Krótkopowěsće (31.08.20)
Znowa třo nawrótnicy z dowola
Budyšin. Wo třoch nowoinfekcijach mjez nawrótnikami z dowola je Budyski wokrjesny strowotniski zarjad minjeny pjatk popołdnju informował. Dohromady rozrosće ličba koronapadow do kónca tydźenja w Budyskim wokrjesu na 515. Postajenych je 57 karantenow (+ 34). Aktualne ličby za sobotu a njedźelu hač do kónca redakciskeho dźěła za dźensniše wudaće hišće njepředležachu.
Dwaj kandidataj za wjesnjanostu
Slepo. Za wólby wjesnjanosty 1. nowembra w Slepom je gmejnski wólbny wuběrk minjeny pjatk dweju kandidatow wobkrućił. Staj to Jörg Funda za CDU a Mathias Lampe za AfD. „Wobaj kandidataj staj přizwolenaj“, podšmórny nawoda wólbneho wuběrka Ronny Jurk w Slepom. Funda je amtěrowacy wjesnjanosta a jednaćel dožiwjenskeje kupjele w Krušwicy. Lampe je ćěsliski mišter.
Janusz Wójcik zemrěł
Krótkopowěsće (28.08.20)
Nětko pjećo w běhu tydźenja
Budyšin. Z dalšej zwěsćenej infekciju dowoloweho nawrótnika je wčera ličba nowych koronapadow w Budyskim wokrjesu w běhu minjenych sydom dnjow na pjeć rozrostła. 23 ludźi je w karantenje. W Zhorjelskim wokrjesu bě wčera 55 postajenych karantenow. Nowe natyknjenja tamniši strowotniski zarjad wozjewił njeje.
Filmowy festiwal digitalnje
Choćebuz. Składnostnje lětušeho 30. jubilejneho wudaća wobdari Choćebuski filmowy festiwal sebje samoho kaž tež cyłu republiku. Podawk, na kotrymž steji wuchodoeuropski film w srjedźišću, budźe dualny a rosće do digitalneho. Filmy móžeš sej w festiwalnym tydźenju wot 3. do 8. nowembra w Choćebuzu, Eisenhüttenstadće, Berlinje, Zhorjelcu, Zgorzelecu a Zielonej Górje w kinje wobhladać, abo digitalnje we wobłuku online- poskitka.
Rozsuda dla přesłapjeny
Krótkopowěsće (27.08.20)
Wědomostne naprašowanje
Budyšin. Za wuhódnoćenje koronapandemije w Budyskim wokrjesu startuje tudyši krajnoradny zarjad tele dny wědomostne naprašowanje. Hromadźe z Drježdźanskej techniskej uniwersitu wuwity naprašnik pósćele strowotniski zarjad nimale tysac wobydlerjam, kotřiž běchu na koronu schorjeni abo stejachu jako kontaktna wosoba pod karantenu.
Towaršnostne mocy zapřijeć
Podstupim/Choćebuz. Krajny sejm Braniborskeje je wčera z wulkej wjetšinu wobzamknył, ciwilnu towaršnosć lěpje na strukturnej změnje we łužiskim brunicowym rewěrje wobdźěleć. Choćebuska wobswětowa skupina Zeleneje ligi pomina, zo měli w přiradźe, kotruž chcedźa nětko wutworić, cyrkwje, dźěłarnistwa, wobswětowe zwjazki, serbska mjeńšina, iniciatiwy nawrótnikow a zwjazkarstwo Wobydlerski region Łužica zastupjene być.
Statuwu guruwa wotstronja
Krótkopowěsće (26.08.20)
Poziciju Łužicy skrućić
Podstupim/Choćebuz. Zo bychu Łužicu při skónčenju wudobywanja brunicy podpěrali, měli najprjedy projekty zahajić, kotrež skrućeja poziciju regiona we wubědźowanju. K tomu słuša zasydlenje a wuwiće předewzaćow runje tak kaž natwar a wutwar wědomostnych a slědźerskich zarjadnišćow. Ministerski prezident Dietmar Woidke (SPD) je wo tym dźensa w tamnišim krajnym sejmje knježerstwowe wozjewjenje podał.
Dwě nowej infekciji
Budyšin. Ličba wobkrućenych infekcijow z koronawirusom je so wčera w Budyskim wokrjesu wo dwě na tuchwilu šěsć zwyšiła. Kaž strowotniski zarjad zdźěli, jedna so wo kontaktnej wosobje póndźelnišeju padow. W karantenje je tu 45 ludźi (+ 8). W Zhorjelskim wokrjesu płaći dalša wosoba jako wuhojena. 144 karantenow je postajenych.
Po přestawce so schadźowali
Krótkopowěsće (25.08.20)
Dalše koronapady
Budyšin/Zhorjelc. Budyski strowotniski zarjad je wčera dwě nowoinfekciji z koronawirusom zwěsćił. Schorjenaj staj so z jězby nawróćiłoj. Tež w Zhorjelskim wokrjesu stej so dwě wosobje na jězbje inficěrowałoj, štož su sobotu zwěsćili. Ličba dotal z wirusom natyknjenych přiběra tak w Budyskim na 509, w Zhorjelskim wokrjesu na 344.
Rozmołwa ze Serbskim sejmom
Budyšin. Dołho wočakowana rozmołwa Domowiny ze Serbskim sejmom budźe 31. awgusta w Budyskim Serbskim domje, kaž Domowina wčera informowaše. Zetkanje změje charakter dźěłoweje rozmołwy z dźesać wobdźělnikami z kóždeje strony. W tutym zwisku widźi so serbski třěšny zwjazk „w historisce zrosćenej winowatosći, tež nutřkownoserbske diskursy a debaty moderěrować“.
Wopušćitej towaršnosć
Krótkopowěsće (24.08.20)
Financne zamóženstwo rostło
Frankfurt nad Mohanom. Financne zamóženje priwatnych domjacnosćow w Němskej je po woteběranju korony dla po nětko předležacej analyzy hižo zaso rekordny niwow docpěło. Bursa je so wočerstwiła a mnozy ludźo dale wjele pjenjez nałoža. Tuž wuchadźa banka ING Němska z toho, zo je financne zamóženje domjacnosćow kónc junija w sumje na 6,55 bilionow eurow rozrostło.
Funda za CDU nastupi
Slepo. Jörg Funda nastupi za CDU k wólbam wjesnjanosty Slepjanskeje gmejny 1. nowembra. Kaž Zhorjelski wokrjesny zwjazk strony zdźěli, su čłonojo gmejnskeho zwjazka CDU Slepjanska wosada Fundu hižo minjenu wutoru nominowali. Po wotstupje dotalneho wjesnjanosty Reinharda Borka nawjeduje Jörg Funda wot 1. awgusta tamniše zarjadniske zjednoćenstwo nachwilnje.
Matury bjez censurow?
Krótkopowěsće (21.08.20)
Podpěruja tež małe kina
Drježdźany. Sakska statna kenclija spěchuje přichodnje małe kina w Sakskej, kotrež Zwjazk ze swojim nowym programom njepodpěruje. Tak móhli tež wone korony dla trěbne naprawy zwoprawdźić, kaž šef statneje kenclije a minister za medije Oliver Schenk (CDU) rjekny. Kino, kotrež ma na přikład jenož kónc tydźenja wotewrjene, móže tak hač do 50 000 eurow za inwesticije nastupajo koronaškit dóstać.
Póst inwestuje w Kumwałdźe
Kumwałd. Němski póst swoju rozdźělowansku syć w Sakskej tež přiběraceho online-wikowanja dla rozšěri. W Kumwałdźe su wčera ze symboliskim prěnim zarywom twar noweho roznošowanskeho zepěranišća zahajili. Na nowym logistiskim stejnišću chcedźa klětu kónc januara dźěłać započeć. 38 sobudźěłaćerjow přećehnje potom z dotalneho přemałeho twarjenja do noweho centruma.
Młodym Běłorusam pomhać
Krótkopowěsće (20.08.20)
Pücklerowy park dale spěchuja
Mužakow. Wopytawši Mužakowski park wjercha Pücklera chcyše kulturna statna ministerka Monika Grütters (CDU) dźensa dojednanje wo dalšim spěchowanju swětoweho namrěwstwa UNESCO ze sakskim ministerskim prezidentom Michaelom Kretschmerom (CDU) podpisać. Dotalne zrěčenje kónc lěta wuběži. Dale chcyštaj so dojednać wo nowotwarje Informaciskeho a kubłanskeho centruma Mužakowskeho zahorka.
Znješkódnja bombu w Grodku
Grodk. 50kilogramowu bombu z Druheje swětoweje wójny je słužba za wotstronjenje wojerskich srědkow dźensa wot 10 hodź. w Grodkowskim měšćanskim dźělu Dubrawa započała znješkódnić. Wuslědk njebě hač do redakciskeho kónca za tute wudaće znaty. Kaž měšćanske zarjadnistwo informuje, měješe 1 400 ludźi swoje bydlenje wopušćić, mjez nimi 98 wobydlerjow jedneje hladarnje.
Wjace hač 600 přeńdźenjow
Krótkopowěsće (19.08.20)
Čarje přepołoženej
Budyšin. Sprjewiny kolesowarski puć a ruta Serbske impresije stej we wobłuku Delnjohórčanskich hatow přepołoženej. Kaž Budyski krajnoradny zarjad zdźěli, je dwulětneje twarskeje naprawy dla wotrězk po hatach zawrjeny. Wobě čarje wjedźetej nětko wot Budyskeho spjateho jězora přez Chwaćicy, Wulku Dubrawu, Zdźěr a Klukš do Brězyny. Rozmysluja samo wo trajnym přepołoženju.
Sakska kritizuje namjet
Drježdźany. Namjet zwjazkoweho sejma, zakoń wo stasijowych aktach změnić, je sakska justicna ministerka Katja Meier (Zwjazk 90/Zeleni) kritizowała. Wotpohlad je, stasijowe akty w kóždym wuchodoněmskim kraju w jednym archiwje centralizować. Njejasny je přichod wotnožkow bjez archiwa w Kamjenicy a Drježdźanach. Meier žada sej, sakske stejnišća wobchować.
Rudne horiny kopate połne
Krótkopowěsće (18.08.20)
Sakska swjeći 30. róčnicu
Aue-Bad Schlema/Drježdźany. Ze stadionowym koncertom w Aue woswjeći Swobodny stat Sakska swoje nowozałoženje a jednotu Němskeje před 30 lětami. Kaž statna kenclija wčera zdźěli, wustupitej Sakska statna kapała Drježdźany a Krajny hórski hudźbny korps Sakskeje 5. septembra zhromadnje w Rudnohórskim stadionje Aue-Bad Schlema. Nadrobnosće chcedźa jutře wozjewić.
Staroměšćanski festiwal wupadnje
Budyšin. Wot 30. awgusta do 1. septembra planowany staroměšćanski festiwal je Budyske turistiske towarstwo nětko wotprajiło. Předsydstwo towarstwa ma rizika hladajo na koronapandemiju za přewulke. Předwidźany bě po lońšej premjerje festiwala „Woda, wuměłstwo, swětło“ znowa wobšěrny serbski program.
Nowa rektorka uniwersity
