Město Choćebuz je wot minjeneje srjedy jedne z třoch wulkich srjedźišćow za přichad, rozdźělenje a dalejězbu z Ukrainy ćeknjenych ludźi. Tón dźeń su hnydom tři ća­hi Němskeje železnicy na hłownym dwórnišću dojěli. Tam jich dobrowólni pomoc­nicy zastarachu. Na to jědźechu Ukrainjenjo z busami dale do wšelakich směrow­. Přichodnje liča wšědnje z něhdźe 3 600 ćěkancami. Dotal su tři miliony ludźi­ Ukrainu ruskeho wojerskeho nadpada dla wopušćili. Něhdźe 230 000 ludźi je do­ Němskeje ćeknyło. Foto: Michael Helbig

Minjeny kónc tydźenja je lisćinu kandidatow za wólby Budyskeho krajneho rady nastupajo dalšej rozsudaj přinjesł. Štyrjo mužojo so wo tele zastojnstwo požadaja. Žonu etablěrowane strony bohužel našli njejsu. Hdyž dźensa hišće njewěmy, komuž wolerki a wolerjo nawod wokrjesneho zarjadnistwa w přichodźe dowěrjeja, je jedne wěste: to budźe muž. Wuchadźeš-li z konstelacije w Budyskim wokrjesnym sejmiku, zwěsćiš, zo třo wot politiskich stron nominowani kandidaća tamnišim poměram wotpowěduja. Najsylnišej we wokrjesnym sejmiku zastupjenej stronje CDU a AfD so ze swójskimaj wosobomaj dowěry wo zastojnstwo prócujetej. Móžne rozsudne wólby mjez woběmaj no­chcył sej předstajić, dokelž wuslědk z toho lědma polěpšenje wobškodźeneho wokrjesneho imagea lubi. Tuž móhł so kandi­dat-jednotliwc jako wulke překwapjenje a zdobom nadźiju wopokazać. Ličba ludźi, kotřiž stronjana za krajneho radu měć nochcedźa, dale přiběra. Axel Arlt

Hodźij (SN). Strona Alternatiwa za Němsku (AfD) je swojeho kandidata za wólby krajneho rady Budyskeho wokrjesa dnja 12. junija nominowała. Na wokrjesnym stronskim zjězdźe sobotu w Hodźiju su so­bustawojo tudyšeho wokrjesneho zwjazka AfD Franka Peschela wuzwolili. Za njeho hłosowaše 52 přitomnych, přećiwo njemu šěsć. Peschel je nakładnik a zapósłanc Sakskeho krajneho sejma. Kaž sam praji, je Budyski wokrjes wot lěta 2017 „módry wólbny wokrjes. To ma so nětko tež na runinje krajneho rady stać. Chcu našim wobydlerjam, njewotwisnje wot kóždeježkuli stronskeje přisłušnosće, byrgarsko-konserwatiwnu wólbnu alternatiwu skićić“, kaž strona kónc tydźenja informowaše. Požadar chce jako krajny rada „hospodarske ramikowe wuměnjenja w Budyskim wo­krjesu polěpšić, zarjadniski aparat redukować a, hdyž móžno, statne wudawki masiwnje pomjeńšić.“ Kandidat dale wo tym rěči, „wobydlerjam pomhać, kotřiž sylnje stupacych płaćiznow za milinu, płun a ćěriwo swoje zežiwjenje lědma hišće­ zapłaćić móža“.

Incidenca dale přiběra

Budyšin/Zhorjelc. Z hódnotu 1926,4 je incidenca w Budyskim wokrjesu přez kónc tydźenja dale přiběrała. Dohromady zwěsći RKI tu 183 nowych natyknjenjow z koronawirusom. Tež w Zhorjelskim wokrjesu je tendenca dale stupaca. Tu zapoda RKI dźensa incidencu 1 590,8. 121 ludźi je so z wirusom inficěrowało. Ani w Budyskim ani w Zhorjelskim wo­krjesu po RKI nowe smjertne pady w zwi­sku z pandemiju registrowali njejsu.

Blokaj pozdźišo wotpinyć

Podstupim/Janšojce. Braniborske krajne knježerstwo chce doskónčne wotpinjenje dweju blokow Janšojskeje milinarnje přestorčić, zo by energijowu wotwisnosć wot Ruskeje pomjeńšiło. Hospodarski minister Jörg Steinbach (SPD) je zwjazkowemu hospodarskemu ministrej Robertej Habeckej (Zeleni) w lisće namjetował, tak mjenowanu wěstotnu zwólniwosć dweju blokow milinarnje podlěšić.

Čěscy wojacy do Słowakskeje