Wjedrarjo warnuja přichodne dny před sylnišimi dešćemi a zdobom před móžnej wulkej wodu, tež w Hornjej Łužicy.

Drježdźany (SN/JaW). Nižina „Nick“ je hižo­ něšto dešća do Sakskeje přinjesła. Kaž Centrum za wulku wodu Sakskeho krajneho zarjada za wobswět, ratarstwo a geologiju w Drježdźanach informuje, přiběra tak tohorunja strach před wulkej wodu předewšěm w mjeńšich rěkach w swobodnym staće. Byrnjež za kónc tydźenja připowědźeny sylny dešć w Hornjej Łužicy wuwostał, je w dalšich kónčinach zdźěla k njewjedram a zliwkam dóšło. Městne zliwki strach wulkeje wody předewšěm w małych rěkach wobstajnje powjetšeja. Wšako njemóža wone spěšnje dosć na dešć reagować, fachowcy krajneho zarjada za wobswět wuswětleja. „Při małych rěkach je čas mjez zasadźenjom sylneho dešća a stupanjom stawa wody chětro krótki, zdźěla mjenje hač hodźinu. W ekstremnych padach stupa wottok wulkeje wody samo runočasnje ze zasadźenjom dešćom, štož mjenuja fachow­cy torhacu wodu (Sturzflut).“

Budyšin/Ternopil (SN). Móžnosće hospodarskich kontaktow za srjedźny staw a wuměny mjez powołanskimi šulemi je Budyski krajny rada Michael Harig (CDU) kónc tydźenja na wopyće w zapado­ukrainskim měsće Ternopilu rozjimał. Na programje stejachu dale wopyt „kla­si­skeho“ gymnazija, hdźež němčinu po­­da­waja, posedźenje Ternopilskeje měšćanskeje rady kaž tež zetkanje ze zastupjerku za mjezynarodne dźěło. Rozmołwni partnerojo chcychu při tym wobłukowe wuměnjenja tematizować, kotrež maja wonkownowikowansce a cłownoprawnisce wobkedźbować.

Krajny rada Michael Harig bě do wot­jězda wuzběhnył, zo je dalši cil jězby, „wobrěčeć móžnosće zdobywanja fachowcow“. Wotpohladane zhromadne dźěło měło we wzajomnym zajimje być.

Kaž krajnoradny zarjad zdźěli, bě tamniši měšćanosta Sergej Nadal hižo loni w januarje w Budyskim wokrjesu pobył. Nastali běchu kontakty přez zhromadny pólski partnerski wokrjes Bolesławiec, z kotrymž tež ukrainske město přećelske styki wudźeržuje.

Incidenca třeći dźeń nad dźesać

Budyšin. Po soboće a njedźeli je Ro­ber­ta Kochowy institut dźensa z inci­dencu 11,4 za wokrjes Budyšin třeći dźeń za sobu­ hódnotu nad dźesać podał. Wosta­nje-li wona tež jutře a srjedu, je wotpowědnje aktualnemu sakskemu korona-postajenju wot pjatka w zjawnych wo­błukach zaso nahubnik trěbny. Tež w Zhorjelskim wo­krjesu je z incidencu 10,4 prohowa hódnota překročena.

Po Biedenkopfje pomjenować

Drježdźany. Lětanišću sakskeje krajneje stolicy měli čestne mjeno prof. dr. Kurt Biedenkopf spožčić, namjetuje prezident Sakskeho krajneho sejma dr. Mat­thias Rößler (CDU). „Kurt Biedenkopf ma wo Saksku runje tajke zasłužby kaž Franz­Josef Strauß wo Bayersku abo Willy Brandt wo Berlin“, rěka w informaciji zarjadnistwa sakskeho parlamenta.

Jako čerwjeny kraj zastopnjowany

Terpje/Zabrod (JoS/SN). Nowa mlokowa rampa stara so tuchwilu w Grodkowskim měšćanskim dźělu Terpje (Terpe) wo rozestajenje mjez městom a domizniskim towarstwom. Rampu je towarstwo zhotowiło we wobłuku spěchowanskeho programa „Demokratiju pěstować“. Nastajili su drjewjanu konstrukciju z małej ławku a přišrubowanymi kanami na ležownosći města. Za to pak njepředležeše dowolnosć. Tuž su rampu na namjet wjesneho předstejićerja Dietera Freißlera najprjedy raz na priwatnu ležownosć přestajili. Tam pak njemóža so wjesne žony na nju posydnyć, hdyž na přikład na pjekarske awto čakaja.

Mjeztym je towarstwo próstwu wo stajenje rampy na předwidźanym městnje nachwatało. Město Grodk drje by to dowoliło, wotpokaza pak kóždužkuli za­moł­witosć, dyrbjało-li so na přikład nje­zbožo stać. To zaso domizniske towarstwo rozumić njemóže, dokelž so jeho zawěsćenje jeničce na towarstwowe skutkowanje poćahuje. „Za měšćanske spěchowanske objekty njemóžemy žane rukowanje přewzać“, praji předsyda domi­zniskeho towarstwa Lothar Hopka.