Z wudaća: srjeda, 16 awgusta 2017

ST Haselbachtal – SJ Chrósćicy II 3:0 (0:0)

Zestawa SJC: Matješk – Kral (82. Wićaz), Kunze, Wowčer, Budar (71. Pjetaš), Liznar,­ Šmit, Klimant, Zahrodnik, Dórnik, Lešawa (76. Mohaupt)

13. awgust 2017 budźe w chronice Chróšćanskeje SJ podšmórnjeny, dokelž hraješe jeje koparska rezerwa prěni raz we wokrjesnej lize.­ W Rychbachu widźachu premjernu hru serbskeho cyłka wokoło kapitana Tomaša Klimanta tež wjacori fanojo z Chrósćic. Trenar Matijas Dórnik bě swoje mustwo derje nastajił.

Chróšćenjo běchu wot prěnjeje sekundy sem koncentrowani a při bulu dosć agresiwni. Pascal Budar měješe při wólnym kopje, jako sadźi jón do žerdźe, trochu njezboža, a Dominik Šmit třěli kulowatu kožu nimo wrotow. Najwjetšu šansu drje měješe Stefan­ Liznar, wón pak njedósta dosć ćišća do třělwy. Móžnosće hosćićela Chróšćanski škit derje wotwobara, tak zo dźěše z 0:0 do přestawki.

Domy ewakuowali

Baršć. Něhdźe 2 000 wobydlerjow Baršća dyrbješe dźensa rano swoje domy wopušćić, dokelž chcychu fachowcy sto kilogramow ćežku bombu z Druheje swětoweje wójny znješkódnić. Bombu běchu minjeny tydźeń při twarskich dźěłach na priwatnej ležownosći namakali. Spočatnje njebě jasne, hač móža bombu znješkódnić abo hač dyrbja ju rozbuchnyć.

Kontrolny projekt předstajeny

Zhorjelc. Sakski nutřkowny minister Markus Ulbig (CDU) je so dźensa w Zhorjelcu wo projekće widejoweje kontrole w starym měsće wobhonił. Pozadk naprawy Zhorjelskeje policajskeje direkcije su přiběrace padustwa w němsko-pólskim namjeznym měsće, kaž nutřkowne ministerstwo zdźěla. Předewšěm stare město je ćežišćo kriminality.

Čaru železnicy přepołožić

Stróža (SN/BŠe). Łuka w Hornjej Łužicy móhła so z přirodnym dźiwom Němskeje 2017 stać. Wo to prócuje so tuchwilu biosferowy rezerwat Hornjołužiska hola a haty ze sydłom w Stróži, wobdźělacy so na wubědźowanju Heinza Sielmannoweje załožby. Z woprawdźitym pokładom – najwjetšej łuku Němskeje z dźiwimi gladiolemi při Dubjanskim lěsu – su so zamołwići rezerwata wo myto požadali. A kaž aktualny staw hłosow w interneće přeradźa, bě rozsud prawy. „Wot spočatka wubědźowanja w juniju ležimy na prěnim městnje. Hač do 10. septembra móža ludźo hišće na wotpowědnej internetnej stronje wothłosować“, wjeseli so sobudźěłaćerka zjawnostneho wotrjada biosferoweho rezerwata Mareen Kühn. Dźensa rano měješe łužiska łuka 16 procentow hłosow, ale tamni požadarjo chětro nachwatuja. Hnydom tři łuki na zapadźe Němskeje su minjene 24 hodźin wjele přihłosowanja žnjeli a su wšitke z ně­hdźe jědnaće procentami łuce gladiolow na pjatach.

Wjesołe dźěćace hłosy su słyšeć. To móže jenož lóštna zabawa być. „Ta traje hišće hač do 2. septembra, potom budźe lětušich dźesać tydźenjow jěchanskich próz­dnin nimo“, powěda Karin Mietke z Parcowskeho dwora w Bjezdowach.

Wosrjedź łužiskeje jězoriny, hnydom w susodstwje Parcowskeho jězora, wupřestrěwa so nahladny areal z twarjenjemi a pastwišćemi. Jěchanski dwór nasta 1998. Wosebity poskitk su tam jěchanske prózdniny. „Smy lěta 2003 z dwanaće dźěćimi započeli. Zaměstnjenje bě spočatnje tróšku dyrdomdejske“, angažowana žona rozprawja, „zajim je spochi přiběrał, tak mějachmy poněčim tež kwa­litu kwartěrow polěpšić.“ Wot lěta 2014 su wobdźělnicy w dwěmaj nowymaj prózdninskimaj domomaj pod třěchu wotewrjeneje bróžnje zaměstnjeni.

Serbski ludowy ansambl přihotuje za nowu­ hrajnu dobu mnohe wjerški. Změja 16 premjerow, mjez kotrymiž su tři prapremjery a znowa nastudowane abo wobdźěłane produkcije.

Budyšin (SN/MiR). 180 předstajenjow steji hižo nětko na planje Serbskeho ludoweho ansambla w hrajnej dobje 2017/2018. „Zwonka łužiskeho regiona budźe 27, mjez druhim w Bayerskej a Badensko-Württembergskej a samo w Šwicarskej“, rjekny jednaćelka SLA Diana Wagnerec wčera na nowinarskej konferency w Röhrscheidtowej bašće. Zašłe lěta bě SLA přewažnje w regionje prezentny. Minjenu sezonu mějachu 120 předstajenjow, 17 z nich zwonka Łužicy. „Mjeztym pak dale a wjac partnerow, z kotrymiž smy mnohe lěta w zwisku, so zaso přizjewja z próstwu, jim předstajenja poskićić“, rozłoži Diana Wagnerowa, „tuž budźemy zaso časćišo po puću.“

Šef sakskeje statneje kenclije, statny minister Fritz Jaeckel (CDU), přebywaše dźensa dopoł­dnja we Wojerowskej kónčinje. Po terminje na wobydlerskim dwórnišću Wojerec­ wopyta wón krajnu šulu za wohnjowe wobory a katastrofowy škit w Nar­ću. Fachowy wučer a eksperta za atomarne, biologiske a chemiske strachi Dietmar Frommelt (nalěwo) je hosćej wozydło za dekontaminaciju wosobow rozkładł. Třeća­ stacija Fritza Jaeckela bě Krabatowy młyn w Čornym Chołmcu. Foto: Gernot Menzel

Drježdźany (SN). Přepryskanje serbskich mjenow na wjesnych taflach w Rakecach a reakcija policije na to (SN rozprawjachu) běštej zapósłancej krajneho sejma Hajkej Kozelej (Lěwica) z přičinu, so z małym naprašowanjom na sakskeho ministra nutřkowneho Markusa Ulbiga (CDU) wobroćić. Mjez druhim chcyše wědźeć, „kak přez wustawu zaručenu škitnu winowatosć swobodneho stata napřećo přisłušnikam serbskeho ludu hladajo na chłostanske přepytowanje zwoprawdźeja“.

We wotmołwje skedźbni Markus Ulbig na wot 1. januara płaćiwu registraciju politisce motiwowaneje kriminality z etniskej komponentu. Krajny kriminalny zarjad je to sakskim policistam w kubłanjach sposrědkował. Nastupajo citowane prašenje pokaza minister na zhromadne specifiske organizaciske jednotki policije, kriminalneho zarjada a OAZ. „Tak je koncentrowane, na skućićelow orientowane a pospěšene přesćěhanje wšitkich politisce motiwowanych njeskutkow, inkluziwnje tajkich přećiwo přisłušnikam serbskeho ludu zawěsćene.“

Wiesbaden (dpa/K/SN). W Němskej nasta loni 808 000 přidatnych dźěłowych městnow. Ličba dźěławych w tak mjenowanym normalnym dźěłowym poměrje – bjezčasowje terminowanych, socialnje zawěsćenych a tydźensce dlěje hač 20 hodźin dźěłacych – je na 25,6 milionow rozrostła. Zdobom postupi ličba ludźi t. mj. atypiskej dźěławosću wo 121 000 na 7,7 milionow. Su to požčeni dźěławi, časowje wobmjezowani abo dźěłopřijimarjo z mjenje hač 20 hodźinami dźěła.

Žane kolektiwne chłostanja

Frankfurt n. M. (dpa/SN). Němski koparski zwjazk (DFB) nochce hižo žane tak mjenowane kolektiwne chłostanja wu­kazać. Tak chce so w zwadźe wo přibě­race namócnosće fanow w stadionach při­wisnikam kopańcy přiwobroćić. „Najprjedy raz“ chce so zawrjenja blokow, dźělneho wuzamknjenja abo hrow w prózdnych stadionach wzdać, zdźěli prezident DFB Reinhard Grindel. Wón wopodstatni swój namjet z tym, zo su wot kolektiwnych chłostanjow tež ći po­trjecheni, kotřiž nimaja z namócnosćemi w stadionach a zwonka nich ničo činić.

Kwota žonow snadnje wyša

Ze wšelakimi akcijemi a z lěsnym lěhwom protestuja přirodoškitarjo z Pólskeje a druhich­ krajow přećiwo hrožacemu zničenju poslednjeho pralěsa Europy njeda­loko wsy Białowieża na mjezy k Běłoruskej. Pólske knježerstwo da we wulkim dźělu jónkrótneho lěsa štomy pušćeć. Mašiny su mjeztym dźěłać započeli. Pralěs steji na lisćinje­ škitanych pasmow Europskeje unije. Foto: dpa/Maciej Łuczniewski

Berlin (dpa/K/SN). Statny sekretar za hospodarstwo Matthias Machnig je postupowanje zwjazkoweho knježerstwa w naležnosći Air Berlin zakitował a poroki irskeho­ tunjeho předewzaća Ryanair wotpokazał.­ Wudawanja Ryanair „su absurdne“. Irska towaršnosć tunich lětow ma insolwencu Berlin Aira za „kumštnje načinjenu“, zo móhła ju Lufthansa bjez problemow přewzać. Přemosćenski kredit zwjazkoweho knježerstwa za lětanske předewzaća w insolwency ma statny sekretar za dospołnje přisprawny. Dźesaćitysacy pasažěrow Air Berlina su we hłownym pućowanskim času po puću. Tych w krótkim času domoj stransportować, za to njeby žanych kapacitow było.