To a tamne (05.12.24)
Cyły skład strašnych rozbuchadłow je policija na němsko-čěskim pomjeznym přechodźe Hellendorf južnje Drježdźan sćazała. W kófrowym rumje wosoboweho awta namakachu zastojnicy tři kartony z pyrotechniku: 36 kulowych bombow, praskotaki a wulku bateriju wohnjostroja z 22 kilogramami rozbuchliny. Za wotstronjenje eksploziwneje namakanki zazwonichu fachowcow za znješkódnjenje municije. 21lětnemu wobsedźerjej hrozy chłostanje.
Dotal najwuspěšniša kniha lěta je edicija Angele Merkel „Swoboda“. Prěni tydźeń su žiwjenske dopomnjenki bywšeje zwjazkoweje kanclerki wjace hac 200 000 króć předali. Tole je wuslědk přepytowanja předewzaća Media Control, kotrež předawanje knihow w Němskej registruje a lisćinu najpožadanišich knihow zestaja. Knihu Merkel „fulminantnje“ předawaja.
Žadaja sej wotstup prezidenta
Seoul (dpa/SN). Hodźiny chaosa w Južnej Koreji: Chětro njewoblubowany prezident Yoon Suk Yeol je wot njeho njewočakowano wukazane wójnske prawo po někotrych hodźinach zaso zběhnył. Do toho běchu jeho zapósłancy parlamenta jednohłósnje namołwjeli, wuwzaćny staw zaso zběhnyć. Nětko jeho opozicija namołwja, wotstupić. W Seoulu su minjenu nóc tysacy ludźi přećiwo postupowanju prezidenta protestowali.
Trump argumentuje kaž Biden
New York (dpa/SN). Wužiwajo argumenty prezidenta USA Joewa Bidena při wobhnadźenju toho syna Huntera žadaja sej prawiznicy přichodneho prezidenta Donalda Trumpa, zo sudnistwo wusud přećiwo Trumpej zatajenych přepokazankow zaso zběhnje. Biden bě „njesprawne“ a politisce motiwowane wobchadźenje justicy ze swojim synom šwikał. Samsne „politiske dźiwadło“ je tež Trump dožiwił, prawiznicy argumentuja.
Putin namołwja Erdoğana
W stolicy Georgiskeje Tbilissiju su tež minjenu nóc přećiwo ...
Kónc knježerstwa w Francoskej?
Paris (dpa/SN). Zapósłancy francoskeje Narodneje zhromadźizny chcedźa dźensa wo wotumje njedowěry přećiwo knježerstwu wothłosować. Za to předležitej jim dwě próstwje. Zapodałoj běštej je lěhwo Lěwicy a prawicarsko-narodni wokoło Marine Le-Pen.
Wobkedźbowarjo wočakuja, zo opoziciji mjeńšinowemu knježerstwu dowěru sćazatej. Ministerski prezident Michel Barnier by w tym padźe nuzowany był wotstupić a statnemu prezidentej Emmanuelej Macronej swój wotstup zapodać. Knježerstwo Barniera je hakle tři měsacy w zastojnstwje. Politiske poměry w Francoskej su komplikowane, dokelž njeje žaneje jasneje wjetšiny w parlamenće.
Ukraina prosy wo dalšu pomoc
W Sakskej sej CDU a SPD přezjednej
Što tči za protestami?
Kak so wobrazy tola runaja: Protesty w Georgiskej přećiwo tamnišemu knježerstwu dopominaja mje na podawki w ukrainskej stolicy Kijewje. W nowembru 2013 bě so tehdyši prezident Wiktor Janukowič spjećował, tak mjenowane asociěrowanske zrěčenje z Europskej uniju podpisać. Na to wudyrichu protesty na torhošću Maidanje w Kijewje – spočatnje měrliwje, potom namócnje a skónčnje krawnje. Lěta 2022 je tam samo wójna wudyriła, kotraž hač do dźensnišeho traje.
Nadźijam so jara, zo wšitcy zamołwići z tutoho zahubneho procesa wuknu. Mjez Berlinom a georgiskej stolicu Tbilissijom leži 3 400 kilometrow. Trjeba Europska unija woprawdźe kraj pod Kawkazom w swojich rjadach? Snano pak tči tež wo wjele wjace za tutymi protestami. Z Ukrainy wšak wěmy, zo chowaja so za tajkimi podawkami tež stajnje strategiske a geopolitiske zajimy. Tute měrja so w prěnim rjedźe na zemske pokłady a wosebje – přećiwo Ruskej. Marko Wjeńka
Socialne medije maja móc demokratiju zničić
Budyšin (CS/SN). Hłowne hesło žurnalista sćelaka ZDF Klausa Prömpersa we wobłuku Budyskich narěčow bě: „Zniča socialne medije demokratiju?“. Něhdźe sto zajimcow bě minjeny pjatk do Budyskeje Tachantskeje cyrkwje přichwatało, nadźijejo so wotmołwy na tute prašenje. Hnydom na spočatku pak rěčnik praji: „Ja so boju, zo haj.“
Socialne medije maja woprawdźe wjele mocy. Wone wotewru durje za desinformaciju, spionažu a sabotažu. Z tym móžeš demokratiju skóncować, bě sej Prömpers wěsty. Socialne medije su ekstremnym populistam móc skićili. „Bjez twittera njeby so Trump z prezidentom stał“, wo tym je Prömpers přeswědčeny.
To a tamne (04.12.24)
Z taksijom ze Schleswigsko-Holsteinskeje poda so muž na kupu Rujany a nochcyše dołhu jězbu na kóncu wodźerjej zapłaćić. Njedaloko rujanskich krydowych skałow je 45lětny šoferej awta wujasnił, zo nima pjenjezy abo kartku. Šofer zazwoni policiju, zličbowanku we wobjimje 850 eurow pak jemu přiwšěm nichtó njezapłaći. Pozdźišo so policija muža znowa dohlada, jako chcyše so na samsne wašnje zaso na dompuć podać. Šofer taksija pak so spjećowaše.
Wohnjowy alarm we wobchodźe w bayerskim Landshuće je roznošowar paketow zawinił. Wón alarmowy knefl z klinkačkom zaměni. Zo bě alarmowa připrawa w škleńčanym kašćiku schowana, 45lětneho wočiwidnje njemyleše. Wohnjowa wobora je z wjacorymi awtami přijěła a wobchod ewakuowała. Hač dyrbi muž zasadźenje płaćić, hišće jasne njeje. Jeho njeleposć pak je njezapomnita.
AfD za nowu dorostowu trupu
Berlin (dpa/SN). Nawodnistwo AfD chce so wot swojeje młodźinskeje organizacije JA (Młoda alternatiwa) dźělić a nowu dorostowu organizaciju załožić. Zwjazkowe předsydstwo strony je so za to wuprajiło, wustawki AfD wotpowědnje změnić, powěsćernja dpa rozprawja. AfD chcyła nowu organizaciju po přikładźe socialdemokratow natwarić. Młoda alternatiwa je jako prawicarsko-ekstremistiska zastopnjowana a nima so po woli nawodnistwa AfD. Tole chcedźa nětko změnić.
Snadny rozrost SPD a Zelenych
Berlin (dpa/SN). SPD a Zeleni su w nahladnosći mjez wolerjemi snadnje přidobyli. W nowym woprašowanju instituta Forsa w nadawku nowiny Bild dóstanu Zeleni 13 procentow, dwaj wjace hač tydźenja. SPD polěpši so wo jedyn na nětko 16 procentow. FDP wostanje njezměnjena pola 4,5 procentow. CDU/CSU přisadźitej jedyn procent a dóstanjetej 31,5 procentow. AfD ma dale 18,5 procentow, Zwjazk Sahry Wagenknecht 7,5.
Trump hrozy Hamas
