Pančicy-Kukow. Wobchod w klóštrje Marijna hwězda w Pančicach-Kukowje je najebać wobmjezowanja korony dla wotewrjeny. Přičina, zo smědźa kupcam swoje poskitki poručić, je, zo maja tam mjez druhim wulki wuběr knihow. Zajimcy móža sej kupić tež wudaća Ludoweho nakładnistwa Domowina. Časy wotewrjenja su po zwučenym wašnju wot póndźele do pjatka wot 10 do 16.30 a sobotu wot 12.30 do 16 hodź. Nakupować móža zajimcy tež po principje click & collect a skazane produkty sej w dorěčanym času we wobchodźe wotewzać.
Předewzaća online zeznać
Budyšin. Přewšo wuspěšny tydźeń wotewrjenych předewzaćow Sakskeje pod hesłom „SCHAU REIN!“, ma so lětsa digitalnje přewjesć. Tež w Budyskim wokrjesu so na to přihotuja. Zajimowani šulerjo móža so pod z kompetentnymi partnerami rozmołwjeć. W planowanym tydźenju zarjadowanjow wot 21. do 26. junija móža so młodostni z digitalnymi poskitkami wo powołanjach zaběrać a informacije wo móžnych powołanskich polach zběrać. W lěću maja so wotměć praktiki. Organizatorojo chcedźa zawody, kotrež tajke poskića, na platformje wozjewić.
Rostliny měnjeć
Mały Wjelkow (CS/SN). Małowjelkowska wjesna rada je so wčera na swojim prawidłownym posedźenju dorozumiła, srědki ze zakonja wo pawšalach wužiwać. Spočatnje běchu pjenjezy za wjesny swjedźeń předwidźane. Tón pak lětsa korony dla njebudźe, a klětu njesmědźa srědki wužiwać. Tuž so radźićeljo na to dojednachu je Sportowemu towarstwu Mały Wjelkow přewostajić. Dohromady je to něšto wjace hač 5 000 eurow. Zjednoćenstwo móže pjenjezy za porjedźenje domu sportowcow derje trjebać.
Diskusiju wo přemjenowanju puća a wo předźěłanju stawizniskeje šćežki chcedźa přestorčić. Puć mjez Hłownej dróhu a Friedricha Gruhlowej, hdźež nichtó njebydli, chcyli na „Kolonie-Gässel“ přemjenować. Dalši namjet je Puć Jana Awgusta Měrćinka. Sławny Małowjelkowčan bě na ekspediciji po Sewjernym polarnym morju wobdźěleny. Mjenowany puć tworješe hač do lěta 1932 hranicu mjez wjesnymaj dźělomaj. Dokelž su taflički stawizniskeje šćežki zdźěla rozprochnawjene (verwittert) a wobsahowje njedokładne, dyrbja najprjedy raz wotpowědnje rešeršować.
Dwě njezboži na A4
Budyšin. Na awtodróze A4 mjez wotjězdomaj Budyšin-wuchod a Wósporkom je so wčera rano nakładnemu awtu wobruč skóncowała. Za sedłowym wlečakom jěducy Seat njemóžeše so lětacym dźělam wuwinyć a zrazy do njeho. Škoda na jězdźidłomaj wučinja něhdźe 10 000 eurow. Wobaj šoferaj wostaštaj njezranjenaj.
Njezbožo na samsnej čarje pola Połčnicy měješe hrozniše sćěhi. Wokoło 8.30 hodź. bě 59lětny šofer nakładneho awta přepozdźe zwěsćił, zo so wobchad do směra na Drježdźany haći, a zajědźe do před nim stejaceho Lkw-ja. Muž z Běłoruskeje móžeše ćežko zranjeny hišće sam wulězć. Z helikopterom transportowachu jeho do chorownje. 37lětny Polak w awće před nim wosta njezranjeny. Wěcna škoda na jězdźidłomaj wučinja po prěnim trochowanju 60 000 eurow. Wo rumowanje starachu so wohnjowi wobornicy, Techniska pomocna słužba kaž tež sobudźěłaćerjo awtodróhoweje mištrownje. Policija bě čaru dospołnje zawrěła, štož hač do zažneho popołdnja traješe. Tak stejachu čakace awta zdźěla hač k parkowanišću Röderska dolina.
Brětnja (SiR/SN). Sindy Leinweber ma wožiwjenje štyristronskeho statoka w Brětni za wjace hač powołanski nadawk. Wonkownje njeje wona dotal na twarjenjach na Hłownej 39 wjele změniła. Přiwšěm pokazuje we wsy a na ležownosći knježacy měr na to, zo něšto pobrachuje. Su to wjeselo, hudźba, reja, zhromadnosć při słódnych poskitkach a wječorki při škleńcy wina, hdyž wopytowarjo chowanje słónca wobkedźbuja. Wulki měr je na jednym boku zwjazany z tuchwilnej koronapandemiju. To pak njeje jenička přičina. Statok je wopušćeny, a taflička z mjenom wobsedźerki je lědma hišće wučitajomna.
Wot lětušeho januara pytachu wobsedźerjo ležownosće za nowym wotnajerjom. Wšako bě dotalna wobhospodarjerka Monique van Nuland w Kamjenskim starym měsće kofejownju wotewrěła a objekt w Brětni spušćiła. Pjeć lět tomu nětko je, zo běštaj so wona a Dirk van Nuland jako přidružnikaj zesamostatniłoj a dworowu kofejownju w Brětni wotewrěłoj.
Město Wojerecy je mjeztym štwórty wobydlerski etat nastajiło. Za to su jeho radźićeljo na wčerawšim posedźenju cyłkownu lisćinu namjetow wobzamkli.
Wojerecy (AK/SN). Za swój wobydlerski etat přewostaji město Wojerecy lětsa 70 000 eurow. Prěni króć njeje financowanje kaž dotal ze srědkow krajneje pawšale wo wjesnych rumow (2018 do 2020) móžne, ale ze swójskich srědkow měšćanskeho etata zaplanowane. „To je woprawdźe dobre znamjo. Připóznawamy tak wulki angažement wobydlerjow města“, zwurazni radźićel Uwe Blazejczyk (SPD), kiž je zdobom předsyda wodźenskeje skupiny za wobydlerski etat, na wčerawšim posedźenju Wojerowskeje měšćanskeje rady. Wona je tam cyłotnu lisćinu namjetow jednohłósnje wobzamknyła. Lisćina wopřijima dohromady 83 namjetow, 35 z města samoho, a 48 z wjesnych dźělow Brětnja-Michałki, Němcy, Hórnikecy, Čorny Chołmc a Ćisk.
Po 30. juniju w praksach šćěpja
Budyšin. Šćěpjenskej centrumaj w Kamjencu a Lubiju runja dalšim we wokrjesach dźěłatej jenož hač do 30. junija. Potom maja praksy domjacych lěkarjow šćěpjenje pře koronawirus zaručić, kaž sakske socialne ministerstwo zdźěli. W Budyskim wokrjesu zwěsćichu wčera 72 natyknjenjow z koronu a dwaj smjertnej padaj. Incidenca po RKI je dźensa 227,9. We wokrjesu Zhorjelc mějachu 130 infekcijow a dwaj smjertnej padaj. Incidenca je tam dźensa po RKI 195,1.
Spěchuje socialne bydlenja
Drježdźany. Sakska wudawa wjace pjenjez za socialne bydlenja. Po wčera wot kabineta wobzamknjenej spěchowanskej směrnicy přewostaja lětsa a klětu po 74,3 milionach eurow, zo bychu tajke bydlenja twarili a saněrowali. Mějićeljo bydlenjow, kotřiž njemóža žanu modernizaciju financować, dóstanu spěchowanje, zo móhli nisku podruž dale zaručić.
Markus Pieper nowy jednaćel
Tři Lkw-je do so zrazyli
Budyšin. Na awtodróze A4 njedaloko wotjězda Budyšin-wuchod su wčera popołdnju tři nakładne awta do so zrazyli. Zranił so na zbožo nichtó njeje.
Rakecy (SN). Hišće hač do 10. meje dyrbja w Rakecach z tym ličić, zo njemóža po Dwórnišćowej jěć. Tam tuchwilu móst dotwarjeja. Tuž maja šoferojo wobjězdku přez Šešow a Nižu Wjes wužiwać.
W Ptačecach (Tätzschwitz), w gmejnje Halštrowska Hola, twarja kanal a wobnowjeja jězdnju. Kóšynska dróha wostanje tuž dale hač do 3. meje zawrjena.
Tež w Protecach (Prietitz), měšćanskim dźělu Halštrowa, twarja. Tam je Biskopičanska dróha hač do 10. meje zawrjena, dokelž tam móst twarja.
Na Mortkowskej w Koblicach traja trěbne dźěła na kanalu a jězdni po planje hišće hač do kónca septembra.
Radwor (SN/BŠe). Radworske dwórnišćo bě městnosć zetkawanja a ma so tež zaso tajke stać. Zaměrnje tuž towarstwo Radworske dwórnišćo inkluzije na tym dźěła a naprawy krok po kroku zwoprawdźa. Hłowny zaměr tuchwilu je twarić projektnu kuchnju, za čož su crowdfunding-akciju zahajili. Lutowarnja poskića za to platformu 99funken, hdźež projekty předstaja. „Wot minjeneje srjedy je projekt takrjec online. Hač do kónca junija chcemy pjenjezy nazběrać“, měni předsydka towarstwa Rafaela Wićazowa. Cyłkownje 10 000 eurow kuchnja płaći, hdźež chcedźa potom projekty přewjesć.