Belem (dpa/SN). Bamž Leo XIV. kritizuje falowacu politisku wolu někotrych krajow w boju přećiwo klimowej krizy. „Štož zapraja, je politiska wola někotrych“, rjekny wón w swojim poselstwje k zahajenju rozsudneho tydźenja swětoweje klimoweje konferency w Brazilskej. Runočasnje chwaleše bamž wuslědki, kiž buchu na zakładźe Pariskeho klimoweho zrěčenja docpěte, kotrež su runje před dźesać lětami wobzamknyli. Zrěčenje njeje zaprajiło, „ale reakcija na to“. Leo XIV. wobžarowaše, zo su so USA z Pariskeho zrěčenja wróćo sćahnyli. Zdobom skedźbni wón na sćěhi změny klimy. „Boža stwórba žałosći ze zapławjenjemi, suchotu, wichorami a surowej horcotu. Kóždy třeći čłowjek je klimoweje změny dla wohroženy.“

Waršawa (dpa/SN). W Pólskej su njeznaći kolije strategisce wažneje železniskeje čary rozbuchnyli. Pólske knježerstwo rěči wo sabotažnym njeskutku. Zamołwići z toho wuchadźeja, zo měrješe so nadpad na ćah. „Bohudźak njeje k tragediji dóšło, naležnosć je pak jara chutna“, rjekny ministerski prezident Donald Tusk. Wón přilubi, njeskutk přeslědźić a skućićelow zajeć. Wotpowědne slědy a dopokazy su pječa namakali. W tym zwisku přepytuja tež wobškodźenja elektriskich grotow nad kolijemi na druhim městnje.

Pólska je wuski zwjazkar Ukrainy a zaruča transport brónjow přez swój kraj.

New York/Gaza (dpa/SN). Wěstotna rada UNO je rezoluciju nastupajo měrowy plan prezidenta USA Donalda Trumpa za Gazaske pasmo schwaliła. Cyłkownje 13 čłonskich statow hłosowaše w New Yorku za namjet USA. Ruska a China so hłosa wzdaštej. Naposledk běchu so tež wulke industrijne kraje skupiny G7 za spěšne zwoprawdźenje měroweho plana z pomocu mandata UNO wuprajili.

Plan předwidźi wotbrónjenje islamistiskeje Hamas a zasadźenje mjezynarodneje měroweje jednotki UNO za stabilizowanje měra kaž tež přechodne palestinske knježerstwo.

Palestinske awtonomne zarjadnistwo w kraju zapadnje Jordana žada sej hnydomne přesadźenje rezolucije. Tak staja so wone přećiwo w Gazaskim pasmje knježacej Hamas.

Ta měrowy plan prezidenta Trumpa wotpokazuje. „Rezolucija njewobkedźbuje politiske a humanitarne žadanja a prawa našeho palestinskeho ludu“, Hamas internetnje piše. Mjezynarodne jednotki bychu jeničce „wotročk Israela“ byli.

Młodźi zapósłancy CDU/CSU spjećuja so rentowemu naćiskej knježerstwa

Berlin (dpa/SN). Zwjazkowy kancler Friedrich Merz (CDU) je spekulacije wo móžnym zwrěšćenju koalicije CDU/CSU a SPD zwady wo renće dla wotpokazał. Na wjeršku zastupjerjow hospodarstwa nowiny Süddeutsche Zeitung wotmołwi předsyda CDU na prašenje, hač koaliciski zwjazk z SPD za lěto hišće eksistuje: „Haj, wězo!“ Mysličku mjeńšinoweho knježerstwa komentowaše wón ze słowami: „Z mojeho wida je wuzamknjene, tajke něšto činić.“

Do toho běchu medije rozprawjeli, zo CDU/CSU scenarij mjeńšinoweho knježerstwa hižo teoretisce zwučuje. Pozadk je zwada wo planowanym pakćiku rentow zwjazkoweho knježerstwa. 18 zapósłancow młodeje skupiny frakcije unije hrozy, zo zakonjej njepřihłosuja, jeli jón njezměnja. Z tym je parlamentariska wjetšina koalicije wohrožena. Merz, kotryž je rentowemu planej hižo přihłosował, změny runje tak wotpokazuje kaž koaliciski partner SPD.