Wóspork (UM/SN). Móst nad Lubatu (Löbauer Wasser) k delnjemu młynej we Wósporku dyrbi zawrjeny wostać. Krótkodobna reparatura, kaž běchu so na spočatku zawrjenja w meji 2021 nadźijeli, njedosaha, zo bychu móst zaso wužiwać móhli. Kaž Wósporske měšćanske zarjadnistwo informuje, je so twarski staw mosta jako přehubjeny wopokazał. Tak drje budźe nětko nowotwar trěbny.
„Hižo w lěće 2015 bě wotwidźeć, zo móst wjace předołho njedźerži. Wšitke drjewjane dźěle běchu hižo tehdy wot plěsniwca skóncowane“, rěka w nowinskej zdźělence wotrjada za porjad a wěstotu Wósporskeho měšćanskeho zarjadnistwa. Jako dołhodobne rozrisanje je jeničce spěchowana naprawa móžna. Wšako trochuja cyłkowne kóšty za nowy móst na něhdźe 250 000 eurow. Tohodla chcedźa so nětko wo pjenjezy z fondsa strukturneje změny prócować, „tež hdyž su powěsće wo strukturnym spěchowanju minjeny čas wšo druhe hač pozitiwne“.
Zawrjeny móst nad Lubatu je wobstatk pućowanskich šćežkow kołowokoło Wósporka kaž tež k Hrodźišćanskej skale.
Gmejna Hamor bě so změnu strukturow nastupajo wo pjenjezy za personalne městno prócowała. Z wida Swobodneho stata Sakskeje pak tajke městno trěbne njeje, nětko wottam rěkaše.
Hamor (CK/SN). Wot Zwjazka spěchowane personalne městno za poradźowanje a próstwy strukturnu změnu nastupajo gmejna Hamor njedóstanje. Wo tym informowaše wjesnjanosta Achim Junker (CDU) gmejnskich radźićelow na minjenym posedźenju. W aprylu 2021 bě gmejna próstwu za tajke městno z 90procentowskim spěchowanjom na tři lěta přez zwjazkowy program „Stark“ zapodała. Srjedź decembra dóstachu wot zwjazkoweho zarjada za hospodarstwo a wuwoznu kontrolu (BAFA) wotprajenje. „Přećiwo tomu zapodamy znapřećiwjenje“, Hamorski wjesnjanosta připowědźi.
Pančicy-Kukow (SN/MWj). „Lěto 2021 bě kaž za wšitkich druhich tež za gmejnu Pančicy-Kukow wšo druhe hač jednore.“ Takle zjima wjesnjanosta Markus Kreuz (CDU) wuwiće swojeje komuny w minjenych dwanaće měsacach. Jako wosebite wužadanje mjenuje wón dalši twarski wotrězk ponowjenja Šule Ćišinskeho. Tón měješe po spočatnych planach hižo w decembru hotowy być. Wyšich twarskich kóštow a pobrachowaceho materiala dla pak so dźěła dlija.
„Jeli wšitko derje poběhnje, budźemy snano jutry tak daloko, zo změjemy wšitko dočinjene“, wjesnjanosta Kreuz připowědźa. Ale što rěka dočinjene? Přiběracych pjenježnych wudawkow dla dyrbjachu hižo to abo tamne šmórnyć. Tak njemóžachu pinčne murje wusušić, a nowe hłowne zachodne durje dyrbja runje tak čakać kaž zapadne schodźišćo. Dalše wulke projekty loni běchu dokónčenje syće pitneje wody w Swinjarni, Kanecach a Jaworje, wotkryće noweje bydlenskeje štwórće při Srjedźnym puću w Pančicach-Kukowje a twar hłowneho puća w Kanecach.
Incidenca na snadnym niwowje
Budyšin/Zhorjelc. Incidency we wokrjesomaj Budyšin a Zhorjelc stagněrujetej na snadnym niwowje w němskim přerězku. Po Roberta Kochowym instituće wučinjatej hódnoće tu 199,3 resp. 189,6. Budyski krajnoradny zarjad informuje wo 146 nowych natyknjenjach z koronawirusom, 14 schorjenych je zemrěło. W Zhorjelskim wokrjesu zličichu 130 dalšich infekcijow a šěsć smjertnych padow.
Pokazaja ptačokwasny program
Budyšin. Serbski ludowy ansambl pokaza po přiměrjenju strowotniskich předpisow nětko tola wječorny ptačokwasny program „Njewěsta njewjesta“. SLA planuje inscenaciju dohromady trójce předstajić, a to 21., 22. a 23. januara w Chróšćanskej wjacezaměrowej hali „Jednota“. Wo wuměnjenjach za wopyt kaž tež móžnosćach, zastupne lisćiki sej kupić, chce SLA krótkodobnje informować.
Wotměja wuměłsku wuměnu
Droby (ES/SN). Chětro křiwy a samlutki steji kamjentny křiž při puću mjez Drobami a pućom wot Łomska do Minakała. Nichtó njewě, čehodla běchu jón něhdy stajili. A tak sta so křiž w běhu lětstotkow z pomnikom a wobstatkom krajiny.
Paduši w bydlenju byli
Budyšin. Do bydlenja na Budyskej Karla Marxowej běchu so njeznaći předwčerawšim w běhu dnja zadobyli. Skućićeljo přepytachu wšitke rumnosće a wočinichu kamory a pisanske blida. Pokradnyli su laptopaj a kameru. Hódnotu rubizny trochuje wobsedźer na 4 000 eurow. Wěcna škoda na bydlenskich durjach wučinja něhdźe 400 eurow.
Slepo (AK/SN). W procesu strukturneje změny chce gmejna Slepo wažne słowčko sobu rěčeć a swoje zajimy zastupować. To podšmórny wjesnjanosta Jörg Funda (CDU) na wčerawšim posedźenju tamnišeje gmejnskeje rady. W lisće wón noweho społnomócnjeneho zwjazkoweho knježerstwa za wuchodne zwjazkowe kraje Carstena Schneidera (SPD) přeproša, wot hórnistwa potrjechene regiony Łužicy wopytać a sej swójski wobraz wo połoženju na městnje tworić.
Wjelelětny bywši gmejnski radźićel Bernd Juskowiak we wobłuku wobydlerskich naprašowanjow napominaše łužiskich zapósłancow zwjazkoweho sejma sylnišo sobu zapřijeć, zo by Slepjanski region w procesu strukturneje změny słyšeć był. „Puć pohórškow dyrbi wotdeleka horje skutkować“, Juskowiak zwurazni. „Dyrbimy zmužići wostać.“
Budyšin (SN/MWj). Nimale dwaj měsacaj dyrbjachu lubowarjo kinowych předstajenjow na tónle wokomik čakać. Tehdy stupaceje incidencneje hódnoty dla je sakske statne knježerstwo srjedź nowembra tak mjenowany kulturny lockdown wobzamknyło. Nětko smě tež Budyske kino wot zajutřišeho, 14. januara, zaso wočinić, na čož so sobudźěłaćerjo z połnej paru přihotuja.
„Njemóžemy wšitke skomdźene filmy w Budyšinje nachwatać. Přiwšěm je naš angažowany team wotměnjawy program zestajił“, zdźěli nawoda Budyskeho kina Andreas Schneider. K wjerškam prěnjeho tydźenja słušeja nimo produkcijow „Spider-Man – No Way Home“ a „The King’s Man: The Beginning“ tež swójbne, kaž „Encanto“ a „Lauras Stern“. Dołho wočakowane pokročowanje rjadu „Matrix“ steji z „Matrix Resurrections“ tohorunja na hrajnym planje. „Sing 2“ drje startuje 20. januara. Tónle pask pak pokazaja w Budyskim kinje jako předpremjeru hižo njedźelu, 16. januara, w 14.30 hodź. Je to perfektne předstajenje za cyłu swójbu. A to najlěpše je, zo dorosćeni, kotřiž dźěćo přewodźeja, tohorunja jeno dźěćacy zastupny lisćik zapłaća.