Krótkopowěsće (25.01.23)
Muzejej dalšej plastice přepodali
Budyšin. Swójba wuznamneho łužiskeho wuměłca Siegfrieda Schreibera je Muzejej Budyšin wčera dalšej skulpturje přepodała. Z bronzowymaj plastikomaj „Stehende (Rosel II)“ a „Teilfassung des Mädchentorsos mit gesenktem Kopf (Reni)“ je so muzejowy wobstatk twórbow ze zawostajenstwa předewšěm za swoje rězbarske twórby znateho Schreibera podwojił.
Solidariski T-shirt
Zhorjelc. Łužiski modowy label LABA předawa wotnětka wosebity, limitěrowany T-shirt „Swoboda wuměłstwa“, wuraznje njepokazowacy twórbu Hanki Krawcec „Monika“. Dochody maja we wobłuku solidariskeje akcije narunanju kóštow za powołanske jednanje nastupajo wužiwanje motiwa na wudźěłkach labela na wyšim krajnym sudnistwje w Drježdźanach (SN rozprawjachu) słužić.
Naftowód do stareho železa?
Krótkopowěsće (24.01.23)
Předčitanska funkcija přistupna
Budyšin. Digitalna předčitanska funkcija za serbšćinu je wotnětka zjawnje přistupna. Rěčespytnikaj Serbskeho instituta (SI) dr. Astrid Schmiedelowa a Jan Měškank staj w tym zwisku wčera hornjoserbski hłós „Mateja“ a delnjoserbski „Jura“ w Budyšinje předstajiłoj. SI namołwja wužiwarjow, „awtomatiske předčitanje na internetnej stronje instituta wuspytać a pohódnoćić“.
Skóržba prawow mjeńšinow dla
Flensburg. Wobydlerski komitej iniciatiwy Minority SafePack a prezidij Federaciskeje unije europskich narodnosćow (FUEN) stej wčera jednohłósnje wobzamknyłoj, „powołanje (Berufung) nastupajo wotpokazowanje kničomneho jednanja (Nichtigkeitsverfahren) prěčiło Europskej komisiji na sudnistwje EU zapodać“. Kaž FUEN zdźěla, su „nadźijepołni, zo so rozsud z lońšeho nowembra zběhnje. Twjerdźenje, zo je EU hižo wšitke móžnosće nastupajo škit mjeńšinowych rěčow a kulturow wučerpała, je njewobchowajomne“.
Sněhakowarjo wola Pavela
Krótkopowěsće (23.01.23)
Ultimatum w holi so skónči
Ottendorf-Okrilla. Hač do dźensnišeho maja młodźi ludźo, kotřiž we Łužničanskej holi přećiwo planowanej jamje za wudobywanje šćerka protestuja, lěs wopušćić. Rěčnica přisłušneho krajnoradneho zarjada w Budyšinje, Sabine Rötschke, praješe Serbskim Nowinam, zo „budu so nětko wšitcy dorozumjeć, kak póńdźe dale“. Aktiwisća protestuja přećiwo porubanju 900 hektarow lěsa.
Wjetša podpěra sadowcam
Drježdźany. We wobłuku inwestiwneho spěchowanja za přirodoškit je Sakska loni 1 080 próstwow z wolumenom něhdźe 17,5 milionow eurow přizwoliła. K tomu liča mjez druhim saněrowanje sadowych łukow, wožiwjenje lěsnych bahnow kaž tež wuwiće drobnych wodźiznow a hladanje biotopow z posykom. Hladanje młodych sadowcow je nowosć w spěchowanskim scenariju Sakskeje.
„Heřmanička“ njeje zabyta
Krótkopowěsće (20.01.23)
Thomas Leberecht kandiduje
Bjedrichecy. K wólbam wjesnjanosty Łazowskeje gmejny 23. apryla mějićel zastojnstwa Thomas Leberecht znowa kandiduje. Jeho je gmejnski zwjazk CDU wčera w Bjedrichecach (Friedersdorf) jednohłósnje nominował. Dotal je Leberecht jenički kandidat. Wón je wot 2016 wjesnjanosta po teritoriju druheje najwjetšeje sakskeje gmejny. Hač do 16. februara móža so hišće namjety zapodać.
Chutny pad zwučowali
Wojerecy. Što činić a kak so zadźeržeć, hdyž strašne zwěrjo twochnje, su wčera we Wojerowskim zwěrjencu zwučowali. Při tym wuchadźachu z toho, zo je so jedyn z dweju mjedwjedźow ze swojeje připrawy wuswobodźił. Krótko po 10 hodź. je zwučowanski signal pola policije dóšoł. Bórze na to policisća, wohnjowi wobornicy a měšćanski hajnik do zwěrjenca přijědźechu a sej dalše kroki dorěčachu.
Na lodźe strach hrozy
Krótkopowěsće (19.01.23)
Statnik měł CDU-mandat złožić
Budyšin. W internetnym woprašowanju serbskeho rozhłosa MDR na Instagramje je so 55 procentow ludźi za to wuprajiło, zo měł předsyda Domowiny, Dawid Statnik, swój mandat w frakciji CDU Budyskeho wokrjesneho sejmika złožić. 29 procentow je hinašeho měnjenja a 16 procentow tema „politiski mandat a zastojnstwo Domowiny“ njezajimuje. 153 ludźi je so wobdźěliło.
Merz za jasnu mjezu k AfD
Drježdźany. Na prašenje Sakskich Nowin, kak posudźuje hłosowanje Budyskeje CDU za namjet AfD we wokrjesnym sejmiku, wotmołwi předsyda zwjazkoweje CDU, Friedrich Merz, zo „je to problem“ a zo „ma za zbytne, štož je so tam stało“. Wón praji dale, zo, by-li Budyska CDU tajki namjet za zmysłapołny měła, dyrbjała jón sama zapodać, a wuzběhny hladajo na AfD: „Naša palna murja steji“.
Hłowna zhromadźizna SKT
Krótkopowěsće (18.01.23)
MSPI dla FUEN znowa skorži
Flensburg. Wuběrk wobydlerskeje iniciatiwy MinoritySafepack (MSPI) a prezidij Federaciskeje unije europskich narodnosćow (FUEN) znowa na Europskim sudnistwje skoržitej, kaž FUEN w interneće zdźěli. Wobaratej so přećiwo rozsudej sudnistwa z 9. nowembra 2022. Po tym je Europska komisija ze swojim wotpokazanjom, prawniske akty na zakładźe MSPI namjetować, prawje jednała.
Rozmołwa w Kulowje
Kulow. Budyski krajny rada Udo Wićaz (CDU) je wčera předewzaće MAJA-meble w Kulowje wopytał. Z jednaćelom Uwe Gottschlichom a zawodnym nawodu Jansom Antalijom je wón aktualnu situaciju twornje rozjimał, hdźež nimale 200 ludźi pušća (SN rozprawjachu). Po zetkanju je so Wićaz z Budyskej dźěłowej agenturu skontaktował a wo podpěru za Kulowske předewzaće prosył.
Hara přińdźe z Němskeje
Krótkopowěsće (17.01.23)
Zličbowanski zarjad kontra MDR
Erfurt/Drježdźany. Durinski zličbowanski kritizuje MDR, zo dosć nječini, „strukturelny deficit“ z prioritami a wužiwanjom synergijow wotbyć. Rozprawa w nadawku zličbowanskich zarjadow Sakskeje, Saksko-Anhaltskeje a Durinskeje je na internetnej stronje tamnišeho krajneho sejma přistupna. Kaž magacin „Flurfunk“ informuje, je MDR znapřećiwił, zo hižo wjele lutuje.
Sej předewzaća wobhladać
Drježdźany. Wot wčerawšeho je móžno, so za 17. tydźeń wotewrjenych předewzaćow „Schau rein“ přizjewić. Wot 13. do 18. měrca maja šulerki a šulerjo w Sakskej zaso přiležnosć, wšědny dźěłowy dźeń dožiwjeć. Jeli so šula na tydźenju njewobdźěli a termin w předewzaću je dopołdnja, je za šulerjow wuswobodźenje z wučby móžne. Informacije
Bože dźěćo durje zaprasnyło
Krótkopowěsće (16.01.23)
Podpěra šulskim nowinam
Drježdźany. Sakske kultusowe ministerstwo nowozałoženje šulerskich nowin pjenježnje podpěra. Štóž w běžnym šulskim lěće swoje prěnje wudaće wozjewi abo wotpohladuje, hišće hač do lěća tajku nowinu załožić, móže so za to próstwu wo startowy pjenjez zapodać. Ministerstwo wudawki za trěbne wěcne kóšty hač do 300 eurow na šulu zaruna. Šulerske nowiny njejsu na papjerjanu formu wjazane, móža tež digitalne być.
Serbska aktiwistka w Lützeraće
Lützerath. Na akcijach přećiwo wotbagrowanju wjeski Lützerath je so po informacijach serbskeho radija RBB tež młoda delnjoserbska aktiwistka Maja Šramojc z Gołbina wobdźěliła. Wona je w Choćebuskim „Kolektiwje Wakuum“ angažowana. Wobmjezowanje woćoplenja atmosfery na 1,5 stopnjow je lědma docpějomne, tak Šramojc, tohodla pokročowanje z wudobywanjom brunicy njezamołwite.
Historisku drohoćinku wustajili
Krótkopowěsće (13.01.23)
Wot 2. februara bjez nahubnika
Berlin. Winowatosć nahubnika w zjawnym dalokowobchadźe ma so k 2. februarej dočasnje zběhnyć. To je zwjazkowy minister za strowotnistwo Karl Lauterbach (SPD) dźensa w Berlinje zdźělił. Po płaćiwym zakonju wo škiće před infekcijemi běchu dotal w dalokowobchadnych busach a ćahach, kaž su to ICE, IC a EC, hišće hač do 7. apryla FFP2-maski předpisane.
Policisća čisło dóstanu
Drježdźany. Štož je w susodnych krajach Sakskeje dawno winowatosć, nětk tež w swobodnym staće płaći: Policisća dóstanu indiwiduelne čisło. Tak hodźi so na přikład po demonstracijach lěpje zwěsćić, kotry zastojnik jednotki hotowostneje policije je so kak napřećo demonstrantam zadźeržał, jeli je k porokam dóšło. Zeleni a SPD su sej to dawno žadali, CDU to dotal wotpokaza.
Parkowanišći přepodali
Krótkopowěsće (12.01.23)
Łužica stolica kultury?
Choćebuz. Kulturna ministerka Braniborskeje, Manja Schüle (SPD), je swój namjet wobkrućiła, zo by so Łužica jako europska stolica kultury požadać móhła. Schüle: „Mamy wulkotnu kulturnu krajinu we Łužicy“, do kotrejež słuša tež „jónkrótne herbstwo Serbow“. W zwisku ze změnu strukturow něhdyšeho brunicoweho rewěra dźe wo to, „potenciale zwjazać a něšto nowe kreěrować.“
Prěnja indigena ministerka
Brasilia. W Brazilskej su prěnju indigenu ministerku w stawiznach kraja spřisahali. Sônia Guajajara nawjeduje wotnětka nowe ministerstwo za indigene ludy, kotrež je dobyćer wólbow, nowy prezident Lula, wutworił. Guajajara běše koordinatorka indigeneho třěšneho zwjazka Abip. Jeje spřisahanje dyrbjachu nadpada militantnych přiwisnikow něhdyšeho prezidenta Bolsonara dla přestorčić.
Hotuja so na jubilejny swjedźeń
