Hanau (dpa/SN). Z cyłkownje 151 576 hodownymi darami nakładowany je „konwoj hodownych pakćikow“ minjenu sobotu swoju mjeztym 25. jězbu do wuchodneje Europy nastupił. Wot lěta 2001 su dźěći a swójby Němskeje wjace hač dwaj milionaj pakćikow darili, kotrež ­dobrowólni pomocnicy do wotležanych kónčin wuchodnych krajow dowjezu a tam dźěćom přepodadźa.

Lětsa jědu čestnohamtscy do Bołharskeje, Moldawiskeje, Rumunskeje a prěni króć do Albaniskeje. Ukraina wostanje najebać njewěstosć wójny dla dale kruty wobstatk pomocneje akcije. Tam přewozmu lokalni partnerojo transport a rozdźělenje darjenych paketow. W potrjechenych krajach domoródni pomocnicy dary přijimaja, dokelž so w kónčinje ­najlěpje wuznawaja a zdobom wědźa, štó je pomocy najpotrěbniši. Dźakowano wjelelětnemu zhromadnemu dźěłu je ­zaručene, zo pomocne posyłki dźěći w šulach, gmejnach a socialnych zarjadnišćach direktnje docpěja.

Wopity šup zbudźa w USA zadźiwanje a tójšto posměwka. Zwěrjo bě so do wobchoda alkoholiskich napojow w staće Virginia na wuchodźe kraja zadobyło a regale přeslědźiło. Při tym so bleša palenca rozbi. Rozlaty palenc je šupej prawdźepodobnje słodźał. Přistajena namaka wopojene zwěrjo na brjuše ležace na nuzniku wobchoda. Sobudźěłaćerjo organizacije za škit zwěrjatow dowjezechu jeho do zwěrjatownje a pozdźišo do lěsa.

Paducha z bydlenja wućěriła je žona we wjaceswójbnym domje w sewjerorynsko-westfalskim Neussu. Žona bě so wokoło 18 hodź. lehnyła, jako spodźiwne zwuki w bydlenju zasłyša. Na to widźeše paducha přez wobłoženje balkona lězć. 57lětna so do njeho da a jeho storkaše, na čož so muž přez balkon zaso zminy. Policija prosy, zo ju ludźo w tajkim strašnym padźe zawołaja a na nju dočakaja.

Kamjenc (SN/mb). Nowy měšćanosta města Kamjenc, Michael Preuß, bu wčera wječor w měšćanskej radźe spřisahany. Wón přisahu złoži, zo chce swoje winowatosće wotpowědujo zakonjam a wustawje spjelnić a na dobro města skutkować. Wón je na sydom lět woleny a naslěduje Rolanda Dantza, kotryž je tute zastojnstwo 21 lět wukonjał, doniž so kónc nowembra na wuměnk njepoda. K prěnim wulkim wužadanjam noweho šefa měšćanskeho zarjadnistwa słušeja mjez druhim inwesticije do pěstowarnjow a Lessingowa kupjel.

44lětny Preuß je jako wukubłany blidar po ciwilnej słužbje abituru nachwatał a architekturu a planowanje městow studował. Wot 2021 skutkowaše rodźeny Kamjenčan a woženjeny nan třoch dźěći w swojim ródnym měsće jako decernent za twarstwo a wuwiće města. Póndźelu na swojim prěnim dźěłowym dnju je nowy měšćanosta symbolisce štom sadźił – ćis w Hennersdorfje, Kamjencej přisłušacej wjesce. W interviewje z „Radijom Łužica“ wón přeradźi, zo je jemu Dantz njedźelu wosrjedź nocy w radnicy kluče přepodał.

Burg (dpa/SN). Dotal njeznaći skućićeljo su wjetše mnóstwo municije zwjazkoweje wobory z ciwilneho nakładneho awta pokradnyli. Po informacijach medijow jedna so wo něhdźe 10 000 wótrych patronow kalibra 9 milimetrow a 9 900 patronow njestrašneje manewroweje municije. Šofer ciwilneje spedicije, kiž municiju transportowaše, bě swoje jězdźidło wječor na parkowanišću w Burgu pola Magdeburga wotstajił. Jako wón přichodny dźeń do kaserny dojědźe, zo by municiju wotedał, padustwo zwěsćichu.

Wotchilerjo unije namołwjeni

Berlin (dpa/SN). Po wčerawšim probowym wothłosowanju wo rentowym pakeće z wjele napřećiwnymi hłosami běchu wšitcy wotchilerjo frakcije CDU/CSU namołwjeni, so dźensa pola nawodnistwa frakcije přizjewić. Tak maja hišće 48 hodźin chwile, zapósłancow přeswědčić, zo zakonjej tola přihłosuja. Wosebje młodźi zapósłancy kritizuja, zo je rentowy paket na njedobro młodeje generacije.

Wočakuja wobćežne jednanja