USA twarja přistaw do Gazy

pjatk, 08. měrca 2024 spisane wot:
Washington (dpa/SN). Prezident USA je dramatiske humanitarne połoženje w Gazaskim pasmje zasudźił a ludźom dalšu pomoc přilubił. Zdobom Biden israelske knježerstwo namołwja, ciwilistow lěpje škitać. W swojej tradicionalnej narěči k połoženju naroda Biden wčera připowědźi, zo chcyli USA zhromadnje z mjezynarodnymi partnerami prowizoriski přistaw na pobrjoze Gazaskeho pasma natwarić. Po tutym puću chcył wón nuzu ćerpjacu ciwilnu ludnosć přez morjo zastarać. Twar přistawa traje někotre tydźenje. Wojakow USA za zwoprawdźenje předewzaća pječa njetrjebaja.

Berlin (dpa/SN). Wjetšina wobydlerjow Němskeje podpěruje zwjazkoweho kanclera Olafa Scholza (SPD), kiž je přećiwo tomu, Ukrainje němske rakety typa Taurus přewostajić. Po najnowšim woprašowanju slědźenskeho instituta YouGov w nadawku powěsćernje dpa wita jenož 28 procentow dodawanje raketow zwjazkoweje wobory, kotrež móža 500 kilometrow daloko lećeć, zo móhła so Ukraina dale ruskemu nadpadej wobarać. 58 procentow je přećiwo tomu. Wjace hač połojca z nich (31 procentow) podpěru Ukrainy z němskimi brónjemi samo zasadnje wotpokazuje. 14 procentow ludźi nima žane měnjenje. Prašeli běchu so 2 169 wólbokmanych ludźi w Němskej.

Ze swojim „ně“ trjechi Scholz čućiwu žiłku wobydlerjow. Wotpokazowace nastanje napřećo Taurus je minjene ty­dźenje samo hišće přiběrało. Spočatk februara bě so 31 procentow za dodawanje Taurus wuprajiło, jenož 49 procentow bě přećiwo tomu było.

To a tamne (08.03.24)

pjatk, 08. měrca 2024 spisane wot:

Drježdźany su stolica denera – to je ­wuslědk přepytowanja dodawanskeho serwisa „Lieferando“. W sakskej stolicy maja 16,84 předawanišćow na 100 000 wobydlerjow, štož je drje tróšku mjenje hač w Berlinje (17,72). Kwalita je pak ­po pohódnoćenju ludźi po cyłej Němskej najlěpša a přerězna płaćizna 4,96 eurow moderatna (w Berlinje 5,41 euro). W Hamburgu dener nimale najmjenje słodźi a je přerěznje najdróši: 6,03 eurow.

Wysokošulsku kóčku Pebbles su na Uniwersity of Exter we wuchodnym jendźelskim Colchesteru počesćili. Bronzowa postawa „Campus Cat“ steji wotnětka wo­srjedź uniwersity. Kóčka Pebbles je 16 lět stara. Před 14 lětami bě so wona prěni króć na campus zabłudźiła. Byrnjež ju wobsedźerjej wróćili, je wona wšědnje zaso přišła a je tam mjeztym doma.

EU nowe sydlišća zasadźuje

štwórtk, 07. měrca 2024 spisane wot:

Brüssel (dpa/SN). Europska unija je najnowši rozsud Israela nastupajo twar nowych židowskich sydlišćow w Kraju zapadnje Jordana wuraznje zasudźiła. Tole wuchadźa ze zdźělenki EU w Brüsselu. ­Israelski planowanski wuběrk bě twar 3 426 bydlenjow poručił. EU sej wot Israela žada, rozsud zaso cofnyć, dokelž nowe sydlišća měrowe rozrisanje mjez Israelom a Palestinjanami haća. Israel bě twar jako reakciju na nadpad Hamas na Israel 7. oktobra 2023 wobzamknył.

Manewer NATO zahajeny

Alta (dpa/SN). Zwjazkowa wobora zwučuje zhromadnje z wojakami dalšich krajow NATO wot dźensnišeho z wulkim manewrom na sewjeru Europy wotwobaranje nadpada na teritoriju zakitowanskeho zwjazka. Na manewru „Nordic ­Response 2024“ wobdźěla so 1 500 wojakow zwjazkoweje wobory, zamołwići w měsće Alta na sewjeru Norwegskeje zdźěleja. Cyłkownje wobdźěli so 20 000 wojakow ze 13 krajow NATO.

Namórnicy na łódźi morjeni

Tysac eurow započatkarjam

štwórtk, 07. měrca 2024 spisane wot:
Berlin (dpa/SN). Studenća-nowačcy z chudšich swójbow dóstanu wot nazymy tysac eurow wot stata, zo móhli sej laptop a wučbnicy kupić a přećah do studijneho města financować. Tak mjenowana studijna startna pomoc je dźěl reformy zakonja Bafög, kotruž je zwjazkowe knježerstwo wčera nastorčiło. „Studij njesmě wotwisny być wot móšnje staršeju“, ­rjekny zwjazkowa ministerka za kubłanje Bettina Stark-Watzinger (FDP) w Berlinje. Wo zakonju chcedźa nětko w zwjazkowym sejmje wuradźować. Změny su tuž hišće móžne. Próstwy wo studijnu startnu pomoc su k zymskemu semestrej móžne. Bafög sam nochcedźa zwyšić, ministerstwo zdźěla. Dźěłarnistwa, socialne zwjazki a zastupnistwa studowacych tole kritizuja, pokazujo na přiběrace kóšty wšědneho žiwjenja.

Před jězbami nuznje warnuja

štwórtk, 07. měrca 2024 spisane wot:
Berlinje (dpa/SN). Wonkowne ministerstwo w Berlinje je swoje pokiwy nastupajo Rusku přiwótřiło a nětko „nuznje“ před jězbami do Ruskeje warnuje. Tole je hladajo na „dale a špatniše połoženje a přiběrace swojowólne zajeća“ trěbne, ministerstwo zdźěla. „W zwisku z njedowolenymi zarjadowanjemi a demonstracijemi su wěstotne mocy minjeny čas masiwnje a zdźěla namócnje přećiwo wobdźělnikam postupowali.“ Dotal bě ministerstwo jenož powšitkownje wotradźiło, do Ruskeje jěć. Słowo „nuznje“ su wčera wudospołnili. Ruska je sta ludźi zahajała, kotřiž běchu zemrěteho Alekseja Nawalnyja wopominali.

Južna Afrika skorži Israela dla

štwórtk, 07. měrca 2024 spisane wot:

Den Haag/Pretoria (dpa/SN). Južna Afrika namołwja Mjezynarodne sudnistwo z nuznej próstwu, Israelej kazać, humanitarnu pomoc do Gazaskeho pasma pušćić, w kotrymž přeco hišće wojuja. Južna Afrika wopodstatni swoju próstwu z „daloko rozšěrjenej hłodowej nuzu“ w dospołnje zawrjenym pobrjóžnym pasmje, sudnistwo w Den Haagu zdźěla. W decembru bě Južna Afrika Israel před mjezynarodnym sudnistwom wobskoržiła, wumjetujo Tel Avivej morjenje ludu.

Hladajo na přiběracu kritiku tež z druhich krajow katastrofalneho zastaranja w Gazaskim pasmje dla knježerstwo w Jerusalemje twjerdźi, zo tuchwilu wjace pomocnych srědkow Gazaske pasmo docpěwa hač do wudyrjenja wójny. Pječa dojědźe wšědnje sto nakładnych awtow do palestinskeje kónčiny, Israel twjerdźi.

Najebać to je połoženje ludźi we wuskim pobrjóžnym pasmje zadwělowane. Po informacijach UNO hrozy hłodowa katastrofa. W pasmje žiwori wjace hač dwaj milionaj ludźi. Minjeny tydźeń su tam 15 zahłódnjenych dźěći zličili.

Rjana gesta, wjace nic

štwórtk, 07. měrca 2024 spisane wot:

Skónčnje – reforma BAföG-zakonja! Tysac eurow za studentow-započatkarjow. To je wjele, abo? Nó haj, tak prawje nic. Wobhladamy-li sej situaciju na bydlenskich wikach, kaž tež płaćizny zežiwidłow, potom pytnjemy, zo wone stupaja. Tysac ­eurow, to je rjana gesta, wjace nic. Pjenjezy mjenujcy dołhodobnje ničo na financielnej situaciji studentkow a studentow njezměnja. Za to měli so sadźby wupłaćenja powyšić. W najlěpšim padźe dóstawa studowacy dźensa 934 eurow na měsac. To zda so dosahace być, ale jenož najmjeńši dźěl wšitkich zapisanych studentow tutu wysoku sumu woprawdźe dó­stanje. Němski stat mjenujcy wjaza wupłaćenje BAföGa na mnohe wuměnjenja. Žadanje za BAföGom, kiž so po zasłužbje staršich nima, ale po woprawdźitych ­žiwjenskich wuměnjenjach studowacych, je dźeń a aktualniše. To jedne je mjenujcy jasne: Žadyn dorosćeny čłowjek nochce wot staršeju wotwisny być!

Maximilian Gruber

Mjenje listow – wjace paketow

štwórtk, 07. měrca 2024 spisane wot:

Bonn (dpa/SN). Němski póst je loni wo wjele mjenje listow wozył hač do toho. Mnóstwo listowych posyłkow je lěta 2023 wo 5,6 procentow na 12,6 miliardow listow woteběrało, póstowy koncern DHL wčera w Bonnje zdźěli. 2022 bě minus jenož 0,3 procenty wučinił. Lěta do toho běchu stajnje stratu dweju abo třoch procentow registrowali. Hłowna přičina je přiběraca digitalizacija: Ludźo wužiwaja mejlki abo chatuja za komunikaciju – a njepisaja hižo listy.

Naprašowanje za paketami přiwšěm dale přiběra, wosebje, dokelž wulki dźěl ludźi prawidłownje pola internetnych wikowarjow kupuje. Mnóstwo paketow je loni wo 3,8 procentow na něhdźe 1,7 miliardow přiběrało. Logistiske přede­wzaće DHL z hłownym sydłom w Bonnje je z wotstawkom najwjetši posrědkowar listow a paketow po wšej Němskej.

Při dowožowanju listow dyrbi so koncern na prawidła dźeržeć, kotrež pochadźeja z 90ych lět. Tak dyrbi 80 procentow wotpósłanych listow přichodny dźěłowy dźeń pola adresata być. Tole chcedźa z nowym zakonjom změnić, štož by ćišć na koncern a tak kóšty znižiło.

To a tamne (07.03.24)

štwórtk, 07. měrca 2024 spisane wot:

Wjace hač tysac přizjewjenjow dóšło je na małej sewjernomórskej kupje Wangerooge za městno dohladowarja tamnišeje swětłownje. Po wobšěrnym rozprawnistwje w medijach wo swobodnym městnje dochadźeja tam požadanja ze wšeje Němskeje a samo z europskeho wukraja. 39 metrow wysoka historiska swětłownja je dawno wusłužiła. Dźensa wužiwaja ju jako wuhladnu wěžu. Nowy přistajeny předawa jenož hišće zastupne lisćiki a suweněry a stara so wo porjadk.

Mobilny błyskač zaparkował je muž w badensko-württembergskim Rottweilu ze swojim bydlenskim mobilom – a to cyle legalnje. Błyskač steješe na parkowanišću při wjele wužiwanej hłownej dróze. Městno pódla nastroja pak bě hišće swobodne, štož muž ze swojim mobilom wuži. W interneće žněje wón za to wjele chwalby a připóznaća.

Serbska debata

nowostki LND