Delegacija wědomostnikow Budyskeho Serbskeho instituta nawróći so w nocy na njedźelu z Lwowa. Tam běchu so na mjezynarodnym sorabistiskim seminarje filologiskeje fakulty tamnišeje uniwersity wobdźělili.

Budyšin/Lwow (JK/SN). Lětuši, mjeztym 15. seminar, na kotrymž wobdźělichu so nimo łužiskich sorabistow tež ukrainscy wědomostnicy z Lwowa a Kijewa kaž tež připóznaći sorabisća z Pólskeje a Běłoruskeje, zaběraše so z aktualnymi ćežemi sorabistiki kaž tež z perspektiwu a wuwićom sorabistiskeho slědźenja. W swojich přednoškach wěnowachu so wědomostnicy nimo rěčespytnych přepytowanjow na kulturnym a literarnym polu tež načasnym narokam digitalizacije a načasnym metodam slědźenja.

Čitanske wječorki wopytać, kaž te we wobłuku čitanskje turneje Ludoweho nakładnistwa Domowiny, a cyle jednorje raz słuchać na to, što su druzy na papjeru přinjesli, so woprawdźe wudani. Tam zhoniš tójšto hišće njewědźaneho. Tak sej wčera w delnich Sulšecach, jako předstajichu tam Serbsku protyku, znowa wuwědomich, kelko serbskosće tam je, a zo po mojim měnjenju přiběra. Wulki podźěl na tym ma bjezdwěla towarstwo Bratrowstwo, kotrež je našu maćeršćinu w Kulowskim regionje stajnje pěstowało a hordosć na nju šěriło. Zajimawe tež bě zhonić, što wšitko w tamnišej pěstowarni na nohi stajeja a kak zwjazane wšitko ze serbskosću, wotpowědnymi nałožkami a přirodu je. To pak je jenož móžno, dokelž starši za tym steja a hordosć na swój lud a jich wjes wuprudźeja. Runja Pětrej Šołće namołwjam tuž Sulšečanow, ale tež wšitkich druhich: Wobchowajće sej hordosć na swoju wjes. A přidam: a tež na serbskosć. Janek Wowčer

Załožba za serbski lud zwěsća tuchwilu potrjebu za projektnymi managerami. Z toho je wotwisne, kelko městnow měli­ zarjadować.

Budyšin/Choćebuz (SN/JaW). Załožba za serbski lud ma wot julija nowych sobudźěłaćerjow w Choćebuzu a w Budyšinje. To wobkrući Serbskim Nowinam załožbowy direktor Jan Budar. 

Budyšin (CRM/SN). Lětuši třidźělny rjad „musica nova sorabica“ bu sobotu wječor w Serbskim muzeju w Budyšinje zahajeny. Wothłós bě njewočakowano dobry. Z někak 50 připosłucharjemi na prěnim koncerće so wopodstatni, zo je prawje, zo Załožba za serbski lud projekt z našočasnej hudźbu wospjet spěchuje.

Njeje wšak samozrozumliwe, zo so nowa hudźba z tajkim respektom a zajimom přiwozmje kaž minjenu sobotu. Walburga Wałdźic z Lipska (spěw), Gerold Gnausch z Berlina (basowa klarineta a altowy saksofon), Predrag Tomić z Lörracha (akordeon) a Clemens Christian Pötzsch z Lipska (piano a elektronika) zamóchu publikum putać, a to nic jenož ze štyrjomi prapremjerami, z kotrymiž po­da so hinaši wid na w 19. lětstotku wudate serbske ludowe spěwy, ale tohorunja z interpretaciju na wysokim niwowje. A wězo skutkowaše live-wustup jazzoweje spěwarki Walburgi Wałdźic za mnohich kaž magnet.