Kamjenc (SN/JaW). Sakska statna ministerska za wědomosć a wuměłstwo dr. Eva-Maria Stange (SPD) je sobotu w Kamjenskej radnicy spisowaćela Marcela Beyera, awtorce Anju Kampmann a Bettinu Wilpert z lětušim Lessingowym mytom Sakskeje a spěchowanskimaj mytomaj k Lessingowemu mytu počesćiła.
Kaž ministerka wuwjedźe, je hakle minjenu wutoru kabinet dotaciju hłowneho myta na 20 000 eurow a spěchowanskeju mytow na stajnje 7 500 eurow zwyšił. „Njeje to jenož dobra powěsć za dźensa a přichodnje wuznamjenjenych, ale tež kompliment mytu samomu“, dr. Stange wuzběhny.
Budyšin (CRM/SN). Nutrna naležnosć z Barta pochadźacej a nětko w Berlinje bydlacej a skutkowacej koncertnej pianistce Heidemari Wiesnerec je, spěchować a šěrić hudźbu Serbow. W 1990tych lětach załoži wuměłča w Italskej koncertny rjad „Wosebity koncert na spočatku lěta.“ Tón njeje na přiwabliwosći zhubił.
Lětsa steji rjad, kotryž předstaja wuměłča w Berlinje, Wojerecach, Lubinje, Lipsku kaž tež w Budyšinje, pod hesłom „Slědy“. Znowa přeprosy sej Wiesnerec ze spěchowanjom Załožby za serbski lud dalšich interpretow, kotřiž so tak ze serbskej hudźbnej kulturu zeznajomjeja. To zwyša tež atraktiwnosć zarjadowanjow, přetož tak je lěto wob lěto wćipnosć na hinaši program z nowymi wosobami, a to z mišterkami a mištrami swojeho předmjeta, zaručena.
Zo budźe wčerawše zarjadowanje w Chróšćanskej putniskej hospodźe derje wopytane, bě wočakować. Telko ludźi pak drje tam hosćićelka Monika Gerdesowa hišće witała njebě.
Chrósćicy (SN/MWj). Wo swojich nazhonjenjach z ćěkancami je bywši Chróšćanski wosadny farar a dźensniši Kamjeničanski propst Clemens Hrjehor wčera w Chróšćanskej putniskej hospodźe porěčał. Wjace hač 60 zajimcow chcyše duchowneho wo aktualnej temje rěčeć słyšeć. Tak njebě jeno zarjadowanska rumnosć połnje wobsadźena, ale wopytowarjo pjelnjachu tež pódlanskej stwě a chódbu.
Jim Clemens Hrjehor wo tym powědaše, kak bě k tomu dóšło, zo je wón nalěto 1993 muslimsku swójbu, kotraž před wójnu w Bosniskej ćěkaše, na Radworskej farje přiwzał a jej tam nachwilne doma dał. Mjez druhim připosłucharjo zhonichu, z kotrymi problemami bě to zwjazane, kotrež pak so na kóncu wšitke zmištrować hodźachu, kaž na přikład pohrjeb wowki woneje swójby na Radworskim kěrchowje, jako dyrbjachu muslimske tradicije z křesćanskimi wašnjemi někak pod jedyn kłobuk přinjesć.
Miłoćicy (aha/SN). Před dźesać lětami załožene towarstwo Kamjenjak ze swojimi 15 aktiwnymi a dźesać čestnohamtskimi čłonami móžeše składnostnje Mjezynarodneho dnja wuměłstwa kónc tydźenja při rjanym zymskim wjedrje tež zajimcow ze zdalenišich kónčin witać.
Budyšin (CS/SN). Swjatočnosće składnostnje 30. róčnicy měrniweje rewolucije su so wčera w Budyšinje z wustajeńcu w Ludowej bance zahajili. Ekspoziciju su Drježdźanske towarstwo za stawizny sakskeho pósta a filatelije, Numismatiske towarstwo Budyšin a tudyše towarstwo filatelistow zhromadnje wuhotowali. Hač do 19. februara budu dalše přednoški, wěnowace so dźělenju Němskeje, měnowej reformje 1948, pućej k měrniwej rewoluciji a k znowazjednoćenju kaž tež prašenju, dalokož su so sony naroda woprawdźe zwoprawdźili.
Zo słuša Nukničanski jolka-swjedźeń mjeztym ke kruće do serbskeho kulturneho žiwjenja zakótwjenym zarjadowanjam, bě minjenu sobotu znowa na wulkej ličbje wopytowarjow pytnyć. W Brězanec bróžni běchu městna znajmjeńša hižo hodźinu do zazběha programa „Klumpańca na hrodźišću“ wšitke wobsadźene. W přitwarjenym stanje so z ludźimi runje tak mjerwješe. Wjesny klub Nuknica, kotryž jolku hłownje wuhotuje, bě tuž z toho wida jara spokojom.
Berlin/Wojerecy (SN/bn). Prěnjej „Wosebitej koncertaj k nowemu lětu“ stej sobotu a zawčerawšim, njedźelu, dobry wothłós připosłucharjow w Berlinje resp. na Wojerowskim hrodźe žnjałoj. Tradicionalny rjad, wospjet z podpěru Załožby za serbski lud, Wojerowskeho wuměłstwoweho towarstwa, Budyskeho krajnoradneho zarjada a Serbskeho ludoweho ansambla wuhotowany wot pianistki Heidemarje Wiesnerec, steji lětsa pod hesłom „Slědy“ a wěnuje so wosebje komponistce Clarje Schumann składnostnje jeje 200. narodnin a loni zemrětemu wjelelětnemu spěchowaćelej rjadu Detlefej Kobjeli. W tym zwisku nasta pjeć nowych twórbow Jana Cyža, Sebastiana Elikowskeho-Winklera, Johannesa Kretschmera, Ulricha Pogody a Hincy Roja, kotrež we wobłuku koncertow prapremjernje zaklinča. Nimo toho jewja so w programje kruchi mjez druhim Jura Mětška, Ludwiga van Beethovena a samozrozumliwje Kobjele a Schumann.