Iniciatiwa BBB přikład dalšim
Budyšinej rěkaja přeco zaso stolica Serbow. Kotru rólu hraje tónle aspekt za dwurěčny měšćanski marketing? Tudyši dźěłowy kruh za serbske naležnosće je so wčera z tematiku zaběrał.
Budyšin (CS/SN). Dwurěčny měšćanski marketing běše jedna tema wčerawšeho posedźenja dźěłoweho kruha za serbske naležnosće při Budyskej měšćanskej radźe. K tomu bě gremij nowu kulturnu managerku Katarzynu Kudzewicz a Marcela Malinka z Budyskeje wobhospodarjenskeje a wobdźělenskeje towaršnosće (BBB) přeprosył. Dokelž korony dla žane měšćanske swjedźenje přewjedli njejsu, njemóžeše Katarzyna Kudzewicz k tomu přewjele rjec. Budu-li tajke zaso móžne, wotpohladuje wona serbske wosady sobu zapřijeć. Němsko-Serbske ludowe dźiwadło měło mjez druhim na dnju pomnikow wjetšu rólu hrać. Kulturna managerka so zdobom nadźija, zo tež dźěłowy kruh nowe ideje zapoda. Z widom na předstejace Lěto Zejlerja a Kocora 2022 měli so zastupnicy města a serbskich institucijow sčasom zetkać, zo njebychu za móžne zhromadne přihoty čas komdźili. Tak je wulke spěwanske zetkanje planowane, bě wčera słyšeć.
W znamjenju wobchadneje wěstoty
Strachi za lěsy
Budyšin (SN). Po zymnej a mokrej meji polěkuje nětko horce a suche wjedro rozmnoženju skórnika, kaž předewzaće Sakski lěs informuje. W Hornim kraju wobkedźbuja hajnicy-lěsnicy zdźěla njesměrnje do wočow bijace, znowanastate žórła škódnika. Mějićelam lěsa předewzaće poruča, wšitke nadpadnjene štomy hnydom podrězać a wotskorić abo je z lěsa transportować resp. znajmjeńša markěrować, zo móhli so druzy wo nje starać.
Lěsniski zawod skedźbnja zdobom na rosćacy strach lěsnych wohenjow w swobodnym staće. Hižo dźensa a jutře liča w mnohich kónčinach z najwyšim schodźenkom lěsnych wohenjow 5.
Krótkopowěsće (17.06.21)
Hornja Łužica pod incidencu 10
Budyšin. W Budyskim wokrjesu su wčera wo dźewjeć natyknjenjach z koronawirusom a třoch smjertnych padach informowali. Zemrěći běchu w starobje 63 do 81 lět. Incidenca je po Roberta Kochowym instituće dźensa 7,7. Wo třoch nowoinfekcijach a jednej w zwisku z koronu zemrětej wosobje informowachu wčera we wokrjesu Zhorjelc. Incidenca tam wučinja po RKI dźensa 4,7.
Twarnišćo labora wopytałoj
Zhorjelc. Zwjazkowy minister za hospodarstwo Peter Altmaier a sakski ministerski prezident Michael Kretschmer (wobaj CDU) staj dźensa přichodne twarnišćo wodźikoweho testoweho labora w Zhorjelcu wopytałoj. Labor je jedyn z centralnych projektow strukturneje změny we Łužicy. Kónc lěta chcedźa twarić započeć, wot kónca 2022 ma labor dźěłać. Zwjazk a Sakska přewostajitej jemu 42 milionow eurow.
Rusku a Chinu wuzamknyli
Policija (16.06.21)
Při přesćehnjenju do so zrazyli
Krěpjecy. Na statnej dróze S 94 su wčera popołdnju krótko do napoł dwěmaj mjez Porchowom a Kamjencom tři jězdźidła do so prasnyli. Pola Krěpjec je ćmowočerwjeny Volvo před nim jěducej Audi kaž tež slěbrobarbny Volvo přesćahnył. W samsnym wokomiku wujědźe Audi nalěwo, zo by awto před sobu přesćahnył, a zrazy do ćmowočerwjeneho jězdźidła. Šofer Audija wodźeše swoje awto wróćo na prawu čaru, ale prasny tam nimale bjez spinanja do slěborneho Volva. Na zbožo so při njezbožu nichtó zranił njeje. Dobrowólnej wohnjowej woborje Krěpjecy a Halštrow stej z wosom kameradami městno njezboža zawěsćiłoj a wuběžace maćizny wotstroniłoj. S 94 běše něhdźe hodźinu na jednej čarje zawrjena, zo by policija slědy na jězdźidłach a jězdni zawěsćiła.
Na Butrowu horu kolesować
Traktorist ćežko znjezbožił
Widźomny rozmach
Hišće wjele móžno
Sakska přewostaja dale spěchowanske srědki za žiwu zjawnu dwurěčnosć
Budyšin (JK/SN). Hižo wjacore lěta zaruča sakske statne knježerstwo z lětnej pawšalu 5 000 eurow gmejnam a městam w serbskim sydlenskim rumje móžnosć, skutkownje na dwurěčnosć swojich komunow skedźbnjeć. To su w tójšto z nich zwoprawdźili a to nadal chutnje bjeru.
Na widejowej konferency na iniciatiwu Budyskeho krajnoradneho zarjada a tamnišeje społnomócnjeneje za serbske naležnosće Haleny Jancyneje su zamołwići wčera wječor wuskutk pawšalneje podpěry a dźěławosć Wojerowskeho serwisoweho běrowa za serbsku rěč w komunalnych naležnosćach bilancowali. Budyski krajny rada Michael Harig (CDU) wuzběhny we witanju wažnosć zjawneje dwurěčnosće za region a serbski sydlenski rum. Widźomna dwurěčnosć je po jeho słowach wuznaće k serbskosći regiona a zdobom pokazka na mnohotnosć tudyšich komunow. Tohodla ma Harig spěchowanje aktiwitow w naležnosći za wažny element politiki, we wokrjesomaj Budyšin a Zhorjelc na wosebitosć dwurěčnosće skedźbnić.
Krótkopowěsće (16.06.21)
Hač do kónca septembra
Budyšin. Šćěpjenskej centrumaj w Kamjencu a Lubiju ze swojimi mobilnymi teamami hač do kónca septembra dale dźěłatej. Prěnje šćěpjenja pak zaručeja tam jenož hišće hač do awgusta. W Budyskim wokrjesu přizjewichu wčera štyri natyknjenja z koronu a jedyn smjertny pad. Incidenca po RKI wučinja tu dźensa hódnotu 10. W Zhorjelskim wokrjesu rozprawjachu wo dwěmaj infekcijomaj. Incidenca po RKI je tam dźensa 6,3.
Hišće wušo z Pólskej dźěłać
Podstupim. Braniborska chce přichodnje hišće wušo ze susodnej Pólskej hromadźe dźěłać a po móžnosći wjele žiwjenskich a politiskich wobłukow splesć. To je krajne knježerstwo po informacijach statneje kenclije wčera wobzamknyło. Tak chcedźa mjezu přesahowacu zhromadnosć sylnić a rozrost pomjezneho regiona zhromadnje zaručić.
Startuja nowy podcast
