Milinarnje z wěstosću twarja

Grodk. Zwjazkowa hospodarska ministerka Katherina Reiche je Łužicy twar nowych płunowych milinarnjow připrajiła. Tole wozjewi wona na wopyće energijoweho koncerna LEAG wčera (SN rozprawjachu). Zwjazkowe knježerstwo chce Łužicu jako tradicionelnu kónčinu za produkciju miliny zachować a garantuje tohodla wěstotu planowanja za nowe milinarnje.

Žně žita wohrožene

Drježdźany. Wjele dešćika w poslednich tydźenjach wohroža žně žita w Sakskej. Mnoho spadkow dla zhubi žito swoju kwalitu a potom so jenož hišće jako pica hodźi. Rezultat toho, je financielna strata mnoho ratarjow. Cyłkownje so žně w Sakskej dlija. Na tamnym boku profitujetej kukurica a cokorowa rěpa wot dešćika­.

Busy zdźěla po planje njepojědu

Wuspěch a eklat

Torgau. Wohnjowej woborje z Chrósta a Blunja stej so kónc tydźenja na lětušim němskim mišterstwje wohnjowych woborow wobdźěliłoj. W hašenju wudobyštej sej 11. a 12. městno. Wjace hač 600 wobornikow bě so wobdźěliło. Na zahajenju zarjadowanja běchu pjatk město němskeje hymny prěnju štučku spěwa Němcow zahrali. Tole zwjazk woborow raznje kritizuje.

Jenički Serb na kursu

Čěske Budějovice. Tež lětsa přewjedu na uniwersiće w Českich Budějovicach zaso intensiwny rěčny kurs čěšćiny. Stipendiat Rěčneho centruma WITAJ je Róžeńčan Jan Hrjehor, kotryž je zdobom jenički Serb. Čěske knježerstwo poskićuje kóžde lěto zajimowanym Serbam stipendij, zo bychu so na kursu wobdźělili.

Wudrjeńca zaso přistupna

Hřensko. Tři lěta po wulkim wohenju w narodnym parku Čěska Šwica je Edmundowa wudrjeńca turistam zaso přistupna. Tež woblubowane čołmikowanje na rěce Kamenice je zaso móžne. Wokomiknje pak móža ludźo wudrjeńcu z wěstotnych přičin jenož při přihódnym wjedrje wopytać, a to wšědnje maksimalnje pjećdźesat wosobow.

Poražce za Budyšin a Biskopicy

Wo slědźerskim centrumje rěčeli

Berlin. Sakska statna ministerka Regina Kraushaar (CDU) je so wčera ze zwjazkowej ministerku za twarstwo Verenu Hubertz (SPD) zetkała. Jedna tema běše planowane stejnišćo Zwjazkoweho slědźerskeho centruma za klimaneutralne a nastupajo resursy eficientne twarjenje. W rozmołwje dźěše předewšěm wo to, kajku hódnotu by stejnišćo za Budyšin měło. Budyski krajny rada Udo Witschas je Kraushaar přewodźał.

Myta za dorost wupisane

Budyšin. Maćica Serbska wupisa lětsa zaso tři myta za dorost. Za gymnaziastki a gymnaziastow Delnjeje a Hornjeje Łužicy stej to myće Bogumiła Šwjele a Michała Hórnika a za studentki a studentow myto Arnošta Muki. Hač do 30. nowembra měli zajimče a zajimcy swoje dźěła zapodać. Dokładniše informacije su na webstronje Maćicy wozjewjene.

Leipner kritizuje policiju

Zarjadowanje polarizuje

Budyšin. Do zarjadowanja CSD so zjawna debata přiwótřa. Tak prosy wokrjesny zwjazk AfD w zjawnym lisće krajnemu radźe Udej Witschasej, zo ma wón riziko zarjadowanja znowa přepruwować. Wšako běchu wjacore zwjazki Antify připowědźili, zo do Budyšina přijědu. Na CSD wo­čakuja nimo tysacow demonstrantow tež prominencu strony Lěwicy a SPD, kotrejž namołwjatej so na zarjadowanju wob­dźělić.

Pomoc firmam za wukubłanje

Drježdźany. Mějićelow małych zawodow abo specializowanych rjemjeslnikow, kotřiž wučomnika pytaja, ale wšě předpisane wobsahi wukubłanja njespjelnja, dale­ podpěruja. Tutu pomoc Sakska spěchuje: wukubłanje w zwjazku. Přizjewić móža so zajimcy wot 13. žnjenca online. Informacije namakaja pod www.sab.sachsen.de/richtlinie-berufliche-bildung-verbundausbildung.

Spěchuje tři łužiske projekty