„Klinkotata lipka“ při kaminje
Lajkojo howrjacy přiklesk za zabawnu lochku komediju žnjeli
Chrósćicy (SN/bn). Serbska lajska dźiwadłowa skupina Chrósćicy je sobotu swoju nowu, mjeztym 25. inscenaciju „Čeplski recept“ prěni raz a přewšo wuspěšnje předstajiła. Předsyda cyłka Tobias Bulank witaše hosći na kopatej połnej Krawčikec žurli a dźakowaše so wosebje režiserej Tomašej Cyžej (NSLDź) kaž tež Jandytarjej Hajnkej-Försterej, kiž bě hru Heinza-Jürgena Köhlera z němčiny přełožił.
Wukubłarka kubłarjow z dejmantnym jubilejom
Wučerka, organizatorka, recensentka, na dobro serbskeho ludu skutkowaca wosobina zjawneho žiwjenja – retomas to pomjenowanjow, kotrež Leńku Thomasowu mjenje abo bóle dokładnje wopisuja. Wčera swjećeše wona 60ćiny.
Tuchwilu skutkuje jubilarka na Budyskim powołanskošulskim centrumje za hospodarstwo a techniku přirjadowanej Serbskej fachowej šuli za socialnu pedagogiku. Tam wukubłuje mjez druhim kubłarki a kubłarjow a stara so tak sobu wo pedagogiski dorost za serbske pěstowarnje a horty kaž tež młodźinskich socialnych dźěłaćerjow mjez druhim za Rěčny centrum WITAJ.
Wo knihach a kniharni (08.02.19)
Historiske fotografije w Serbskej kulturnej informaciji
Budyšin (SN/bn). „Serbske žiwjenje na kraju“ rěka pućowaca wustajeńca historiskich fotografijow, kotruž je rodźeny Choćebužan a sobudźěłaćer Ludoweho nakładnistwa Domowina Heiko Lobert ze swójskeje zběrki zestajał. Wotnětka je hač do kónca měrca w Budyskej Serbskej kulturnej informaciji přistupna.
Dohromady 28 zdźěla sylnje powjetšene reprodukcije pokazaja přewažnje wjesne žiwjenje, swjedźenje a nałožki zapadnje Choćebuza. Najstarši wobraz bě wokoło lěta 1910 nastał, najmłódši něhdźe 1980. Wjetšina fotografijow pak wotbłyšćuje 1920te a 1930te lěta, při čimž njehodźa so wšitke eksponaty jasnje datěrować. Portretowane wosoby – žony nimale stajnje w serbskej narodnej drasće – su wobydlerjo mjez druhim Putgóle, Kokrjowa a Cazowa kaž tež hižo wjace njeeksistowaceje wsy Tšawnicy. W tym zwisku najskerje najbóle jimacy je motiw, pokazowacy muža, kiž husy pase a w pozadku brunicowy bager.
Witriny chowaja tójšto originalnych fotow. Wosebje napadny je prawdźepodobnje w Francoskej nastaty wobraz młodeju Serbowkow z młodźatkom lawa.
W Brüsselu so předstajili
Dotal wjace hač tysac stipendijow
Mättigowa załožba wupisa lětsa znowa stipendij za wědomostny dorost. Nimo toho chce kónc lěta restawraciju Mättigoweho epitafa w tachantskej cyrkwi zakónčić.
Budyšin (SN/bn). „Dohromady dźesać stipendiatow smy po nowozałoženju našeje institucije w lěće 2007 pjenježnje podpěrali. Tak pokročujemy z tradiciju spěchować wědomostny dorost, slědźacy wo stawiznach Hornjeje Łužicy. Cyłkownje su wot lěta 1649 wjace hač tysac studentow přiražku dóstali, někotrežkuli nade wšo zajimawe dźěło hewak najskerje wušło njeby“, zjima předsyda Mättigoweje załožby dr. Uwe Koch wčera na nowinarskej konferency w Budyskim wosadnym domje swj. Pětra. Wosebje wuzběhny wón „młodu serbsku inteligencu, kotrejž je załožba něhdy přistup na gymnazij a studij zmóžniła“. Přikład bě jemu mjez druhim załožer uniwersitneje biblioteki w Jenje Christian Gottlieb Buder, rodźeny w Ketlicach a serbskeho pochada. „Z dźensnišim stipendijom wolóžamy kandidatam na přikład publikaciju wědomostnych knihow“, Uwe Koch naspomniwši dr. Lubinu Malinkowu a dr. Friedricha Pollacka doda.
Trójce maksimalnje móžne dypki we Wojerecach
Hudźbna rada Němskeje wuhotuje kóždolětnje wubědźowanje „Młodźina hudźi“. Kónc tydźenja zarjadowaše zhromadnje z tudyšimi hudźbnymi šulemi wurisanje za region Sakska-Łužica.
Wojerecy (SN/bn). Na lětušim wubědźowanju „Młodźina hudźi“ w regionje Sakska-Łužica we Wojerecach je so kónc tydźenja 158 dorostowych wuměłcow wobdźěliło. Trójce hódnoćeše jury wukony z maksimalnje móžnymi 25 dypkami. W starobnej skupinje dźewjeć- a dźesaćlětnych zdobyštaj sej Emil Weißig z Huski a Budyšanka Luisa Näther prěnje městno w kategoriji gitarowe duwo. Annika Jannasch z Wopakeje wobsadźi tule poziciju mjez 17- a 18lětnymi we wobłuku husle solo.
