Wosebity pilotowy projekt zahajitej 1. apryla Wojerowska wobchadna towaršnosć a Wobchadny zwjazk hornje Łobjo. Tón budźe předewšěm na dobro wobydlerjow z wjesnych dźělow města.
Wojerecy (AK/SN). Za zjawny busowy bliskowobchad chce město Wojerecy wjace sobujěducych zdobyć. To je zaměr pilotoweho projekta „dnjowy lisćik za 3,50 eurow“, kotryž přichodny pjatk, 1. apryla, zahaja. Iniciator je Wojerowska wobchadna towaršnosć (VGH). Wuchadźišćo běchu nazhonjenja města Stuttgarta z dnjowym lisćikom. Nětko chce wobchadny zwjazk Hornje Łobjo (VVO) přijomny tiket za bliskowobchad w přichodnymaj lětomaj testować. „Jednotliwa jězba z měšćanskim busom płaći normalnje 2,50 eurow. Nowa jězdźenka za 3,50 eurow so hižo zadani, hdyž samsny dźeń wróćo jědźeš, wosebje pak wot třećeje jězby samsny dźeń“, wuzběhny jednaćel VGH Stefan Löwe. Powabliwy je nowy poskitk předewšěm za wobydlerjow wjesnych dźělow města a za tych, kotřiž tak a tak wjacore razy wob dźeń z busom sobu jězdźa. VGH poskića w měsće pjeć busowych čarow a zasadźa tam 18 busow, kotrež wob lěto dohromady něhdźe 500 000 kilometrow jědu.
Hodźij (SN). Strona Alternatiwa za Němsku (AfD) je swojeho kandidata za wólby krajneho rady Budyskeho wokrjesa dnja 12. junija nominowała. Na wokrjesnym stronskim zjězdźe sobotu w Hodźiju su sobustawojo tudyšeho wokrjesneho zwjazka AfD Franka Peschela wuzwolili. Za njeho hłosowaše 52 přitomnych, přećiwo njemu šěsć. Peschel je nakładnik a zapósłanc Sakskeho krajneho sejma. Kaž sam praji, je Budyski wokrjes wot lěta 2017 „módry wólbny wokrjes. To ma so nětko tež na runinje krajneho rady stać. Chcu našim wobydlerjam, njewotwisnje wot kóždeježkuli stronskeje přisłušnosće, byrgarsko-konserwatiwnu wólbnu alternatiwu skićić“, kaž strona kónc tydźenja informowaše. Požadar chce jako krajny rada „hospodarske ramikowe wuměnjenja w Budyskim wokrjesu polěpšić, zarjadniski aparat redukować a, hdyž móžno, statne wudawki masiwnje pomjeńšić.“ Kandidat dale wo tym rěči, „wobydlerjam pomhać, kotřiž sylnje stupacych płaćiznow za milinu, płun a ćěriwo swoje zežiwjenje lědma hišće zapłaćić móža“.
Incidenca dale přiběra
Budyšin/Zhorjelc. Z hódnotu 1926,4 je incidenca w Budyskim wokrjesu přez kónc tydźenja dale přiběrała. Dohromady zwěsći RKI tu 183 nowych natyknjenjow z koronawirusom. Tež w Zhorjelskim wokrjesu je tendenca dale stupaca. Tu zapoda RKI dźensa incidencu 1 590,8. 121 ludźi je so z wirusom inficěrowało. Ani w Budyskim ani w Zhorjelskim wokrjesu po RKI nowe smjertne pady w zwisku z pandemiju registrowali njejsu.
Blokaj pozdźišo wotpinyć
Podstupim/Janšojce. Braniborske krajne knježerstwo chce doskónčne wotpinjenje dweju blokow Janšojskeje milinarnje přestorčić, zo by energijowu wotwisnosć wot Ruskeje pomjeńšiło. Hospodarski minister Jörg Steinbach (SPD) je zwjazkowemu hospodarskemu ministrej Robertej Habeckej (Zeleni) w lisće namjetował, tak mjenowanu wěstotnu zwólniwosć dweju blokow milinarnje podlěšić.
Čěscy wojacy do Słowakskeje
Rakecy (JK/SN). Hnydom na spočatku minjeneho posedźenja Rakečanskeje gmejnskeje rady, we wobłuku wobydlerskich naprašowanjow, přizjewi so tež radźićel Jörg Jevlasch ze Stróže. Na njeho běchu so starosćiwi wobydlerjo wobroćili, a to planowaneho škričkowanskeho sćežora dla. Tón chcedźa pječa stajić njedaloko železniskeho přechoda do směra na Šćeńcu. Jevlasch chcyše wot wjesnjanosty Swena Nowotneho (CDU) jasne wuprajenje k naležnosći měć, zo by wobydlerjam wotpowědne strachi a wobmyslenja wzał.
Šunow. Přichodny škotowy turněr serbskich seniorow wotměje so wutoru, 29. měrca, w 14 hodź. w Šunowskej Fabrikskej hospodźe. Kaž organizator Měrćin Nowak zdźěli, su nowačkojo stajnje witani. Dalši turněr budźe 26. apryla w hosćencu w Kozarcach.
Wuhotuja 11. schadźowanku
Chrósćicy. Rěčny centrum WITAJ a župa „Michał Hórnik“ přeprošatej na 11. swójbnu schadźowanku njedźelu, 3. apryla, w 15 hodź. do Chróšćanskeje „Jednoty“. Pisany program zahaja mali rejwarjo skupiny Łužičanka a šulerska hudźbna skupina Šwintuchi. Přizamknu so dźěłarnički a zaběry za najmłódšich, mjez druhim z paslenjom a kamishibai-dźiwadłom. Za trochu staršich budźetej krosnowanje a dźěćaca wohnjowa wobora přihotowanej. Dale předstajitaj so Serbski muzej z poskitkom a Ludowe nakładnistwo Domowina z najnowšimi wudaćemi za dźěći. Starši móža so z fachowcami wo rěčnych kursach a rěčnym kubłanju rozmołwjeć kaž tež při kofeju a tykancu bjesadować.
Młodostny so ćežko zranił
Halštrow. 81lětna wodźerka Mercedesa chcyše předwčerawšim w Halštrowje z hłowneje dróhi nalěwo wotbočić. Njewobkedźbowaše pak, zo jej mopedist napřećo přijědźe, a zrazy do njeho. 15lětny wodźer mopeda so při tym ćežko zrani. Jeho dyrbjachu do chorownje dowjezć.