Krótkopowěsće (12.10.20)
Korona chětro přiběrała
Budyšin. Wo nahladnym postupje zwěsćenych koronainfekcijow je Budyski krajnoradny zarjad minjeny pjatk rozprawjał. Po 20 pozitiwnych testach rozrosće cyłkowna ličba potrjechenych na 698. Přez kónc tydźenja bě dalšich pjeć natyknjenjow, dohromady 703, kaž Roberta Kochowy institut dźensa zdźěli. W Budyskim wokrjesu bě pjatk 118 na koronawirus schorjenych (+20).
Do dźěłowych skupin wuzwoleni
Budyšin. Prěni raz online přewjedźena hłowna zhromadźizna Młodźiny europskich narodnych mjeńšin je sobotu štyrjoch čłonow towarstwa Pawk do dźěłowych skupin organizacije wuzwoliła. Su to Chrystof Grofa a Rejzka Lipičec w dźěłowej skupinje mjeńšinowe prawa a politika kaž tež Syman Sćapan a Jakub Wowčer w skupinje komunikacija.
Lěkuja zranjenych Běłorusow
Krótkopowěsće (09.10.20)
Za myto nominowanaj
Drježdźany. Slepjanski gmejnski radźićel a Rownjanski wjesny předstejićel Matthias Jainsch kaž tež Wojerowska młodźinska měšćanska rada staj mjez nominowanymi kategorije „Zhromadnje skrućić – kraj wuhotować“ za lětuše Sakske wobydlerske myto. Spožčić chcedźa myto mjeztym dźesaty raz w cyłkownje pjeć kategorijach 14. oktobra w Drježdźanskej cyrkwi Našeje knjenje.
Nobelowe myto Louisy Glück
Stockholm. Ameriska basnica, esejistka a mjez druhim hižo z Mytom Pulitzera počesćena Louise Glück je lawreatka lětušeho Nobeloweho myta za literaturu. Šwedska akademija wuznamjeni lyrikarku za jeje „njezaměnjomny poetiski hłós. Wona spřistupnja indiwidualnu eksistencu jako uniwersalne dožiwjenje“, jury rozsud wčera wopodstatni.
„Mały Tibet“ blisko Łužicy
Krótkopowěsće (08.10.20)
Znowa smjertny pad korony dla
Budyšin. Koronapandemija je sej w Budyskim wokrjesu dalši wopor žadała, dohromady je jich 23. Potrjechenu 69lětnu žonu běchu do toho w chorowni lěkowali, krajnoradny zarjad wčera zdźěli. Stacionarnje nětko dweju hladaja. Ličba natyknjenych je wo dźewjeć na 663 rozrostła. Schorjenych bě wčera 83 (+8), 557 ludźi je so mjeztym wustrowiło.
Nobelowe myto žonomaj
Stockholm. Lawreatce lětušeho Nobeloweho myta za chemiju stej w Berlinje skutkowaca Francozowka Emmanuelle Charpentier a Američanka Jennifer Doudna. Wonej stej tak mjenowane genowe nožicy wuwiłoj, z kotrymiž móža namrěte kajkosće zaměrnje změnić. Procedura je rewolucija we wědomosći molekularneho žiwjenja, informowaše Kralowska-šwedska akademija wědomosćow wčera w Stockholmje.
Po přestawce nowy powěstnik
Krótkopowěsće (07.10.20)
Wučerka so natyknyła
Ralbicy/Budyšin. Serbska zakładna šula Ralbicy je wot korony potrjechena, kaž Budyski krajnoradny zarjad wčera wozjewi. Infekciju su pola wučerki zwěsćili, jednu rjadownju 4. lětnika pósłachu do karanteny, dalše kontakty tuchwilu přepruwuja. Wčera bě w Budyskim wokrjesu 16 wobkrućenych nowonatyknjenjow z koronawirusom, cyłkownje 654. Schorjenych je 75 wosobow (+12).
Nobelowe myto Němcej
Stockholm. Nobelowe myto fyziki dóstanu lětsa hnydom třo, kotřiž su wo čornych dźěrach w swětnišću slědźili a kompaktny objekt w centrumje našeje galaksije wotkryli. Połojcu pjenježneho myta spožča Rogerej Penrose z Wulkeje Britaniskeje. Tamnu połojcu dźělitaj sej Andrea Ghez z USA a Reinhard Genzel z Mnichowa, zdźěli wčera akademija wědomosćow w Stockholmje.
Pilotojo a politika
Krótkopowěsće (06.10.20)
DGB: Žadyn socialny pasyk
Drježdźany. Přichodny etat Sakskeje nastupajo warnuje předsyda DGB Sakskeje Markus Schlimbach dźensa před socialnym pasykom (Kahlschlag) w swobodnym staće. „Runje w krizy dyrbiš do přichoda ludźi inwestować. Nětko w dźěłowičnej abo socialnej politice lutować je wopačny puć.“ Žadanje zwjazkow dźěłodawarjow, bóle lutować, Schlimbach wotpokazuje.
Nobelowe myto za medicinu
Stockholm. Lětuše Nobelowe myto za medicinu spožča biochemikarjej Michaelej Houghtonej (Wulka Britaniska) kaž tež wirologomaj Harveyjej J. Alterej a Charlesej M. Ricej (wobaj USA). To zdźěli wčera Karolinska-institut w Stockholmje. Mjenowani třo su wirus hepatitis-C wotkryli. Dźakowano jich slědźenjam je chorosć hepatitis C nětko lěkujomna.
Rigorozne naprawy korony dla
Krótkopowěsće (05.10.20)
Žana wučba hač do prózdnin
Budyšin. Po tym zo je Budyski wokrjes minjeny pjatk wo zwěsćenych 14 nowych infekcijach z koronawirusom informował, je ličba sobotu wo dalše dźewjeć na 638 rozrostła, kaž z aktualneho přehlada Roberta Kochoweho instituta wuchadźa. W Budyskej Curiejowej zakładnej šuli korony dla hač do nazymskich prózdnin tuž wučba wupadnje. Tež 11. lětnik Wojerowskeho powołanskošulskeho centruma dyrbi doma wostać.
Nowe postajenje płaćiwe
Podstupim. Nowe braniborske serbske postajenje wo narunanju kóštow wotnětka płaći. Wo tym je přisłušne ministerstwo za wědomosć, slědźenje a kulturu dźensa w Podstupimje informowało. Z njej susodny zwjazkowy kraj kulturu a rěčnu mnohotnosć we Łužicy skrući, zdobom pak wuswobodźi komuny z kóštow nastupajo nałožowanje serbšćiny. Serbska rada je postajenju přihłosowała.
97 próstwow dóšło
Krótkopowěsće (02.10.20)
Ličba natyknjenjow přiběra
Budyšin. W Budyskim wokrjesu zwěsćichu wčera sydom dalšich z koronawirusom natyknjenych wosobow. Dohromady je jich po wčerawšim stawje 615. Ličba schorjenych je wo pjeć na 43 přiběrała. W postajenej karantenje bě 162 wobydlerjow (+25). Srjedu su 25 testow přewjedli. Strašnosće koronapandemije dla wažne mnóstwo nowonatyknjenjow w minjenych sydom dnjach je 35 na cyłkowne wokrjesne wobydlerstwo.
Chcedźa Zahrodku wozrodźić
Wojerecy. W Delnim Wujězdźe planuja klětu składnostnje jeho 100. róčnicy wobstaća towarstwo Zahrodka wozrodźić. To potwjerdźi Sonja Hrjehorjowa, regionalna rěčnica Domowiny za teritorij župy „Handrij Zejler“, wčera na wuradźowanju regionalnych rěčnicow we Wojerecach. Tež z rěčnym kursom a wustajeńcu wo serbskich stawiznach chcedźa serbskosć we wsy zaso wožiwić.
Wobčušlenje wobmjezowane
Krótkopowěsće (01.10.20)
Třoch stacionarnje lěkuja
Budyšin. Z dalšimi pjeć zwěsćenymi padami je ličba z koronawirusom inficěrowanych w Budyskim wokrjesu wčera na 608 rozrostła. Schorjenych je 38 wosobow (+ 3), z kotrychž tři (+ 1) stacionarnje lěkuja. Nastupajo natyknjenu šulerku Budyskeho powołanskošulskeho centruma (BSZ) ze Zhorjelskeho wokrjesa kontaktne wosoby dale zwěsćeja, zdźěli krajnoradny zarjad. Strach, zo dyrbja BSZ zawrěć, tuchwilu njehrozy.
Filmy festiwala online hladać
Choćebuz. Wot 3. do 8. nowembra njewotměje so 30. Choćebuski filmowy festiwal jenož w kinach, ale tež online. Zajimcy móža so za 30 eurow z internetnym formularom akreditować, zo bychu sej nimale 200 filmow online wobhladać móhli, a to hač do 25. oktobra. Jednotliwe filmy su w Němskej bydlacym tež přez poskitk Pay-per-view bjez akreditacije přistupne.
Nowy staršiski list wušoł
Krótkopowěsće (30.09.20)
Polěpšenje na dźěłowych wikach
Budyšin. We wuchodnej Sakskej bě w septembrje 18 299 bjezdźěłnych, 496 mjenje (-2,6 procentow) hač w awgusće. Kaž Budyska agentura za dźěło dźensa zdźěli, přizjewichu předewzaća regiona tónle měsac zaso jasnje wjace dźěłowych městnow. Nimo toho su młodźi ludźo wukubłanje započeli a zawody dalšich dźěłopřijimarjow přistajili. Bjezdźěłnostna kwota wučinješe 6,6 proc.
Dźesać nowych infekcijow
Budyšin. Znowa wo dźesać je wčera ličba zwěsćenych koronainfekcijow w Budyskim wokrjesu rozrostła, cyłkownje su jich 603. Wčera bě 35 wosobow schorjenych, z kotrychž dwě dale w chorowni lěkuja. Předwčerawšim su 44 testow přewjedli. Zhorjelski wokrjes rozprawješe wčera wo štyrjoch nowonatyknjenych, cyłkownje 392. Třo su w Hamorje, jedyn w Zhorjelcu.
Z přistajenymi so dojednali
Krótkopowěsće (29.09.20)
Němski hrajny film dobył
Großhennersdorf. Hłowne myto 17. nysoweho filmoweho festiwala je němski hrajny film „Jiyan“ (žiwjenje) režiserki Süheyle Schwenk dobył. Z 10 000 eurami dotěrowane wuznamjenjenje je sakske ministerstwo za kulturu a turizm spěchowało. Drama wo dwěmaj ćěkancomaj w Berlinje přeswědča z „originelnymi, sugestiwnymi, zmužitymi a cineastiskimi srědkami bjez kompromisa. Film će hišće dołho po kóncu zaběra“, rěkaše ze stron jury.
Studentow witaja w dźiwadle
Budyšin. W Němsko-Serbskim ludowym dźiwadle chcedźa lětsa swjatočnje 150 nowych studentow Budyskeje studijneje akademije witać. Za to maja so naprawy škita a hygieny dodźeržeć, akademija wčera zdźěli. Za hospodarski a techniski wobłuk je ličba studowacych někak jenaka. Moderne labory stejnišća skića jim najlěpše wuknjenske wuměnjenja.
Zjawny transport podróša
