Krótkopowěsće (11.09.23)
Diskusija wo drasće šulerjow
Podstupim. Šule móhli same regule za drastu šulerjow postajić, praji kubłanski minister Braniborskeje Steffen Freiberg (SPD). Zwjazkowa rada staršich je sej postajenja žadała, zo bychu wučerjo šulerjow domoj słać móhli, kotřiž njejsu porjadnje dosć zdrasćeni. Němski zwjazk wučerjow widźi namjet skeptisce, wšako njeje jasne, što přiměrjene njeje. Zwjazkowa konferenca šulerjow tajke „pjeluchowanje“ (Bevormundung) wotpokaza.
Wulki zajim za Serbski muzej
Budyšin. Składnostnje 30. Dnja wotewrjeneho pomnika je wčera 343 wopytowarjow do Serbskeho muzeja přichwatało, zdźěli muzeologowka Andrea Pawlikowa. Wosebje so za aktualnu wustajeńcu „Čej’ da sy?“ a přednošk Trudle Kuringoweje wo nabožno-narodnych pomnikach zajimowachu. Wjac wo tutym dnju w našim regionje zhoniće na stronje 4!
Sakske myto wučomnikam
Krótkopowěsće (08.09.23)
Do wuchodneje Azije
Drježdźany. Sakski hospodarski minister Martin Dulig (SPD) startuje njedźelu do wuchodneje Azije. Delegaciji přisłušeja zastupjerjo předewzaćow, slědźenišćow, komunow, Hospodarskeho spěchowanja Sakska a krajneje politiki. Woni přebywaja hač do 20. septembra w Japanskej a Južnej Koreji. Do wobeju krajow so minister druhi raz poda. Wón wočakuje nowe nastorki nastupajo inowaciju w swobodnym staće.
We Wulkim domje zaso hrać
Zhorjelc. Po dramatiskej škodźe wody dla loni w nowembrje móže Zhorjelske Gerharta Hauptmannowe dźiwadło swoje hłowne jewišćo znajmjeńša zaso prowizorisce wužiwać. W domje su koncept zdźěłali, kotryž połnohódne, chibazo wobmjezowane hraće pod wuměnjenjemi we Wulkim domje dowola. To rjekny intendant Daniel Morgenroth wčera předstajejo program noweje hrajneje doby.
500 km w běhu třoch dnjow
Krótkopowěsće (07.09.23)
Kongres FUEN zahajeny
Pécs. W madźarskim měsće Pécs zahaja dźensa 67. kongres Federalneje unije europskich narodnosćow (FUEN). Hač do njedźele wuradźuja delegaća wo temach, kotrež tuchwilu mjeńšiny zaběraja. Nimo hłowneje zhromadźizny, kotraž budźe sobotu, informuja so wobdźělnicy wo połoženju němskeje mjeńšiny w hosćićelskim kraju a wopytuja jeje institucije. Domowina je z delegaciju přitomna.
Dźeń Saksow klětu wupadnje
Drježdźany. Najwjetši ludowy a domizniski swjedźeń w swobodnym staće, Dźeń Sakskow, klětu wupadnje. Město Zhorjelc je wuhotowanje wotprajiło, rěka z kuratorija Dnja Saksow. Za 2025 liča z požadanjom města Sebnicy. Runje tak rozmysluja, zarjadowanje z financnych přičin přichodnje jenož kóždej dwě lěće wotměwać, zdźěli prezident kuratorija a krajneho sejma Matthias Rößler (CDU).
Graubner dale w zastojnstwje
Krótkopowěsće (06.09.23)
Chrystina Pašcyna pola CSB
Miłoćicy. Křesćansko-socialny kubłanski skutk (CSB) ma nowu fachowu poradźowarku za swoje kubłanišća. Kaž Maik Brězan informowaše, wukonja zastojnstwo Chrystina Pašcyna. Młoda Chróšćanka a mać dweju dźěsći dźěłaše po studiju pedagogiki dźěćatstwa w Berlinje naposledk w dźěćacym dnjowym přebywanišću we Worklecach. CSB je nošer 11 dźěćacych kubłanišćow z 1 360 dźěćimi.
Wo srědki so požadać
Rakecy. Towarstwo za wuwiće kónčiny Hornjołužiska hola a haty je nětko prěnju projektnu namołwu spěchowanskeje doby 2023 – 2027 wozjewiła. Cyłkownje 1,05 milionow eurow je za to k dispoziciji. Hač do kónca oktobra smědźa so priwatne wosoby, předewzaća, komuny abo organizacije kaž towarstwa a załožby wo srědki programa Leader požadać.
Přidatne zastupne lisćiki
Krótkopowěsće (05.09.23)
Pilotowy projekt
Drježdźany. 30 šulow po cyłej Sakskej móže so na pilotowym projekće „strowota wučacych“ wobdźělić. Krajny zarjad za šulu a kubłanje (LaSuB) a Centrum za zdźěłanje wučacych a šulske slědźenje (ZLS) Lipšćanskeje uniwersity poskićujetej bjezpłatne kursy wo kedźbnosći z wědomostnej ewaluaciju. Hač do srjedź oktobra móža so šule za projekt požadać.
Serbska změna strukturow tema
Wojerecy. Na přeprošenje Pětra Brězana, referenta Domowiny za hospodarske a infrastrukturelne naležnosće, su so dźensa we Wojerowskim domje třěšneho zwjazka nošerjo serbskich projektow z cyłeje Łužicy schadźowali, kotrež su w ramiku změny strukturow spěchowane. Zaměr stej, tak Brězan, wuměna nazhonjenjow a dorěčenje kooperacijow.
Turistiska čara za bosy běhacych
Krótkopowěsće (04.09.23)
Gasterstädt naslěduje Koarka
Halštrowska Hola. Antje Gasterstädt budźe nowa wjesnjanostka gmejny Halštrowska Hola a naslěduje wjelelětneho mějićela zastojnstwa Dietmara Koarka. Kandidatka CDU je při wčerawšich wólbach 66,7 proc. płaćiwych hłosow docpěła. Jako samostatny požadar je Hannes Smohar na 33,3 proc. hłosow přišoł. Wólbne wobdźělenje běše z 63 proc. wo wjele wyša hač 2016 z 38,9 proc.
Elektromištra wuznamjenili
Drježdźany/Budyšin. Za swoje wurjadne zasłužby we wobłuku rjemjesła na wuchodźe Sakskeje je Drježdźanska rjemjeslniska komora Budyskeho elektromištra Franka Šołtu wuznamjeniła. Na swojim tradicionalnym lěćnym zeńdźenju minjeny štwórtk w Załomju je jemu prezident komory Jörg Dittrich złotu čestnu jehłu přepodał.
„Lětopis“ online a zadarmo
Krótkopowěsće (01.09.23)
Prěnje zrěčenja podpisane
Choćebuz. W nowej Choćebuskej tworni Němskeje železnicy ma wot januara 400 z cyłkownje 1 200 dźěłowych městnow nastać. Tole zdźělištaj wčera braniborski ministerski prezident Dietmar Woidke (SPD) a Němska železnica. Prěnje dźěłowe zrěčenja su přichodni sobudźěłaćerjo hižo podpisali.
Přepokazaja towarstwu pjenjezy
Njebjelčicy. Njebjelčanske wuměłske a kulturne towarstwo Kamjenjak dóstanje do hospodarskeho plana za lěto 2023 zapisane a wobzamknjene pjenjezy. To zdźěli wjesnjanosta André Bulank (njestronjan) na naprašowanje SN. Wón je připokazał sumu we wysokosći 2 250 eurow towarstwu přepokazać. Financne srědki su za lětušu 17. mjezynarodnu rězbarsku dźěłarničku předwidźane.
Warnowanske stawki pola LEAG
Choćebuz. Dźěłarnistwo IGBCE je nastupajo druhe tarifowe koło z koncernom Łužiska energija a milinarnje (LEAG) něhdźe 7 200 přistajenych k warnowanskim stawkam namołwjało. Dźens stawkowachu sobudźěłaćerjo LEAG před hłownym zachodom industrijoweho parka Čorna Pumpa žadajo sej jasnje wyše mzdy.
Krótkopowěsće (31.08.23)
Özdemir w Hornjej Łužicy
Stróža/Koćina. Zwjazkowy ratarski minister Cem Özdemir (Zeleni) je dźensa z hosćom w Hornjej Łužicy. Zhromadnje ze sakskim ratarskim ministrom Wolframom Güntherom wopyta wón mjez druhim Ringpfeilec hatarstwo w Stróži a Koćinski Krabatowy mlokowy swět. Ministraj chcetaj sej dźěławosć zawodow spřistupnić.
Starosć wo chorownju
Biskopicy. Frakcija CDU Biskopičanskeje měšćanskeje rady starosći so wo dalše wobstaće tamnišeje chorownje. Tuž je wona wyšemu měšćanosće nadawk dała a wokrjesny sejm wo to prosyła, so za dlěšodobne zachowanje chorownje hornjołužiskich klinikow (OLK) na stejnišću Biskopicy zasadźić. Zwjazkowe knježerstwo planuje zakoń wo reformowanju chorownjow.
Wjele bjezdźěłnych z Ukrainy
Krótkopowěsće (30.08.23)
Prof. Rafał Leszczyński zemrěł
Waršawa. Přećel Serbow prof. Rafał Leszczyński je w nocy na minjenu sobotu, 26. žnjenca, dwě njedźeli po swojich dźewjećdźesaćinach, w chorowni we Łódźu zemrěł. Njeboćički je awtor mjez druhim Hornjoserbsko-pólskeho a Pólsko-hornjoserbskeho słownika pozdatnych ekwiwalentow a wšelakich delnjoserbsko-pólskich słownikow. Tež w časopisu Lětopis je wozjewjał. Pohrjeb budźe 7. septembra we Waršawje.
Žada sej krute hranične stacije
Budyšin. W zwisku ze stupacymi ličbami ilegalneho zapućowanja z Čěskeje a Pólskeje žada sej serbski zapósłanc Sakskeho krajneho sejma Marko Šiman (CDU) zarjadowanje krutych hraničnych stacijow po přikładźe Awstriskeje. „Jenož z tutej naprawu a přidatnym personalom zwjazkoweje policije kaž tež intensiwnišimi kontrolemi sakskeje policije móžemy ilegalnej migraciji přez pašowarjow zadźěwać“, wón praji.
Přihotuja park latarnjow
Krótkopowěsće (29.08.23)
Serbja na Dnju Saksow
Budyšin. Na lětušim Dnju Saksow, kotryž so wot 1. do 3. septembra w Aue-Bad Schlema wotměje, so tež Serbja wobdźěla. Publikum wo serbskej rěči a kulturje informować chcedźa tu Serbska kulturna informacija, towarstwje Serbski kulturny turizm a Serbski folklorny ansambl Wudwor kaž tež zarjad Domowiny. Ze serbskim denerom budźe Wawrikec catering wopytowarjow pohosćować.
Wita naprawy Schustera
Zhorjelc. W dźensnišej nowinskej zdźělence wita krajny rada Zhorjelskeho wokrjesa Stephan Meyer (CDU) naprawy k zamjezowanju ilegalneho zapućowanja, kotrež je nutřkowny minister Sakskeje Armin Schuster (CDU) kónc tydźenja připowědźił. Sakska policija slědźi wot wčerawšeho w namjeznych kónčinach sylnišo za ilegalnymi přesmykowarjemi.
Cyła wjes bjez miliny
