Nowe žiwjenjew manufakturje
Drježdźany (dpa/SN). W škleńčanej manufakturje Volkswagen (VW) w sakskej krajnej stolicy ma inowaciski campus nastać. Najwjetši awtotwarc Němskeje, swobodny stat Sakska a Drježdźanska Techniska uniwersita (TU) su za to strategiske partnerstwo wutworili, Volkswagen zdźěla.
Planowany je inowaciski centrum za centralne wobłuki technologije, mjez druhim za kumštnu inteligencu, robotiku, mikroelektroniku a design chipow. Techniska uniwersita chce w přichodźe połojcu wšeje płoniny w Drježdźanskej tworni wužiwać. Za to inwestujetej VW a TU zhromadnje přichodne lěta wjace hač 50 milionow eurow. „Rozsud, po wjace hač 20 lětach produkciju awtow w škleńčanej manufakturje skónčić, njebě lochki“, rjekny wotrjadnik VW Thomas Schäfer. „Hladajo na hospodarske wuslědki pak bě to nuznje trěbne.“ Ćim wažnišo je, namakać do přichoda sahacy koncept.
Srjedź decembra w škleńčanej manufakturje serijowu produkciju elektriskeho awta ID.3. skónča. 230 sobudźěłaćerjow swoje dźěło najprjedy raz wobchowa. Jim chcedźa wotpowědne alternatiwne dźěło poskićić.
Přepytuja namóc
To a tamne (08.12.25)
Hoberska žołma je na kupje Teneriffa třoch turistow moriła a dalšich třoch zraniła. Za dalšej wosobu hišće pytaja. Ludźo běchu w přirodnym płuwanskim basenku na zapadźe španiskeje dowoloweje kupy, jako jich žołma do morja storhny. Po dotalnych informacijach pomocneje słužby běchu mjez woporami turisća z Italskeje a Słowakskeje. Hakle před měsacom mějachu tam podobne njezbožo.
Moderator Thomas Gottschalk je so na swój publikum wobroćił, po tym zo je so schorjenja na raka dla z telewizy wróćo sćahnył. Přichodne měsacy chce so wón dospołnje swojemu wustrowjenju wěnować. „Wěm, zo tole rozumiće a zo maće to za prawje.“ Dale piše 75lětny internetnje: „Njezawěram durje dospołnje. Spušćam so na to, zo wostanjeće mi swěrni kaž minjene 40 lět. Planuju kaž mój přećel terminator: Nawróću so!!!“
VVO a ZVONso zjednoćitej
Coswig/Drježdźany (SN). Zwjazkowa zhromadźizna wobchadneho zwjazka Hornje Łobjo (VVO) je wčera w Coswigu planowane zjednoćenje z wobchadnym zwjazkom Hornja Łužica-Delnja Šleska (ZVON) schwaliła. ZVON běše fuziji hižo lětsa w juniju přihłosował. Spočatk januara 2026 wutworitej wobchadnej zwjazkaj nowy zaměrowy wobchadny zwjazk Wuchodna Sakska (ZVVO). Přihłosowanje krajneje direkcije Sakskeje je hišće trěbne.
Nowy zwjazk ma wokrjesy Budyšin, Zhorjelc, Mišno a Sakska Šwica/Wuchodne Rudne horiny kaž tež krajnu stolicu Drježdźany a město Zhorjelc zastarać. Na jeho prěnjej zwjazkowej zhromadźiznje, kotraž ma so w januaru wotměć, chcedźa zamołwići wo nowym centralnym tarifje rozsudźić. Zaměr je jednotny tiket, z kotrymž móža sobujěducy w přichodźe po wšej wuchodnej Sakskej jězdźić. Najprjedy pak tuchwilne tarify VVO a ZVON dale płaća. Wob lěto matej wobchadnej zwjazkaj dohromady 225 milionow sobujěducych. „Wšitkim tutym budźe wutworjenje noweho zwjazka z wužitkom“, wuzběhny sakska ministerka za infrastrukturu Regina Kraushaar (CDU).
„KI-Ära“ słowo lěta
Wiesbaden (dpa/SN). Wuraz „KI-Ära“ je słowo lěta 2025. Tole je Towaršnosć za němsku rěč dźensa we Wiesbadenje rozsudźiła. Kaž jury zdźěli, symbolizuje přiběracy wliw kumštneje inteligency (KI) „epochalne wuwiće, přirunujo z industrijnej rewoluciju“. Na druhe městno wuzwolichu fachowcy wuraz „deal“, jedne z najlubšich słowow prezidenta USA Donalda Trumpa. Zapřijeće „wurjadne zamóženje“ zwjazkoweho knježerstwa wobsadźi 4. městno.
Wo renće wothłosowali
Berlin (dpa/SN). Zwjazkowy sejm je dźensa wo rentowym pakeće knježerstwoweje koalicije CDU/CSU a SPD rozsudźił. Hač do kónca njebě jasne, hač so zwjazkowe knježerstwo ze swojim naćiskom přesadźi. Wjacori młodźi zapósłancy z rjadow CDU a CSU so spjećowachu, dokelž zakoń po jich měnjenju zajimy přichodnych generacijow njewobkedźbuje. Wuslědk wothłosowanja hač do kónca redakciskeho časa njepředležeše.
Dalši drogowy čołm zničili
Z tradicionalnej ceremoniju su w grjekskej stolicy Athenje wčera ...
Z koaliciju njespokojom
Bojkotuja ESC Israela dla
Genf (dpa/SN). Po měsacy trajacej zwadźe je nětko rozsudźene, zo smě so Israel klětu na hudźbnym wubědźowanju Eurovision Song Contest 2026 we Wienje wobdźělić, Europska rozhłosowa unija (EBU) zdźěli.
Po rozsudźe su wjacore wobdźělene sćelaki ze Španiskeje, Irskeje a Nižozemskeje připowědźili, zo zarjadowanje bojkotuja. Španiski sćelak RTVE je sobu najwjetši pjenjezydawar zarjadowanja. Rozhłosownicy wumjetuja Israelej złóstnistwa přećiwo palestinskej ciwilnej ludnosći w Gazaskim pasmje. Zastupnicy EBU a awstriskeho ORF su podarmo spytali, bojkotej zadźěwać. Woni argumentowachu, zo jedna so wo ryzy hudźbne a nic politiske zarjadowanje.
Změnili su tež prawidła wothłosowanja na dobro jury, zo njemóhli sej wuměłcy, kaž israelska spěwarka Yuval Raphael lětsa w Baselu, ekstremnje wjele hłosow z publikuma organizować.
Putin chce dalše dźěle Ukrainy
Moskwa/New-Delhi (dpa/SN). Mjeztym zo USA a Ukraina dale wo zasadnych dypkach měroweho plana za Ukrainu wuradźuja, je ruski prezident Wladimir Putin z tym hrozył, dalše kónčiny na juhu Ukrainy wojersce zdobyć. Donbass padnje runje tak kaž regiony na juhu kraja „na kóždy pad do rukow Ruskeje“, rjekny Putin telewizijnemu sćelakej India Today na započatku swojeho dwaj dnjej trajaceho wopyta w Indiskej. Putin bě wčera wječor do New Delhija dolećał.
W rozmołwje z indiskimi nowinarjemi wupraji so Putin tež k rozmołwam z wurjadnym pósłancom USA Steve Witkoffom. Putin chwaleše prezidenta Donalda Trumpa: „Njeje lochko, zo so konfliktnej stronje dojednatej.“
Steinmeier wopory wójny počesćił
Coventry (dpa/SN). Zwjazkowy prezident Frank-Walter Steinmeier je dźensa w jendźelskim měsće Coventry wopory němskich bombowych nalětow za čas Druheje swětoweje wójny wopominał. Němske bombowcy běchu njedaloko Birminghama ležace industrijne město wjackróć bombardowali. Při tym sta ludźi morichu a wulke dźěle města zničichu.
Zhromadnje z Edwardom, wójwodu Kenta, je Steinmeier we wobłuku swojeho statneho wopyta w ruinje tehdy zničeneje katedrale města wěnc połožił. Edward, kuzenk zemrěteje kralowny Elizabeth, wobdźěli so wospjet na wopominanskich zarjadowanjach we wobłuku wujednanja mjez Wulkej Britaniskej a Němskej. Ze swojimi 90 lětami je wón mjeztym najstarši čłon kralowskeje swójby. Lěta 2015 běchu jemu za jeho angažement Drježdźanske měrowe myto spožčili. Dobry poměr mjez krajomaj je Steinmeier wčera w Londonskim parlamenće jako „wulki dar“ wosebje wuzběhnył.
