Při Serbskej studni lód lizać
Nadźijeja so lěpšich časow
Tak kaž wšudźe druhdźe je koronowa pandemija tež na Trjebinskim Šusterec statoku normalne žiwjenje znjemóžniła. Přiwšěm su spytali, to najlěpše ze situacije wuzbytkować.
Trjebin (JoS/SN). Bilancu lěta 2021 Šusterec statoka w Trjebinje je tele dny tamniša Domowinska skupina sćahnyła a při tej składnosći hižo raz na přichodne měsacy pohladnyła. „Je zlě, zo je korona dźěło našeje skupiny hižo druhe lěto za sobu sylnje poćežowała“, zjima předsydka Angelika Balccyna. „Hakle loni w lěću je so połoženje trochu normalizowało.“ Přiwšěm su trěbne dźěła w mjeńšich skupinach wukonjeli, tak na přikład bydlenski dom kaž tež bróžnju rjedźili a hladali. „Na našim polu smy mały wobłuk za jahody a zela wutworili. Stare ratarske graty a mašiny su čłonojo skupiny sporjedźeli. Tež płót su wobarbili“, Angelika Balccyna rozłoži.
Póndźelu započnu točić
Přepytowanja za móžny projekt strukturneje změny oficialnje zahajili
Konjecy (SN/MWj). Wobydlerjow delanskich wsow drje poćehnje přichodne tydźenje zawěsće hdys a hdys na kromu Konjec. Tam zahaja póndźelu točenja hač do hłubokosće 250 metrow. Z nimi chcedźa wuslědźić, hač hodźi so kónčina mjez Kamjencom a Budyšinom za twar Němskeho centruma za astrofyziku. Tón móhł jako třiróžk z dołhosću stajnje dźesać kilometrow něhdźe 200 metrow pod zemju nastać. Je to jedyn z planowanych wulkich slědźerskich projektow we wobłuku strukturneje změny.
Do přichoda hladane
Za Ukrainu darować
Budyšin (SN/CoR). Bywši wjelelětny nawoda Smochčanskeho Domu swj. Bena a předsyda towarstwa Ekumeniski tachantski wobchod Budyšin dr. Peter-Paul Straube hladajo na rusku wójnu w Ukrainje namołwja, za Ukrainu darować. Mnohe lěta pomhaja hižo w kooperaciji ze socialnej załožbu „St. Wolodymyr Fonds“ ukrainsko-katolskeje cyrkwje we Lwowje socialnje słabym, dźěćom, jatym a dźeń a bóle wot wójny potrjechenym a ćěkancam z wuchodneje Ukrainy. Štóž chce załožbu podpěrać, móže to z pjenježnym darom na towarstwowe konto Ekumeniskeho tachantskeho wobchoda DE33 8509 0000 5626 2110 05 při Ludowej bance Drježdźany-Budyšin, zaměr St. Wolodymyr Fonds Lviv/Lemberg. Darjenske wopisma budu wupisane. Pjenjezy na konto załožby w Pólskej dale posrědkuja.
„Rano sym z Drježdźanskim ukrainsko-katolskim fararjom telefonował, kiž je so dźens z Ukrainy nawróćił. Połoženje na mjezy je katastrofalne. Sym zrudny a nadźijam so, zo mnozy Ukrainjanam pomhaja“, rjekny Straube SN. Dźens wječor přeprošeja w Budyskej tachantskej cyrkwi na ekumeniske modlenje za měr.
Krótkopowěsće (25.02.22)
Chcedźa nuzowy stop
Choćebuz. Ze spěšnej próstwu Choćebuskemu zarjadniskemu sudnistwu chcetej Němska wobswětowa pomoc a Zelena liga nuzowy stop wudobywanja brunicy w Janšojskej wuhlowej jamje docpěć. Tomu so energijowy koncern LEAG spřećiwja. Kaž dźensa wottam rěka, by hnydomny kónc wudobywanja fatalne sćěhi na pohórnistwowu krajinu, předewšěm na dnownu wodu, měł.
Nowe hódnoćenje trěbne
Berlin. Po tym zo je na wuchodźe Europy wójna wudyriła, chce Lěwica wo swojim wotpokazanju hospodarskich sankcijow ze stron Europskeje unije rozmyslować. Frakciski šef strony w zwjazkowym sejmje Dietmar Bartsch je powěsćerni dpa mjez druhim prajił: „Tónle historiski zarěz nuzuje nas k nowemu hódnoćenju.“ Hišće minjeny tydźeń bě strona wo zrozumjenje za ruske zajimy wabiła.
Incidenca wostała
„Franc wšak to zdokonja“
Lětsa 12. junija wola w mnohich gmejnach Budyskeho wokrjesa wjesnjanostu abo wjesnjanostku. Budźe to za mnohich z prěnich muži gmejnow napjaty a wosebity dźeń. Jedyn z nich drje budźe so tež za wólby w swojej gmejnje zajimować, ale njebudźe hižo tak wočakliwy kaž při dotalnych. Skerje změje wšu přičinu, so na přichodny, zasłuženy wuměnk wjeselić.
Franc Brusk je drje tón wjesnjanosta, nic jenož w Budyskim wokrjesu, z najdlěšej hamtskej dobu. Nimale poł lětstotka je wón na čole Worklečanskeje gmejny stał a móže nětko na jara wobšěrnu a dobru bilancu zhladować. Jako zamołwity muž za komunu a tak za jeje wobydlerjow je dožiwił najwšelakoriše časy a wuměnjenja, w politiskim kaž hospodarskim, ale tež komunalnym wobłuku.
Stare cyhele za nowe špundowanje
Po nanuzowanej přestawce prěni raz pjerjo drěli
Rowno (JoS/SN). Wjeselo so minjenu póndźelu a předwčerawšim žonam z mjezwoča směješe, zo je z pjerjodrěćom zaso zwučena towaršliwosć na Rownjanskim Njepilic statoku zaćahnyła. Před dobrymaj lětomaj bě pjerjodrěće poslednje zarjadowanje wobmjezowanjow korony dla. Tehdy nichtó njewědźeše, kak so wšitko wuwije. Nětko su swój slěd po-dawkow w běhu lěta móhłrjec zaso wožiwili. Nadźija, zo njebudźe to znowa poslednje zarjadowanje, je hladajo na připowědźenja z politiki woprawnjene.
Wjace hač 25 žonow bě na pjerjodrěće přišło, nic jeno z Rownoho, ale tež z tamnych wsow Slepjanskeje wosady. Někotre běchu so serbsku dźěłansku drastu woblekli. Zo bě jich dohromady telko wobdźělnicow, drje zaležeše sobu na tym, zo mějachu sej po tak dołhim času wjele wjesnych nowosćow powědać. Najstarša bě 90lětna Ema Kralowa. Tež wulki dźěl tamnych žonow so hižo tójšto lět na pjerjodrěću wobdźěla. Dokelž loni žane pjerjo drěli njeběchu, mějachu nětko ćim wjace na blidźe ležo.
Policija (24.02.22)
Na dobyću dwělowała
Wojerecy. Prawje jednała je předwčerawšim žona we Wojerecach, jako ju njeznaći zazwonichu a jej wulke dobyće připowědźichu. Po zdaću bě 64lětna dohromady 38 500 eurow při někajkim wupisanju myta dobyła. Pjenjezy chcyštej jej pječa wěstotna firma a notarka přepodać. Za pjenježny transport pak měješe Wojerowčanka tak mjenowane google-play-karty w hódnoće 1 000 eurow wobstarać a při wupłaćenju dobyteje sumy transporterej přepodać. To zbudźi wulke dwěle pozdatneje dobyćerki, na čož je policiju informowała.
