Wojerecy. Za zjawny bliskowobchad w měsće chcedźa wot klětušeho apryla jězbny lisćik testować, kiž ma cyły dźeń płaćiwy być. Za 3,50 eurow móža wobydlerjo potom wob dźeń wšitke měšćanske linije wužiwać, zdźěli šef Wojerowskeje wobchadneje towaršnosće Stefan Löwe. Tuchwilu płaći jednotliwa jězba we Wojerecach 2,50 eurow, dnjowy tiket za cyły teren wobchadneho zwjazka Hornje Łobjo pak 6,50 eurow.
Radźićeljo wuradźuja
Pančicy-Kukow. Přichodne zjawne posedźenje gmejnskeje rady Pančicy-Kukow wotměje so štwórtk, 9. decembra, w 19 hodź. na Wotrowskej starej šuli. Mjez druhim budu radźićeljo wo tym rěčeć, hač přihłosuja přirjadowanju zaměroweho zwjazka za wopłóčki Při Klóšterskej wodźe ke Kamjenskemu zaměrowemu zwjazkej za pitnu wodu.
Za posedźenje test trěbny
Wojerecy (AK/SN). Hromadźe z Łužiskej a srjedźoněmskej towaršnosću hórnistwoweho zarjadnistwa (LMBV) město Wojerecy přichodne lěta planuje, zapadny pobrjóh Šibojskeho jězora wuwić. Dwanaće milionow eurow chcedźa tam za najwšelakoriše naprawy wudać. Z toho ma město 15 procentow zwjesć, 85 procentow dóstanu ze spěchowanskehoprograma za saněrowanje bywšich wuhlowych jamow. „W nalěću 2022 maja so twarske dźěła zahajić“, zdźěli Wojerowski wyši měšćanosta Torsten Ruban-Zeh (SPD) tele dny na nowinarskej rozmołwje.
Dźěła měrja so na 450 metrow dołhi wotrězk pobrjoha. Tam běchu hižo loni w lěću płuno-, wodo- a milinowód kaž tež wopłóčkowy kanal kładli. Nětko matej parkowanišći z dohromady 320 městnami nastać. Kaž twarski zamołwity města Wojerec Dietmar Wolf rjekny, mysla dale na hrajkanišćo ze wšelakimi nastrojemi a na městnosć za wolejbul. Při puću, kotryž ma parkowanišći zwjazać, maja sanitarne připrawy nastać.
Incidenca snadnje niša
Budyšin. Roberta Kochowy institut zwěsći dźensa snadnje nišu incidencnu hódnotu 1 376,8 za Budyski wokrjes a za Zhorjelski 1 123,9. Minjeny pjatk bě Budyski wokrjes wo 734 natyknjenjach a šěsć smjertnych padach w zwisku z koronu rozprawjał, wokrjes Zhorjelc mjenowaše pjatk 528 dalšich infekcijow a jědnaće zemrětych.
Ralph Büchner njeboh
Wojerecy. Lokalny politikar Lěwicy Ralph Büchner je njeboh. 60lětny Wojerowčan je sobotu po ćežkej chorosći zemrěł, informowaše Budyski wokrjesny zwjazk Lěwicy. Büchner bě wjelelětny měšćanski radźićel we Wojerecach a předsyda frakcije Lěwicy w Budyskim wokrjesnym sejmiku. Wón bě stajnje tež serbskim naležnosćam wotewrjeny a je so za nje zasadźał.
Dalši kwartěr za ćěkancow
Budyšin (CS/SN). Po swjatoku w přijomnej atmosferje na škleńcu wina zetkać móžeš so nětko w nowej winowej barje, kotruž je Carola Bauriedel blisko Budyskeje Pětroweje cyrkwje zarjadowała. Wot 1. oktobra wita mějićelka floristiskeho wobchoda „Moosmutzel“ wot 17 do 21.30 hodź. lubowarjow wina, a to stajnje wot srjedy do pjatka. Za swoju winowu baru je wosebitu dowolnosć dóstała. W swojim wobchodźe „Moosmutzel“ wšak bě stajnje hižo tež wino najwšelakorišich družin předawała. Ale mnozy kupcy a runje turisća sej přejachu, wino tež woptać móc. A tak nasta ideja z winowej baru.
Mólby a tesaki kradnyli
Budyšin. Njewšědnu rubiznu wupytachu sej paduši, kotřiž zadobychu so w času wot minjeneje wutory popołdnja do srjedy dopołdnja do bydlenja na Budyskej Šulerskej hasy. Tam spakosćichu mólby a wjacore tesaki, kotrež słužachu w bydlenju jako dekoracija. Hač jednaše so wo originalne mólby abo kopije, je runje tak mało znate kaž cyłkowna hódnota rubizny, zdźěli Zhorjelska policajska direkcija. Wěcna škoda wučinja něhdźe 100 eurow. Kriminalni technikarjo na městnje slědy zawěsćichu. Kriminalisća tónle pad nětko dale přepytuja.
Zo bychu nadal pjenjezy Europskeje unije za projekty na wsach łužiskeje jězoriny dochadźeli, dyrbja towarstwo załožić. Na te wašnje móhli žiwjensku kwalitu we wjesnej kónčinje přisporjeć.
Slepo/Dźěwin/Trjebin (CK/SN). Tři gmejny Slepjanskeho regiona přistupja towarstwu za wjesne wuwiće. Te ma so hišće oficialnje załožić. To su gmejnscy radźićeljo w Slepom, Dźěwinje a Trjebinje na swojich zašłych posedźenjach jednohłósnje wobzamknyli. Towarstwo załožić je trjeba, dokelž su po předpisu sakskeho ministerstwa za regionalne wuwiće za připóznaće jako Leaderowa kónčina w spěchowanskej dobje 2023 do 2027 jenož hišće samostatne juristiske wosoby dowolene. Dotal su to lokalne akciske skupiny (LAG). Tohodla chce LAG Łužiska jězorina towarstwo załožić. Přistupić ma jemu dotalnych jědnaće komunow. Sobu činić chcedźa nimo toho Mužakow a dalše tři komuny, kotrež přisłušachu dotal skupinje „Wuchodna Hornja Łužica“.