Krótkopowěsće (28.10.25)
Kandidata nominowali
Zhorjelc. Strona CDU w Zhorjelcu je nětko swojeho kandidata za wólby wyšeho měšćanosty města nominowała. Tuchwilny měšćanosta Octavian Ursu bě jenički kandidat. 58lětny dósta 38 hłosow čłonow CDU. Wólby wotměja so klětu 10. meje. Dotal je Ursu jenički, kotryž je zwólniwy zastojnstwo wukonjeć.
Renoměrowany festiwal zahajili
Lipsk. Lětuši, mjeztym 68. filmowy festiwal DOK Leipzig bu wčera z premjeru paska „Writing Life: Annie Ernaux Through the Eyes of High School Students“ wotewrjeny. Program wopřijima cyłkownje 252 mjezynarodnych produkcijow. Prapremjernje pokazaja mjez druhim dokumentarny film „Weißer Rauch über Schwarze Pumpe“ Martina Gressmanna a animaciju „Four percent“ Moniki Masłoń.
Ponowja měšćansku halu
Krótkopowěsće (27.10.25)
Pruwuje prawniske kroki
Budyšin. Ronny Böhme, zadźěwany kandidat za wólby 2. Serbskeho sejma, kiž nima wólby sejma za płaćiwe, pruwuje dale prawniske kroki přećiwo zamołwitym sejma. Wólbna komisija je w nalěću mjez druhim wobzamknyła, zo jeho kandidatura zapozdźeneho zapodaća dla płaćiwa njeje. Böhme pak njebě informacije wo rozsudźe wo swojim pohóršku dóstał, wón kritizuje. Nimo toho paruje doskónčny posudk wólbneje komisije.
Hišće žadyn pad mrětwy w Sakskej Drježdźany. W zwisku z dźeń a bóle so rozšěrjacej pjeriznowej mrětwu (HPAI) namołwja sakska statna ministerka Petra Köpping plahowarjow pjerizny w Swobodnym staće k skedźbnosći. Štóž schorjeneho abo mortweho ptačka nadeńdźe, njech so jeho njedótknje a njech přizjewi pad nanajspěšnišo zamołwitemu weterinarnemu zarjadej. Dotal w Sakskej schorjenje na HPAI znate njeje.
Hudźba centralna tema
Krótkopowěsće (24.10.25)
Akademija zahaji semester
Budyšin. 17. Budysku akademiju wuhotujetej město Budyšin a campus Dualneje wysokeje šule. Mjez pjeć poskitkami, kotrež spočatk nowembra zahaja, budźe klětu 13. apryla přednošk wo Mari Grólmusec. Historikarka a nawodnica wopomnišća na Mnichowskim naměsće w Drježdźanach dr. Birgit Sack rysuje žonu mjez wědomosću, politiku a spjećowanjom.
Mjez sobu so nadpadnyłoj
Drježdźany. W Budyskim wokrjesu namakanej mortwej wjelčicy njebuštej zatřělenej. Kaž Sakski krajny zarjad za wobswět, ratarstwo a geologiju w Drježdźanach zdźěli, stej zwěrjeći na přirodne wašnje zahinyłoj. Jako přičinu mjenuje zarjad rozestajenja a bój mjez młodymaj zwěrjećomaj. Berlinski Leibnitzowy institut bě kadawraj přepytował.
Mjenje pěstowarnjow
Krótkopowěsće (23.10.25)
Prěni raz zwonka Němskeje
Bozen. Do oficialneho zahajenja kongresa FUEN su dźensa připołdnju wustajeńcu ,,Was heißt hier Minderheit“ w Domje kulturow w južnotirolskim Bozenje wotewrěli. Štyri w Němskej zasydlene narodne mjeńšiny so w njej prezentuja. K tomu porěča w Južnym Tirolu bydlaca Serbowka Sara Mičkec. Jednaćelka Domowiny Judit Šołćina je syłu hosći po wustajeńcy wjedła, kotraž so prěni raz zwonka Němskeje prezentuje.
Mytowanski wuběrk trjeba ludźi
Budyšin. Domowina pyta kandidatow za mytowanski wuběrk, wšako so po spožčenju lětušich wuznamjenjenjow Myta Domowiny a čestneho znamješka přihot na klětuše mytowanje započina. Wšitcy zajimcy a wosebje župy a towarstwa Domowiny su namołwjeni, kulturnemu referentej třěšneho zwjazka hač do 15. nowembra kandidatow z e-mejlku podać:
Jězbni wučerjo warnuja
Krótkopowěsće (22.10.25)
Na dwórnišću so paliło
Budyšin. Na Budyskim dwórnišću je wčera wječor woheń wudyrił. Něhdźe 100 ludźi dyrbješe ležownosć wopušćić. Koš za papjeru na nuzniku bě so zapalił, policija zdźěli. Zastojnicy z toho wuchadźeja, zo bě něchtó z wotpohladom woheń zamiškrił. Woheń bu spěšnje zhašeny. Twarjenje dwórnišća dyrbjachu nachwilnje zawrěć. Nastupnišćo pak móžachu sobujěducy ćahow dale wužiwać.
Zatřělenej wjelkaj nadešli
Wětnica/Lipiny. W běhu tydźenja su w Budyskim wokrjesu dwaj mortwej wjelkaj – po informacijach policije prawdźepodobnje zatřělenej – nadešli. Jednoho namakachu póndźelu wječor blisko Wětnicy (Wiednitz) pola Njedźichowa, dalšeho wutoru wječor blisko Lipiny (Lippen) pola Łaza. Hač padaj mjez sobu zwisujetej, je dotal njejasne. Policija přepytuje podhlada zranjenja přirodoškitneho zakonja dla.
Blamaža we wopačnej šuli
Krótkopowěsće (21.10.25)
Wohroženy Telux mytowany
Běła Woda. Sociokulturnemu centrumej Telux su wčera Sakske myto za wobydlerjow w kategoriji mobilne dźěło za młodźinu a sociokultura spožčili. Ministerski prezident Michael Kretschmer (CDU) je myta w Drježdźanskej cyrkwi našeje lubeje knjenje přepodał. Telux je skrótšeneho spěchowanja ze stron města dla wohroženy, kotrež je frakcija AfD w měšćanskej radźe zawiniła.
Konferenca zjawnje přistupna
Mały Wjelkow. Towarstwo za stawizny bratrowskeje jednoty Unitas Fratrum přewjedźe wot 24. do 26. oktobra swoju lětnu zhromadźiznu. Lětsa wěnuja so wosebje Małemu Wjelkowej. Přednoški su zjawne. Zetkanje wotměje so w modlerni jednoty, sobotu pak w Domje Dory Schmitt. Pjatk wječor w 19.30 hodź. so konferenca z přednoškom „Mały Wjelkow a jeho woznam“ zahaji.
Fachowcow z Brazilskeje witali
Krótkopowěsće (20.10.25)
Lay: CDU změnu wustawy nochce
Berlin. Łužiska zapósłanča Lěwicy w zwjazkowym sejmje Caren Lay je po wuradźowanju rozmołwneho koła „mjeńšiny“ nutřkowneho wuběrka parlamenta z mjeńšinowej radu zašły štwórtk zludana, dokelž CDU přiwzaće narodnych mjeńšin do zakładneho zakonja skeptisce wobhladuje. SPD wustupuje pačena, tak Lay napřećo SN. Karsten Hilse (AfD) pak je SN přihłosowanje frakcije AfD signalizował (hlej SN pjatk).
Měšćanosta sej konsekwency žada
Zhorjelc. Po tym zo su njeznaći knihi při pomniku za wopory fašizma w Zhorjelcu spalili, je sej wyši měšćanosta města Octavian Ursu (CDU) jasne konsekwency žadał. Zamołwitych dyrbjeli pochłostać, wón wuzběhny. Minjeny štwórtk je policija njeskutk zwěsćiła. Wo kotre knihi so jedna, znate njeje. Policija a statny škit pad přepytujetej.
Pytaja noweho nošerja
Krótkopowěsće (17.10.25)
Sakscy šulerjo su najlěpši
Berlin. Sakscy šulerjo 9. lětnika su po cyłej Němskej w matematice a w přirodowědnych předmjetach najlěpši. Na to pokazuja wuslědki studije Instituta za wuwiwanje kwality (IQB) z lěta 2024, kiž je IQB w Berlinje předstajił. Sakska je w matematice 511 a w přirodowědnych předmjetach 505 do 513 dypkow docpěła, přerězk druhich zwjazkowych krajow wučinja 474 resp. 471 do 477 dypkow.
„Nadźija“: Prěni serbski podawk
Přiwćicy. Towarstwo w nastaću „Nadźija“ ma noweju městopředsydku a pokładnika, Helgu Döršelowu a Bruna Schumppa. Kaž rěčny motiwator Domowiny Lucian Kaulfürst zdźěli, su wčera tež premjerje serbskeje synchronizacije krótkofilma „Jako šće wódni mužojo běchu“ a serbskeho přełožka knižki Jurja Brězana „Powědki wo wodźe“ 15. nowembra na žurli hosćenca „Wódny muž“ přihotowali. Partner je SLA.
„Nachilenu cyrkej“ ponowili
Krótkopowěsće (16.10.25)
Ptak z ćahom sobu jěł?
Děčín. Zranjeneho nawalnika (Sturmvogel) su blisko železniskich kolijow w Děčínje našli. Mórski ptak, kiž je při Atlantiku zadomjeny, je so w Čěskej prěni raz jewił. Ornitologojo rěča wo sensaciji. Hladajo na wulku zdalenosć maja samo za móžne, zo je wón wot Hamburga do Čěskeje z ćahom sobu jěł. Ptaka spytaja nětko we wuchowanskej staciji wustrowić a zaso k morju transportować.
Protestuja přećiwo zawrjenju
Njedźichow. Wot minjeneje póndźele protestuja Njedźichowscy škleńčerjo z pominanskej stražu přećiwo zawrjenju zawoda. Wo tym bě něhdźe 100 přistajenych před tydźenjomaj zhoniło. Dotal nichtó wupowědźenje dóstał njeje. Dokładny termin zawrjenja njeje znaty. Dźensa zeńdu so zastupnicy dźěłarnistwa, zawodneje rady a jednaćelstwa, zo bychu wo perspektiwach za zawod a přistajenych rěčeli.
Krabatowe towarstwo zludane
Krótkopowěsće (15.10.25)
Chcedźa ćahi zaso wožiwić
Drježdźany. Sakske knježerstwo chce někotre železniske trasy, kotrež su po přewróće zawrěli, zaso wožiwić. Čaru mjez Kamjencom a Wojerecami chcedźa ze srědkami Zwjazka za zesylnjenje strukturow dotalnych wuhlowych rewěrow zaso natwarić. Nimo toho planuja wožiwjenje šěsć dalšich čarow, mjez druhim mjez Kamjencom a Hóznju (Zły Komorow), Lubijom a Habrachćicami.
Wustajeńca wuměłstwa
Katowice. W Katowicach přihotujetej „Zwjazk Serbow w Pólskej – Maćica Łužiska“ a slawistiska fakulta Šleskeje uniwersity wustajeńcu wuměłče Ludmiły Gajczewskeje pod hesłom „Łužica w basnjach a wobrazach“. Na wotewrjenju jutře popołdnju w rumnosćach CINiBA porěči specialistka za historisku geografiju dr. hab. Joanna Szczepankiewicz-Battek wo temje „Łužica – kraj štyrjoch kulturow“.
Inowatiwny projekt
