Festiwal pod nowej režiju

Chrósćicy. Běrtlk lěta po mjezynarodnym folklornym festiwalu je přizwolenje srědkow ze załožby dóšło – tak zwěsćichu wčera wurunanu financielnu bilancu. Marko Kowar, lětdźesatki dołho předsyda přihotowanskeho wuběrka, złoži „politiskeje hygieny w Serbach dla“ funkciju, wšako je mjeztym předsyda załožboweje rady. Naslědnistwo budu po změnje strukturow gremija rjadować.

Na A 4 wokołopuć přez Wóspork

Budyšin. Krótkodobnje je Awtodróhowa towaršnosć Zwjazka wčera nawječor wo zawrjenju wujězda Budyšin-wuchod na A 4 do směra na Zhorjelc hač do pjatka informowała. Dokelž w Budyskej wokolinje žane tafle na to njeskedźbnjachu, dyrbješe dźensa rano tójšto šoferow po awtodróze wokołopuć přez Wóspork na so wzać, zo bychu swój cil docpěli.

Přezmjezne plany za železnicy

Wjesny młodźinski klub Sernjany přeprosy zańdźenu sobotu wot dopołdnja lubowarjow sušeneje ryby a rybičkoweje całty k wjesnemu hatej při „Paradizu“. Po sylnym dopołdnišim dešću so wot připołdnja słónčko směješe a dobra nalada knježeše wosebje mjez młodymi wopytowarjemi, kotřiž so ze zajimom wulkim karpam wěnowachu. Tute běše młodźinski klub na skazanku z Němskich Pazlic do Sernjan přiwjezł, zo by je čerstwje zarězane poskićił. Popołdnjo wuklinča při rjanej rozmołwje ze słódnej praženej kołbasku abo steakom. Foto: Anja Nowakowa

Budyšin. Po přestawce korony dla přeprošuje stawizniska sekcija Maćicy Serbskeje zaso na swoje zjawne přednoški. Na žurli Budyskeho Serbskeho domu porěči štwórtk, 19. oktobra, w 19 hodź. Jan Malink na temu: „Hadam Bohuchwał Šěrach – pčołar, wučbnicar, stawiznar a farar.“ Lětsa spomina so na 250. posmjertniny Hadama Bohuchwała Šěracha, 2024 na jeho 300. narodny dźeń. Jako pčołar doby sej ze swojimi wotkryćemi europsku sławu. Tola tež na serbskim cyrkwinskim a kulturnym polu běše nimoměry aktiwny. Přednošk budźe w serbskej rěči.

W Barće nastanje hač do 2026 nowa wyša šula za 300 šulerjow

Bart (CS/SN). Symboliski prěni zaryw za nowu wyšu šulu bě wčera w Barće. Z něhdyšeje Bartskeje zakładneje šule ma hač do februara 2026 dwučarowa wyša šula za 300 šulerkow a šulerjow nastać. Za to dotalny šulski kompleks přetwarja a saněruja a nimo toho dwě nowej twarjeni natwarja. W nimaj zaměstnja fachowe kabinety, zarjadnistwo, jědźernju a kuchnju. Foyer ma jako zwisk mjez starym a nowym dźělom fungować.

Projekt płaći dohromady 18,9 milionow eurow. Z toho je 9,9 milionow eurow spěchowanskich srědkow z programa za šulsku infrastrukturu. Z tym, zo je Malešanska gmejna trěbnu ležownosć přewostajiła je wona projekt hakle zmóžniła. Hižo hotowa je nowa sportownja, kotruž wot februara 2023 wužiwaja. Po zakónčenju wšitkich dźěłow ma so wona harmonisce do cyłkowneho kompleksa zarjadować a wšěm šulerjam krótke puće zmóžnjeć.