Prěnja baletna premjera Serbskeho ludoweho ansambla tuteje hrajneje doby „W stwičce“ sobotu wječor njebě jenož wuslědk njedobrowólneje jewišćoweje přestawki w času prěnjeho lockdowna lěta koronapandemije dla, ale zdobom pokazka na wot dźensa za wšitke jewišća płaćiwy druhi.

Kolaža modernych, zdźěla wot rejwarjow SLA samych choreografowanych baletnych kruchow na serbske kompozicije kaž tež na jakne ludowe pěsnje w předstajenju „W stwičce“ je so poradźiła. Bě pytnyć, zo ansambl z wěstej sensibelnosću wupruwuje, kak daloko móže hić. Spočatk bě hišće cyle tak, kaž sej to wot tež na hajenje (nic jenož) hudźbnych serbskich tradicijow specializowaneje institucije předstajiš: štyri holcy w narodnej drasće zawjedu na swjatočne wašnje do programa. Na to wotměnjatej so moderna a tradicija, swobodna a ze zašłosće nam posrědkowana forma. Runje w tutej kombinaciji pak so zdobom prašeš, hač njebychu sej tute krasne, po wobsahu tola poprawom přeco hišće aktualne ludowe lubosćinske spěwy nowu načasnu a snano tež bóle eksperimentelnu formu rejwanja kaž tež drastoweho wuhotowanja zasłužili. Bych sej to přała. Respekt móžeš našim prjedownikam tež z aktualizowanjom pokazać, tuž: Zwažće so! Cordula Ratajczakowa

27. oktobra před 150 lětami je francoska Rynska armeja w twjerdźiznje Metz před wójskom němskich statow kapitulowała. Rynsku armeju bě maršal François-Achille Bazaine rozkazował. Franzojo kapitulowachu pobrachowacych žiwidłow dla. 80 000 wojakow, mjez nimi třo maršalojo, a 1 360 kanonow padny do rukow němskeho wójska.

Swoju psychoanalytisku studiju wo arche­typje słowjanskosće we Łužicy „Swjate su mi twoje hona“ je wjelelětny čłon Towarstwa přećelow Smolerjec kniharnje dr. Křesćan Kessner wčera w Smolerjec kniharni předstajił.