Wochozy (AP/SN). Park błudźenkow we Wochozach bě cil lětušeho zeńdźenja dźěłoweho kruha Łužiske muzeje a muzealne zarjadnišća sekcije ludowěda/muzejownistwo Maćicy Serbskeje.
Nowa wustajeńca we wopytowarskim centrumje wo serbskich stawiznach Wochožanskeje kónčiny njebě jenička přičina póndźelneho zetkanja. Muzejownicy běchu tež wćipni na nowy projekt towarstwa Serbski kulturny turizm. Wone wuwiwa mjenujcy kartu „Ducy po serbskej Łužicy“, z kotrejž chce „tež za serbske muzeje, rjemjesło a tradicije wabić“, Ines Kunzendorf rozłoži a připowědźi, zo ma karta hišće lětsa wuńć. Přitomni skedźbnichu na wažnosć runohódneho nałožowanja serbšćiny – tež hladajo na słowjanskich susodow, kiž so přiběrajcy za łužisku jězorinu zajimuja –, a zdobom na šansy, kiž z ideje zhromadneho wabjenja wurostuja.
Drježdźany (mla/SN). 17. króć swjećachu w sakskej stolicy a přisłušnych měšćanskich dźělach minjeny pjatk Dołhu nóc wědomosćow. Wjace hač 650 zarjadowanjow na 17 wědomostnych stacijach je sej tež tójšto Serbow z města a zajimcow z Hornjeje Łužicy wobhladało. Wšako chcychu so wo aktualnych slědźenskich wuslědkach, projektach a kubłanskich poskitkach popularnych wědomosćow Drježdźanskeje Science Community wobhonić.
Wšelake fakulty Techniskeje uniwersity Drježdźany předstajichu na přikład najnowše inowatiwne twarske maćizny, alternatiwne móžnosće zmilinjenja a chemijowu fabriku přichoda. Wosebje dźěćom so při najwšelakorišich pospytach w laborje woči błyšćachu a jich starši so njemało dźiwachu, kak móža sej ze sadu a zeleniny sami bateriju twarić. Fachowcy Fraunhoferskeho instituta rozłožichu eksperiment, zo móžeš tež z wopłóčkow milinu wudobywać.
Wojerecy (SN/bn). We wobłuku zhromadneho kabinetneho posedźenja Sakskeje a Braniborskeje stej so wobě knježerstwje dźens tydźenja we Wojerecach za to wuprajiłoj, kónc měrca prěni raz wuhotowany Łužiski festiwal (Serbske Nowiny rozprawjachu) jako mjezy a sparty přesahowacy wjeršk etablěrować. Festiwal hodźał so zhromadnje z akterami regiona, kotřiž měli zdobom jeho nošerjo być, dale wuwiwać, rěka w minjeny pjatk wozjewjenej nowinskej zdźělence braniborskeho ministerstwa za wědomosć, slědźenje a kulturu (MWFK) a sakskeho statneho ministerstwa za wědomosć a wuměłstwo (SMWK).
Korzym (CS/SN/bn). Budyšin, Koporcy, Lubij, Nowe Jěžercy (Neugersdorf), Nowosólc-Hródk (Neusalza-Spremberg) a Korzym běchu stacije lětušeje čary wuměłstwoweho busa KunstBus.
Hižo šesty raz zwjazachu busy městnosće Hornjeje Łužicy, hdźež móžachu wopytowarjo minjeny kónc tydźenja hudźbu, dźiwadło a tworjace wuměłstwo na zdźěla njewšědnych městnach dožiwić. Tak koncertowaštaj na přikład spěwarka Jasmin Hoppe z Rostocka a Drježdźanski pianist Sebastian Paul na Koporskim hrodźe. Mjez druhim přednjeseštaj wonaj ariju z twórby Wolfganga Amadeusa Mozarta „Mitridate re di Ponto“ a wujimk z operety Freda Raymonda „Módra maska“. Nimo toho poskićeše etablissement wobsedźacy Sebastian Flämig wodźenja po bywšim ryćerskim kuble kaž tež po hrodowym parku. Při busowym zastanišću w Koporcach witaše resp. rozžohnowaše smyčkowy kwartet Lubijskeje hudźbneje šule při- a wotjěducych hosći.
Budyšin (SN/bn). Přihotowanym sydłam w druhej najwjetšej rumnosći za wosebite wustajeńcy Budyskeho Serbskeho muzeja dyrbjachu sobudźěłaćerjo njewočakowaneho nawala zajimcow dla přidatne stólcy přistajić, prjedy hač Lipšćanske duwo Mlokawka swój połhodźinski koncert zahaji. Dohromady přednjeseštaj spěwarka Walburga Wałdźic a gitarist Max Löb sydom mjez jazzom a šansonom chabłacych spěwow, skomponowanych na teksty Róže Domašcyneje a Kita Lorenca. „Wšitke tute twórby namakaće tež na naju nowej CDji ‚Poezija lubosće‘, kotruž smój tu dźensa takrjec njeoficialnje předstajiłoj“, Wałdźic po wustupje wabješe.
Budyšin (SN/bn). „Znaki pominaki kopolaki“ rěka nowa, w Ludowym nakładnistwje Domowina wušła kniha, w kotrejž awtorki Róža Domašcyna, Měrka Mětowa a Měrana Cušcyna we formje episkeje basnje literarisce po Łužicy pućuja. Njewšědna wosebitosć publikacije je, zo wopřijima tekst dohromady 39 štučkow ze stajnje 13 wjeršemi. A kóžda štučka na předchadźacu z pjera jednotliweje spisowaćelki nawjazuje.
14. junija 1944 poradźi so ameriskim wojakam w Normandiji wot štyrjoch němskich diwizijow horco zakitowanu frontowu liniju před Saint-Sauveurom-le-Vicomte přełamać a město dwaj dnjej po tym wuswobodźić. Zdobom docpěchu Američenjo zaso přibrjóh Atlantika a postupowachu na wjetše přistawne město Cherbourg, kotrež potom 23. junija zdobychu. Tak zahaji so ofensiwa aliěrowaneho wójska do wot Němcow wobsadźeneje Francoskeje.
Po přizemjenju wosom diwizijow a tankow antihitlerskich zwjazkarjow 6. junija 1944 w Normandiji wutworichu ameriscy a jendźelscy wojacy tam tři sylne zepěranišća. Wone sahachu wot Atlantika dźesać kilometrow do francoskeho kraja. 6. junija 1944 – na tak mjenowanym D-dayju – dósta so něhdźe 150 000 ameriskich, jendźelskich a kanadiskich wojakow do Normandije a k zaliwej rěki Seine, hdźež su skónčnje dołho wočakowanu zapadnu frontu w Europje wutworili. Něhdźe 7 000 łódźow a 1 100 lětadłow zwjazkarjow transportowaše a škitaše jich před jenož 50 němskimi honjakami.