Hwězdni spěwarjo po puću byli
Nochcedźa dlěje mjelčeć
Dotal bě za přihłosowarjow płaćiwych koronowych postajenjow ćežko swoje měnjenje w zjawnosći zwuraznić, bjez toho zo bychu z wonymi postajenjemi do konflikta přišli. W Kamjencu su nětko wupuć namakali.
Kamjenc (UM/SN). Je sobotu dopołdnja před Kamjenskej radnicu. Jenož hdys a hdys raz něchtó přez torhošćo dźe. Z Hasy Rosy Luxemburg bliži so horstka ludźi, w rynku jedyn po druhim z nahubnikom a ze stólcom w ruce. Napřećo radnicy so woni sydnu, tak zo nastanjetej połkruhaj z wotstawkom dźesać metrow.
Tukotanje daloko słyšeć było
Zetkanje oldtimerow lětsa jako turu po wšelakich gmejnach přewjedli
Hora (FR/SN). Trubjenje bě daloko słyšeć, jako nastaji so z Hory blisko Noweje Jaseńcy dołha kolona wozydłow do směra na Bóšicy. Přećeljo a lubowarjo oldtimerow, předewšěm tajkich, kotrež su trěbne za dźěło w ratarstwje, w lěsach abo na dróhach, su so předwčerawšim sedmy króć zetkali. Organizowało bě zarjadowanje wospjet Horjanske towarstwo přećelow wlečakow. Porno dotalnym zetkanjam pak njemóžachu sej zajimcy jězdźidła wobhladać na ležownosći, na kromje wsy, kaž je to hewak z wašnjom. Korona bě sej žadała wo tym rozmyslować, hač bě scyła móžno přewjesć zarjadowanje, kotrež je tradicionalnje kóždu druhu njedźelu januara. Tuž zrodźichu entuziasća wokoło Roberta Ryćerja ideju, jěć z twarskimi mašinami, traktorami, wlečakami (Schlepper), awtami a dalšimi wozydłami do blišeje wokoliny. Wola, swoje jězdźidła prezentować a z nimi po puću być, bě wjetša hač wobmyslenja.
Krótkopowěsće (11.01.22)
Omikron Hornju Łužicu docpěł
Budyšin. Wirusowa warianta omikron je Budyski wokrjes docpěła. Krajnoradny zarjad je wčera dotal 17 padow wobkrućił. Incidencna hódnota mjeztym dale woteběra. Po RKI wučinja wona dźensa we wokrjesu 222,8. Wčera rozprawjachu wo 158 natyknjenjach z koronu a wo wosom smjertnych padach wot minjeneho pjatka. Wokrjes Zhorjelc zwěsći 171 infekcijow, třoch zemrětych a tři omikron-pady. Incidenca po RKI je tam 181,2.
Kulturny wuběrk
Budyšin. Kulturny wuběrk Domowiny je so wčera we wobłuku online-posedźenja skonstituował. Jeho jednohłósnje wuzwoleny předsyda je z Njebjelčic pochadźacy nowy čłon zwjazkoweho předsydstwa Feliks Ričel. Jemu poboku staj městopředsydka Franciska Grajcarekec a městopředsyda Jan Bělk, kaž třěšny zwjazk informuje.
Spěw wo Běłoruskej
440 ludźi so šćěpić dało
Budyšin (SN). Pod hesłom „Budyšin šćěpi – za tebje, za mnje, za nas“ su předwčerawšim w Budyskim Němsko-Serbsko-ludowym dźiwadle přidatnu šćěpjensku akciju Budyskich lěkarjow wotměli. Organizował bě akciju zwjazk „Budyšin w zhromadnosći“. Nimale 440 dorosćenych a młodostnych je so přećiwo koronowemu wirusej šćěpić dało. Najwjetši dźěl z nich bě w starobje 30 do 50 lět.
Šćěpjensku akciju su Lubijska „Stara apoteka“ a tři lěkarske praksy ze swojimi teamami čestnohamtsce přewjedli. Iniciatiwa a dźiwadło jako hosćićel stej jara spokojom z wothłosom, rěka ze stron organizatorow. Akcija bě wuspěch, a to nic jeno za kóždeho jednotliwca, ale tež w zmysle iniciatiwy, jako znamjo zhromadnosće w Budyšinje.
Domy lětsa hinak swjeća
Policija (10.01.22)
Katalyzator pokradnyli
Wojerecy. Nimale wšědnje rozprawja policija wo pokradnjenych katalyzatorach awtow. Najnowši tajki pad sta so minjene dny na Wojerowskej Hasy D w tamnišim industrijnišću. Tam bě wobsedźer wosoboweho awta typa Honda Accord swoje jězdźidło srjedu připołdnju wotstajił a so hakle pjatk rano k njemu wróćił. W tym času běchu skućićeljo katalyzator wu-twarili a sobu wzali. Mějićelej awta nasta něhdźe 600 eurow škody.
Wobšěrne ponowjenje zahajili
Wotrowska cyrkej dóstanje přewětrjensku připrawu, elektriku a barbu
Wotrow (SN/MWj). Z poslednjej Božej mšu je Wotrowska wosada minjeny štwórtk ze swojeho Božeho domu wućahnyła. Nazajtra započachu ławki wotšrubować a sobotu su je pomocnicy z cyrkwje znosyli. To bě start wobšěrneho ponowjenja cyrkwje, kotrež ma hač do wosadneho swjedźenja w juniju składnostnje 250. róčnicy wobstaća wosady swj. Bena wotzamknjene być. „Nimo ławkow smy tež wšón dalši mobiliar, kiž je za liturgisku potrjebu trěbny a je transportabelny, wurumowali, mjez druhim tež wołtarne blido. Wone je chětro wobškodźene. Najwjetši dźěl dowjezu do Rjenčec firmy w Dobrošicach, hdźež wšitke drjewjane dźěle po pomnikoškitnych zasadach ponowja a zawěsća“, rozłožuje Chróšćanski farar Měrćin Deleńk, kiž je za Wotrowsku wosadu sobu zamołwity. Dźensa započachu róšty twarić, a to tak, zo je dale móžno w cyrkwi njedźelu kemše swjećić. Za to dyrbja sej wosadni stólc sobu přinjesć. Jeno za seniorow spřihotuja 20 stólcow, tak zo woni žane po wsy nosyć njetrjebaja.
Ćeže ponowjenja
Krótkopowěsće (10.01.22)
Dalši pacienća zemrěli
Budyšin. Incidenca je po Roberta Kochowym instituće dźensa w Budyskim wokrjesu 313,1 a w Zhorjelskim 271,8. Wokrjes Budyšin informowaše minjeny pjatk wo 161 natyknjenjach z koronawirusom a wo třoch smjertnych padach. Wokrjes Zhorjelc bě 96 infekcijow a 13 zemrětych w ziwsku z koronu zwěsćił.
Nowe rjadowanja na šulach
Drježdźany. Nowy korona-wukaz sakskeho knježerstwa předwidźi wobmjezowane regularne wotewrjenje dźěćacych dnjowych přebywanišćow a zakładnych šulow. Rjadownje a skupiny maja so kruće dźělić. W šulskich twarjenjach a stajnje potom, njehodźi-li so minimalny wotstawk połdra metra dodźeržeć, ma so nahubnik wužiwać. Za wuknjacych wot 5. lětnika wobsteji we wučbje za to winowatosć, w primarnym schodźenku nic. Wopytowarjo mjenowanych zarjadnišćow maja aktualny negatiwny test předpołožić.
Wulkopósłanc wotwołany
