskeje, tež w Budyskim wokrjesu. Najwjac padow pak wuchadźeja nadal z wulkim wotstawkom ze sceny prawicarskeho ekstremizma.
Hamor ze zwjazka wuzamknjeny
Hamor. Gmejna Hamor bu z turistiskeho zwjazka Łužiska jězorina wuzamknjena. Z tym wotpowědowaše zwjazk próstwje Budyskeho wokrjesa. Gmejna Hamor bě do toho ze zwjazka wustupiła, dokelž běchu jej powyšene lětne přinoški předrohe. Dotal wučinjachu wone 14 000 eurow. Nětko měješe gmejna 95 000 eurow zapłaćić. Hamor chce so přećiwo wuzamknjenju wobarać, w rozprawje Sakskich Nowin rěka.
Ukrainske žiwidła w Čěskej
Krótkopowěsće (11.06.26)
25 lět WITAJ w Delnjej Łužicy
Choćebuz. Z dnjom serbskich pedagogowkow a pedagogow Rěčny centrum WITAJ w Delnjej Łužicy dźensa 25lětny jubilej swojeho wobstaća woswjeći. Na swjedźenskim zarjadowanju w klubowni delnjoserbskeho internata w Choćebuzu wobdźěli so tež předsyda Domowiny Dawid Statnik. Po programje powjedźetaj nawodnica a wotrjadnik RCW dr. Beata Brězanowa a Bernd Melcher.
Wuběrk faworita wuzwolił
Drježdźany. Twarski wuběrk města Drježdźany je na swojim wčerawšim posedźenju naćiski noweho Carolineho mosta wobjednał. Na wuradźowanju su radźićeljo ze štyrjoch zapodatych naćiskow faworita wuzwolili. Při tym jedna so wo ideju planowarskeho zjednoćenstwa LAP/ Knight Architects. Spočatk septembra ma měšćanska rada doskónčnje wo tym rozsudźić.
Hara nad Sakskej
Krótkopowěsće (10.06.26)
Rozsud sudnistwa za wokrjes
Budyšin. Wobzamknjenje Budyskeho wokrjesneho sejmika za financielnu podpěru Kamjenskeje chorownje swj. Jana smě so přesadźić. Drježdźanske zarjadniske sudnistwo je próstwu čłonki sejmika na nachwilny prawniski škit k wusadźenju wobzamknjenja z 31. meje 2026 wotpokazało. Přećiwo tomu je móžno před wyšim krajnym sudnistwom skoržić.
Njewšědny dar bibliotece
Lipsk. Něhdźe 5 000 knihow wopřijima Edicija Tauchnitz słuša wot dźensnišeho do wobstatka biblioteki Uniwersity Lipsk. Darićel Alastair Jollans z Wulkeje Britaniskeje je jednotliwe eksemplary w běhu lět w antikwariatach po cyłej Europje zezběrał, wobkedźbujcy předewšěm prěnjotne wudaća. Z w 19. lětstotku w Lipsku wušłymi wudaćemi bu nakładnik Christian Bernhard Tauchnitz z pioněrom kapsneje knihi a na awtorske prawa dźiwacych přełožkow.
Płaćiwosć jězdźenki rozšěrja
Krótkopowěsće (09.06.26)
Rozsud sejmika pruwuja
Drježdźany. Rozsud Budyskeho wokrjesneho sejmika wo zachowanju Kamjenskeje porodźernje so juristisce pruwuje. Jedyn čłon sejmika je pola zarjadniskeho sudnistwa w Drježdźanach přećiwo wobzamknjenju wosebiteho sejmika z 31. meje 2026 skóržbu a zdobom prawniski škit zapodał. Sudnistwo je sej wot wokrjesa krótkodobnje stejišćo žadało, čemuž je wokrjes hnydom wotpowědował.
Projekty sej spěchować dać
Rakecy. Leaderowy region Hornjołužiska hola a haty přewostaja 400 000 eurow spěchowanskich pjenjez za projekty. Mjeztym wone hižo 8. króć k tomu namołwja, so na wubědźowanju wo projekty za zwoprawdźenje wuwićowych strategijow w Leaderowym region wobdźělić. Spěchowanska doba traje hišće hač do klětušeho. Mjez druhim podpěruja předewzaća we wobłukomaj zakładne zastaranje abo žiwjenska kwalita.
Wjace wučerjow wotrjadować
Krótkopowěsće (08.06.26)
Podhladnaj zajataj
Zhorjelc. Tři tydźenje po sypnjenju chěže w Zhorjelcu staj pozdatnaj skućićelej, kiž staj njezbožo zawinowałoj, hižo zajataj. Podhladnaj staj pozdatnje w pincy domu roły wobškodźiłoj abo manipulowałoj. Polak a Afghana nětko w přepytowanskim jastwje sedźitaj, policija zdźěli. Zastojnicy dale za slědami pytaja a swědkow namołwjeja so přizjewić.
Gymnazij a dźiwadło kooperujetej
Budyšin. Němsko-Serbske ludowe dźiwadło a Serbski gymnazij Budyšin prezentujetej 24. junija wuslědk kooperaciskeho projekta „Domizna“. Šulerki a šulerjo 9. lětnika běchu so minjene měsacy z titulnej temu zaběrali a na tutym zakładźe inscenaciju wuwili. Zdobom NSLDź zdźěli, zo kooperaciju z kubłanišćom w nowym šulskim lěće pokročuje, a to pod samsnym hesłom z dohromady 77 wobdźělnikami.
Lisćinu žadanjow přepodali
Krótkopowěsće (05.06.26)
Radworska šula tema w sejmje
Radwor/Drježdźany. „Kwalita serbskeho rěčneho kubłanja na Radworskej serbskej zakładnej šuli w šulskim lěće 2026/2027“ je tema naprašowanja Franziski Schubert, frakciskeje předsydki Zelenych w Sakskim krajnym sejmje, knježerstwu swobodneho stata. Nawjazujo na rozprawnistwo Serbskich Nowin chce mjez druhim wědźeć, kak so w krajnej wustawje zaručene prawo na wuwiće a hajenje serbšćiny dodźeržuje, hdyž dwě třećinje sobušulerjow jeničkeje rjadownje 1. lětnika a rjadowniska wučerka dosć serbsce njemóža.
Clemens před sudnistwom
Drježdźany. Wosobinsce skazany běše sakski kultusowy minister Conrad Clemens (CDU) dźensa dopołdnja na hamtske sudnistwo w Běłej Wodźe. Hišće w zastojnstwje społnomócnjeneho swobodneho stata pola Zwjazka běše wón w lěće 2023 w Krušwicy na dróze z předpisanej spěšnosću 30 km/h z 81 km/h po puću był. Hamtske sudnistwo prawniske sćěhi delikta nětko pruwuje.
Słowjanske mjeńšiny wuradźuja
Krótkopowěsće (04.06.26)
Wuhodnoća točenja
Nowoslicy. Projektowy team Einsteinoweho teleskopa přeproša po točenjach blisko Nowoslic na informaciske zarjadowanje za zajimcow wokoliny. Na nim chcedźa wuslědki přepytowanjow prezentować a na prašenje wotmołwić, hač so region za Einsteinowy teleskop hodźi. Zarjadowanje přewjedźe so 11. junija w 16 hodź. direktnje na městnje točnenja.
Nowa profesura wupisana
Lipsk. Uniwersita Lipsk wupisuje wotnětka nowu juniorowu profesuru za serbsku literaturu a kulturu. Městno ma slědźenje a wuwučowanje w předmjeće sorabistiki sylnić kaž tež poskitk za studowacych rozšěrić. Serbja su so dołho za přidatnu profesuru na instituće zasadźowali. Po wuspěšnym wupruwowanju móhło so městno trajnje wobsadźić. Požadanja su hač do 24. julija móžne.
Chór zwučuje za koncert
