Wot 19. do 22. awgusta 1948 wotmě so w Delnim Wujězdźe Zjězd dźěłowych ­brigadow Serbskeje młodźiny (SM). Prěni dźeń bě studentska schadźowanka, na třećim dnju bilancowachu brigady swoje skutkowanje. Wjeršk zlěta bě njedźelu, 22. awgusta. Něhdźe 10 000 ludźi do wsy přichwata. Na čole swjedźenskeho ćaha kročeše brigada „Alojs Andricki“, kotraž bě w Juhosłowjanskej dźěłała. 220 młodych Serbow předstaji masowu rejwansku scenu, z kotrejž běchu na Wšo­sokołskim zlěće w Praze wustupili. Delni Wujězd dožiwi tež prěnju mjezynarodnu kopańcu w Serbach: Radworska Slawija přewiny mustwo pólskeho konsulata w Złym Komorowje z 2:1. Na Zjězdźe brigadow chcychu zdobom samostatnu organizaciju z mjenom Serbska ludowa młodźina (SLM) załožić. Dźěłowy wuběrk ­bě šěsćstronski naćisk wustawkow z kan­didatnej lisćinu do Drježdźan krajnemu wjednistwu SED pósłał. Wottam, wosebje pak ze sowjetskeje strony załoženje SLM wotpokazachu. Wotpowědny přikaz bě maršal Sokolowski z Berli­na-Karlshorsta majorej Kownerej do Budyšina pósłał.

Mikławš Krawc

XVI. mjezynarodny kongres slawistow w Běłohrodźe skići wobdźělnikam wobšěrne rozestajenje ze wšěmi aspekta­mi tohole wědomostneho pola. Tež Łužiscy Serbja su wobdźěleni.

Běłohród (SN/bn). Na lětušim XVI. mjezynarodnym kongresu slawistow w serbiskej stolicy Běłohrodźe, kotryž su wčera swjatočnje zahajili, je tež delegacija Serbskeho instituta z hosćom. Dr. Jana Šołćina, čłonka Komisije za słowjanske spisowne rěče w Mjezynarodnym komiteju slawistow (MKS), změje přednošk wo serbskej rěčnej politice a problemach implementacije teoretiskich koncepcijow. Dr. Anja Pohončowa wobdźěli so jako­ čłonka Komisije za slawistisku rěčespytnu bibliografiju w MKS z referatom wo zawjazanju Serbskeje bibliografije do dru­hich digitalnych informaciskich systemow. A priwatny docent dr. Thomas Menzel porěči wo kompleksnosći flektiwiskich strukturow w hornjo- a delnjoserbšćinje. Wšitke tři přednoški budu serbskorěčne.

We wobłuku prěnjeho festiwala zwjazka šesćiměstow „Přińć a woteńć“ stej minjenu sobotu Carolina Eyckec na tereminje ­a Susanne­ Stock na akordeonje w Hrodźišćanskim hrodźe koncertowałoj. Z „Jězbu po dobach serbskeje hudźby“ wobkuzłaštej wonej něhdźe połsta připosłucharjow z njewšědnymi interpretacijemi twórbow mjez druhim Bjarnata Krawca, Korle ­Awgusta Kocora a Jana Cyža, kotrehož kruch „ergän zungen“ je tu prěni raz jako akordeonowe solo zaklinčał. Foto: Feliks Haza

Ćisk (JT/SN). Sčasom přińć zawěsća dobre městno, myslachu sej mnozy, kotřiž přichwatachu minjenu sobotu na Ćišćanski statok. Tamniša dźiwadłowa skupina pokaza „Das Schwiegermonster“. W kruchu dźe wo wšědne temy kaž domjace hladanje a ćělne zbrašenje, štož zdatej so skerje chutnej naležnosći być. Ale awtorka Viola Schößler stwori napjatu kriminalnu komediju ze žortom a dramatiku, štož su Ćišćanscy lajscy hrajerjo pod režiju Katje Tillich wuběrnje přesadźili.

Róli na chorobny stoł sputaneje přichodneje maćerje Paule a jeje přichodneho syna Kurta běštej z Anett Zahrodnikowej a Tobiasom Herrmannom optimalnje wobsadźenej. Paula, kotraž něšto dnjow pola přichodneho syna Kurta by­dli, čušli w jeho póšće a wotpokazuje potencielnych kupcow, tak zo hrozy plan Kurta, so jako financny makler pospytać, zwrěšćić. Spěšnje je Kurtej jasne: „Ta dyrbi preč.“ Zhromadnje z přećelom Siggijom, předstajenym wot Tiny Schubert, wumyslitaj sej plan, kak móhło so ně­kajke nje­zbožo stać.