Krótkopowěsće (07.12.21)
Incidenca woteběraca
Budyšin. Po kóncu tydźenja zwěsći Roberta Kochowy institut w Hornjej Łužicy dale incidencu na wysokim niwowje, ale woteběracu. Dźensa mjenuje za Budyski wokrjes 1 187,9 a za Zhorjelski 879,2. Budyski krajnoradny zarjad je wčera za čas wot minjeneho pjatka wo 1 171 natyknjenjach z koronawirusom a dźesać smjertnych padach rozprawjał, Zhorjelski wo 611 infekcijach a štyrjoch zemrětych. Gmejna z najwjace korona-padami w Budyskim wokrjesu su dale Ralbicy-Róžant ze 66 na tysac wobydlerjow.
Serbska kniha za dźěći chorwatsce
Zagreb. „Woko Mok – syn wódneho muža“ rěka lěta 2003 w LND wušła dźěćaca kniha Křesćana Krawca, kotruž chce Zagrebske nakładnistwo nětko w chorwatskej rěči wudać. Ilustrowała bě wudaće tehdy Iris Brankačkowa.
Přiwozmu čěsku pomoc
Krótkopowěsće (06.12.21)
Incidenca snadnje niša
Budyšin. Roberta Kochowy institut zwěsći dźensa snadnje nišu incidencnu hódnotu 1 376,8 za Budyski wokrjes a za Zhorjelski 1 123,9. Minjeny pjatk bě Budyski wokrjes wo 734 natyknjenjach a šěsć smjertnych padach w zwisku z koronu rozprawjał, wokrjes Zhorjelc mjenowaše pjatk 528 dalšich infekcijow a jědnaće zemrětych.
Ralph Büchner njeboh
Wojerecy. Lokalny politikar Lěwicy Ralph Büchner je njeboh. 60lětny Wojerowčan je sobotu po ćežkej chorosći zemrěł, informowaše Budyski wokrjesny zwjazk Lěwicy. Büchner bě wjelelětny měšćanski radźićel we Wojerecach a předsyda frakcije Lěwicy w Budyskim wokrjesnym sejmiku. Wón bě stajnje tež serbskim naležnosćam wotewrjeny a je so za nje zasadźał.
Dalši kwartěr za ćěkancow
Krótkopowěsće (03.12.21)
Nakopjene pady wotdźěłali
Budyšin. Z koncentrowanej akciju su wčera w Budyskim krajnoradnym zarjedźe nakopjene 3 000 njewobdźěłanych korona-padow wotdźěłali. Samsny dźeń informowachu wo 775 natyknjenjach a wo pjeć smjertnych padach. Incidenca po RKI wučinja dźensa 1 476,1 w Budyskim wokrjesu a 1 021,7 w Zhorjelskim. Tam zwěsćichu wčera 476 infekcijow a dźesać zemrětych na covid-19.
Přez kulturu k rěči
Choćebuz. Kak móžeš so přez kulturu k rěči předobyć, wo tym su sej čłonki a čłonojo předsydstwa Domowinskeje župy Delnja Łužica a zastupjerjo noweje Delnjoserbskeje kulturneje akademije wčera we wobłuku online-wuradźowanja mysle a nazhonjenja wuměnjeli. Zarjadnišćo w Choćebuzu je předewzaće powšitkownowužitneje projektoweje towaršnosće Domowina Delnja Łužica.
Chorownjam pomhać
Krótkopowěsće (02.12.21)
26 schorjenych zemrěło
Budyšin/Zhorjelc. Wo 26 smjertnych padach korony dla abo w zwisku z njej stej wokrjesaj Budyšin (15) a Zhorjelc (11) wčera rozprawjałoj. Z podatymi 1 297 natyknjenjemi je incidenca po Roberta Kochowym instituće w Budyskim wokrjesu dźensa 1 514,0 a we wokrjesu Zhorjelc 1 040,9. Tam su wčera wo dalšich 933 infekcijach informowali. 499 ludźi w chorownjach wobeju wokrjesow lěkuja.
Wo mjeńšinach wědu šěrić
Berlin/Budyšin. Wědu wo tudyšich narodnych mjeńšinach měli na šulach po cyłej Němskej šěrić. Dokument z wobsahowymi zakładami za wučbny material su čłonojo mjeńšinoweje rady wčera na swojim online-wuradźowanju rozjimali. Wo tym je dźensa rano Serbski rozhłós informował. Dale su sej mysle wuměnjeli ze Stefanom Seidlerom, nowowuzwolenym zapósłancom SSW w zwjazkowym sejmje.
Wubědźowanje popoweje hudźby
Krótkopowěsće (01.12.21)
Incidenca dale jara wysoka
Budyšin. Z hódnotu 1 492,9 po Roberta Kochowym instituće je incidenca w Budyskim wokrjesu dźensa dale jara wysoka. Tam rozprawjachu wčera wo 562 natyknjenjach z koronawirusom a dalšich pjeć smjertnych padach. 335 infekcijow a šěsć zemrětych pacientow zwěsćichu we wokrjesu Zhorjelc, indicenca po RKI wučinja tam dźensa 1 085,6.
Wobstawaja na dobrych jobach
Choćebuz. Při pospěšenym wustupje z brunicy je sej Němski dźěłarniski zwjazk (DGB) do dźensnišeje 17. łužiskeje konferency wot politiki zarunanje za derje zapłaćene joby žadał. Wot noweho knježerstwa wočakuje wobwodny šef DGB Berlin-Braniborska Christian Hoßbach, zo wone kurs wobchowuje, ze změnu strukturow dobre dźěło w rewěrje zaruča a wupłaćenje strukturneho spěchowanja časowje přiměri.
Lětopis 2021/2 wušoł
Krótkopowěsće (30.11.21)
Dźewjeć schorjenych zemrěło
Budyšin. Incidenca 1 791,2 po Roberta Kochowym instituće dźensa w Budyskim wokrjesu je třeća najwyša po cyłym Zwjazku. Krajnoradny zarjad informowaše tam wčera wo 1 667 natyknjenjach z koronawirusom a dźewjeć smjertnych padach. Gmejna Ralbicy-Róžant steji z 94 potrjechenymi na tysac wobydlerjow na čole. We wokrjesu Zhorjelc bě wčera 37 infekcijow, incidenca po RKI je 1 284,3.
Kwota zaso pod šěsć
Budyšin. We wuchodnej Sakskej bě w nowembrje 16 213 bjezdźěłnych, 314 mjenje hač w oktobrje. Z tym leži kwota bjezdźěłnosće pola 5,9 procentow a je dźakowano nazymskemu wožiwjenju prěni raz po lěće 2019 pod šěsć procentow padnyła, to Budyska wotnožka zwjazkoweje agentury za dźěło dźensa zdźěli. Kaž dale rěka, pak ludźo ze zbrašenjemi ćešo zaso přistajenje namakaja.
W zastojnstwje wobkrućenaj
Krótkopowěsće (29.11.21)
Natyknjenja njewoteběraja
Budyšin. 2 635 natyknjenjow z koronawirusom a šěsć smjertnych padow w Budyskim wokrjesu, wo kotrychž Roberta Kochowy institut wot minjeneho pjatka hač do dźensnišeho rozprawja, je dalše zwyšenje incidency na nětko 1 732,8 zawiniło. We wokrjesu Zhorjelc wučinja incidenca po RKI dźensa 1 554,5, w mjenowanej dobje bě tam 2 976 infekcijow, dźesać pacientow zemrě.
Snadne komdźenja nachwatać
Zły Komorow. Lětsa docpěty staw při wutwarje spěšneho interneta we wokrjesu Hornje Błóta-Łužica leži w časowym planje. Předwidźane hłubokotwarske dźěła su dospołnje wotzamknjene. Snadne komdźenja zwěsćichu při montaži syćowych rozdźělowakow a domjacych přizamkow přez firmy, kotrymž běchu tele dźěła přepodali. Hač do klětušeho februara maja wone wotzamknjene być, rěkaše na njedawnym posedźenju wokrjesneho wuběrka.
Pochowarjo so starosća
Krótkopowěsće (26.11.21)
Njesměrnje wysoka incidenca
Budyšin. Po cyłej Němskej druhu najwyšu incidencu po RKI ma Budyski wokrjes dźensa z hódnotu 1 683,8. Wokrjes informowaše wčera wo 1 029 natyknjenjach z koronawirusom a třoch smjertnych padach. Njesměrnje postupiła je incidenca po RKI w Zhorjelskim wokrjesu, hdźež rozprawjachu wčera wo 1 960 nowoinfekcijach a štyrjoch zemrětych pacientach.
Nowe šćěpjenske městnosće
Budyšin. Wot póndźele poskića šćěpjenja w Kamjenskej wotnožce wokrjesneje uniwersity (póndźelu/štwórtk), na Wojerowskej žurli Vis-à-Vis na Hrodowym měsće (wutoru/pjatk) a w Budyskej wjacezaměrowej hali na Třělnišću (srjedu/štwórtk), a to wot 11 do 17 hodź. Dotalne mobilne poskitki we Wojerowskim Łužiskim centeru a w Budyskim ECE wjace njebudu.
Polěpša zwisk do Łužicy
Krótkopowěsće (25.11.21)
Incidenca na wysokim niwowje
Budyšin. Z 95 korona-padami na tysac wobydlerjow je gmejna Ralbicy-Róžant w Budyskim wokrjesu z wotstawkom najbóle potrjechena. Incidenca po RKI tu je dźensa 1 027,5. Wčera informowachu wo 1 656 natyknjenjach z koronawirusom. W Zhorjelskim wokrjesu bě jich wčera 1 033. Tři smjertne z časa wot 8. do 17. nowembra statistiku wudospołnjeja. Incidenca po RKI je tam dźensa 735,6.
Wólby znowa přestorčene
Budyšin. Zwjazk serbskich wuměłcow (ZSW) je swoju hłownu a wólbnu zhromadźiznu dalši raz přestorčił. Aktualneho pandemiskeho połoženja dla njemóža 7. decembra w Budyskej Röhrscheidtowej bašće planowane zarjadowanje přewjesć. Nowy termin dotal hišće jasny njeje. ZSW dale zdźěli, zo je literaturu šěrjacy projekt „serbskiTV“ wotnětka tež na platformje Instagram přistupny.
Změnja prawidła mawty
Krótkopowěsće (24.11.21)
Incidenca tróšku mjeńša
Budyšin. Wčera su w Budyskim wokrjesu 447 dalšich natyknjenjow z koronawirusom registrowali. Incidencna hódnota pak je tu po Roberta Kochowym instituće dźensa z 1 227,5 tróšku niša hač wčera. W Zhorjelskim wokrjesu su wčera 449 nowych koronapadow zwěsćili. Incidenca je tu po RKI dźensa na 393,1 spadnyła.
1 500 ludźi peticiju podpisało
Budyšin. Zjawnu online-peticiju přećiwo znowastajenju Bismarckoweho pomnika na Čornobóh je dohromady 1 529 ludźi podpisało, z toho 397 z Budyšina. Wčera su peticiju Budyskej měšćanskej radźe oficialnje zapodali. Wšako chce gremij dźensa wo pomniku rozsudźić. Medije po cyłej Němskej běchu wo naležnosći rozprawjeli.
Gymnazij dźělnje zawrjeny
Budyšin. Na Budyskim Serbskim gymnaziju hač do pjatka šulerjow 5. do 10. lětnika njewuwučuja. W rjadowni 6-1 běchu ze spěšnotestom jědnaće natyknjenjow z koronawirusom zwěsćili, pjeć z PCR-testom wobkrućenych. 11. a 12. lětnik matej dale prezencnu wučbu. Ralbičanska šula je wulkeje ličby infekcijow dla hižo wot 19. nowembra zawrjena, tež hač do pjatka. Wot 5. do 10. lětnika mějachu tam 42 infekcijow.
