Krótkopowěsće (04.04.22)
Angela Stachowa zemrěła
Lipsk. W starobje 74 lět je serbsko-němska spisowaćelka a politikarka Angela Stachowa 29. měrca w Lipsku zemrěła, kaž swójbni zdźělichu. Wona bu wuznamjenjena z wjacorymi mytami. Jednotliwe jeje twórby buchu do čěšćiny, pólšćiny, rušćiny, šwedšćiny, chorwatšćiny a jendźelšćiny přełožene. Wot 1990 do 1994 bě wona zapósłanča PDS/Lěweje lisćiny w zwjazkowym sejmje.
Wokrjes dlěje njeinformuje
Budyšin. Wot dźensnišeho płaći w Němskej nastupajo koronu jenož hišće bazowy škit. Po Roberta Kochowym instituće je aktualna incidenca w Budyskim wokrjesu 1 375,5 a w Zhorjelskim 1 125,6. Wokrjes Budyšin je minjeny pjatk wo 606 natyknjenjach a sydom smjertnych padach informował, wokrjes Zhorjelc wo 812 infekcijach. Nimo toho wokrjes Budyšin wot dźensnišeho wjace wšědnje wo wuwiću pandemije na swojej internetnej stronje njerozprawja.
Wo delnjoněmčinje
Krótkopowěsće (01.04.22)
Snadnje woteběraca tendenca
Budyšin. Z incidencu 1 416,7 w Budyskim wokrjesu a 1 248,8 w Zhorjelskim je Roberta Kochowy institut dźensa snadnje woteběracu tendencu za Hornju Łužicu potwjerdźił. Wokrjes Budyšin je wčera wo 846 zwěsćenych nowych natyknjenjach z koronawirusom rozprawjał. Wokrjes Zhorjelc mjenowaše štwórtk 739 infekcijow, mjez nimi bě 140 dźěći, a dalši smjertny pad z 21. měrca.
Nalětnje wožiwjenje
Budyšin. Wo nalětnim wožiwjenju na wuchodosakskich dźěłowych wikach je Budyska wotnožka Zwjazkoweje agentury za dźěło wčera informowała. Wjace hač 1 100 wosobow je so zaso do dźěła dóstało, štož je stopnjowanje wo pjećinu porno předměsacej. W regionje bě w měrcu 17 481 bjezdźěłnych, 343 mjenje hač w februarje. Tudyša kwota bjezdźěłnosće aktualnje 6,3 procenty wučinja.
Luksusowy hotel nastanje
Krótkopowěsće (31.03.22)
Zaručenje dorosta wužadace
Budyšin. Načolnicy serbskich institucijow rozjimachu na wčerawšim zeńdźenju zhromadnu starosć serbski dorost nastupajo. Namakać fachowje a rěčnje kmany dorost je dźeń a bóle wužadace, zdźěli Załožba za serbski lud. Podate ideje chcedźa hač do přichodneho zetkanja dale wuwić a kwalifikować. Nimo serbskich dźěłowych poskitkow měł dorost zhonić wo tym, kajke móžnosće w serbskich institucijach scyła wobsteja.
Wuznamjenjenje na dobro dźěći
Wojerecy. Dźěćaca klinika Wojerowskeho jězorinoweho klinikuma je kwalitny pječat „wuběrnje“ za medicinu dźěći a młodostnych přijała. Lěkarjo a sobudźěłaćerjo su je z wulkim wjeselom přiwzali. Mjeztym sedmy króć je Towaršnosć za chorownje a wotrjady za dźěći w Němskej z.t. klinice tele wuznamjenjenje spožčiła. Wona wuměnjenja kwality wot 2018 lěto wob lěto spjelni.
Postup a spad incidency
Krótkopowěsće (30.03.22)
18. čitanske wubědźowanje
Budyšin. Pod hesłom „Knihi su zastupny lisćik do raja fantazije“ zarjaduje Rěčny centrum WITAJ w kooperaciji ze Serbskim muzejom wospjet čitanske wubědźowanje za šulerjow 3. lětnika. Najlěpši čitarjo wšěch serbskich zakładnych šulow wubědźuja so sobotu w dwěmaj rěčnymaj skupinomaj w Serbskim muzeju. Je to mjeztym 18. tajke zarjadowanje.
Moderatne zniženje
Budyšin/Zhorjelc. Po Roberta Kochowym instituće je so incidenca w Hornjej Łužicy dźensa moderatnje znižiła a wučinja w Budyskim wokrjesu 1378,8. Tamniši krajnoradny zarjad informuje wo 720 zwěsćenych nowoinfekcijach z koronawirusom. We wokrjesu Zhorjelc zličichu 875 nowych natyknjenjow, 15 schorjenych je zemrěło. Incidenca tam je na 1270,0 woteběrała.
Wědomostne dźěło wo Serbach
Krótkopowěsće (29.03.22)
Přećah šule wobzamknyli
Budyšin. Wyša šula w Malešecach přeměstni so do Barta. To je Budyski wokrjesny sejmik na wčerawšim posedźenju wobzamknył. Z planowanym přepodaćom noweho twarjenja wot šulskeho lěta 2025/2026 budźe stejnišćo wyšeje šule we wjesnym dźělu Bart. Nětčiša Bartska zakładna šula do Malešec přećehnje. Nošer wyšeje šule je wokrjes, za zakładnu je gmejna zamołwita.
Kolekcije jejkow zapodać
Budyšin. 69. wubědźowanje wo najrjeńše serbske jutrowne jejko za dźěći a młodźinu do 24 lět je zahajene. Hač do 20. apryla móža młodźi ludowy wuměłcy kolekcije z dwěmaj wudutymaj kokošacymaj jejkomaj wotedać. Mytuja so w štyrjoch znatych technikach z tradicionelnymi mustrami a gratami zhotowjene wudźěłki. Tučasnych wobstejnosćow dla maja so kolekcije z póštu zapodać.
Wolóženje pytnyć njeje
Krótkopowěsće (28.03.22)
Incidenca dale přiběra
Budyšin/Zhorjelc. Z hódnotu 1926,4 je incidenca w Budyskim wokrjesu přez kónc tydźenja dale přiběrała. Dohromady zwěsći RKI tu 183 nowych natyknjenjow z koronawirusom. Tež w Zhorjelskim wokrjesu je tendenca dale stupaca. Tu zapoda RKI dźensa incidencu 1 590,8. 121 ludźi je so z wirusom inficěrowało. Ani w Budyskim ani w Zhorjelskim wokrjesu po RKI nowe smjertne pady w zwisku z pandemiju registrowali njejsu.
Blokaj pozdźišo wotpinyć
Podstupim/Janšojce. Braniborske krajne knježerstwo chce doskónčne wotpinjenje dweju blokow Janšojskeje milinarnje přestorčić, zo by energijowu wotwisnosć wot Ruskeje pomjeńšiło. Hospodarski minister Jörg Steinbach (SPD) je zwjazkowemu hospodarskemu ministrej Robertej Habeckej (Zeleni) w lisće namjetował, tak mjenowanu wěstotnu zwólniwosć dweju blokow milinarnje podlěšić.
Čěscy wojacy do Słowakskeje
Krótkopowěsće (25.03.22)
Jako sudnik dźěłać njesmě
Lipsk. Bywši zapósłanc zwjazkoweho sejma strony AfD Jens Maier swoje zastojnstwo jako sudnik najprjedy raz wukonjeć njesmě. Słužbne sudnistwo za sudnikow w Lipsku je 60lětnemu zakazało, tuchwilne zastojnstwo dale wjesć. Wo tym sudnistwo dźensa informowaše. Wustawowy škit w Sakskej zastopnjuje Maiera jako prawicarskeho ekstremista.
Roman Nuk nominowany
Waršawa/Drježdźany. Kandidaća za lětuše Němsko-Pólske žurnalistiske myto Tadeusza Mazowieckeho su pomjenowani. Jury je wčera 30 přinoškow w pjeć kategorijach nominowała. Mjez nimi je w kategoriji „žurnalizm w pomjeznym regionje“ tež rozhłosowy přinošk Romana Nuka a Holgera Lühmanna „Mensch Nachbar extra: Was kommt nach der Kohle?“. 9. junija chcedźa dobyćerjow na gali w Zhorjelcu wuznamjenić.
Wolóženje njewotwidźomne
Krótkopowěsće (24.03.22)
Polěpšenje dale njespóznajomne
Budyšin/Zhorjelc. Krajnoradny zarjad wokrjesa Budyšin informowaše wčera wo dalšich 1 757 zwěsćenych infekcijach z koronawirusom. W Zhorjelskim wokrjesu je so 1 091 wosobow z nim natyknyło, štyrjo schorjeni su zemrěli. Incidency stej so po Roberta Kochowym instituće we woběmaj wokrjesomaj zwyšiłoj a wučinjatej dźensa za Budyšin 1 957,7 a za Zhorjelc 1 400,1.
Na dobro klimy a móšnjow
Wojerecy. Wobchadny zwjazk Hornje Łobjo (VVO) a Wobchadna towaršnosć Wojerecy (VGH) poskićatej wot 1. apryla nowy dnjowy tiket. Jězdźenka płaći 3,50 eurow a dowola jězby z busom a železnicu po měsće kaž tež we wokolinje hač do Čorneho Chołmca. Zaměr je, wjace ludźi za zjawny wosobowy bliskowobchad zahorić. Wukopa-li so modelowy projekt jako wuspěšny, chce VVO přichodnje po-dobny poskitk za cyły region zarjadować.
Ličba skawtow dale a wjetša
Krótkopowěsće (23.03.22)
IC TEAM z Budyšina počesćeny
Budyšin. Budyska towaršnosć IC TEAM Personaldienste GmbH bu z pječatom „Najlěpši dźěłodawar w srjedźnym stawje 2022“ wuznamjenjena. Předewzaće je we wubědźowanju Centruma za dźěłodawarsku atraktiwitu (zeag GmbH) lětsa třeće městno docpěło. Jury dźiwa wosebje na strowu a zdobom wukonitu kulturu na dźěłowym městnje. Zakład su detailowane woprašowanja sobudźěłacych.
Dale mnohe natyknjenja
Budyšin. Ličba z koronawirusom natyknjenych wosobow w Hornjej Łužicy je dale wulka. Budyski wokrjes informowaše wčera wo 1 963 infekcijach a wo třoch smjertnych padach. Tu je incidenca po Roberta Kochowym instituće dźensa 1 785,5, we wokrjesu Zhorjelc 1 392,1. Tamniši krajnoradny zarjad rozprawješe wčera wo 909 natyknjenjach a třoch zemrětych z časa wot 6. do 16. měrca.
Delnjoserbska brošurka FUEN
Krótkopowěsće (22.03.22)
Serija nětko w mediatece
Drježdźany. Serija wo Serbach „Straight Outta Crostwitz“ je w mediatece ARD widźeć. Wobhladać móža sej ju zajimcy tež wot jutřišeho na MDR+. W srjedźišću serije, kotraž bu w Chrósćicach a Hornjej Hórce wjerćana, steji spěwarka ludowych pěsnjow Hanka (Jasna Fritzi Bauer), kotraž so jako rapperka na wubědźowanju wobdźěli. Wobdźěleny běše tež bubnar skupiny „Silbermond“ Andreas Nowak.
Incidenca zaso pod 2 000
Budyšin. Incidenca po Roberta Kochowym instituće je dźensa w Budyskim wokrjesu z 1 932,5 zaso pod hódnotu 2 000, we wokrjesu Zhorjelc je wona 1 418,8. Tam informowachu wčera wo 1 437 natyknjenjach wot minjeneho pjatka a wo dwěmaj smjertnymaj padomaj wot 11. měrca. Z Budyskeho wokrjesa porno wčerawšemu žane aktualniše ličby njepředleža.
Swobodne městna za poetryslam
Budyšin. Serbski ludowy ansambl a Ludowe nakładnistwo Domowina wuhotujetej 18. junija prěni serbski poetryslam „Lit|a|pop“. Za njón přihotowacu dźěłarničku, kotruž organizatoraj 26. a 27. měrca w Budyskej młodowni poskićatej, móža so zajimcy krótkodobnje hišće přizjewić, a to z mejlku na .
