Krótkopowěsće (06.05.26)
Mjenje chorych, wjac mortwych
Drježdźany. Cyłkownje 258 ludźi je w sezonje 2025/2026 w Sakskej na gripu zemrěło, to je telko kaž hišće ženje wot spočatka ličenja padow w lěće 2001. Tole sakske strowotniske ministerstwo wčera zdźěli. Mjez zemrětymi bě 126 muži a 132 žonow. Přerězna staroba wučinješe 86 lět. Cyłkownje bu 28 550 infekcijow přizjewjenych, štož je mjenje hač we wosebje sylnej předchadźacej sezonje.
Syltsku frizišćinu wuknyć
Westerland. Sölring mjenowanu frizišćinu, kiž rěča wobydlerjo na kupje Sylt, móža sej zajimcy wotnětka online hač do niwowa A2 přiswojić. Za přizjewjenje na darmotnym kursu dosaha krótka mejlka z předmjenom, swójbnym mjenom a wužiwarskim mjenom na . W běhu něšto dnjow sćelu ći daty za přistup.
Skućićela wuslědźili a zajeli
Krótkopowěsće (05.05.26)
Kurs slepjanšćiny pokročuje
Slepo. Kurs slepjanšćiny na Njepilic statoku w Rownom dźe dale: Manfred Hermaš je zamołwitosć za to wot Juliany Kaulfürstoweje přewzał, kotraž so po wjelelětnej dźěławosći w regionje redaktorstwu kulturneho časopisa „Rozhlad“ wěnuje. 14 wuknjacych wšelakich generacijow je so wčera na konwersaciju a čitanje zešło. Chcedźa so wotnětka kóždej dwě njedźeli zetkawać, přichodny raz póndźelu, 18. meje.
Kritizuja jednaćelku chorownje
Kamjenc. Radźićeljo Kamjenskeje měšćanskeje rady a Budyskeje wokrjesneje rady su w zhromadnym wozjewjenju wuprajenja jednaćelki Kamjenskeje chorownje Jany Uhlig kritizowali. Wona jednostronsce na debatu wo zawrjenju porodneje stacije a kliniki za gynekologiju reaguje. Zdobom skedźbneja woni na Sakski serbski zakoń, kotryž swobodny stat a wokrjesy zawjazuje, dalewobstaće Serbow w swojim sydlenskim rumje we wšěch žiwjenskich wobłukach škitać. To wopřijima bydlenju blisku porodnu pomoc.
Ponowja trasu pitneje wody
Krótkopowěsće (04.05.26)
Georg Baselitz zemrěł
Salzburg. Georg Baselitz je njeboh. Jako Hans-Georg Bruno Kern lěta 1938 w Němskich Pazlicach narodźeny tworjacy wuměłc, jewišćowy wuhotowar a wysokošulski docent zemrě 30. apryla w Salzburgu. Wosebje swojich mólbow dla bě po wšěm swěće jako jedyn z najwuznamnišich načasnych wuměłcow připóznaty.
Woheń w Čěsko-Sakskej Šwicy
Děčín. Wot soboty so w narodnym přirodowym parku w Čěskej Šwicy pali. Wohnjowa wobora wojuje tež z pomocu kolegow ze Słowakskeje, kiž su helikopteraj wupožčili, na nimale 100 ha wulkej płoninje přećiwo wohenjej. Woheń drje njeje so dźensa dale rozšěrił, pod kontrolu pak hišće njeje. „Zawinił drje je jón čłowjek – cigareta abo njedowolene wohnišćo“, rjekny nowinski rěčnik parka. Loni su něhdźe 300 wohnišćow wotstronili.
Azerbajdźana dla pistu powjetša
Krótkopowěsće (30.04.26)
„Herbstwo Łužicy“ předstajili
Drježdźany. Nošerjo imaterielneho kulturneho herbstwa Sakskeje su so wčera w Drježdźanach zešli. Cyłkownje 21 kulturelnych formow ma w Sakskej tónle titul, mjez nimi su tež Serbja. W twarskej hěće Zwingera předstaji Susann Troppa projekt ,,Herbstwo Łužicy“, při čimž wosebje rólu imaterielneho kulturneho herbstwa Serbow wuzběhny.
Wulki nowy dołh za Saksku
Drježdźany. Načolni politikarjo koalicije CDU a SPD w Sakskej su so wčera (po redakciskim kóncu SN) tola hišće na kompromis za zakłady etata swobodneho stata za lěće 2027/28 dojednali. K tomu słuša přidatne zadołženje Sakskeje we wysokosći 1,4 miliardow eurow, štož bě CDU do toho wotpokazała. Nimo toho chcedźa hač do lěta 2040 w krajnej słužbje 8 773 dźěłowych městnow wottwarić.
Dźěławosć derje zaběžała
Krótkopowěsće (29.04.26)
Dom Njechorńskeho ponowja
Budyšin. Wuběrk Zwjazkoweho předsydstwa Domowiny je wčera wobzamknył, zo ma so Dom Měrćina Nowaka-Njechorńskeho ponowić. Twarska dowolnosć wot měrca předleži. W meji maja so twarske dźěła zahajić. Murje domskeho su włóžne a zahroda nima hižo charakter, kajkiž bě jej serbski wuměłc swój čas dał. Dom ma dale jako muzej a zetkanišćo słužić.
Sakski etat dale njejasny
Drježdźany. W běhu tři dny trajacych jednanjow njeje sakska koalicija CDU a SPD konflikty w zwisku z planowanym etatom kraja za lěće 2027 a 2028 rozrisała. Wčerawšu nowinsku konferencu wo wuslědkach su bjez noweho termina wotprajili. Knježerstwu pobrachuje po rozprawach medijow 2,9 hač do 4,5 miliardow eurow. Tohodla diskutuja wo wottwarje 11 000 dźěłowych městnow w zjawnej słužbje kraja.
Jastwo njewottorhaja
Krótkopowěsće (28.04.26)
Solvesta kupi Perfectu
Budyšin. Wobdźělenska towaršnosć Solvesta je wčera Budysku firmu Perfecta kupiła. Kupča, kotraž zawody před insolwencu wuchowuje, přewza z tym tradicionalne předewzaće ze 60 sobudźěłaćerjemi. Přičiny za rozsud inwestora su mnohostronske. Najwjetši problem běchu woteběrace nakłady klasiskich ćišćanych produktow a sylna konkurenca poskićowarjow z Azije.
Zjawnostne dźěło jara wuspěšne
Drjowk. Towarstwo Serbski kulturny turizm (SKT) je na swojej lětušej hłownej zhromadźiznje w Drjowku mjez druhim swoje wuspěšne zjawnostne dźěło bilancowało. Hač do 90 000 ludźi je SKT w socialnych syćach interneta docpěło. Lětsa woswjeći 30. róčnicu załoženja a planuje wospjet wuprawu za zastupjerjow turistiskeje branše, zo bychu serbske městnosće zeznali.
Serbskeho komponista počesćili
Krótkopowěsće (27.04.26)
Znapřećiwja wólbnemu wuslědkej
Baršć. Z 51,5 proc. hłosow bu kandidat CDU Martin Heusler 22. měrca we wokrjesu Sprjewja-Nysa za krajneho radu wuzwoleny. Kandidatka AfD Christine Beyer jemu z 48,5 proc. snadnje podleža. Na tym strona AfD dwěluje a sej přepruwowanje žada. Po wuličenju hłosow we wólbnych lokalach je Bayer prědku ležała. Hakle po wuličenju wólbnych lisćikow, kiž běchu z póštu dóšli, so dobyćer změni.
Peticija z wulkim wothłosom
Kamjenc. Peticiju přećiwo zawrjenju kliniki za gynekologiju a porodnu pomoc chorownje swj. Jana w Kamjencu je do dźensnišeho připołdnja něhdźe 17 500 ludźi podpisało. Krótko po wozjewjenju rozsuda jednaćelstwa chorownje minjeny štwórtk su zběranje podpismow na platformje change.org zahajili. Tež Kamjenski wyši měšćanosta Michael Preuß (njestronjan) akciju podpěruje.
Etat w srjedźišću klawsury
Krótkopowěsće (24.04.26)
FUEN w Berlinje so zešła
Berlin. Zastupjerjo FUEN su so wčera w Berlinje zetkali, zo bychu wo problemach mjeńšinow diskutowali. Prioritu zeńdźenja mějachu prawa narodnych mjeńšin, kotrež měli so w přichodźe po cyłej Europje zawěsćić. Dale žadachu sej podpěru nastupajo njedótkliwosć mjeńšinowych strukturow. Tole wobrěčachu při parlamentariskej snědani, na kotrejž so mjez druhim předsyda Domowiny Dawid Statnik wobdźěli.
Verdi za dialog
Drježdźany. Dźěłarnistwo Verdi so dale wo dialog w tarifowym konflikće zjawneho bliskowobchada w Sakskej prócuje. Hač do 12. meje, hdyž zahaji so přichodne koło jednanjow z dźěłodawarjemi, bě Verdi štyri terminy za sonděrowanje namjetowała. Wot strony dźěłodawarjow sej dźěłarnistwo žada, zo tute terminy za konstruktiwne namjety wužiwa.
Nowy skład wotewrěli
Krótkopowěsće (23.04.26)
Premjera w Delnjej Łužicy
Žylow. Němsko-Serbske ludowe dźiwadło je wčera dźěćom Žylowskeje Witaj-pěstowarnje najnowšu wersiju dwurěčneje inscenacije „Zgubjone a namakane“ premjernje předstajiło. Bernadet Šnajdrec a Paul Hölters předstajataj protagonistow w hrě Rike Reiniger. Hač do 5. meje slěduje pjeć dalšich předstajenjow we Wětošowje, w Choćebuzu a Tšupcu.
Zhudźbnjenu poeziju předstajiłoj
Lipsk. Spěwarka Walburga Wałdźic a huslerka Izabela Kałduńska stej wčera z wosebitym koncertom swoju aktualnu tačel „Za Minu“ w Lipšćanskim klubje „Horns Erben“ předstajiłoj. Něhdźe 30 wopytowarjow je so interpretkomaj za prezentaciju kompozicijow, nastatych na lyriku Miny Witkojc, ze sylnym přikleskom dźakowało.
Domowina iniciatiwu podpěruje
Krótkopowěsće (22.04.26)
Próstwy sčasom zapodać
Budyšin. Załožba za serbski lud na to skedźbnja, zo maja so próstwy wo spěchowanje z programa „Serbska rěč a kultura w strukturnej změnje“ za předewzaća w Swobodnym staće Sakska hač do 31. julija zapodać. To potrjechi mjez druhim projekty, kiž přewjedujetej Zari a Lucija. Po pruwowanju a přizwolenju spěchowanja ze stron Zwjazka hodźa so projekty wot 1. januara 2027 přewjesć.
Steinmeier za lokalne nowiny
Berlin. Składnostnje wčerawšeho „dnja lokalneje nowiny“ je zwjazkowy prezident Frank-Walter Steinmeier (CDU) mjeńše němske nowiny jako měznik wotewrjeneje towaršnosće pomjenował. We wočomaj prezidenta njeje lokalny žurnalizm jenož rjany připlack, ale je stołp stabilneje demokratije. Tak přeprosy sej Steinmeier lokalnych žurnalistow do hrodu Bellevue, zo by so z nimi wo aktualnych problemach rozmołwjał.
Rakečanki w zwjazkowej lize
