Krótkopowěsće (07.06.23)
Komunalne wólby klětu 9. junija
Drježdźany. Přichodne komunalne wólby w Sakskej budu klětu 9. junija. Wuzwolić maja so za pjećlětnu wólbnu dobu wokrjesne sejmiki, měšćanske, gmejnske a wjesne rady. Termin je sakske ministerstwo nutřkowneho postajiło a wčera wozjewił. Komunalne wólby wotměwaja so wot lěta 1994 w swobodnym staće paralelnje k wólbam Europskeho parlamenta samsny dźeń.
Za Opus Klassik nominowany
Berlin. Organist Johannes Kral, pochadźacy z Dobranec pola Hodźija, je w dwěmaj kategorijomaj za myto Opus Klassik 2023 nominowany. Ze swojim albumom „Elements of Bach“ požada so w kategorijomaj „instrumentalist lěta“ a „dorostowy wuměłc lěta“. Opus Klassik je myto za klasisku hudźbu w Němskej. Lětušich lawreatow w oktobrje w Berlinje počesća.
Lemke pólsku koleginu zetkała
Krótkopowěsće (06.06.23)
Nowy wyši pjekarski mišter
Kubšicy. Pjekarski mišter Stefan Richter z Kubšic je nowy wyši mišter sakskeho zjednoćenstwa pjekarjow „Saxonia“. Delegaća hłowneje zhromadźizny w Kamjenicy su 44lětneho minjenu sobotu do zastojnstwa wuzwolili. Jeho předchadnik Roland Ermer njebě hižo k wólbam nastupił. Stefan Richter njeskutkuje jeničcy jako pjekar w Kubšicach, ale wuwučuje na sakskej fachowej šuli za pjekarjow w Drježdźanach.
Su na dialog wusměrjene
Osijek. Konferenca „Mjeńšiny na zapadnym Balkanje“ bě prěni krok w rjedźe konstruktiwnych a na jednanje orientowanych dialogow za tamnišu kónčinu. Zašły kónc tydźenja so zastupjerjo tam zasydlenych narodnych mjeńšin na nastork Federalistiskeje unije europskich narodow (FUEN) z tutej temu rozestajachu a móžne mechanizmy, wobstejace wužadanja zmištrować, rozjimachu.
Božemje čěskim tramwajkam
Krótkopowěsće (05.06.23)
Alojsa Mikławška počesćili
Drježdźany. Serbski zapósłanc Sakskeho krajneho sejma Alojs Mikławšk je jedna z wosom wosobow, kotrež je prezident krajneho sejma Matthias Rößler (wobaj CDU) ze Sakskej wustawowej medalju předwčerawšim w Drježdźanach wuznamjenił. Mikławšk pyta dialog z wobydlerjemi, wón so za demokratiske hódnoty a swoju domiznu zasadźuje, Rößler při přepodaću podšmórny.
B 156 dale wutwarja
Drježdźany. Dalši wažny wotrězk zwjazkoweje dróhi B 156 mjez Budyšinom a Běłej Wodu generalnje saněruja. Za to je Krajna direkcija Sakskeje štwórty twarski wotrězk wot Brězynki do Zdźěrje z wobzamknjenjom wo zwěsćenju plana přizwolił. Jězdnju zwonka wsow na 7,50 metrow rozšěrja, paralelnje twarja kolesowanski puć.
Najwjetša skazanka brónjow
Krótkopowěsće (02.06.23)
Serbšćina w hospodarstwje
Nadrózna Hrabowka. Prěni sympozij „Serbšćina w hospodarstwje“ je twornja TDDK dźensa pod hesłom „mnohotnosć nam tyje“ wotměła. Ronald Juhnke, wicešef předewzaća, chce serbskich wotchadnikow šulow serbsce narěčeć a jich pozbudźować, swoju maćeršćinu tež w zawodźe nałožować. TDDK ma z Carolinu Měršowej społnomócnjenu za serbske naležnosće (póndźelu zhoniće wjac).
Dobyćerski naćisk wuzwola
Budyšin. W architekturnym wubědźowanju za přichodny Serbski centrum wědy na Lawskim arealu w Budyšinje je 18 namjetow dóšło. Mytowanska jury je je wčera a dźensa rozjimała a dobyćerski naćisk wuzwoliła. Jón hakle srjedź junija wozjewja, kaž Załožba za serbski lud zdźěla. Wustajeńca ze zapodatymi naćiskami je wot 5. junija hač do 3. julija wotydźenja wot 10 hodź do 16.30 hodź. w Serbskim domje zjawnje přistupna.
Nachwilne ličby za 5. lětnik
Krótkopowěsće (01.06.23)
Nowe šulerske wubědźowanje
Podstupim. Braniborski kubłanski minister Steffen Freiberg a hospodarski minister Jörg Steinbach (wobaj SPD) staj dźensa prěnje „Braniborske wodźikowe myto“ w formje šulerskeho wubědźowanja zahajiłoj. Z nim ma so „wěda wo natwarje wodźikoweho hospodarstwa w šulach kraja šěrić a zrozumjenje za nje zwyšić“. Cyłkownje rozdźěluja mytowanske pjenjezy we wysokosći 15 000 eurow.
Dalši protest při jamje
Drježdźany. Zjednoćenstwo Fridays for Futuere je dalšu wulku demonstraciju za spěšniši kónc wudobywanja brunicy we Łužicy připowědźiło. 25. junija chcedźa při jamje Wjelcej protestować. Tam chcedźa wospjet na to skedźbnić, zo je kónc wudobywanja brunicy 2038 přepozdźe, wšako njeje tutón termin z 1,5-stopnjowej hranicu woćóplenja kompatibelny.
„Ródne čisła“ haj abo nic?
Krótkopowěsće (31.05.23)
Ekstremistka zasudźena
Drježdźany. Wyše krajne sudnistwo w Drježdźanach je dźensa pozdatnu lěwicarsku ekstremistku Linu E. wjacorych nadpadow na prawicarskich ekstremistow dla k jastwu pjeć lět a třoch měsacow zasudźiło. Třo dalši wobskorženi dyrbja dwě a tři lěta do jastwa. Přiwisnicy zasudźeneje w sudniskej žurli wótře přećiwo wusudej protestowachu. 28lětnej studentce wumjetuja kriminelnu namóc.
Lědma mjenje bjezdźěłnych
Budyšin. W meji běše we wuchodnej Sakskej 19 020 bjezdźěłnych, 329 resp. 1,7 procentow mjenje hač w aprylu. Kaž Budyska wotnožka Zwjazkoweje agentury za dźěło dźensa informuje, su słabeje konjunktury dla w róžowniku mało hibanja na tudyšich dźěłowych wikach zwěsćili. Zawody swój personal dźerža. Ličba přizjewjeneje bjezdźěłnosće je porno aprylej dale spadowała.
Ličba kurjakow woteběrała
Krótkopowěsće (30.05.23)
Župne literarne wubědźowanje
Choćebuz. Župa Delnja Łužica je literarne wubědźowanje „Přećeljo – pismiki – prominentni“ zahajiła. Wubědźowanje je wšitkim delnjoserbskim prócowarkam a prócowarjam wěnowane, kotřiž lětsa jubilejne posmjertne narodniny swjeća. Wo tym je Bramborske serbske radijo rozprawjało. Basnica a redaktorka Mina Witkojc kaž tež farar a sobuzałožer Domowiny Bohumił Šwjela staj dwajo z nich.
Nowa nawodnica
Worklecy. Worklečanske dźěćace dnjowe přebywanišćo „K wódnemu mužej“ změje wot 1. julija 2023 nowu wjednica. Gmejna Worklecy, jako nošerka žłobika, pěstowarnje a horta je so za 25lětnu Vanessu Kralowu z Kinsporka rozsudźiła. Z tym mnohe lěta w zarjadnišću jako kubłarka a komisariska nawodnica skutkowaca Monika Lejnertowa bórze swojej naslědnicy zamołwitosć přepoda.
Dołhe rynki jězdźidłow na A4
Krótkopowěsće (26.05.23)
Tež dalše šule so přizjewili
Baršć. Prawicarske zjawy na Bórkowskej šuli „Mina Witkojc“ běchu tema na posedźenju sejmika wokrjesa Sprjewja-Nysa wčera w Baršću. Tam je nawoda statneho šulskeho zarjada rozprawjał, zo su so po wozjewjenju padow w Bórkowach tež dalše šule přizjewili. Wčera je mać ze Złeho Komorowa wo podobnych padach informowała. Přitomnaj šulerjej z Bórkowow staj prawicarske akcije wobkrućiłoj.
Bywši zarjad wottorhaja
Chrósćicy. Něhdyši gmejnski zarjad wosrjedź Chrósćic chce gmejna wottorhać dać. To su radźićeljo na wčerawšim posedźenju zdźělili, po tym zo běchu to do toho jednohłósnje wobzamknyli. Twarjenje je wot lěta 2019 prózdne. Za nje žanoho kupca namakali njejsu. Nětko planuja, zo ma tam nowa gratownja wohnjoweje wobory nastać. Wottorhanje płaći 111 000 eurow.
Koło abo e-bike leasować
Krótkopowěsće (25.05.23)
Lěpšinu tež za studowacych
Drježdźany. Tiket za Němsku měli w přichodźe na wšěch wysokich šulach jako model połneje solidarity za 29,40 eurow poskićeć. Potuńšenu semestersku jězdźenku je dźěłowa skupina krajow za wuwiće tarifow na nastork Sakskeje namjetowała, kaž statne ministerstwo za hospodarstwo, dźěło a wobchad dźensa zdźěla. Zwjazk dyrbi tomu hišće přihłosować.
Słuchokniha znowa wušła
Budyšin. W Ludowym nakładnistwje Domowina je słuchokniha ze žortnymi powědančkami Jana Wornarja „Naš dźěd a ja“ w druhim nakładźe wušła. Směšne powědančka čita dźiwadźelnik Michał Lorenc. Zabawne powědki su zestajene ze zběrkow „Wajchtar trubi“ a „Po wsy horje, po wsy dele“. Słuchoknihu móžeće sebi za 12,90 eurow na přikład w Smolerjec kniharni kupić.
Psyče pissoiry dobywaja swět
Krótkopowěsće (24.05.23)
Předstaji rěčne slědźenja
Nysa. Dr. Cordula Ratajczakowa, wědomostna sobudźěłaćerka projekta Domowiny ZARI (syć za regionalnu identitu a serbsku rěč), wobdźěli so tuchwilu na mjezynarodnej fachowej konferency w pólskim měsće Nysa. Pod hesłom „Wjacerěčnosć jako šansa“ předstaji wona zajutřišim, pjatk, wuslědki ze slědźenja wo połoženju, serbsku rěč nastupajo, na Budyskim Serbskim gymnaziju.
Kulturny pas za 18lětnych
Budyšin. Młodostni, kotřiž lětsa swoje 18. narodniny woswjeća, móža wot srjedź junija cyłoněmski kulturny pas wužiwać. Na to skedźbnja łužiska zapósłanča zwjazkoweho sejma Kathrin Michel (SPD). Młodostni maja za to wirtuelny budget we wysokosći 200 eurow k dispoziciji. Kulturnicy tuchwilu swoje poskitki, za kotrež maja hišće zastupne lisćiki, na registruja.
Ruska płaćić nochce
