Durje dźiwadła šěroko wočinjene

pjatk, 11. septembera 2015 spisane wot:
Budyšin (SN). Zajutřišim, njedźelu, njeje jenož dźeń wotewrjeneho pomnika, ale při tej składnosći tež dźeń wotewrjenych duri w Budyskim Němsko-Serbskim ludowym dźiwadle. Tón dźeń spřistupni NSLDź wšitke swoje jewišća a komorki w Dźiwadle na hrodźe. Jako serbske wjerški njech su poručene wustupaj skupiny Floppy dolls, kotraž předstaji w 11.05 a w 13.45 hodź. wurězki swojeho pro­grama za Wendish Fest 2015 w Texasu, a wurězki noweje inscenacije „Čmjeła Hana namaka přećela“ w 13.05 a 15.20 hodź. Tónle kruch změje 15. septembra premjeru w Njebjelčanskej pěstowarni. Nimo toho čakaja na wopytowarjow wulka klanka Guliwera, šminkowanje za dźěći, dobroty za chłóšće huby a za lu­bowarjow dohlady do noweho hrajneho plana činohry a klankodźiwadła.

Krótkopowěsće (11.09.15)

pjatk, 11. septembera 2015 spisane wot:

Serbske institucije zeznali

Choćebuz. Nowačcy 7. lětnika Delnjoserbskeho gymnazija běchu wčera a za­wčerawšim z regionalnej rěčnicu Domowiny Karin Tšukowej w Choćebuzu po puću, zo bychu so z tam zaměstnjenymi serbskimi zarjadnišćemi zeznajomnili. Woni wopytachu tež społnomócnjenu za serbske naležnosće w radnicy.

Planuja prózdninski serbski kurs

Budyšin. Rěčny centrum WITAJ planuje klětu přewjesć prózdninski serbskorěčny kurs za dźěći 1. do 4. lětnika, kotrež zwonka Łužicy wotrostuja. Budźe-li wosom do dwanaće zajimcow, přewjedu kurs w prěnim tydźenju zymskich prózdnin w Budyšinje. Dopołdnja bychu šulerjo pisać a čitać zwučowali, popołdnju so zabawjeli. Přizjewjenja přijimuje RCW hač do 25. septembra.

Starši bóle motiwowani

Stuttgart. Młodźi dźěławi njejsu po aktualnym přepytowanju tak motiwowani kaž ći starši. Mjeztym zo jenož 32 procentow ludźi w starobje hač do 30 lět praji, zo su při dźěle „wulce motiwowani“, wučinja podźěl 61lětnych a staršich dźěławych 40 procentow. Přiwšěm 61 procentow młodych ludźi měni, zo su z powołanjom „zasadnje spokojom“.

Policija (11.09.15)

pjatk, 11. septembera 2015 spisane wot:

Hodźij. Njewšědne njezbožo je so wčera připołdnju w Hodźiju stało. Tam par­kuja transportery Fährmannec pjekarnje zwjetša na zadnim boku zawoda, zwotkelž wužiwaja Praskowski puć, zo bychu twory do předawarnjow wozyli. Wčera pak njewotboči šofer transportera na puć, ale jón z dotal njeznateje přičiny přeprěči, přełama płót a suny so po skłoninje na dwaj metraj hłubšo ležace sportnišćo. Awto jědźeše na to runjewon přez hrajnišćo a přełama na jeho tamnej kromje wobhrodźenje. Při tym sej šofer wolijowu wanju jězdźidła roztorha. Tołsta smuha wolija ćehnješe so na to dale přez susodne hrajkanišćo hač k štomam před Hodźijskim spjatym jězorom. Wodźer awta jědźeše nimo sportoweho domu wróćo do wsy, při pěstowarni pak wone zapraji. Wobornicy z Hodźija, Spytec a Brězy dyrbjachu wolij zrumować. Wo přičinach­ njemóžeše šofer ničo rjec.

Njewšědnosć dožiwichu tele dny w Mužakowskim Pücklerowym parku. Na česć přewodnicy Pücklera poswjećichu nowu družinu róžow na mjeno Machbuba. Ćmowočerwjenu filigranu rjanosć je Roland Graeff (srjedźa) plahował. Hromadźe z nim poswjećištaj ju Maja Avermann z Baršćanskeje róžoweje zahrody (nalěwo) a Holger Daetz z Pückleroweho parka. Foto: Joachim Rjela

Poprawom maja wšitke gmejny spočatk lěta schwaleny hospodarski plan měć. We Wulkodubrawskej su etat 2015 hakle­ tele dny wobzamknyli. To drje změje njelube sćěhi.

Wulka Dubrawa (CK/SN). Parkowanišćo při šuli chce Wulkodubrawska gmejna lětsa znowa wuhotować a nimo toho nowe hašenske awto za Klukšansku wo­hnjowu woboru kupić. Za nje běži tuchwilu wupisanje. Hromadźe z připowěšakom kalkuluja za jězdźidło 164 000 eurow.­ Połojcu toho chcedźa ze spěcho- wanskimi srědkami financować.

Dohromady poł miliona eurow chce gmejna Wulka Dubrawa lětsa inwestować, z čehož je 334 000 eurow spěchowanskich srědkow a připokazanjow. Mjez druhim maja předwidźane při komunalnych twarjenjach biologisku wodočisćernju natwarić. Wjele pjenjez nałoži komuna nimo toho za porjedźenje a saněrowanje wohnjowoborneho hata w Brěmjenju a za wutwar wjacezaměroweje rumnosće w šuli. Tam chcedźa akustiku a izolowanje zwuka polěpšić a wo­hnjoškitne předpisy zwoprawdźić.

Technika tónraz w srjedźišću

štwórtk, 10. septembera 2015 spisane wot:

W měsće a wokolinje zajimawe poskitki na dnju wotewrjeneho pomnika

Budyšin (SN/MWj). „Rjemjesło, technika, industrija“ rěka njedźelu, 13. septembra, hesło lětušeho dnja wotewrjeneho pomnika. Na mnohich městnach budu wo­py­towarjo najwšelakoriše techniske za­jima­wostki wobdźiwać móc.

Město Budyšin budźe takrjec hornjołužiske srjedźišćo z dohromady pjatnaće objektami, kotrež budu wot 10 do 17 hodź. přistupne. Mjez druhim su to Kopornik na Židowje, Gersdorfski palais, wodarnja w Třělanach, sotrownja w Małym Wjelkowje a Nowa wodarnja w Budyšinje. Prěni raz wobdźěli so historiska róla na Wonkownej Lawskej. Dale wobhladać móžeš sej Staru wodarnju, Budyske jastwo (tu je wupokaz trěbny), Młynske wrota, Mikławšowu wěžu a bydlenski dom na Křidarskej 5. W Hamorniku powitaja wopytowarjow tohorunja hudźbnicy SLA, kotřiž tam wot 11 do 16 hodź. na serbskich instrumentach hudźa.

Měšćanski swjedźeń z atrakciju

štwórtk, 10. septembera 2015 spisane wot:
Swój 20. měšćanski swjedźeń swjeća wot jutřišeho hač do njedźele we Wojerecach. W jeho wobłuku změja tež wulki hermank, kotrehož wosebita atrakcija budźe bjezdwěla 26 metrow wysoki nastroj z mjenom „burner“, zmóžnjacy třidimensionalne pohiby w powětře. Dźěći pak smědźa z nim hakle wot staroby wosom lět a z wulkosću znajmjeńša 140 centimetrow sobu jěć. Dospołny program měšćanskeho swjedźenja nańdu zajimcy pod www.stadtfest-hoyerswerda.de. Foto: Ulrike Herzger

Staršiske přinoški zwyšene

štwórtk, 10. septembera 2015 spisane wot:

Kulow (AK/SN). Za žłobik, pěstowarnju a hort w dźěćacych dnjowych přebywanišćach Kulowa je wjetšina měšćanskich radźićelow wčera staršiske přinoški zwyšiła. Radźićelej Susanne Kockert a Roland Homola hłosowaštaj přećiwo tomu, Jan Michałk a Marion Grellert (wšitcy Po­wšitkowne wobydlerske zastupnistwo) so hłosa wzdaštaj.

Město reaguje tak na přiběrace zawodowe kóšty, kotrež rozrosćechu wo 20 000 eurow na lěto. „Posledni raz smy přinoški lěta 2004 přiměrili. Wot toho časa zarunachmy wšitke zwyšene zawodowe kóšty přez měšćanski etat. Tuchwilne zwyšenje je tuž z wida města woprawnjene“, rjekny Kulowski měšćanosta Markus Posch (CDU).

Krótkopowěsće (10.09.15)

štwórtk, 10. septembera 2015 spisane wot:

Wulke lětadło nad Łužicu

Kamjenc. Wjele zadźiwanja zbudźiło je wulke nakładne lětadło dźensa dopoł­dnja nad Kamjencom a Wojerecami, jako tam hodźiny dołho w kruhu lětaše. Mašina typa Boeing 747 bě sej při wotlěće w Lipsku wobruč wobškodźiła. Dyrbješe tuž nad městomaj kružić, zo by ćěriwo přetrjebała. Připołdnju móžeše na Lipšćanskim lětanišću zaso přizemić.

Radio a telewiza dale prědku

Fankfurt n. M. Něhdźe dwě třećinje swojeho medialneho časoweho budgeta wěnuja ludźo nad 14 lětami w Němskej telewizy a rozhłosej. To je wuslědk reprezentatiwneho woprašowanja. Tak hladaja ludźo wšědnje přerěznje 208 mjeńšin telewizor, 173 mjeńšin słuchaja radijo a su 107 mjeńšin w interneće. Wšědnu nowinu čitaja ludźo runje hišće 23 mjeńšin.

Kopacz: Test přistojnosće

Policija (10.09.15)

štwórtk, 10. septembera 2015 spisane wot:

Slepo. Zo njeznaći awtowe čisła kradnu a je za njeskutki wužiwaja, so často stawa. Zo pak wobkradnjeny swójske čisła zaso namaka, porno tomu lědma. Stało je so to zawčerawšim w Slepom. Na parkowanišću kupnicy wuhlada žona wo­sobowe awto z čisłomaj, kotrejž bě jej něchtó před něšto dnjemi pokradnył. Přiwołana wobsadka policajskeho awta sej BMW 318i bliže wobhlada a zwěsći, zo bě jón něchtó 23. awgusta w Běłej Wodźe na Liebknechtowej pokradnył. Móžni skućićeljo pak po wšěm zdaću w bliskosći njeběchu. Kriminalna policija nětko za nimi slědźi.

nawěšk

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019

nowostki LND